Tepetepet Manlapud Saray Managbasa

Napansiansia kasi na sakey a Kristiano so maong a konsiensia to no awaten to so trabahon walay bebembenan ya armas?

Ipapapuso na saray Tasi nen Jehova ed sankamundoan so inter na Dios a responsabilidad da a legpeten ed materyal so kapamilyaan da. (1 Timoteo 5:8) Balet, walaray klase na trabaho a mabitar a misumlangan ed saray prinsipyo na Biblia a nepeg a paliisan. Saratan a trabaho so misiglaotan ed panagsugal, lingon panguusar ed dala, tan say pangiyaalibansa ed saray produkto na tabako. (Isaias 65:11; Gawa 15:29; 2 Corinto 7:1; Colosas 3:5) Say arum niran klase na trabaho, anggaman agdirektan kinondena na Biblia, so nayarin manumlang ed konsiensia na sakey odino ed konsiensia na arum.

Personal a desisyon so iloob ed sekular a trabahon nakaukolan so pambemben na paltog odino arum ya armas. Balet, say trabahon walay bebembenan ya armas so mangipaarap ed sakey diad posiblin pankasalanan ed dala no kapilitan to lan usaren itan ya armas. Kanian, nakaukolan a manmotektek tan manpikasi so sakey a Kristiano no kasin awaten to so responsabilidad a biglaan lan panagdesisyon sano nalalanor lay bilay na too. Say pambemben na armas so mangipaarap met ed sakey a too diad kapeligroan na pakarisgo odino ipatey lapud iyataki odino ibawi na arum.

Nayarin naapektoan met so arum diad desisyon na sakey. Singa bilang, say manunan responsabilidad na sakey a Kristiano et say pangipulong ed maong a balita na Panarian. (Mateo 24:14) Posible kasin nibangat na sakey a too so arum pian ‘mikareenan ed ganaganay totoo,’ no sikato et mantratrabahon walay sankabembenan ton armas? (Roma 12:18) Komusta met so ananak odino arum niran membro na pamilya? Agkasi napeligro so bilay da no walay paltog diad loob na abung? Niarum ni, agkasi nagapol so arum ed talindeg na sakey a too nipaakar ed satan?​—Filipos 1:10.

Diad sarayan “kaunoran ya agew,” ondarakel so totoon ‘maruksa, maingongot ed saray maabig.’ (2 Timoteo 3:1, 3) No nodnonoten itan, nibaga kasin ‘anggapo so pakabalawan’ na sakey a too no sikatoy onloob ed trabahon nakaukolan so pambemben na armas a nayarin sikatoy makapi-enkuentro ed saratan a totoo? (1 Timoteo 3:10) Andin balot! Lapud satan, say kongregasyon so agmangipasen ed satan a too bilang ‘anggapo so pakabalawan’ to no sikatoy mantultuloy a manbemben na armas kayari na mapangasin impanimbawa ed sikato unong ed Biblia. (1 Timoteo 3:2; Tito 1:5, 6) Diad ontan, satan a laki odino bii so ag-onkualipika ed antokaman iran nikabiig a pribilehyo ed loob na kongregasyon.

Pinaseguroan nen Jesus iray babangatan to a no iyuna ra ed bilay da so intereses na Panarian, ag-ira kaukolan a manpagan tuloy ed saray pankaukolan da ed bilay. (Mateo 6:25, 33) On, no sigpot itayon manmatalek ed si Jehova, “sikato bembenan to [itayo]: agton balot paulyan so matunong a natentenyeg.”​—Salmo 55:22.