Kasin Manakar Kayon Kaiba so Dios?
Kasin Manakar Kayon Kaiba so Dios?
“Manakar a mauy-uyamo ed Dios mo.”—MIQUEAS 6:8.
1, 2. Panon a niyaliling so liknaan nen Jehova ed sikatayo diad samay liknaan na sakey ya ateng a mangibabangat ed anak ton manakar?
SAKEY ya ugaw, ya akaandereng a tuging-tuging, so onaalawat ed ateng to tan ginmapo la ed primero iran kupbang to. Singano aliwan importante itan ya agawaan, balet ta parad atateng to et makanakana itan a gapoan, sakey a bektan napno na sipan ed arapen. Pirawrawat na atateng a nakaibay melag ya anak da a manaakar, a sankatabin da, diad onsabi iran bulan tan taotaon. Diad dakel a paraan et pirawat dan taryaan so ugaw na panangigiya tan suporta anggad arapen.
2 Ontan met so liknaan nen Jehova ed saray mangaraldalin ya ananak to. Oniay aminsan ya inkuan to nipaakar ed totoo ton Israel, odino Efraim: “Imbangat ko si Efraim a manakar, sinayakop ko ra ed saray taklay ko . . . Ginuyor ko ra ed saray lubir na sakey a too, ed saray singer na aro.” (Oseas 11:3, 4) Adeskribe dia si Jehova bilang sakey a maaron ateng a maanos a mangibabangat ed anak to a manakar, a nayarin sampaten to ed taklay to so ugaw sano natumba. Si Jehova, say sankaabigan ya Ateng, so magunaet a mangibangat ed sikatayo no panon so manakar. Panliketan to met so pangiba ed sikatayo legan itayon onaaligwas. Unong ya ipapabitar na teksto ya angibasiyan na tema, makapankurang itayo a kaiba so Dios! (Miqueas 6:8) Balet anto so kabaliksan na panakar a kaiba so Dios? Akin a nakaukolan tayon gawaen itan? Panon itan a posible? Tan antoran bendisyon so nagamoran ed panakar a kaiba so Dios? Sansakeyen tayon konsideraen itan ya apatiran tepet.
Anto so Kabaliksan na Panakar a Kaiba so Dios?
3, 4. (a) Anto so makatantanda nipaakar ed deskripsion a manakar a kaiba so Dios? (b) Anto so kabaliksan na panakar a kaiba so Dios?
3 Siempre, say too so aliwan literal a makapanakar a kaiba si Jehova, a sakey ya espiritu. (Exodo 33:20; Juan 4:24) Kanian sano sasaglawien na Biblia so totoo a manaakar a kaiba so Dios, satan et diad piguratibon pantalos. Dedeskribien na satan so makatantandan deskripsion, ya agnapegetan na pandurumaan na nasyon tan kultura, tan pati ed panaon. On, wala ta so lugar odino panaon ya agnatalosan na totoo so ideyan manaakar so sakey a too a walay kaulop to? Agta dedeskribien na satan so ligsa tan inkaapit? Say ontan iran liknaan so mangiter ed sikatayo na aralem a pakatalos ed kabaliksan na panakar a kaiba so Dios. Balet ta magmaliw itayon espisipiko.
4 Nodnonoten pa so matoor a lalaki a si Enoc tan si Noe. Akin ya adeskribe ira bilang akiulop-ulop odino nanakar a kaiba so Dios? (Genesis 5:24; 6:9) Diad Biblia, say terminon “manakar” so mabetbet a mankabaliksan na panumbok ed sakey a kurang. Pinili nen Enoc tan Noe so sakey a kurang na bilay a mitunosan ed linawa nen Jehova a Dios. Aliwan singa saramay totoo ed mundo a walad kaliberliber da, nanilalo ira ed panangiwanwan nen Jehova tan tinulok da so panangidirehi to. Sikara so nanmatalek ed sikato. Kabaliksan kasi na satan a sikara so indesisyonan nen Jehova? Andi. Impagamor nen Jehova ed totoo so bulos a panagdesisyon, tan labay ton usaren tayo itan a langkap tekep na “pakayari tayon mankatunongan.” (Roma 12:1, NW) Balet, legan itayon mandedesisyon, mapaabeba tayon aabuloyan so pakayari tayon mankatunongan pian paigiya ed agnatukor tan atagtagey a kanonotan nen Jehova. (Uliran 3:5, 6; Isaias 55:8, 9) Bilang resulta, legan itayon mankukurang ed bilay, sikatayo so manbabaroy a maapit tayon kaulop si Jehova.
5. Akin a sinaglawi nen Jesus so pangarum na sankasiko ed karukey na bilay na sakey a too?
5 Mabetbet ya iyaaliling na Biblia so bilay diad sakey a panagbaroy odino panakar. Diad arum a kipapasen et direkta itan a panangikompara, balet diad arum a kipapasen et ipapasagilig labat itan. Singa bilang, oniay imbaga nen Jesus: “Siopa ta ed sikayo so, lapu ed kapagaan to makapangiyarum na sankasiko ed inalageyan to?” (Mateo 6:27) Nayarin makawetwet ed sikayo so arum ed saratan a salita. Akin a sinaglawi nen Jesus so pangarum na “sankasiko,” a sukat na kaarawi, diad “inalageyan” odino karukey na bilay na too, a susukaten ed kabayag na panaon? * Si Jesus so mapatnag a mangililitrato ed bilay bilang panagbaroy. Bilang epekto, imbangat to a say panaburido so agmakatulong ed sikayo pian naaruman na anggan sankarangan a kupbang so pambabaroy yo ed bilay. Balet, nepeg tayo kasin isipen ya anggapo lay nagawaan tayo nipaakar ed kaarawi na aakaren tayo? Andin balot! Satan so mangipaarap ed sikatayo diad komaduan tepet, Akin a nakaukolan tayo so manakar a kaiba so Dios?
Akin a Nakaukolan Tayo so Manakar a Kaiba so Dios?
6, 7. Saray ag-ayadyarin totoo so walaan na anton pankakkaukolan, tan akin a nepeg itayon mandependi ed si Jehova pian napenek itan a pankaukolan?
6 Sakey a rason no akin a nakaukolan itayon manakar a kaiba si Jehova a Dios et nipaliwawa diad Jeremias 10:23: “O Jehova, amtak a say dalan na too anggapo ed sikato lanlamang; aliwa a wala ed too a manakar a mangitonton ed saray kurang to.” Kanian sikatayon totoo so andian na abilidad odino kanepegan a mangiwanwan ed dilin kurang na bilay tayo. Sikatayo so mankakkaukolan na panangigiya. Saramay mangipipilit ed dilin paraan da, ya independente ira manlapud Dios, so makakagawa na lingo a mipara ed ginawa nen Adan tan Eva. Inako na inmunan sanasawa so kanepegan a manpili parad inkasikaran dili nipaakar ed no anto so maong tan mauges. (Genesis 3:1-6) Satan a kanepegan et “anggapo” ed sikatayo.
7 Agyo kasi nalikna so pankaukolan na panangigiya diad pambabaroy tayo ed bilay? Inagew-agew a nipapaarap itayo ed angkelag tan angkabaleg iran dedesisyonan. Arum ed saratan so mairap tan makaapekta ed arapen tayo—ontan met ed saray inaro tayo ed bilay. Balet, isipen pa a walay mas abaybayag lan nambilay tan mas makabat a tuloy nen say sikatayo, a sikatoy maliket a mangiter ed sikatayo na maaron panangigiya ed panaggawa na desisyon! Makapaermen, maslak a totoo natan so malabay nin manmatalek ed dilin desisyon da tan igigiya da iray dilin kurang da. Ibabaliwala ra so katuaan a nidatak ed Uliran 28:26: “Say manmatalek ed dili a puso to sikato so maatiw; balet say manakar a makabat, nilaban naani.” Labay nen Jehova a napaliisan tayo so kapeligroan ya epekto na panagmatalek ed mapalikdon puso na too. (Jeremias 17:9) Labay to itayon mankurang ed kakabatan, a manmatalek ed sikato bilang say makabat a Manangigiya tan Instruktor tayo. Sano gawaen tayo itan, say pankurang tayo ed bilay so maligen, makapaliket, tan makapenek.
8. Anto so nisipor a pansusumpalan na totoo lapud kasalanan tan ag-inkayadyari, ingen anto so labay nen Jehova parad sikatayo?
8 Say sananey nin rason no akin a nakaukolan tayo so manakar a kaibay Dios et mangilalanor ed kaarawi na labay tayon akaren. Idadalatdat na Biblia so makapaermen a katuaan. Diad sakey a pantalos, amin ya ag-ayadyarin totoo so manaakar a mamaarap ed parehon destinasyon. Diad panedeskribe ed saray subok a nasagmak diad itakken, oniay ibabaga na Eclesiastes 12:5: “Say too onla ed maando ya abung, tan saray managogol onliber ira ed saray pulong.” Anto so “maando ya abung”? Say lubok a sipor a pangiyaakaran ed sikatayo na kasalanan tan ag-inkayadyari. (Roma 6:23) Balet, say labay nen Jehova et aliwan say antikey tan maprobleman panagbilay manlapud kianak anggad ipatey. (Job 14:1) Dia lambengat ed panakar a kaiba so Dios a sikatayoy makapanilalon mankurang unong ed inggagala ton panakar tayo, salanti, diad andi-anggaan. Agta ontan so labay yo? Malinew sirin a nakaukolan yoy manakar a kaiba so Ama yo.
Panon Itayon Makapanakar a Kaiba so Dios?
9. Akin a nensaman et walaray panaon a singa inyamot nen Jehova so inkasikato manlapud totoo to, ingen anto so impaseguro ton itarya unong ed Isaias 30:20?
9 Say komatlon tepet a konsideraen tayo et makanepegan na maalwar a panangimano tayo. Salanti, Panon itayon makapanakar a kaiba so Dios? Naromog tayo so ebat diad Isaias 30:20, 21: ‘Ag-onamot ed anggan kapigan so Mangibangat ed sikayo, noag ingen saray mata yo nanengneng da so Mangibangat ed sikayo. Et saray layag yo makadngel ira naani na sakey a salita ed beneg yo, a kuan to, Saya so dalan, ondalan kayo ed sikato; sano onarap kayo ed nikawanan, tan sano onaarap kayo ed nikawigi.’ Diad sayan makapaseseg a teksto, saray salita nen Jehova a nikurit ed bersikulo 20 so nayarin angipanonot ed totoo to a sanen sikara so nanrebelde ed sikato et singano inyamot toy inkasikato manlapud sikara. (Isaias 1:15; 59:2) Balet, diad sayan punto et agdeneskribe ya onaamot si Jehova, noagta sikatoy mapalaway ya akaalagey ed arap na matoor a totoo to. Nayarin naisip tayo so sakey a managbangat ya akaalagey ed arap na saray estudyante to, ya ipapatnag to a labay to iran makaaral.
10. Diad anton pantalos a ‘narerengel tayo so boses ed benegan tayo’ manlapud Baleg a Managbangat tayo?
10 Diad Isa 30 bersikulo 21, walay adeskribe a nikaduman panangilitrato. Si Jehova so nilitrato bilang manaakar ed benegan na totoo to, ya ibabaga to no iner so arapen da. Inkuan na saray iskolar na Biblia a sayan balikas so nayarin nibase ed paraan na managpastol a manumtumbok no maminsan ed saray karnero to, a sikatoy onkekelyaw pian iwanwan ira tan nipaliis ira ed agsuston direksion. Panon iyan onaplika ed sikatayo? Bueno, sano ontutupleg itayo ed Salitay Dios parad giya, say babasaen tayo et saray salitan nikurit ed nilibon taon lay apalabas. Saratan so manlalapu ed benegan tayo, a singa panangibaga, diad apalabas a panaon. Ingen, mitukoyan iratan ed panaon tayo a singa met nen nisulat iratan. Say simbawa na Biblia so mangigigiya ed sikatayo diad agew-agew iran desisyon tayo, tan ontulong itan ed sikatayo pian niplano tayo so kurang na bilay tayo diad onsabi iran panaon. (Salmo 119:105) Sano magunaet tayon anapen so ontan a simbawa insan iyaplika tayo, si Jehova so magmaliw a Manangigiya tayo. Sikatayo so manaakar a kaiba To.
11. Unong ed Jeremias 6:16, anton makapasagyat a panangilitrato so deneskribe nen Jehova parad totoo to, balet panon so inkiwas da?
11 Kasin aabuloyan tayo so Salitay Dios a maapit a mangigiya ed sikatayo? Makagunggona so ontunda no maminsan pian matuan usisaen tayo so inkasikatayo. Konsideraen pa so bersikulo a makatulong ed sikatayon manggawa ed satan: “Onia so kuan nen Jehova, Onalagey kayo ed saray dalan tan onnengneng kayo, tan tepeten yo so saray daan a basbas to, iner so maong a dalan; et ondalan kayod’man, et makaromog kayo naani na painawa nipaakar ed saray kamarerwa yo.” (Jeremias 6:16) Saratan a salita so nayarin mangipanonot ed sikatayo ed sakey a managbaroy ya ontutunda diad saray nansangaan pian ontepet na direksion. Diad espiritual a pantalos, ontan met so kinaukolan a gawaen na saray rebelyoson totoo nen Jehova ed Israel nensaman. Kinaukolan dan anapen so dalan a papawil ed “saray daan a basbas.” Satan a “maong a dalan” so nankurangan na saray matoor ya atateng da, say dalan a kinasipaan na nasyon. Makapaermen ta agtinmulok so Israel ed sayan maaron panonot nen Jehova. Oniay intuloy na satan met a bersikulo: ‘Balet sikara inkuan da, Agkami naani ondalan ed satan.’ Ingen ta, diad modernon panaon, duma so inkiwas na totoo na Dios ed satan a simbawa.
12, 13. (a) Panon so inkiwas na saray alanaan a patumbok nen Kristo ed simbawa na Jeremias 6:16? (b) Panon tayon usisaen so inkasikatayo nipaakar ed dalan a pankukurangan tayo natan?
12 Manlapu la nen mansamposampot so koma-19 siglo, saray alanaan a patumbok nen Kristo so angiyaplika ed simbawa na Jeremias 6:16. Bilang sakey a grupo, indaulo ra so sigpot-puso ya ipapawil ed “saray daan a basbas.” Aliwan singa say apostatan Kakristianoan, sikara so matoor a tinmumbok ed “uliran na saray maabig a salita” ya inletneg nen Jesu-Kristo tan inyalibansa na saray matoor a patumbok to nen inmunan siglo K.P. (2 Timoteo 1:13) Anggad sayan panaon, saray alanaan so mantutulongan ed balang sakey ontan met ed “arum a karnero” a kakaiba ra pian gegemtanen da so makagunggona tan maliket a dalan na kabibilay ya intalirak na Kakristianoan.—Juan 10:16.
13 Diad pangitatarya ra ed espiritual a tagano ed dugan panaon, say matoor ya aripen a klase so ontutulong ed minilyon a makaromog ed “saray daan a basbas” tan manakar a kaiba so Dios. (Mateo 24:45-47) Kaiba kayo kasi ed saratan a minilyon? No ontan, anto so nagawaan yo pian agkayo onkasipa, a tumboken yoy dilin dalan yo? Makabat so panapanaon ya itunda pian usisaen so dalan a pankukurangan yo ed bilay. No matoor yon babasaen so Biblia tan saray publikasyon a nibase ed Biblia tan aatendian iray programa na panangibangat ya itatarya na saray alanaan natan, sikayo so nipapasal a manakar a kaiba so Dios. Tan sano mapaabeba yon iyaaplika so simbawa ed sikayo, peteg a sikayo so manaakar a kaiba so Dios, ya ontutumbok ed “saray daan a basbas.”
Mankurang a Singano “Nengnengnengen so Agnanengneng”
14. No petepeteg si Jehova ed sikatayo, panon itan a napatnagan ed personal iran desisyon tayo?
14 Pian makapanakar itayo a kaiba si Jehova, sikato so nepeg a petepeteg ed sikatayo. Tandaan, pinaseguroan nen Jehova iray matoor ed Israel nensaman a sikatoy ag-akaamot manlapud sikara. Natan, ipaparungtal to met so inkasikato ed totoo to bilang say Baleg a Managbangat da. Kasin ontan lan kapeteg si Jehova ed sikayo, a singano akaalagey ed arap yo pian mangibangat ed sikayo? Ontan a klase na pananisia so nakaukolan tayo pian makapanakar itayo a kaiba so Dios. Si Moises so walaan na ontan a pananisia, ta “nansiansia a singa to nengnengnengen so agnanengneng.” (Hebreos 11:27) No petepeteg si Jehova ed sikatayo, ikonsidera tayo sirin so liknaan to sano mandedesisyon itayo. Alimbawa, agtayo nononoten so manggawa na kasalanan insan salien iratan ya iyamot manlapud Kristianon mamatatken odino kapamilyaan tayo. Imbes, panggunaetan tayo so manakar a kaiba so Dios anggano anggapo so too a makakanengneng ed sikatayo. Singa si Arin David nensaman, say determinasyon tayo et: “Manakar ak ed loob na abung ko a nagnap so pusok.”—Salmo 101:2.
15. Panon a makatulong so pililimog tayo ed saray Kristianon agagi tayo pian magmaliw a petepeteg si Jehova ed sikatayo?
15 Natatalosan nen Jehova a sikatayo et ag-ayadyari tan makabos a pinalsa, a nairapan no maminsan a manisia ed agnanengneng. (Salmo 103:14) Baleg so nitutulong to ed sikatayo pian natalonaan itan a kaleteyan. Alimbawa, tinipon to so “totoo a nipaakar ed ngaran to” manlapud amin a nasyon na dalin. (Gawa 15:14) Legan itayon nankakasakey a manlilingkor, sikatayo so makapanpapabiskegan. Say pakadngel ed no panon so impanulong nen Jehova ed sakey a kaagian tayo ed espiritual ya akatalona ed sakey a kaleteyan odino akalabas ed mairap a subok so ontulong pian lalon magmaliw a petepeteg so Dios ed sikatayo.—1 Pedro 5:9.
16. Panon itayon natulongan na pakaaral ed si Jesus pian makapanakar itayon kaiba so Dios?
16 Manuna ed amin, inter nen Jehova ed sikatayo so alimbawa na Anak to. Oniay inkuan nen Jesus: “Siak so dalan, tan say katuaan, tan say bilay. Anggapo so ondateng ed Ama, noag dia ed panamegley ko.” (Juan 14:6) Say panaral ed impanbilay nen Jesus diad dalin so sakey ed saray sankaabigan a paraan pian magmaliw a lalon petepeteg si Jehova ed sikatayo. Amin ya imbaga odino ginawa nen Jesus so naspot a pakapatnagan na personalidad tan saray paraan na mangatatawen ya Ama to. (Juan 14:9) No manggagawa itayo na saray desisyon, nakaukolan tayon maalwar ya isipen no panon ya asikasoen nen Jesus iray pamaakaran. Sano napatnagan ed saray desisyon tayo so maalwar tan masimoon ya impannonot tayo, diad ontan et natutumbok tayo iray bakat nen Kristo. (1 Pedro 2:21) Bilang resulta, manaakar itayon kaiba so Dios.
Antoran Bendisyon so Nagamoran?
17. No manakar itayo ed dalan nen Jehova, anton “painawa” so naromog na saray kamarerwa tayo?
17 Say panakar a kaiba so Dios a Jehova so mansumpal ed makapaliket a bilay. Tandaan so insipan nen Jehova ed totoo to nipaakar ed pananap ed “maong a dalan.” Oniay inkuan to: “Ondalan kayod’man, et makaromog kayo naani na painawa nipaakar ed saray kamarerwa yo.” (Jeremias 6:16) Anto so kabaliksan na “painawa”? Kasin sakey itan a mainawan bilay a napnoy likeliket tan kayamanan? Andi. Wala so magmaong nin intarya nen Jehova, sakey a bengatlan mataltalag a naromog na anggan say sankayamanan ed limog na katooan. Say pakaromog na inawa nipaakar ed kamarerwa yo et mankabaliksan na pakawalaay kareenan na nonot, liket, inkapnek, tan inkakontento ed espiritual. Say ontan a mainawan kipapasen so mankabaliksan a makapanmatalek kayo a say pinili yo et sankaabigan a basbas ed bilay. Say ontan a kareenan na nonot so mataltalag a bendisyon ed sayan mundo a napnoy problema!
18. Anton bendisyon so labay nen Jehova a nagamoran yo, tan anto so determinasyon yo?
18 Siempre, say bilay tayon mismo et baleg a bendisyon. Anggan say antikey a pankurang ed bilay so magmaong ni nen say agbalot pankurang. Balet, agbalot labay ya ibaga nen Jehova ya antikey labat so pambaroy tayo, a manlapud biskeg na inkatobonbalo anggad ot-ot na inkatatken. Andi, labay nen Jehova a nawalaan kayo na sankaabigan a bendisyon ed amin. Labay ton manakar kayo a kaiba to diad andi-anggaan! Saya so maabig a nibalikas ed Miqueas 4:5: “Saray amin a baley manakar ira balang sakey ed ngaran na dios to; et manakar itayo naani dia ed ngaran nen Jehova a Dios tayo ed ando lan ando lawas.” Labay yo kasin nagamoran itan a bendisyon? Labay yo kasi so manbilay ed makapasagyat a “peteg a bilay” ya iyoopresi nen Jehova? (1 Timoteo 6:19) Sirin, gawaen yon determinasyon yo so panakar a kaiba si Jehova natan, nabuas, tan ed kada agew anggad andi-anggaan!
[Paimano ed leksab]
^ par. 5 Sinalatan na arum a patalos na Biblia so “sankasiko” ed sayan bersikulo diad sakey a panagsukat ed panaon, a singa say “sakey a bekta” (The Emphatic Diaglott) odino “sakey a minuto” (A Translation in the Language of the People, nen Charles B. Williams). Balet, say talagan kabaliksan na salita ya inusar ed orihinal a teksto et sankasiko, a ngalngali 45 sentimetro ed karukey.
Panon Yon Ebatan?
• Anto so kabaliksan na panakar a kaiba so Dios?
• Akin a nepeg yon isipen a nakaukolan so panakar a kaiba so Dios?
• Anto so makatulong ed sikayo pian makapanakar a kaiba so Dios?
• Antoran bendisyon so nagamoran na saramay manaakar a kaiba so
[Tepetepet Parad Panagaral]
[Saray litrato ed pahina 23]
Diad panamegley na saray pahina na Biblia, narerengel tayo so boses nen Jehova ed benegan tayo a kuanto, “Saya so dalan”
[Litrato ed pahina 25]
Diad saray pantitipon, naaawat tayo so espiritual a tagano ed suston panaon