Paliisan so Pakawalaan na Mapaatagey a Puso

“Say Dios sumpaen to so atagey a linawa.”​—SANTIAGO 4:6.

1. Mangiter na alimbawa na manepeg a liknaan na pampasirayew.

 WALA ta la so agawa a sengegan na impanpasirayew yo? Maslak ed sikatayo so akaeksperiensya la na ontan a maliket a liknaan. Aliwan mauges so pakalikna na ontan. Alimbawa, sano nabasa na sanasawan Kristiano so report na eskuelaan nipaakar ed maong ya ugali tan inkakuli na anak dan bii, maligliga so lupa ra ed panliket a tuloy lapud agawaan na anak da. Impasirayew di apostol Pablo tan saray kaiba to so balon kongregasyon a tinulongan dan ombiskeg lapud saray agagi ditan et matoor a nansungdo ed panamasegsegang.​—1 Tesalonica 1:1, 6; 2:19, 20; 2 Tesalonica 1:1, 4.

2. Akin a kaslakan et aliwan maabig so panagpasirayew?

² Unong ed saray alimbawa ed tagey, naimano tayo a say pampasirayew et nayarin mankabaliksan na pakalikna na liket lapud agawaan odino kayarian. Balet ta mabetbet a nipapatnag ed panagpasirayew so agmanepeg a panangitandoro ed dili, ya isipen na sakey a sikatoy atagtagey lapud abilidad, itsura, kayamanan, odino posisyon to. Mabetbet itan a napatnagan ed malastog ya ugali tan malangas a kakikiwas. Say ontan a panagpasirayew so nepeg a paliisan tayo bilang Kristiano. Akin? Lapud walaan itayo na nisipor a tendensia na inkasiblet, ya atawir tayo ed inmunan ama tayon si Adan. (Genesis 8:21) Bilang resulta, mainomay itayon palikdoen na kapusoan tayo pian manpasirayew lapud agmanepeg iran rason. Singa bilang, nepeg a labanan na saray Kristiano so pampasirayew lapud rasa, kayamanan, edukasyon, nisipor iran abilidad, odino nagagawaan da ed trabaho no ikompara ed arum. Say pampasirayew makasengeg ed saratan a bengatla so agmanepeg tan agmakapaliket ed si Jehova.​—Jeremias 9:23; Gawa 10:34, 35; 1 Corinto 4:7; Galacia 5:26; 6:3, 4.

3. Anto so panagpaatagey, tan anto so imbaga nen Jesus nipaakar ed satan?

³ Wala ni so sakey a rason no akin ya ipulisay so agmanepeg a panagpasirayew. No abuloyan tayon ontubo itan ed puso tayo, magmaliw itan a kagulgulan klase na panagpasirayew a tatawagen a panagpaatagey. Anto so panagpaatagey? Nilikud ed panliknan atagtagey, melmelagen na mapaatagey a too so arum, saramay ipapasen ton abebbeba. (Lucas 18:9; Juan 7:47-49) Inlaktip nen Jesus so “pambalegbalegan” odino panagpaatagey ed saramay mauges ya ugali a ‘manlalapu ed puso’ tan ‘manudutak ed too.’ (Marcos 7:20-23) Namoria na saray Kristiano so kaimportantian na ipaliis ed pakawalaan na mapaatagey a puso.

4. Panon itayon natulongan no konsideraen tayo iray alimbawa ed Biblia nipaakar ed panagpaatagey?

⁴ Natulongan kan ompaliis ed panagpaatagey no konsideraen mo so pigaran salaysay na Biblia nipaakar ed saray mapaatagey a totoo. Nagkalalon nibiig mo so agmanepeg a panagpasirayew odino kinon a nayarin niwala ed sika odino nabayuboan mo ed ilabas na panaon. Ontulong itan ed sika pian niwaklit iray kaisipan  odino liknaan a mangitonton ed pagmaliw a mapaatagey. Bilang resulta, agka naapektoan no gawaen la na Dios so impasakbay to: “Sikato naani pangekal ko ed pegley mo ed saray mapangta a manliket ed sika, et anggan kapigan agka la mapangta ed masanto a palandey ko.”​—Sofonias 3:11.

Pidenengan na Dios Iray Mapaatagey

5, 6.Panon ya impatnag nen Faraon so panagpaatagey, tan anto so resulta na satan?

⁵ Natalosan yo met so panmoria nen Jehova ed panagpaatagey diad impideneng to ed saray makapanyarin manuley a singa si Faraon. Anggapo so duaruwa a si Faraon et walaan na mapaatagey a puso. Lapud momoriaen to so inkasikato bilang dios a nepeg a dayewen, minudmora to iray aripen ton Israelita. Imanoen pa so reaksion to ed kerew ya ibulos to la iray Israelita pian onla ed kalawakan a manselebra na “sakey a piesta” ed si Jehova. Balet, onia so matangsit ya ebat nen Faraon: “Siopa ta si Jehova, a nepeg ko a dengelen so boses to ya abuloyan ko so Israel ya onla?”​—Exodo 5:1, 2.

⁶ Kayarin sinagmak nen Faraon so anemiran salot, oniay imbaga nen Jehova ya itepet nen Moises ed manuley na Ehipto: “Manpangta ka ya onsumpa ed katooan ko ya agmo ni paulyan so katooan ko ya ontaynan?” (Exodo 9:17) Insan inyabawag nen Moises so komapiton salot, salanti, say graniso ya aneral ed dalin da. Kaalis na saray nibulos ya Israelita kayari na komasamplon salot, anguman so nonot nen Faraon tan inusilan to ira. Diad kaunoran, si Faraon tan saray armada to so nalner ed pegley na Ambalangan Dayat. Isipen pa no anto so inisip da sanen sikara so nalelegep la ed danum! Anto so resulta na panagpaatagey nen Faraon? Oniay inkuan na saray mabayanin sundalo to: “Ontaynan itayo dia ed arapan na saray Israelitas; ta si Jehova so pinagkalaman da a mibakal ed saray Ehipsio.”​—Exodo 14:25.

7. Panon ya impatnag na saray manuley ed Babilonia so panagpaatagey?

⁷ Impaabeba met nen Jehova so arum niran mapaatagey a manuley. Sakey lay Senakerib, ya ari na Asirya. (Isaias 36:1-4, 20; 37:36-38) Diad kaunoran, say Asirya so sinakop na saray taga-Babilonia, balet ta niyabeba met so duaran mapaatagey ya ari na Babilonia. Nonoten pa so ponsia a naniinuman ira di Arin Belsasar tan saray bisita to ed palasyo, ya inusar da iray sinamsam dan panag-inuman ed templo nen Jehova legan dan dadayewen so dirios na Babilonia. Biglan walay pinmanengneng iran gamet na lima na too ya angisulat na sakey a mensahe ed padir. Sanen impaipaliwawa ed si propeta Daniel so misteryoson sulat, oniay impanonot to ed si Belsasar: “Say Sankatageyan a Dios initer to ed Nabucodonosor ya amam so panarian, . . . Balet sanen say puso to nipatagey, . . . nakal a nanlapu ed maari a trono to tan inala ra so gayaga to a nanlapu ed sikato. . . . Et sika ya anak to a [laki], O Belsasar, agmo pinaabeba so pusom, anggan naamtaan mo so sayan amin.” (Daniel 5:3, 18, 20, 22) Diad saman a labi, say armada na Medo-Persia so anakop ed Babilonia, tan apatey si Belsasar.​—Daniel 5:30, 31.

8. Panon so impideneng nen Jehova ed pigaran mapaatagey a totoo?

⁸ Isipen pa met so arum niran mapaatagey a lalaki a nanmudmora ed totoo nen Jehova: say Filisteon higante a si Goliat, say Persianon Primo Ministro a si Haman, tan si Arin Herodes Agripa, a nanuley ed probinsya na Judea. Lapud panagpaatagey da, sinagmak na satan a taloran lalaki so makapabaing ya ipapatey ya indapo na Dios ed sikara. (1 Samuel 17:42-51; Ester 3:5, 6; 7:10; Gawa 12:1-3, 21-23) Say paraan na impideneng nen Jehova ed saratan a mapaatagey a lalaki so mangidadanet ed sayan katuaan: “Say mapangta onla ed unaan na kabagbag, tan say mapasang ya espiritu ed unaan na kapelag.” (Uliran 16:18) On, talagan ‘susumpaen na Dios iray atagey a linawa.’​—Santiago 4:6.

9. Panon a nagmaliw a traidor iray ari na Tiro?

⁹ Midumaan ed saray mapaatagey a manuley na Ehipto, Asirya, tan Babilonia, say ari na Tiro so aminsan a nagmaliw a matulong ed totoo na Dios. Legan na uley nen Arin David tan si Solomon, sikato so angitarya na onsiano iran komikimey ontan met ed materyales parad saray paalagey na ari tan ed templo na Dios. (2 Samuel 5:11; 2 Awaran 2:11-16) Makapaermen ta diad saginonor  et saray taga-Tiro so sinmumpa ed totoo nen Jehova. Akin ya ontan so agawa?​—Salmo 83:3-7; Joel 3:4-6; Amos 1:9, 10.

‘Say Pusom Nampaatagey’

10, 11. (a) Siopa so nayarin nikompara ed arari na Tiro? (b) Anto so akapanguman ed awawey na saray taga-Tiro nipaakar ed Israel?

¹⁰ Pinuyanan nen Jehova so propeta ton Ezequiel pian iwalwal tan kondenaen so dinastiya na arari na Tiro. Satan a mensahe ya impasabi ed “ari na Tiro” so walaan na saray balikas a matukoy a manideskribe ed dinastiya na Tiro tan say orihinal a traidor, si Satanas, ya “agtinmalindeg ed katuaan.” (Ezequiel 28:12; Juan 8:44) Si Satanas so datin matoor ya espiritun pinalsa diad organisasyon nen Jehova, a tugyopen na saray mangatatawen ya ananak To. Diad panamegley nen Ezequiel et impabitar nen Jehova a Dios so manunan sengegan na insian na dinastiya na Tiro tan si Satanas:

¹¹ “Wala ka nensaman ed Eden, a tanamanan na Dios; balang mabli a bato sikato so sakbong mo, . . . Sika so nilanaan a kerubin a manakbong; . . . Sika ayadyari ka nensaman ed saray dalan mo a nanlapu ed agew ya inkapalsam angga ed aromog ed sika so inkapikewet. Lapu ed karakel na impanlakom pinano ra so pegley mo ed panagduksa et sika nankasalanan ka: Kanian sika so . . . dineral ko, O mananakbong a kerubin, . . . Say pusom nipatagey lapu ed limgas mo; sika dineral mo so kakabatan mo lapu ed sinag mo.” (Ezequiel 28:13-17) On, lapud panagpaatagey et nagmaliw a maramsak so arari na Tiro sumpad totoo nen Jehova. Say Tiro so nagmaliw a mayamyaman a sentro na komersyo tan bantog lapud mararakep iran produkto to. (Isaias 23:8, 9) Saray arari na Tiro so nagmaliw ya arogante, tan pinairap da iray totoo na Dios.

12. Anto so sengegan na manamalikdon inkiwas nen Satanas, tan anto so intultuloy ton ginawa?

¹² Mipadpara, say espiritun pinalsa a nagmaliw a Satanas so datin walaan na kakabatan a nakaukolan pian nasumpal to so antokaman ya asainmin ya iter na Dios ed sikato. Imbes a misalsalamat, sikato so nagmaliw a “mapangaya” tan minudmora to so paraan na pananguley na Dios. (1 Timoteo 3:6) Atagtagey so pakanengneng to ed dili to kanian pinilalek to a sikatoy dayewen nen Adan tan Eva. Satan a mauges a pilalek so nambunga tan nanresulta ed kasalanan. (Santiago 1:14, 15) Tinukso nen Satanas si Eva a mangan na bunga na sakey a kiew ya insebel na Dios. Insan, sikato so inusar nen Satanas pian sagyaten si Adan a mangan met ed insebel a bunga. (Genesis 3:1-6) Lapud satan et impulisay na inmunan sanasawa so kanepegan na Dios a manuley ed sikara tan, bilang resulta, sikara so nagmaliw a managdayew nen Satanas. Anggapo so limitasyon na panagpaatagey nen Satanas. Nanggunaetan ton tuksoen so amin ya intelihentin pinalsa ed tawen tan diad dalin, pati si Jesu-Kristo, pian mandayew ed sikato tan ipulisay da so inkasoberano nen Jehova.​—Mateo 4:8-10; Apocalipsis 12:3, 4, 9.

13. Anto so resulta na panagpaatagey?

¹³ Naimano yo sirin a say panagpaatagey so ginmapo ed si Satanas; satan so manunan sengegan na kasalanan, kairapan, tan kaugsan ed mundo natan. Bilang “dios na sayan panaon,” si  Satanas so mantutultuloy a mangiyaalibansa na agmanepeg iran liknaan a panagpasirayew tan panagpaatagey. (2 Corinto 4:4) Amta to ya antikey lay panaon to, kanian babakalen to iray tuan Kristiano. Say gagala to et pabenegen to ira ed Dios, ya aroen day inkasikaran dili, manpasirayew, tan manpaatagey. Impasakbay na Biblia a saratan a sinisiblet ya ugali so onkasmak ed sarayan “kaunoran ya agew.”​—2 Timoteo 3:1, 2; Apocalipsis 12:12, 17.

14. Unong ed anton paraan so pideneng nen Jehova ed saray matudion pinalsa to?

¹⁴ Diad biang nen Jesus, makpel ton inwalwal so mauges iran resulta na panagpaatagey nen Satanas. Diad amitlon inkagawa tan diad arapan na saray mantunongtunongan a kakabusol to, indanet nen Jesus so paraan na pideneng nen Jehova ed katooan: “Anggan siopa a mamaatagey ed sikato lanlamang napaabeba; et say manpaabeba napaatagey.”​—Lucas 14:11; 18:14; Mateo 23:12.

Alwaran Yo so Puso Yo Sumpad Panagpaatagey

15, 16. Anto so sengegan na impanpaatagey nen Hagar?

¹⁵ Nayarin naimano yo a saray asaglawin alimbawa na panagpaatagey et mangilalanor ed saray bantog a totoo. Kabaliksan kasi na satan a saray ordinaryon totoo et andian na tendensian manpaatagey? Andi. Nodnonoten pa so agawa ed sankaabungan nen Abraham. Satan a patriarka so andian na ilalak a tomatawir, tan agla makaanak so asawa ton si Sara lapud akulaw la. Kustombre nensaman parad sakey a laki, a singa diad kipapasen nen Abraham, a mangala na komaduan asawa pian makapanilalak. Inabuloyan na Dios so ontan a panangasawa lapud aliwa nin saman so panaon pian iletneg to lamet so orihinal ya estandarte to ed panamaley diad limog na saray tuan managdayew.​—Mateo 19:3-9.

¹⁶ Lapud panangombinse na asawa to, si Abraham so inmabuloy a manilalak na sakey a magmaliw a tomatawir diad panamegley nen Hagar, say Ehipsion aripen nen Sara. Bilang komaduan asawa nen Abraham, si Hagar so nanlukon. Nepeg komon a sikatoy misalamat a maong lapud satan a pribilehyo to. Balet, inabuloyan toy puso to a magmaliw a mapaatagey. Oniay salaysay na Biblia: “Sanen anengneng to a nanlukon, abalaw ed mata to so katawan to a bii.” Lapud satan ya awawey to, linmesa so pankokolkol ed sankaabungan nen Abraham kanian pinataynan nen Sara si Hagar. Balet ta wala so solusyon ed saman a problema. Oniay insimbawa na anghel na Dios ed si Hagar: “Pawil ka ed katawan mo, tan manpaabeba ka ed saray limalima to.” (Genesis 16:4, 9) Mabitar ya inawat nen Hagar itan a simbawa tan impetek to so ugali to ed si Sara, tan nagmaliw ya inmunan ateng na dakel a totoo.

17, 18. Akin a nepeg itayon manalwar sumpad panagpaatagey?

 ¹⁷ Iyiilustra na agawa ed si Hagar a nayarin magmaliw a mapaatagey so sakey a too sano onaligwas so kipapasen to. Say leksion et anggan say sakey a Kristiano ya angipatnag na maong a puso diad panaglingkor ed Dios et nayarin magmaliw a mapaatagey sano nawalaan lay kayamanan odino autoridad. Satan ya awawey so nabayuboan met sano sikato so irayew na arum lapud aligwas, kakabatan, odino abilidad to. On, say sakey a Kristiano so nepeg a manalwar pian agto nabayuboan ed puso to so panagpaatagey. Petepeteg itan sano sikato so onaligwas odino makaawat na kaaruman a responsabilidad.

¹⁸ Say sankabiskegan a rason no akin a paliisan tayo so panagpaatagey et say panmoria na Dios ed satan ya ugali. Oniay ibabaga na Salita to: “Say atagey a kanenengneng, tan mapangta a puso, anggan say tinkaw na marelmeng, sikato so kasalanan.” (Uliran 21:4) Makapainteres ta papasakbayan na Biblia iray Kristiano a ‘mayayaman dia ed sayan mundo’ ya ag-ira “mantagey na linawa.” (1 Timoteo 6:17; Deuteronomio 8:11-17) Saray Kristiano ya aliwan mayaman et nepeg ya ompaliis ed pakawalaan na maibeg odino “mauges a mata,” tan nepeg dan tandaan a say panagpaatagey so nayarin nagawa ed amin, mayaman man odino pobri.​—Marcos 7:21-23; Santiago 4:5.

19. Diad anton paraan a dineral nen Uzias so maong a reputasyon to?

¹⁹ Say panagpaatagey pati ed arum niran mauges ya ugali so maneral ed maong a relasyon ed si Jehova. Alimbawa, konsideraen pa so gapo na impanuley nen Arin Uzias: “Ginawa to so maptek ed saray mata nen Jehova, . . . et impasen to so inkasikato a mananap ed Dios . . . et leleg ya inanap to si Jehova, sikato so ginawa na Dios a maaligwas.” (2 Awaran 26:4, 5) Balet, makapaermen ta dineral nen Arin Uzias so maong a reputasyon to, lapud ‘say puso to so nampaatagey anggad nanggawa na sankabandayan.’ Sikato so nagmaliw a mapaatagey, a linmoob ed templo pian manpasob na insenso. Sanen pinasakbayan na saray saserdote ya agto gagawaen iman a mapalakbat a kiwas, “Si Uzias sinmanok.” Bilang resulta, indapo nen Jehova ed sikato so kating, tan inatey ya andian na panangabobon na Dios.​—2 Awaran 26:16-21.

20. (a) Panon a niiyan ed kapeligroan so maong a reputasyon nen Arin Ezekias? (b) Anto so konsideraen ed ontumbok ya artikulo?

²⁰ Niduma yo so alimbawa nen Arin Ezekias. Diad aminsan ya inkagawa et napepeligro so alay abig a reputasyon na ari lapud ‘say puso to so nampaatagey.’ Makapaliket ta “si Ezekias nampaabeba nipaakar ed pasirayew na puso to” tan agamoran to lamet so panangabobon na Dios. (2 Awaran 32:25, 26) Imanoen pa a say anaeg ed inkamapaatagey nen Ezekias et say kapaabebaan. On, say kapaabebaan so kasunian na panagpaatagey. Kanian diad ontumbok ya artikulo et konsideraen tayo no panon tayon bayuboan tan pansiansiaen so kapaabebaan bilang Kristiano.

21. Anto so nailaloan na saray mapaabeban Kristiano?

²¹ Balet, agtayo lilingwanan so amin a mauges  a bunga na panagpaatagey. Lapud ‘susumpaen na Dios iray atagey a linawa,’ determinado itayon ipulisay so liknaan na agmanepeg a panagpasirayew. Legan tayon pambabanikelan so pagmaliw a mapaabeban Kristiano, makapanilalo itayo ed kililiktar diad baleg ya agew na Dios, sano naekal la ed dalin iray mapaatagey tan say epekto na panagpaatagey da. Diad ontan, “mansampot so panagpaatagey na too tan naderal so panagpasirayew na amin a katooan, . . . tan nitandoro so Katawan labat diad satan ya agew.”​—Isaias 2:17, Maung a Balita.

Saray Punton Dalepdepen

• Panon yon deskribien so mapaatagey a too?

• Anto so gapoan na panagpaatagey?

• Anto so sengegan a nayarin magmaliw a mapaatagey so sakey a too?

• Akin a nepeg tayon paliisan so panagpaatagey?

[Tepetepet Parad Panagaral]

[Litrato ed pahina 23]

Nipaabeba si Faraon lapud panagpaatagey to

[Litrato ed pahina 24]

Si Hagar so nagmaliw a mapaatagey lapud inyaligwas na kipapasen to

[Litrato ed pahina 25]

Nampaabeba si Ezekias tan agamoran to lamet so panangabobon na Dios