Maabig so Epekto na Maong a Kondukta

DIAD sakey a melag ya isla a walad asingger ed baybay na abalaten a Hapon, sakey ya ina a kaibay taloran ananak to so iyaaralan ed Biblia na saray Tasi nen Jehova. Lapud nanenengneng itan na kakaabay da diad satan a niarawin lugar a maapit ya ontutumbok ed abangonan, samay ina so agda la iimanoen kapag no naabet da. “Say lalon pakakasakitan ko nilikud ed agda pangiimano ed siak et papaliisan da met so masiken ko tan say ananak mi,” so insalaysay to. Anggaman ontan, oniay impurek to ed ananak to: “Nepeg ya ag-itayo ontutundan mangibano ed kakaabay tayo parad si Jehova.”​—Mateo 5:47, 48.

Diad abung da et imbangat to iray anak to a magmaliw a magalang anggaman agda ira iimanoen. Legan iran manbiabiahe a paarap ed hot spring, a ditan so naynay a pasyaran da, saray ugugaw et nampasal ed loob na luluganan no panon so pangibano ra. Kasabi ra ed saman a lugar, sarayan ugugaw so naynay ya akaimis a mangibabalikas na, “Konnichiwa!”​—“Maabig ya agew!” Sayan pamilya so nantultuloy ya angibano ed amin a naabet da, anggano agni ran siansia inimano na kakaabay da. Anggaman ontan, wala ra so totoo ya akaimano ed maong a kondukta na saratan ya ugugaw.

Diad kaunoran et pigara lan kakaabay da so mangibabalikas met la na “Konnichiwa.” Kayari na duay taon, amin lan totoo lawari ed baley so oneebat met la ed panangibano na pamilya. Ibabano met la na saratan so sakey tan sakey tan mas makaaro la ra. Kinaliktan na kasandin mayor a pagalangan iraman ya ugugaw lapud agawaan da ed sayan pananguman. Balet sikatoy pinaseguroan na ina ra a gagawaen da lambengat so nepeg a gawaen na saray Kristiano. Diad saginonor, diad sakey a kontis ed panagpaliwawa ed interon-isla, insalaysay na sakey ed saray anak a laki no panon ya imbangat na ina to so pamilya ra a mangigalang ed arum anggano agda ira imanoen. Say paliwawa to so akala na primeron premyo tan niimprinta itan ed sakey a peryodiko ed baley. Natan et malikeliket so pamilya lapud maabig so epekto na impangiyaplika ra ed Makristiano iran prinsipyo. Lalon mainomay so manginabang na maong a balita ed arum a totoo no sikaray makaaro.