Tepetepet Manlapud Saray Managbasa

Kasin naapektoan so relasyon na sakey ed si Jehova diad panggalaw na maramsak odino bayolenti iran galaw ed kompyuter?

“Si Jehova suboken to so matunong; balet say bagel tan saman so labalabay to so karamsakan gulaen na kamarerwa to,” so insulat nen Arin David na kadaanan ya Israel. (Salmo 11:5) Say salitan “gula” diad orihinal a lenguahe so nayarin mankabaliksan na pagmaliw a “sakey a kabusol.” Kanian, siopaman a mangaaro ed karamsakan et pagmamaliwen toy inkasikato a kabusol na Dios. Say tepet a kaukolan tayo sirin a konsideraen et: Kasin nabayuboan so panangaro ed karamsakan diad panggalaw na ontan iran galaw ed kompyuter?

Saray bayolenti a galaw ed kompyuter so mangipapaseseg ed pangusar na saray armas. Saratan so mabetbet a kipapasalan na manggagalaw parad dunong ed pibabakal. Oniay inkuan na magasin a The Economist: “Say militar na Amerika so mandedependin maong ed saray galaw ed kompyuter bilang uusaren ed panagpasal. Arum ed saray galaw ya uusaren na militar et nasaliw ed saray lakoan.”

Tua, agmet napapasakitan na saramay manggagalaw na bayolenti ed kompyuter so tudtuan totoo. Balet antoy ipapanengneng na sayan pinilin panagligliwaan no nipaakar ed pagmamaliwan na kapusoan da? (Mateo 5:21, 22; Lucas 6:45) Antoy nibaga yo’d toon labalabay ton saksaken, paltogen, pukolen, tan pateyen so kunwarin too? Panon to no uupoten na sayan too so dakel ya oras a sinimba-simba pian panliketan irayan bayolentin imbension, a naaadik la ed saratan a galaw? Anggan panon et nibaga yon nababayuboan to la so panangaro ed karamsakan, no panon a samay toon manbabantay na pornograpiya et nababayuboan to so imoral iran pilpilalek.​—Mateo 5:27-29.

Panoy inkapirmi na pambusol nen Jehova ed sakey a mangaaro ed karamsakan? Inkuan nen David a satan a too et ‘kagulgula’ nen Jehova. Nen panaon nen Noe, impanengneng nen Jehova so inkapirmi na panggula to ed saramay mangaaro ed pateyan. Oniay inkuan nen Jehova ed si Noe: “Say anggaan na amin a laman sinmabi ed arapan ko; ta say dalin napno na karawalan lapu ed sikara; et nia gaygayen ko ran pati dalin.” (Genesis 6:13) Dineral na tuan Dios so interon mundo na katooan lapud inkabayolenti odino inkaramsak da. Say inliktar To labat et si Noe tan say pamilya to​—waloran totoo ya ag-angaro ed karamsakan.​—2 Pedro 2:5.

Saray totoon malabay a magmaliw a kakaaro nen Jehova so ‘mamitpit ed saray kampilan da a pagmaliwen da a dingding na lukoy, tan saray gayang da a komkompay.’ Imbes ya aralen dan aroen so karamsakan, ag-ira la “manaral na bakal ed anggan kapigan.” (Isaias 2:4) Pian mansiansian kaaro imbes a kalaban na Dios, nepeg tayon ‘arawian so mauges, tan gawaen so kaabigan.’ Kaukolan tayon “anapen . . . so kareenan tan tumboken” itan.​—1 Pedro 3:11.

Panon to no dati tayo lan manggagalaw na saray bayolentin video games? No ontan, nepeg tayon panggunaetan a paliketen si Jehova diad pangitunda ed panggawa na kagulgula to. Seguradon kaukolan tayoy manpikasi parad tulong na masanton espiritu na Dios pian nitunda iyan makaderal ed espiritual a kagagawa. Nitunda tayo iya no abuloyan tayo iray kalidad a singa say deen, kaabigan, tan dangka a mangitunos ed bilay tayo ed saray dalan na Dios.​—Lucas 11:13; Galacia 5:22, 23.