Anton Klase na Edukasyon so Mamaaligwas na Bilay Mo?

KASIN asalim lay nipaarap ed dakerakel a problema a say pakaliknam et singa ka la nalelener ed maag-agus ya ilog? Isipen pa labat so pirmin panirap mo no nalingo ka ed pangarap mo ed saratan a problema! Anggapo so too a walaan na nisipor ya abilidad a manresolbe ed amin a problema, a diad amin a panaon et duga iray desisyon to. Satan so rason no akin a nakaukolan so edukasyon. Balet, iner so pakalaan mo na edukasyon a mangiparaan ed sika a mangarap ed saray problema ed bilay?

Dakel a totoo, malangwer man odino matakken, so mangipapasen a sankaimportantian so akademikon edukasyon. Ibabaga ni ingen na arum ya eksperto a “sigpot dan panisiaan ya agkan balot makaromog na [marakep] a trabaho no anggapoy asumpal mo ed kolehyo.” Ingen, walaray pankaukolan na too ya agnapenek diad pagmaliw labat a maasenso ed materyal. Singa bilang, kasin say pakawalaan na atagey ya aral et pagmaliwen to kan maong ya ateng, asawa, odino kaaro? Diad tua, saray totoon pandidinayewan lapud impakagamor da na atagey ya aral et magmamaliw ya aliwliwa so ugali ra, agmaliket so bilay na pamilya ra, odino manbibikkel ni ingen.

Arum so paiwawanwan ed relihyon bilang lapuan na edukasyon, balet nadidismaya ira la ingen lapud ag-itan makapangiiter na praktikal a tulong pian naarap iray kairapan ed bilay. Alimbawa, oniay inkuan nen Emilia * a taga-Mexico: “Labinliman taon lay apalabas sanen inisip ko ya agmi la nitepel so manamong bilang sanasawa. Naynay kamin mankokolkol. Agko napatunda ed panag-inum toy alak. Mabetbet kon ititilak so angkekelag ya ananak mi pian anapen koy masiken ko. Naksawan ak lan manaanos. Akimisa ak ya aminpigapiga ompan agla piga a walay makatulong ed pakaresolbe na problemak. Anggaman sagpaminsan ya inusar so Biblia, anggapon balot so nadngel kon simbawa a direktan manutukoy ed kipapasen ko, tan anggapo labat lay inmasingger ed siak a mangibaga no antoy gawaen ko. Say iyaakar ko ed simbaan pian manguli-ulit lambengat na pigaran dasal so ag-amenek ed siak.” Saray arum so nadidismaya lapud naiimatonan da a saray mismon espiritual a lider da et agbalot napanuliranan so panagbilay da. Kanian dakel so naandian lay kompiyansa a say relihyon so panlapuan na panangipasal odino edukasyon parad maaligwas a bilay.

Kanian, oniay nayarin itepet mo ed inkasika, ‘Anton klase na edukasyon so nepeg kon gamoran ta pian onaligwas so bilay ko?’ Kasin naebatan na tuan Inkakristiano iyan importantin tepet? Saya so singbaten diad ontumbok ya artikulo.

[Paimano ed leksab]