Minabang ed Walan Sankaabigan ya Edukasyon!

IPAPABIDBIR na Biblia a si Jehova a Dios so Manamalsa na amin a bengatla, a kabiangan la’d saratan so totoo. (Genesis 1:27; Apocalipsis 4:11) Bilang Engranden Managbangat, imbangat to so inmunan sanasawa, si Adan tan Eva, tan intadia to ira a manayam diad marakdakep a hardin ed Eden. Gagala to a sikaray mantultuloy ya ibangat to tan magnayon ya asikasoen to. (Genesis 1:28, 29; 2:15-17; Isaias 30:20, 21) Isipen pa labat itan ya ilalo!

Balet, makapaermen ta impulisay na inmunan sanasawa so ilalo ra. Lapud intunganga ra, say katooan so inmabeba ed moral tan kinmapuy ed pisikal. (Genesis 3:17-19; Roma 5:12) Nipaakar ed saraman so nambilay ed loob labat na pigaran henerasyon kayarin apalsa so totoo, oniay inkuan na Biblia: “Si Jehova anengneng to a say kabaglan na too ed dalin abalbaleg, tan mauges labat a lanang so amin a pimorekdek na nonot na puso to.”​—Genesis 6:5.

Ngalngali 4,500 a taon lay linmabas sanen imbaga nen Jehova a naynay lan pinonot na too so panggawa na kaugsan, tan mas mauges ni so kipapasen na katooan natan nen say kapiganman. Dakel so makmakpel a mantitila, mantatakew, odino mangakabil ed kapara ran too. Ondarakel so problema ed kada agew, bangta ngalngalin anggapo la so too a mangiyaansakit ed kapara to. Agta peteg a naaapektoan so maslak a personal a relasyon, laktip la iray relasyon ed loob na pamilya? Ingen, aliwan say Dios so natetel ed kaplesan iran nagagawa, nisay anggapo lay pibabali to ed saray problema natan. Si Jehova et lawas interesado ed pankaabigan na too, tan sikatoy akaparaan a mangibangat ed saramay mabulos a paiwanwan ed sikato pian nawalaan na maliket a bilay. Ngalngalin 2,000 a taon lay apalabas sanen imbaki to so Anak ton si Jesu-Kristo diad dalin tan impatnag To so pilalek ton ibangat iray totoon malabay ya onaligwas so bilay da. Angitilak si Jesus na pangaligan parad naspot ya edukasyon lapud sikatoy imbangat na Engranden Managbangat ed loob na abayag a panaon.

Tuan Inkakristiano​—Say Lapuan na Edukasyon

Si Jesu-Kristo so angiletneg ed tuan Inkakristiano, sakey a dalan na bilay a nibase ed aro. Diad satan et amin a kanonotan tan kiwas so nepeg a mitunosan ed linawa na Dios, parad kigalangan tan kirayewan na ngaran to. (Mateo 22:37-39; Hebreos 10:7) Saray bangat nen Jesus nipaakar ed ontan a dalan na bilay so susuportaan nen Ama to, si Jehova. Oniay nabasa tayo diad Juan 8:29 nipaakar ed impanuporta na Dios ed si Jesus: “Say angibaki dia ed siak wala ed siak; agto ak pinaulyan a manbukbukor, ta gawaen ko lawas so saray bengatla a makapaliket ed sikato.” On, si Jesus et sinuportaan tan inwanwan na Ama to diad interon ministeryo to. Saray inmunan papatumbok nen Jesus so niwanwan met a mangarap ed saray problema ed bilay. Sikaray imbangat nen Jehova panamegley na Anak to. Nagmaliw iran maong a totoo lapud inunor da iray bangat nen Jesus tan inalig da so ehemplo to. Ontan met so pagmamaliwan na saray babangatan to natan.​—Nengnengen so kahon a “Say Impluensya nen Jesus tan Saray Bangat To,” diad pahina 6.

Say sakey a nikadkaduman aspekto na tuan Inkakristiano et say edukasyon a mangiimpluensya ed nonot tan puso parad kapasimbalo na personalidad na totoo. (Efeso 4:23, 24) Bilang sakey  ya alimbawa, konsideraen so imbangat nen Jesus nipaakar ed inkamatoor ed kapareha: “Nadngelan yo a nikuan, Agka mikalugoran ed agmo asawa. Balet kuan ko ed sikayo, a balang sakey ya onlimgis ed sakey a bii ed pangagum to, akilawanan la ed sikato diad puso to.” (Mateo 5:27, 28) Diad panamegley na sarayan salita, imbangat nen Jesus iray babangatan to a nepeg dan pansiansiaen a maralus so puso ra tan saray agmanepeg a kanonotan tan pilpilalek et nayarin mansumpal ed mauges, anggaman agni iratan ginawa. Agta tua a say mauges a kanonotan so mansumpal ed saray kiwas ya agmamaliket ed Dios tan mamasakit ed arum?

Kanian oniay insimbawa na Biblia: “Agkayo miaabobon unong ed sayan mundo: noag ingen manguman kayo lapu ed kapasimbalo na kanonotan yo, pian nasali yo no anto so maong, tan makapaliket, tan nasnaspot a linawa na Dios.” (Roma 12:2) Oniay nayarin itepet mo: ‘Peteg kasin napasimbalo tayo so kanonotan panamegley na edukasyon?’ Say pamasimbalo ed kanonotan et mangilalanor ed pangipaarap ed satan ed sananey a direksion diad naynay a pannonot ed saray prinsipyo tan panamilin na Salita na Dios. Nagawaan itan diad pangawat ed edukasyon ya itatarya na Dios panamegley na Salita to.

Apakiwas Ira a Manguman

“Say salita na Dios sikatoy mabilay tan mabiskeg.” (Hebreos 4:12) Mabiskeg nin siansia so impluensya na Salitay Dios ed saray indibidual, a mamapaneknek a praktikal ni itan. Napakiwas na satan so too a manguman ed kurang to, manayakup ed tuan Inkakristiano, tan magmaliw a magmaong a too. Saray onggendan ya alimbawa so mangiyiilustra ed kablian na edukasyon ed Biblia.

Si Emilia, ya asalambit diad inmunan artikulo, so angikuan: “Say impansagpot ko a bukor so agmagenap pian napaabig so situasyon na pamilyak. Sanen impaiyaralan ak na Biblia ed saray Tasi nen Jehova, amoriak a wala ni so ilalo kanian inuman ko so awawey ko. Naaralan koy magmaliw a mas maanos tan agmaisasanok. Asabi panaon, kaibak met lan nanaral na Biblia so masiken ko. Anggaman nairapan ya ontunda ed panag-inum to, nitunda to itan a siansia. Satan so amawala na balon gapoan ed panamaley mi. Malikeliket kami la natan bilang Kristiano tan ipupurek mi ed ananak mi iray maabig a prinsipyo na Biblia.”​—Deuteronomio 6:7.

Say edukasyon ya itatarya na tuan Inkakristiano so makapangibulos ed sakey a too manlapud saray bisyo tan imoral a kabibilay. Pinaneknekan itan nen Manuel. * Sanen 13-años to, sikatoy tinmaynan ed abung da tan ginapoan toy nansungap na marihuana. Asabi panaon et insublay toy heroin. Sikatoy akirelasyonan ed sekso ed lalaki tan bibii pian walay napanayaman tan napankuartaan to. No maminsan et sikatoy mantatakew pian nalegpet toy inkasikato. Amin lawarin panaon et sikatoy aka-druga. Sikatoy mabetbet a nipripriso lapud marawal a kondukta to.  Sikatoy nipriso nensaman ed loob na apat taon, tan diad loob na prisoan et sikatoy mangipupuslit na saray armas pian ilako. Kayari ton angasawa, siansia ni ya inani nen Manuel iray bunga na mauges a kabibilay to. Oniay inkuan to: “Say abung a nanayaman mi et datin pukokan na manok. Agko met nalingwanan a say panlulutoan na asawak et diad saray laryo. Aliwan maligen iray kipapasen mi kanian anggan saray kapamilyaan ko so angibaga ed asawak a taynan to ak la.”

Panon ya anguman so bilay to? Oniay ebat nen Manuel: “Walay sakey a kabat ko a linma ed abung mi tan intongtong to so nipaakar ed Biblia. Inmabuloy ak a dalawen to pian paneknekan labat ed sikato ya anggapo so Dios ya interesado ed totoo. Ipapasen kon siak so mabilay a prueba ed satan. Nikelawan ak ta maan-anos tan marespeto iman a Tasi, kanian inmabobon ak ya onatendi ed saray pantitipon diad Kingdom Hall. Anggaman saray arum a wadman et kabat day inkatook, sikaray makaaron angibano ed siak. Impalikna ra’d siak ya aliwa ak a duma ed sikara. Makaligliwan tuloy iman. Siak so atenyeg kanian denesidik lan taynanan so mundo na druga pian mananap na mapagalang a trabaho. Kayari apat bulan a panaaral ko na Biblia, naabuloyan ak lan mibiang diad kimey a panagpulong, tan apat bulan kayari na satan, siak so abautismoan bilang sakey ed saray Tasi nen Jehova.”

Antoy kabaliksan na tuan Inkakristiano parad si Manuel tan say pamilya to? “No agak nanaral na Biblia, maseguro ya abayag ak lan inatey. Nankakasakey kami lamet a pamilya lapu ed dalan na bilay ya imbangat nen Jesus. Agko la labay a nasali na duaran anak mi so naeksperiensyak sanen tobonbalo ak ni. Siak so malikeliket tan misalsalamat ed si Jehova lapud maabig la natan so ulopan min sanasawa. Siak so kinomendaan na arum ed saray datin kabat ko, ya imbaga ra’d siak ya ipapasen dan sankaabigan so kurang na bilay ko natan.”

Diad dalan na bilay na Kristiano, aliwa labat a say kalinisan ed moral so nakaukolan noag  pati say kalinisan met ed pisikal. Atalosan itan nen John, a manaayam diad sakey a lugar ed Abalaten Aprika, a mair-irap ditan so panagbilay. Oniay impaliwawa to: “No maminsan et sakey simban agman-uras so anak min bii, tan palpaulyanan mi labat itan.” Inaksobi met na asawa to a talagan marutdutak so abung da. Balet anguman so bengabengatla lapu ed Makristianon edukasyon. Agla akiulop si John ed sakey a grupon managtakew na kotsi tan inteen to lay imano to ed pamilya to. “Naaralan mi a bilang Kristiano et nepeg min pansiansiaen a malinis so laman tan kawes mi. Agustoan ko iray balikas ed 1 Pedro 1:16, a mamibilin ed sikatayo a magmaliw a masanto lapud si Jehova a Dios et masanto. Natan et panggugunaetan min parakepen so melag ya ayaman mi.”

Naromog Mo so Sankaabigan ya Edukasyon

Aliwa lan nikaduma iray eksperiensyan asalambit diad tagey. Bilang resulta na edukasyon a nibase ed Biblia, naaaralan na nilibon totoo so pambilay a maaligwas. Lapud matua tan makukuli ra, labalabay ira na saray amo ra. Maomaong iran kakaabay tan kakaaro, ya interesado ra ed pankaabigan na kapara ran too. Ompapaliis ira ed saray bisyo tan pilpilalek na laman, kanian naaasikaso ran maong so mismon bunigas da ed pisikal, mental, tan emosyonal. Imbes a daraken da so kaykayarian da diad saray bisyo, uusaren da iratan parad pankaabigan dan dili tan say pamilya ra. (1 Corinto 6:9-11; Colosas 3:18-23) Andi-duaruwan saray resulta na pangiyaplika ed saray indatak nen Jehova diad Biblia so mangipatnag a say pambilay unong ed tuan Inkakristiano so sankaabigan a kurang na bilay, a satan la so sankaabigan ya edukasyon. Oniay ibabaga na Biblia nipaakar ed sakey a manbibilay a mitunosan ed saray ganggan na Dios: “Antokaman a gawaen to ombuna.”​—Salmo 1:3.

Makapaseseg a naamtaan a say Makapanyarin-amin a Dios, a si Jehova, so mabulos a mangibangat ed sikatayo. Oniay ibabaga to nipaakar ed inkasikato: “Siak si Jehova a Dios mo, ya angibangat ed sika na nipaakar ed nabang mo, a mangitonton ed sika ed dalan a laen mo komon.” (Isaias 48:17) On, intarya nen Jehova so dalan panamegley na ehemplo tan bangabangat na say Anak ton si Jesu-Kristo. Saray bangat to so akapanguman ed bilay na dakel a totoo ya akapikabat ed sikato sanen wadia ed dalin, tan makapanguman met itan ed bilay na dakel nin totoo natan a manbibilay unong ed saray bangat to. Akin ya ag-ipanaon so panaral nin nagkalalo nipaakar ed sarayan bangat? Saray Tasi nen Jehova ed lugar yo so maliket ya ontulong ed sikan makaawat na satan a makanakanan edukasyon.

[Paimano ed leksab]

[Kahon/Litrato ed pahina 6]

Say Impluensya nen Jesus tan Saray Bangat To

Diad impangusar nen Zaqueo ed posisyon to bilang manunaan a managsingil na buis, sikatoy yinmaman lapud kinuartaan tan inaguman to iray ordinaryon totoo. Balet inuman to so dalan na bilay to diad impangiyaplika to ed saray bangat nen Jesus.​—Lucas 19:1-10.

Si Saulo na Tarso so tinmundan amasegsegang ed saray Kristiano tan akomberte ed Inkakristiano, tan nagmaliw ya apostol Pablo.​—Gawa 22:6-21; Filipos 3:4-9.

Arum ed saray Kristiano ed Corinto et datin ‘managlawan, manangigalang ed talintao, managsingger ed agda asawa, binabai, matakew, maagum, managbuanges, managpabanday, managpatubo.’ Ingen, sanen naaralan da so tuan Inkakristiano, sikaray ‘naurasan, apasantos, tan nibilang a matunong ed ngaran na Katawan a Jesu-Kristo.’​—1 Corinto 6:9-11.

[Litrato ed pahina 7]

Makatulong ed sika so Biblia no panon kan ontalona