Siopa si Jesu-Kristo?

NONOTEN pa labat so agaylan panliket na kalangweran a Judio a si Andres sanen primero ton nadngel iray balikas nen Jesus a Nazareno! Inkuan na Biblia a binatik nen Andres so agi to tan kuanto: “Aromog mi [la so] so Mesias (a kabaliksan to, no ipatalos, Kristo).” (Juan 1:41) Diad saray lenguahe a Hebreo tan Griego, saray salitan kaslakan lan ipapatalos bilang “Mesias” tan “Kristo” so mankabaliksan na “Alanaan.” Si Jesus imay Alanaan, odino Pinili na Dios, salanti, say insipan a Lider. (Isaias 55:4) Lugan na Kasulatan iray propesiya nipaakar ed sikato, tan saray Judio ed saman et manatalaran ed sikato.​—Lucas 3:15.

Panon tayon naamtaan a talagan si Jesus imay Pinili na Dios? Bueno, imanoen no antoy agawa ed taon 29 K.P. sanen mantaon na 30 si Jesus. Sikatoy linma ed si Juan a Managbautismo pian pabautismoan dia ed Ilog Jordan. Inkuan na Biblia: “Si Jesus, sanen abinyagan la, tinmatdang a tampol a nanlapu ed danum; et nia, alukasan so saray tawen ed sikato, et anengneng to so espiritu na Dios ya onleleksab a singa sakey a malapati, tan oonla ed sikato. Tan nia, sakey a boses a nanlapu ed saray katawenan a kuan to, Saya so ana’ko ya inararok; napaliket ak a maong ed sikato.” (Mateo 3:16, 17) Kayarin nadngel nen Juan itan a panamaseguro, panduaruwaan to ni kasi a si Jesus imay Pinili na Dios? Diad impangikalbo nen Jehova a Dios ed masanton espiritu To ed si Jesus, sikatoy nilanaan to, odino tinuro to a magmaliw ya Ari ed onsabin Panarian To. Kanian, si Jesus so nagmaliw a Jesu-Kristo, odino Jesus ya Alanaan. Akin balet a tinawag ya Anak na Dios si Jesus? Iner so nanlapuan to?

Sikatoy Nanlapu ed “Inmuna”

Say bilay nen Jesus et nayarin apagen ed taloran peryodo. Say unona so ginmapo andukey nin panaon sakbay na inkianak to bilang too. Sikatoy “nanlapu nen inmuna, nanlapu ed ando lan ando,” so inkuan na Miqueas 5:2. Inkuan nen Jesus a mismo: “Siak nanlapu ak ed tagey,” salanti, diad tawen. (Juan 8:23) Sikatoy abayag lan walad tawen bilang sakey a makapanyarin espiritun persona.

Lapud amin a pinalsa et walaan na gapoan, wala sirin so panaon a manbukbukor so Dios. Balet, say Dios so ginmapon amalsa agla nabilang a taon so apalabas. Siopay unaan a pinalsa to? Ipapabidbir na sampot a libro na Biblia si Jesus bilang “say sengeg na pinalsa na Dios.” (Apocalipsis 3:14) Si Jesus so “panguloan ed amin a pinalsa,” lapud “dia ed sikato apalesa so amin a bengatla, dia ed katawenan tan ed tapew na dalin, saray bengatla a nanengneng tan bengabengatlan agnanengneng.” (Colosas 1:15, 16) On, si Jesus lambengat so direktan pinalsa na Dios a mismo. Kanian, sikatoy atawag a “bogbogtong ya Anak” na Dios. (Juan 3:16) Say panguloan ya Anak so atawag met a “Verbo” odino Salita. (Juan 1:14) Akin? Lapud antis na inkianak to bilang too, sikatoy nanlingkor ed tawen bilang pinagkasangiyan na Dios.

Say “Salita” so wala ed Dios a Jehova “dia [ed] gapo,” sanen “saray tawen tan say dalin” so apalsa. Sikato imay angibagaan na Dios na: “Manggawa itayo na too a kaulibay na inalageyan tayo.” (Juan 1:1; Genesis 1:1, 26) Say panguloan ya Anak so walad abay nen Ama ton si Jehova, ya aktibon mikikimey ed sikato. Diad Uliran 8:22-31, sikatoy deneskribe a mangibabagan: “Diad saman wala ak ed abay [na Manamalsa], singa uloen a komikimey; tan siak nensaman so inagew-agew a panggayagaan to, a malikeliket lawas ed arap to.”

Seguradon akabat a maong nen Jehova a Dios tan say bogbogtong ya Anak to so sakey  tan sakey legan iran mankikimey a saniba! Satan a maapit ya impiulop ed si Jehova diad abaybayag a panaon so angimpluensyan maong ed Anak na Dios. Sayan matulok ya Anak so nagmaliw a kaparpara na Ama to, si Jehova. Diad tua, diad Colosas 1:15 si Jesus so atawag a “talintaoy Dios ya agnanengneng.” Saya so rason no akin a say pikakabat nipaakar ed si Jesus et importante pian napenek so espiritual a pankaukolan tayo tan say natural a pilalek tayon nakabat so Dios. Sanen wadiad dalin si Jesus et ginawa to so amin a bengatlan eksakton iilaloan nen Jehova a gawaen to. Kanian, say pikabat ed si Jesus so mankabaliksan met na panamalaknab na pikakabat nipaakar ed si Jehova. (Juan 8:28; 14:8-10) Balet panon ya akakar si Jesus ed dalin?

Say Bilay To Bilang Too

Say komaduan peryodo na bilay nen Jesus et ginmapo sanen sikatoy imbaki na Dios diad dalin. Saya so ginawa nen Jehova diad mamilagron impangiyalis to ed bilay nen Jesus manlapud tawen dia ed panag-anakan na matoor a Judion birhen a si Maria. Anggapoy atawir nen Jesus ya ag-inkaperpekto lapud aliwan too so ama to. Say masanton espiritu, odino aktibon puersa nen Jehova, so linma ed si Maria, tan sikatoy ‘tinarongan’ na pakayari To, kanian sikatoy mamilagron nanlukon. (Lucas 1:34, 35) Say resulta et angiyanak si Maria na perpekton ugaw. Bilang tinagibin anak na karpenteron si Jose, sikatoy binmaleg ed simplin ayaman tan panguloan ed pigara nin anak ed pamilya.​—Isaias 7:14; Mateo 1:22, 23; Marcos 6:3.

Daiset labat so naamtaan nipaakar ed impanugaw nen Jesus, balet ta walay sakey ya inkagawan makatantanda. Sanen mantaon na 12 si Jesus, sikatoy impila na ateng to ed tinaon ya iyaakar da ed Jerusalem parad Paskua. Legan ton wadtan, sikatoy nambayag ed templo, “a manyodyorong ed pegley na saray doktores, ya ondedengel tan ontetepet ed sikara.” Sakey ni, “saray amin ya akadngel ed sikato nankelkelaw ira ed pakatalos to tan ed saray eba’to.” On, likud ed pakasarag na ugaw nin Jesus a mangitepet na pannonotan a maong tan maespiritual iran tepet, nayarian to met so mangiter na intelihentin ebat a nankelkelawan na arum. (Lucas 2:41-50) Legan na ibabaleg to ed syudad na Nazaret, sikatoy akaaral a mankarpentero, a maseguron imbangat na anagibin ama to a si Jose.​—Mateo 13:55.

Si Jesus so nanayam ed Nazaret anggad impan-30 años to. Insan sikatoy linma ed si Juan pian manpabautismo. Kayari na bautismo nen Jesus, ginapoan toy impasyan ministeryo to. Diad loob na talora tan kapalduan taon, binaroy toy interon binalegan ton dalin ya inyaabawag to so maong a balita na Panarian na Dios. Pinaneknekan to a sikatoy imbaki na Dios. Panon? Diad impanggawa to na saray milagro​—makapanyari iran kimey ya agnagawaan no diad pakayari labat na too.​—Mateo 4:17; Lucas 19:37, 38.

Si Jesus et matamoy met tan walaan na aralem a pililikna. Nagkalautlan napatnagan so inkatamoy to diad paraan na impanmoria tan impantrato to ed arum. Lapud si Jesus et mainomay ya asinggeran tan mapangasi, asagyat iray totoo ed sikato. Anggan saray ugugaw et komportable ed sikato. (Marcos 10:13-16) Marespeto so  impantrato nen Jesus ed saray bibii, anggaman nen panaon to et abebbebay pakanengneng na arum ed sikara. (Juan 4:9, 27) Tinulongan to iray mairap-bilay tan nalalames a ‘naromog so inawa nipaakar ed kamarerwa ra.’ (Mateo 11:28-30) Say paraan na panagbangat to et malinew, simpli, tan praktikal. Tan impatnag na saray imbabangat to so masimoon a pilalek ton ipakabat ed saray dumerengel to so tuan Dios a si Jehova.​—Juan 17:6-8.

Diad impangusar to ed masanton espiritu na Dios pian manggawa na milagro, mapangasin tinambal nen Jesus iray mansasakit tan maniirap. (Mateo 15:30, 31) Singa bilang, walay inmasingger ed sikaton akating tan inkuan to: “Katawan no labay mo, nayarian mo ak a gawaen a malinis.” Antoy ginawa nen Jesus? Inyunat toy lima to insan to diniwit so laki ya inkuan to: “Labay ko; nalinisan ka komon.” Tan inmabig so mansasakit a too!​—Mateo 8:2-4.

Imanoen met imay inkagawa sanen si Jesus so dinago na amayamay a too a nansiansia ira ed sikato ed loob na taloy agew ya anggapoy naakan da. Akasian to ira tan mamilagro ton pinakan so “apat a libo ran lalaki nilikud so saray bibii tan ugugaw.” (Mateo 15:32-38) Diad sananey nin inkagawa, pinakalma nen Jesus so bagyo ya ameligro ed saray kakaaro to. (Marcos 4:37-39) Pinaoli, odino pinabilay to, iramay inaatey la. * (Lucas 7:22; Juan 11:43, 44) Mabulbulos ni ingen ya inter nen Jesus so perpekton bilay to bilang too pian nawalaan iray aliwan perpekton katooan na ilalo ed arapen. Agaylan kabaleg a talaga so aro nen Jesus ed totoo!

Iner la so Kawalaan nen Jesus Natan?

Si Jesus so inatey ed sakey a panamairapan a kiew diad edad a 33 1/2. * Balet aliwan satan so sampot na bilay to. Say komatlon peryodo na bilay to so ginmapo kayari na manga taloy agew sanen pinaoli nen Jehova a Dios so Anak to bilang sakey ya espiritun pinalsa. Kayari na inkioli to, nampanengneng si Jesus ed nilasus a totoo a nambilay nen inmunan-siglo K.P. (1 Corinto 15:3-8) Kayari na satan sikatoy “inmirong ed nikawanan na Dios” tan nanalagar anggad pakaawat to ed maarin pakayari. (Hebreos 10:12, 13) Sanen asabi itan a panaon, si Jesus so ginmapon nanuley bilang Ari. Kanian panon so nepeg a pangipasen tayo ed si Jesus natan? Kasin isipen tayon sikatoy sakey a toon maniirap a papateyen? Odino kasin ipasen tayon sakey a nepeg a dayewen? Si Jesus natan et aliwan sakey a too nisay Dios a Makapanyarin-amin. Imbes et sikatoy sakey a makapanyarin espiritun pinalsa, sakey a manuuley ya Ari. Natan et maganggano to lan ipatnag so inkaari to ed sayan mundon napnoy problema.

Diad impangusar na masimbolikon lenguahe, indeskribe na Apocalipsis 19:11-16 si Jesu-Kristo bilang arin akakabayo ed amputi ya onsasabin mangukom tan mibakal diad inkatunong. Sikatoy walaan na ‘makdem a kampilan a panugat to ed saray nasyones.’ On, usaren nen Jesus so baleg a pakapanyari to pian deralen iray marelmeng. Komusta balet iramay manggugunaet a mangalig ed ehemplon impanengneng to sanen sikatoy wadiad dalin? (1 Pedro 2:21) Sikato tan say Ama to so mangiliktar ed sikara diad onsabin “bakal na baleg ya agew na Dios, a Makapanyarin-amin”​—a mabetbet a tatawagen ya Armagedon​—pian makapambilay ira na andi-anggaan ed dalin diad silong na mangatatawen a Panarian na Dios.​—Apocalipsis 7:9, 14; 16:14, 16; 21:3, 4.

Legan na uley ton walaan na kareenan, si Jesus so manggawa na amayamay a milagro parad amin a katooan! (Isaias 9:6, 7; 11:1-10) Tambalen to iray sakit tan panganggaen to lay patey. Usaren na Dios si Jesus pian paolien so binilyon, diad ontan et nawalaan iray pankanawnawan manbilay na andi-anggaan ed dalin. (Juan 5:28, 29) Agtayo ingen anggan naisip no panon kaabig so bilay diad uley na Panarian. Importante sirin a mantultuloy itayon mangalay pikakabat manlapud Biblia tan lalon nakabkabat si Jesu-Kristo.

[Saray paimano ed leksab]

 [Kahon ed pahina 7]

KASIN MAKAPANYARIN-AMIN A DIOS SI JESUS?

Dakel so relihyoson totoo a mangibabagan si Jesus et Dios. Ibabaga na arum a say Dios et Trinidad. Unong ed sayan bangat, “say Ama et Dios, say Anak et Dios, tan say Masanton Espiritu et Dios, ingen ta aliwan talora a Dios noagta sakey a Dios.” Ipipilit dan sayan talo et “parehon magnayon tan manpapara.” (The Catholic Encyclopedia) Kasin susto iratan a panmoria?

Si Jehova a Dios so Manamalsa. (Apocalipsis 4:11) Sikatoy andian na gapoan odino anggaan, tan sikatoy makapanyarin-amin. (Salmo 90:2) Diad biek a dapag, si Jesus so walaan na gapoan. (Colosas 1:15, 16) Oniay inkuan nen Jesus sanen tinukoy toy Dios bilang Ama to: “Say Ama babaleg nen say siak.” (Juan 14:28) Impaliwawa met nen Jesus a walaray bengatlan agto amta ni saray anghel, ya amta lambengat na Ama to.​—Marcos 13:32.

Niarum ni, oniay impikasi nen Jesus ed Ama to: “Aliwa a say linawak noag say linawam so nasumpal.” (Lucas 22:42) Siopa ni kasi imay pampipikasian nen Jesus noag samay sakey a superyor a Persona? Sakey ni, say Dios so amaoli ed si Jesus, aliwan si Jesus a mismo. (Gawa 2:32) Mapatpatnag sirin ya aliwan manpara so Ama tan say Anak sakbay na inyakar nen Jesus ed dalin odino sanlegan na impanbilay to ed dalin. Komusta balet kayari na inkioli nen Jesus ed tawen? Inkuan na 1 Corinto 11:3: “Say ulo nen Kristo say Dios.” Diad tua, say Anak so lawas a walad pakauley na Ama. (1 Corinto 15:28) Ipapanengneng sirin na Kasulatan a si Jesus et aliwan Dios a Makapanyarin-amin. Imbes et sikatoy Anak na Dios.

Samay tatawagen a komatlon persona ed Trinidad, salanti, say masanton espiritu, et aliwan persona. Oniay inkuan na salmista sanen sikatoy manpipikasi ed Dios: “Sika ibakim so espiritum, et napalsa ira.” (Salmo 104:30) Sayan espiritu et aliwan say Dios a mismo; sakey itan ya aktibon puersa ya ibabaki odino uusaren to pian nasumpal so antokaman a kaliktan to. Panamegley na satan, pinalsa na Dios so nanengneng a katawenan, say dalin, tan amin a mabilay a bengatla. (Genesis 1:2; Salmo 33:6) Inusar na Dios so masanton espiritu to pian puyanan iray lalaki a nansulat na Biblia. (2 Pedro 1:20, 21) Say Trinidad sirin et aliwan Makasulatan a bangat. * Inkuan na Biblia a “Si Jehova a Dios tayo, sikato so sakey a Jehova.”​—Deuteronomio 6:4.

[Paimano ed leksab]

[Litrato ed pahina 5]

Sanen abautismoan si Jesus, sikatoy nagmaliw a say Nilanaan na Dios

[Litrato ed pahina 7]

Intalaga nen Jesus so biskeg to ed kimey ya inter na Dios ed sikato

[Litrato ed pahina 7]

Si Jesus et sakey la natan a makapanyarin Ari