Kasin Nibibiig Mo so Tanda na Kiwawala nen Jesus?

ANGGAPO so malabay a mansakit na grabe odino biglan nasabian na kalamidad. Ta pian napaliisan iratan a duknal, say makabat a too et maimano ed saray tanda a mangipapatnag ed nagawan kapeligroan tan sikatoy onkiwas unong ed satan. Deneskribe nen Jesu-Kristo so sakey a tanda a nakaukolan tayon ibiig. Say tutukoyen ton tanda et walaan na epekto ed interon mundo tan ed amin a katooan​—kaiba ka la tan say pamilyam.

Sinaglawi nen Jesus so Panarian na Dios, a mangekal ed kaugsan tan manggawa ed dalin bilang paraiso. Maupapet iray babangatan to nipaakar ed saya tan labay dan amtaen no kapigan so isabi na Panarian. Oniay intepet da: “Anto so magmaliw a tanda na kiwawalam tan say kasampotan na sistema na bengabengatla?”​—Mateo 24:3, NW.

Amta la nen Jesus a kayari na ipatey tan kioli to, dakel nin taon so onlabas sakbay na kitrono to ed tawen bilang Mesianikon Ari a manuley ed katooan. Lapud agnanengneng na totoo so kitrono to, inter nen Jesus so sakey a tanda ta pian naamtaan na saray patumbok to so ‘kiwawala’ to ontan met ed “kasampotan na sistema na bengabengatla.” Sayan tanda so tugyopen na pigaran kabiangan, a manibukel ed tugyop a pakabidbiran, odino sinyalis​—say tanda na kiwawala nen Jesus.

Saray managsulat na Ebanghelyo a si Mateo, Marcos, tan Lucas so maalwar ya angikurit ed ebat nen Jesus. (Mateo, kapitulo 24 tan 25; Marcos, kapitulo 13; Lucas, kapitulo 21) Say arum niran managsulat na Biblia so angiyarum na saray detalye na tanda. (2 Timoteo 3:1-5; 2 Pedro 3:3, 4; Apocalipsis 6:1-8; 11:18) Ag-onsusto ed sayan artikulo so amin a detalye, balet konsideraen tayo labat so limara a manunan kabiangan a manugyop ed tanda a sinalambit nen Jesus. Naamtaan mo a saya so matukoy tan importante ed sikan mismo.​—Nengnengen so kahon ed pahina 6.

“Sakey a Pananguman ya Angitonton ed Balon Panaon”

“Ontalindeg naani nasyon sumpa ed nasyon, tan panarian sumpa ed panarian.” (Mateo 24:7) Inreport na peryodiko ed Alemanya a Der Spiegel a sakbay na 1914 et saray totoo so “anisia ed alay abig ya arapen a walay  nagkalalon kawayangan, inkaaligwas, tan inkadaakan.” Ingen ta anguman so amin a bengatla. “Say guerra a ginmapo nen Agosto 1914 tan anampot nen Nobyembre 1918 et sakey a makapakebbiew ya ebento. Biglan anguman so awaran na katooan, a nibiig la so apalabas manlapud kaplesan,” so kuan na magasin a GEO. Masulok a 60 milyon a sundalo manlapud limaran kontinente so akibiang ed inaayep a panlalaban. Diad promedyo et manga 6,000 a sundalo so inatey ed kada agew. Manlapu la’d saman, impasen na saray historyador a nambilay ed kada kailalakan tan walaan na nanduruman opinyon ed politika a diad “saray taon 1914 anggad 1918 et agawa so sakey a pananguman ya angitonton ed balon panaon.”

Pinawala na Guerra Mundial I so agnaamper iran pananguman ed sosyedad na too tan impaarap na satan so katooan ed kaunoran iran agew na sayan sistema na bengabengatla. Say arum iran taon na satan a siglo so akapatnagan na mas dakel a guerra, panlalaban, tan terorismo. Anggapo so inaligwasan ed apalabas iran taon na peles a siglo tayo. Nilikud ed guerra, nanenengneng niray arum a kabiangan na tanda.

Eras, Salot, tan Yegyeg

“Wala ra naani eraeras.” (Mateo 24:7) Agawa so eras ed Europa legan na inmunan guerra mundial, tan manlapu la’d saman et sasaloten la na eras so katooan. Insulat na historyador a si Alan Bullock a diad Russia tan Ukraine nen 1933 et “dakel a grupo na totoon naeerasan so nanteyengteyeng ed kaumaan . . . Abunton iray bangkay diad gilig na karsada.” Nen 1943 et naimatonan na dyurnalistan si T. H. White so eras ed Henan, sakey a probinsya ed Tsina. Oniay insulat to: “Diad sakey ya eras, amin lawarin bengatla et nayarin akanen tan gilingen, ya akmonen tan mamakasil ed laman na too. Balet naisip lambengat na sakey a too a kanen so bengatla ya anggad natan et ipapasen ya agnaakan sano sikatoy sesesgaen la na ipapatey.” Makapaermen ta amin lawarin lugar ed Aprika so anagmak na eras nen imbebeneg iran dekada. Anggaman magenap a tagano so papawalaen na dalin parad amin, kakalkulaen na UN Food and Agriculture Organization a manga 840 milyon a totoo ed sankamundoan so walaan na dagdaiset a naakan.

‘Dia ed nambabangil a pasen et walay salot.’ (Lucas 21:11) “Say trangkaso Español so akalkulan amatey na 20 milyon anggad 50 milyon a totoo nen 1918, a mas dakel ni nen say inatey ed baleg a salot odino diad inmunan guerra mundial,” so inreport na Süddeutsche Zeitung. Manlapu la’d saman, dakerakel so adapoan na sakisakit a singa say malaria, lutot, TB, polyo, tan cholera. Tan natatalagnaw so mundo lapud agnapatunda so ikakayat na AIDS. Makapawetwet so situasyon tayo natan lapud mantutultuloy ni so sakit anggaman onaaligwas a tuloy so medisina. Sayan pankontraan, ya anggad  natan et agnaiimano na katooan, so mangipapanengneng a manbibilay itayo ed nikadkaduman panaon.

‘Saray yegyeg.’ (Mateo 24:7) Diad apalabas a 100 taon, saray yegyeg so amatey na nilasus nilibon totoo. Unong ed sakey a reperensya, saray yegyeg a walaay kakasil a maneral ed saray bilding tan mamaletak ed dalin so walaan na promedyo a 18 kada taon manlapu la nen 1914. Saray mas makadesyang a yegyeg, a makapangikusbo na saray bilding so nagagawa a maminsan ed sakey taon. Anggano onaaligwas so teknolohiya, dakel nin siansia so ompapatey lapud say dakel a syudad a kawalaan na ombabaleg a populasyon et walad dadalanan na saray yegyeg.

Makapaliket a Balita!

Maslak a kabiangan na tanda na saray kaunoran ya agew et makapagonigon. Balet wala met so makapaliket a balita ya imbaga nen Jesus.

“Saya ya ebanghelyo na panarian nipulong naani ed sankamundoan ya onkanan pamintuan ed saray amin a nasyones.” (Mateo 24:14) Say kimey ya inggapo nen Jesus a mismo, salanti, say panangipulong ed maong a balita na Panarian so mamantok legan na kaunoran iran agew. Peteg a nagagawa la itan. Ipupulong na saray Tasi nen Jehova so mensahe na Biblia tan ibabangat da iray interesadon totoo a mangiyaplika ed nanaaralan da diad inagew-agew a panagbilay da. Diad kaplesan et masulok lan anemiran milyon a Tasi so manpupulong ed 235 a bansa tan diad masulok ya 400 a lenguahe.

Imanoen pa ya ag-imbaga nen Jesus ya ontunda lan amin iray kimey lapud makapagonigon iran kipapasen ed mundo. Agto met imbaga a nagawa ed interon mundo so sakey lambengat a kabiangan na tanda. Balet impasakbay to so dakel iran ebento a manugyop ed tanda a nanengneng ed inerman a pasen na dalin.

Imbes ya imanoen so sakey labat a klase na saray ebento odino insidente, kasin nanenengneng mo so inkatibukel na saratan, say tugyop a tanda a walaan na kaimportantian ed mundo? Say nagagawa et mangapekta ed sikayon sankapamilyaan. Balet nayarin itepet tayo, akin a dagdaiset a totoo so maniimano?

 Mas Iyuuna Ra so Dilin Pankaabigan Da

Nanenengneng tayo so arum ed saray manamasakbay a karatula a singa say “No Swimming,” “High Voltage,” “Reduce Speed,” balet ta mabetbet ya ibabaliwala iratan. Akin? Mainomay itayon naimpluensyaan na bengatla ya ipapasen tayon maabig parad sikatayo. Alimbawa, nayarin isipen tayo a nakaukolan so panmaneho a mas maples nen say iyaabuloy na ley, odino pampilpilalekan tayo so manlangoy ed nisebel iran lugar. Balet agmakabat so pangibaliwala ed saray pasakbay.

Singa bilang, saray itetebag na yelo diad kapalandeyan na Alpine diad Austria, Italya, Pransya, tan Switzerland so mamapatey ed saray turista a mangibabaliwala ed saray pasakbay a nepeg iran man-ski odino man-snowboard diad maligen iran rota. Unong ed Süddeutsche Zeitung, dakel a turistan mangibabaliwala ed saratan a pasakbay so walaan na prinsipyon, Anggapo so liket no anggapo so peligro. Makapaermen ta makapasinagem so pansumpalan no ibaliwala iray pasakbay.

Akin ya ibabaliwala na totoo so tanda a deneskribe nen Jesus? Sikara so nayarin abulag la ed pilalek dan onyaman, agla ra makalikna lapud anggapoy interes da, agla ra makakiwas lapud ag-ira makadesisyon, nigalet la ra ed rotina, odino natatakot ira ompan naandian ira na atagey a posisyon. Wala kasi ed saratan so sengegan na pangibabaliwalam ed tanda na kiwawala nen Jesus? Agta makabat ya ibiig so tanda insan onkiwas unong ed satan?

Bilay ed Paraison Dalin

Ondarakel so totoo a maniimano tan onkikiwas ed tanda na kiwawala nen Jesus. Oniay insulat nen Kristian, sakey a de-asawan laki a taga-Alemanya: “Saraya so mauddiem a panaon. Sikatayo so maseguron manbibilay la ed ‘kaunoran iran agew.’” Sikaran sanasawa so manguusar na dakel a panaon pian itongtong ed arum so nipaakar ed Mesianikon Panarian. Si Frank so manaayam met ed satan a bansa. Sikaran sanasawa so mamapaseseg ed arum panamegley na maong a balita a manlalapud Biblia. Oniay imbaga nen Frank: “Lapu ed kipapasen na mundo, dakel a totoo natan so mapaga nipaakar ed arapen. Papasesegen mi ra panamegley na saray propesiya na Biblia nipaakar ed paraison dalin.” Diad ontan et nasusumpal nen Kristian tan Frank so sakey a kabiangan na tanda nen Jesus, salanti, say panangipulong ed maong a balita na Panarian.​—Mateo 24:14.

Sano amantok la so kaunoran iran agew, deralen nen Jesus iyan daan a sistema tan saray totoon manusuporta ed satan. Insan say Mesianikon Panarian so mangasikaso la ed saray pakurang diad dalin, a mangitarok ed nipasakbay a Paraison kipapasen. Say katooan so agla mansakit tan agla ompatey, tan saray inaatey so napaoli ed bilay diad dalin. Saratan so makapalikliket ya ilalo parad saramay maniimano ed tanda na saray panaon. Agta makabat a kurang so panaral a nagkalalo nipaakar ed tanda tan no anto so nepeg a gawaen na sakey pian makaliktar ed anggaan na sayan sistema? Seguradon saya la so panaon na pirmin pankaganatan parad amin.​—Juan 17:3.

[Blurb ed pahina 4]

Impasakbay nen Jesus a dakel iray ebento a manugyop ed tanda a nanengneng ed inerman a pasen na dalin

[Blurb ed pahina 6]

Kasin nanenengneng mo so inkatibukel na tanda, say tugyop a tanda a walaan na kaimportantian ed mundo?

[Kahon/Saray litrato ed pahina 6]

SARAY PAKABIDBIRAN ED KAUNORAN IRAN AGEW

Malaknab a pambabakal.​—Mateo 24:7; Apocalipsis 6:4

Eras.​—Mateo 24:7; Apocalipsis 6:5, 6, 8

Saray salot.​—Lucas 21:11; Apocalipsis 6:8

Onloloor a kaugsan.​—Mateo 24:12

Saray yegyeg.​—Mateo 24:7

Maatap iran panaon a mairap a pidenengan.​—2 Timoteo 3:1

Agmanepeg a panangaro ed kuarta. ​—2 Timoteo 3:2

Matunganga ed atateng.​—2 Timoteo 3:2

Andian na panangaro ed kapamilyaan.​—2 Timoteo 3:3

Maaro ed likeliket imbes a diad Dios.​—2 Timoteo 3:4

Andian na kontrol ed dili.​—2 Timoteo 3:3

Andian na panangaro ed kaabigan.​—2 Timoteo 3:3

Agmaniimano ed manasingger lan kapeligroan.​—Mateo 24:39

Ipulisay na saray managbalaw so ebidensya na kaunoran iran agew.​—2 Pedro 3:3, 4

Panangipulong ed Panarian na Dios diad sankamundoan.​—Mateo 24:14

[Picture Credit Lines ed pahina 5]

Saray sundalo nen Guerra Mundial I: Manlapud libron The World War​—A Pictorial History, 1919; pobrin pamilya: AP Photo/Aijaz Rahi; biktima na polyo: © WHO/P. Virot