Bayuboan so Tuan Kapaabebaan
Bayuboan so Tuan Kapaabebaan
“Iyaagel mo iray totoon mauyamo.”—2 SAMUEL 22:28, Maung a Balita.
1, 2. Anto so pampadparaan na saray manuley ed mundo?
IPAPANONOT na saray piramid ed Ehipto so totoo a datin nanuley ed satan a bansa. Saray arum nin bantog a lalaki et si Senakerib na Asirya, si Alejandro a Baleg na Gresya, tan si Julius Cesar na Roma. Saratan a manuley so walaan na pampadparaan. Ag-apatnagan ed sikara so tuan kapaabebaan.—Mateo 20:25, 26.
2 Naisip yo kasi a wala ed saratan a manuley so manliliberliber ed nasasakopan da pian anapen iray duka ya uuleyan da a mankaukolan na ligliwa? Andin balot! Nisay naisip yo met ya oonla ira ed simpli iran ayaman na saray nagogonigon a mibabaley da pian sikaray pabiskegen da. Agaylan midumaan so awawey da ed awawey na Supremon Manuley na uniberso, si Jehova a Dios, nipaakar ed saray duka!
Say Sankaabigan ya Ehemplo na Kapaabebaan
3. Panon so pantratrato na Supremon Manuley ed saray uuleyan ton totoo to?
3 Si Jehova so matalonggaring tan atagey a tuloy, ingen ta “saray mata [to] ombatik dia tan diman ed amin a dalin, pian ompatnag a mabiskeg ya ontulong ed saray ayadyari puso ra a dapit ed sikato.” (2 Awaran 16:9) Tan anto so gagawaen nen Jehova sano naimano to iray duka a mandadayew ed sikato a nagogonigon lapud nanduruman subok? Diad sakey a pantalos et sikato so ‘miaayam’ ed sikara diad panamegley na masanton espiritu to ‘pian bilayen to lamet so espiritu na mauyamo tan bilayen to lamet so puso na mansisibkel.’ (Isaias 57:15) Diad ontan, saray apabiskeg a mandadayew ed sikato so lalon akinlongan a mangituloy ed panaglingkor da ed sikato tekep na panliket. Agaylan kapaabebaan so ipapatnag na Dios!
4, 5. (a) Anto so liknaan na salmista ed paraan na pananguley na Dios? (b) Anto so kabaliksan na ‘pampaabeba’ na Dios pian tulongan iray “duka”?
4 Anggapo ed uniberso so nampaabeba a singa ed ginawa na Soberanon Katawan ta pian tulongan iray makasalanan a totoo. Oniay nisulat na salmista: “Si Jehova atagey ya arawi nen saray amin a nasyon, tan say gloria to wala ed tagey na saray katawenan. Siopa so mipadpara ed Jehova a Dios tayo, sikato a manaayam ed tagey, sikato a manpaabeba ya onnengneng ed saray bengabengatla ed tawen, tan dia ed dalin? Sikato ipaalagey to so duka ya agwaten ed dabok, tan lakeyen to so naukolan ya agwaten ed dumsis.”—Salmo 113:4-7.
5 Imanoen pa so salitan “manpaabeba.” Sano iyaplika itan ed totoo, satan a salita so walaan na negatibon kabaliksan, salanti, ‘pangipasen ed dili ya atagtagey nen samay abeban klase na too odino duka.’ Si Jehova a Dios so agbalot nadeskribe a walaan na ontan a mapaatagey ya awawey lapud sikato et maralus, masanto, tan agpakapatnagan na “pambalegbalegan” odino panagpaatagey. (Marcos 7:22, 23) Balet say ‘pampaabeba’ so mankabaliksan met na ileksab ed kipapasen na sakey ya abebbeba ed sosyedad odino ileksab manlapud rangko odino kagalangan pian pidenengan so sakey ya abeba. Kanian, ipapatalos na arum a Biblia so Salmo 113:6 a say Dios et nampaabeban mismo. Agaylan matukoy a panangideskribe ed mapaabeban Dios tayo a maaron maniimano ed saray pankaukolan na ag-ayadyarin mandadayew ed sikato!—2 Samuel 22:36.
No Akin a Mapaabeba si Jesus
6. Anto so sankatalonggaringan a gawa na kapaabebaan nen Jehova?
6 Say sankatalonggaringan a ginawa na Dios a pakapatnagan na kapaabebaan tan aro to et say impangibaki to ed inadaro ton panguloan ya Anak pian nianak diad dalin tan ombaleg bilang too, a kilabanan na katooan. (Juan 3:16) Imbangat nen Jesus ed sikatayo so katuaan nipaakar ed mangatatawen ya Ama to insan inter to so ayadyarin bilay to bilang too pian ekalen so ‘kasalanan na mundo.’ (Juan 1:29; 18:37) Lapud naspot ya ipapatnag nen Jesus iray kalidad nen Ama ton Jehova, kalaktip lay kapaabebaan, mabulos ton ginawa so pagagawa ed sikato na Dios. Satan so sankatalonggaringan ya alimbawa na kapaabebaan tan aro ya impatnag na sakey ed saray pinalsa na Dios. Balet ta aliwan amin a totoo et angapresya ed kapaabebaan nen Jesus, a sikato ni ingen so impasen na saray ombubusol ed sikato bilang say ‘sankaabebaan ed totoo.’ (Daniel 4:17) Anggaman kuan, amoria nen apostol Pablo a saray kapananisiaan to so nepeg a mangalig ed si Jesus tan magmaliw met a mapaabeba sano midedeneng ira ed balang sakey.—1 Corinto 11:1; Filipos 2:3, 4.
7, 8. (a) Panon a naaralan nen Jesus so magmaliw a mapaabeba? (b) Anto so kerew nen Jesus ed saray magmaliw a babangatan to?
7 Impabitar nen Pablo so matalonggaring ya ehemplo nen Jesus, ya oniay insulat to: “Iyatol yo so sayan kalakal ed sikayo, a wala met nensaman ed Kristo Jesus, a bangta sikatoy wala ed ereng na Dios, agto imbilang a say inkaparpara to ed Dios et sakey a bengatlan bebembenan to nensaman. Noag ingen nilukpos to so inkasikato, ya inala to so ereng na sakey ya aripen, ya agawan kaulibay na saray totoo; tan bangta aromog a singa nengneng na sakey a too, nampaabeba a nagmaliw a matulok ya anggad say ipapatey, on, say ipapatey ed krus [“panamairapan a kiew,” NW].”—Filipos 2:5-8.
8 Arum so nayarin manuumameng no, ‘Panon a naaralan nen Jesus so magmaliw a mapaabeba?’ Satan so alay abig a resulta na maapit ya impilimog to ed mangatatawen ya Ama to diad loob na abayag a panaon, a legan na satan et sikato so nanlingkor bilang “uloen a komikimey” na Dios diad impamalsa ed amin a bengatla. (Uliran 8:30) Kayari na impanrebelde diad Eden, say Panguloan ya anak na Dios so akaimaton ed mapaabeban impideneng nen Ama to ed makasalanan a totoo. Kanian sanen wadiad dalin si Jesus et impatnag to so kapaabebaan nen Ama to tan oniay inkerew to: “Ala yoy pakok ed sikayo, tan manaral kayo’d siak; ta mauyamo ak tan mapaabeba ak a puso; et naromog yoy inawa nipaakar ed saray kamarerwa yo.”—Mateo 11:29; Juan 14:9.
9. (a) Anto so alay abig a naimano nen Jesus ed saray ugugaw? (b) Sanen imparungtal to so sakey a melag ya ugaw, anton leksion so imbangat nen Jesus?
9 Si Jesus so tuan mapaabeba kanian agnatatakot ed sikato iray ugugaw. Imbes, sikara so maasingger ed sikato. Impatnag met nen Jesus ed sikara so panangaro tan inasikaso to ira. (Marcos 10:13-16) Anto ta so alay abig a naimano nen Jesus ed saray ugugaw? Sikara so walaan na alay abig iran kalidad ya aglawas impatnag na saray babangatan to. Kabkabat a saray angkelag ya ugugaw et ipapasen da iray wala la’d edad bilang atagtagey nen say sikara. Naimano yo itan diad dakel a tepet da. On, no ikompara ed saray wala la’d edad, saray ugugaw so mas mainomay ya ibangat tan ag-ira mapaatagey. Diad aminsan ya inkagawa, imparungtal nen Jesus so sakey a melag ya ugaw tan inkuan to ed saray patumbok To: “Noag kayo ompawil tan agkayo magmaliw a singa saray angkekelag ya ugugaw, anggan panon agkayo naani makaloob ed panariay tawen.” Oniay intuloy to: “Siopaman a manpaabeba a singa sayan melag ya ugaw, sikato lanlamang so kabalbalgan ed panariay tawen.” (Mateo 18:3, 4) Indalatdat nen Jesus so totontonen: “Amin a mamaatagey ed sikato a dili napaabeba naani; et say manpaabeba ed sikaton dili napaatagey naani.”—Lucas 14:11; 18:14; Mateo 23:12.
10. Antoran tepet so konsideraen tayo?
10 Satan a katuaan so mamalesa na importante iran tepet. Say ilalo tayon makagamor na andi-anggaan a bilay so anggan panon et akadepende ed pamayubo tayo na tuan kapaabebaan, balet akin a naiirapan no maminsan iray Kristiano a magmaliw a mapaabeba? Akin a mairap parad sikatayo so pangiwaklit ed liknaan a mapaatagey, insan mapaabeban onkiwas sano nasusubok? Tan anto so makatulong ed sikatayo pian nabayuboan so tuan kapaabebaan?—Santiago 4:6, 10.
No Akin a Mairap so Manpaabeba
11. Akin ya agla pankelawan so pipupuligesgesan tayon magmaliw a mapaabeba?
11 No nalilikas yon naiirapan kayon manpaabeba, ontan met so nalilikna na arum. Nen 1920, siningbat na sayan dyurnal so simbawa na Biblia ed pankaukolan ya ipatnag so kapaabebaan, ya oniay inkuan na satan: “Lapud naimano tayo ya ontan lay pamapabli na Katawan ed kapaabebaan, satan so nepeg a mamaseseg ed amin a tuan babangatan a mamayubo ed sayan kalidad diad inagew-agew.” Insan oniay prangkan inaksobi na satan: “Anggaman ed amin na sarayan simbawa na Kasulatan, singano ontatalona so ag-ayadyarin inkatoo lapud saramay magmamaliw a totoo na Katawan tan manutumbok ed sayan dalan so ompatnag a mas naiirapan tan lalon mipupuligesgesan a mangipatnag ed sayan [kalidad] nen say arum niran [kalidad].” Ipapabitar na saya so sakey a rason no akin a kaukolan a mipuligesgesan iray tuan Kristiano a magmaliw a mapaabeba—say makasalanan ya inkatoo tayo so manpipilalek na agmanepeg a gloria. Say makasengeg et ilalak itayo na makasalanan a sanasawa, si Adan tan Eva, ya adaeg na sinisiblet iran pirawat.—Roma 5:12.
12, 13. (a) Panon a say mundo et babeng ed panangipatnag na Makristianon kapaabebaan? (b) Siopa so lalon mamapairap ed pipupuligesgesan tayon mamayubo na kapaabebaan?
12 Say sakey nin rason no akin a naiirapan itayon mangipatnag na kapaabebaan et lapud wala itayo ed mundon mamapaseseg ed totoo a magmaliw ya atagtagey nen say arum. Sakey ed saray kaslakan a kalat ed sayan mundo et say pampirawat a peneken so “kilalawan na [makasalanan a] laman tan kilalawan na mata tan maapan gloria na bilay.” (1 Juan 2:16) Imbes a natalonaan ed saratan a minumundon pilalek, nepeg a pansiansiaen na saray babangatan nen Jesus so simplin mata tan iyapasakey itan ed panggawa na linaway Dios.—Mateo 6:22-24, 31-33; 1 Juan 2:17.
13 Say komatlon rason no akin a mairap a bayuboan tan ipatnag so kapaabebaan et sayan mundo so uuleyan nen Satanas a Diablo, say inmuna-unan angipatnag na panagpaatagey. (2 Corinto 4:4; 1 Timoteo 3:6) Iyaalibansa nen Satanas iray mauges ya ugali to. Alimbawa, imbaga ton iter to’d si Jesus so “amin a panarian na mundo” daput no sikatoy dayewen nen Jesus. Lawas mapaabeba si Jesus kanian mapekder ton impulisay so iyoopresi na Diablo. (Mateo 4:8, 10) Ontan met, tutuksoen nen Satanas iray Kristiano pian anapen so gloria ed inkasikaran dili. Balet, panggugunaetan na saray mapaabeban Kristiano a tumboken so alimbawa nen Jesus, ya ipapaarap da so dayew tan kagalangan ed Dios.—Marcos 10:17, 18.
Bayuboan tan Ipatnag so Tuan Kapaabebaan
14. Anto so “kunkunwarin panagpaabeba”?
14 Diad sulat to ed saray taga-Colosas, amasakbay si apostol Pablo sumpad mankuankuanan a panagpaabeba pian pandinayewen so totoo. Deneskribe itan nen Pablo bilang “kunkunwarin panagpaabeba.” Saramay mankuankuanan a mapaabeba et aliwan maespiritual a totoo. Diad tua et nipapatnag da a talagan “napno” ira na kinon. (Colosas 2:18, 23, NW) Impabitar nen Jesus iray alimbawa na palson panagpaabeba. Kinondena to iray Fariseos lapu ed maparungtal a panagpikasi ra tan ed paraan na panag-ayunal da tekep na maermen tan mabintan kalupaan pian sikaray naimano na totoo. Diad pidumaan, nepeg tayon ibalikas iray personal a pikakasi tayo diad mapaabeban paraan ta pian walaan iratan na kablian ed arapan na Dios.—Mateo 6:5, 6, 16.
15. (a) Anto so nagawaan tayo pian napansiansia tayo so kapaabebaan na nonot? (b) Siopara so pigara ed saray maabig ya ehemplo na kapaabebaan?
15 Napansiansia na saray Kristiano so peteg a kapaabebaan na nonot no naynay dan isipen iray sankaabigan ya ehemplo na kapaabebaan, salanti, si Jehova a Dios tan si Jesu-Kristo. Nagawaan itan no regular tayon aaralen so Biblia tan saray katulongan ed panagaral na Biblia ya intarya na “matoor tan makabat ya aripen.” (Mateo 24:45) Makanakana so ontan a panagaral parad saray Kristianon manangasikaso, ta “pian ag-onkinon so puso [ra] ed saray agagi [ra].” (Deuteronomio 17:19, 20; 1 Pedro 5:1-3) Morekdeken pa so dakel ya alimbawa na saramay abendisyonan lapud mapaabeban awawey da, a singa si Rut, Ana, Elizabeth, tan dakel nira. (Rut 1:16, 17; 1 Samuel 1:11, 20; Lucas 1:41-43) Isipen met so dakel a maabig ya alimbawa na kabkabat a totoo a nansiansian mapaabeba ed panaglingkor da ed si Jehova, a singa si David, Josias, Juan a Managbautismo, tan si apostol Pablo. (2 Awaran 34:1, 2, 19, 26-28; Salmo 131:1; Juan 1:26, 27; 3:26-30; Gawa 21:20-26; 1 Corinto 15:9) Tan komusta met so dakel ya ehemplo na kapaabebaan ed panaon tayo a naromog ed loob na Kristianon kongregasyon? Diad pandalepdep ed saratan ya ehemplo, natulongan iray tuan Kristiano a nawalaan na “panagpaabeba, a manlilingkoran so sinansakey.”—1 Pedro 5:5.
16. Panon itayon natulongan na Makristianon ministeryo pian magmaliw a mapaabeba?
16 Say regular a pibibiang ed Makristianon ministeryo so makatulong met ed sikatayo pian magmaliw a mapaabeba. Say kapaabebaan na nonot so makatulong pian magmaliw itayon epektibo sano asinggeran tayo iray agtayo kabat a totoon nakatongtong tayo ed kabkaabungan tan ed arum niran pasen. Tua itan sano diad primero et say unabung so agmagalang odino ag-interesado ed mensahe na Panarian. Mabetbet a susuppiaten iray sisiaen tayo, balet say kapaabebaan so ontulong ed Kristiano pian naebatan to iray tepet diad “siuuyamo tan sitatakot” a paraan. (1 Pedro 3:15) Saray mapaabeban lingkor na Dios so inmalis ed balo iran teritorya pian ontulong ed totoo a walaan na miduma iran kultura tan estandarte na panagbilay. Saratan a ministro so mapaabeba anggaman ed mairap a panaaral da na balon lenguahe ta pian mas makatulong ira ed saramay labay dan panginabangan na maong a balita. Agaylan nakomendaan itan!—Mateo 28:19, 20.
17. Antoran responsabilidad na Kristiano so mankaukolan na kapaabebaan?
17 Dakel so mapaabeban anumpal ed saray obligasyon da bilang Kristiano, ya inyuna ra so intereses na arum imbes a say dili ra. Alimbawa, nakaukolan so panagpaabeba parad sakey a Kristianon ama pian mangipanaon ed pangiparaan tan pangikondukta na epektibon panangiyaral na Biblia ed ananak to. Say kapaabebaan so ontulong met ed ananak a mangigalang tan magmaliw a matulok ed ag-ayadyarin atateng da. (Efeso 6:1-4) Saray bibii a kaasawaan na agmananisia so mabetbet a nipapaarap ed saray situasyon a kaukolan so panagpaabeba legan dan tatangguyoren so kaasawaan da panamegley na ‘masimpit a panagbilay da, a sitatakot.’ (1 Pedro 3:1, 2) Say kapaabebaan tan masakripisyon aro et makanakana met sano maaro tayon aasikasoen iray pankaukolan na mansasakit tan maedad laran atateng.—1 Timoteo 5:4.
Naresolbe Iray Problema Lapud Kapaabebaan
18. Panon itayon natulongan na kapaabebaan pian nasolbar iray problema?
18 Ag-ayadyari so amin a totoon lingkor na Dios. (Santiago 3:2) No maminsan et nayarin agmakapantunosan odino agmakapantalosan so duaran Kristiano. Say sakey et nayarin walaay makatunongan a rason pian ireklamo so sakey. Diad kaslakan et nasolbar iratan a problema diad pangiyaplika ed sayan simbawa: “Mantetepelan so sakey tan sakey, tan manpeperdonaan so balang sakey, no say siopaman a too wala so pangidalman to ed siopaman; unong ed impamerdona na Katawan ed sikayo, ontan met so gawaen yo.” (Colosas 3:13) Tua, aliwan mainomay so panumbok ed satan a simbawa, balet makatulong so kapaabebaan pian niyaplika itan.
19. Anto so nepeg tayon tandaan sano katongtongen tayo so akaopendi ed sikatayo?
19 No maminsan et nayarin isipen na sakey a Kristiano ya agnayarin ibaliwala so makatunongan ya irereklamo to lapud seryoso itan. Diad ontan, say kapaabebaan so ontulong ed sikato pian asinggeran so ipapasen ton akaopendi ed sikato tekep na gagalan nipawil so kareenan. (Mateo 18:15) Say sakey a rason no akin a no maminsan et agnaandi iray problema ed baetan na saray Kristiano et lapud ag-akoen na sakey odino sikaran dua so kalilingoan to. Odino samay unonan onasingger pian mipulangan komon et nayarin mantunongtunongan tan makritiko. Diad pidumaan, say tuan mapaabeban awawey so epektibon tuloy diad pakaresolbe na dakel ya agpantatalosan.
20, 21. Anto so sakey ed sankabalegan iran tulong pian magmaliw a mapaabeba?
20 Say manunan kundang pian nabayuboan so kapaabebaan et say pampikasi ed Dios, a kerewen so tulong tan espiritu to. Balet tandaan a “say Dios . . . mangiter na grasya [pati say masanton espiritu to] ed mauyamo.” (Santiago 4:6) Kanian no walay agyo pakapitunosan ed sakey a kapanisiaan, manpikasi ed si Jehova pian magmaliw kayon mapaabeba a mangawat ed lingo yo, melag man itan odino baleg. No asakitan kayo tan masimoon ya imbaga na akaopendi ed sikayo a, “Dispensa mo ak,” sikato so mapaabeban perdonaen yo. No nairapan kayon manggawa ed satan, masimoon yon kerewen so tulong nen Jehova pian naekal ed puso yo so antokaman a sebangsebang a panagpaatagey.
21 Say impakaaral tayo ed dakel iran gunggona na pagmaliw a mapaabeba so nepeg a mamakiwas ed sikatayon mamayubo tan mamasiansia ed sayan mablin kalidad. Pian nagawaan itan, agaylan abig parad sikatayo iray ehemplo nen Jehova a Dios tan si Jesu-Kristo! Agbalot lilingwanan so panamaseguro na Dios: “Say tumang na kauyamoan tan say takot ed Jehova sikato so saray kayamanan, tan dayew, tan bilay.”—Uliran 22:4.
Saray Punton Dalepdepen
• Siopa iray sankaabigan ya ehemplo na kapaabebaan?
• Akin a mairap a bayuboan so kapaabebaan?
• Anto so makatulong ed sikatayo pian magmaliw itayon mapaabeba?
• Akin ya ontan lan kaimportante so pansiansian
[Tepetepet Parad Panagaral]
[Litrato ed pahina 26]
Si Jesus et tuan mapaabeba
[Litrato ed pahina 28]
Papasesegen na mundo so totoo a magmaliw ya atagtagey nen say arum
[Credit Line]
WHO photo by L. Almasi/K. Hemzǒ
[Litrato ed pahina 29]
Say kapaabebaan so ontulong ed sikatayo pian asinggeran iray agtayo kabat a totoo diad ministeryo tayo
[Saray litrato ed pahina 30]
Mabetbet a naresolbe iray agpantutunosan diad mapaabeban panakbong tayo ed satan panamegley na aro
[Saray litrato ed pahina 31]
Dakel so paraan a nipatnag na saray Kristiano so kapaabebaan