Manakar a Kaibay Dios, tan Man-ani na Maabig
Manakar a Kaibay Dios, tan Man-ani na Maabig
“Lapu ed nantanem ira na dagem man-ani ra naani na alimbusabos.”—OSEAS 8:7.
1. Panon itayon makapanakar a kaibay Jehova?
MAS liktar so pambaroy ed mapeligron lugar no say mangigiya et eksperiensyado la. Makabat so manakar a kaulop so ontan a manangigiya imbes a bukor tayo. Diad pigaran pamaakaran, iyiilustra na satan so situasyon a kawalaan tayo. Diad piguratibon panangibaga, si Jehova so mangiyoopresin mangigiya ed sikatayo diad maaw-awang a desierto na peles a marelmeng a mundo. Makabat itayo no miulop itayo ed sikato a manakar imbes a salien tayon iwanwan iray dilin kurang tayo. Panon itayon makapanakar a kaibay Dios? Diad panamegley na panumbok ed panangigiya ya itatarya to diad Salita to.
2. Anto so nasingbat ed sayan artikulo?
2 Siningbat na inmunan artikulo so simbolikon drama a naromog ed Oseas kapitulo 1 anggad 5. Unong a naimano tayo la, walaray praktikal a leksion ed satan a drama a makatulong ed sikatayon manakar a kaibay Dios. Singbaten tayo natan so pigaran pabitar na kapitulo 6 ya anggad 9. Makatulong no igapo tayo diad pansumaryo ed sarayan apatiran kapitulo.
Sumaryo
3. Isalaysay ed antikey iray lugan na Oseas kapitulo 6 anggad 9.
3 Imbaki nen Jehova si Oseas pian manpropesiya a manuna ed mamaamianen a samploran-tribu na panarian na Israel. Satan a nasyon, ya akabkabat met bilang Efraim, say ngaran na prominentin tribu na satan, so angibeneg ed Dios. Ipapabitar na Oseas kapitulo 6 anggad 9 a saray totoo so agnanmatoor diad impanunggay da ed sipanan nen Jehova tan impangagamil da na karelmengan. (Oseas 6:7) Sikaray nanmatalek ed minumundo iran alyansa imbes ya ompawil ed si Jehova. Lapud nantultuloy iran nantanem na kaugsan, sikara so man-ani met na kaugsan. Diad arum a panangibaga, manasingger la so pirmin panangukom. Balet, say propesiya nen Oseas so walaan met na makapaligsan mensahe. Apaseguroan iray totoo a nayarian day ompawil ed si Jehova tan nagamoran da so panangasi to no ipatnag day masimoon a panagbabawi.
4. Antoran praktikal a leksion ed propesiya nen Oseas so singbaten tayo?
4 Manlapud sarayan apatiran kapitulo na propesiya nen Oseas, makagamor itayo na kaaruman nin giya ya ontulong ed sikatayon manakar a kaibay Dios. Singbaten tayo so apatiran praktikal a leksion: (1) Nipatnag so tuan panagbabawi diad saray gawa, aliwa labat a diad saray salita; (2) agnapaliket so Dios ed saray bagat lambengat; (3) nasakitan si Jehova no sikatoy ikaindan na saray managdayew to; tan (4) pian man-ani na maabig, nepeg a mantanem itayo na maabig.
No Panon a Nipatnag so Tuan Panagbabawi
5. Iter so segek na Oseas 6:1-3.
5 Dakel so ibabangat ed sikatayo na propesiya nen Oseas nipaakar ed panagbabawi tan panangasi. Diad Oseas 6:1-3, nabasa tayo: “Dago kayo tan ompawil itayo ed Jehova: ta sikato biningkas to itayo, et tambalen to itayo, kinabil to itayo et bedberan to itayo naani. Kayari duaran agew pabilayen to itayo naani: ed komatlo ya agew paolien to itayo naani, et manbilay itayo naani ed arap to. Sikato komon so amtaen tayo, tan ontumbok itayo komon a mangamta ed Jehova: Say ipaway to ag-onlaron a singa say kabuasan; et sikato onsabi naani ed sikatayo a singa say uran, a singa say kaunoran ya uran a salogen to so dalin.”
6-8. Antoy problema ed panagbabawi na Israel?
6 Siopa so analambit ed saray salitan nikurit ed sarayan bersikulo? Walaray iskolar a mangibabagan sinalambit iratan na saray agmatoor ya Israelita tan ibabaga ra met a saray matungangan totoo so kunkunwarin magbabawi tan mangaanamot ed panangasi na Dios. Balet, ibabaga na arum a si propetan Oseas so analambit ed saratan, a mikakasi ed totoo ya ompawil ira ed si Jehova. Siopaman so analambit ed saratan, say importantin tepet et, Kasin saray totoo na samploran-tribu na panarian na Israel ed inkalapagan so pinmawil ed si Jehova, ya impatnag day tuan panagbabawi? Say ebat et andi. Onia so imbaga nen Jehova panamegley nen Oseas: “Anto naani gawaen ko ed sika, O Efraim? Anto naani gawaen ko ed sika, O Juda? Ta say kaabigan mo singa say lurem ed kabuasan, tan singa say linaew ya ontaynan a masakbay?” (Oseas 6:4) Agaylan paneknek na makapaermen ya espiritual a kipapasen na totoo na Dios! Say maaron-kaabigan, odino matoor ya aro, so ngalngali la naandi—a singa linaew ed kabuasan a tampol a naandipat diad ibutay na agew. Anggaman ompatnag a saray totoo so magbabawi, anggapoy basiyan nen Jehova pian kasian to ira. Anto ta so problema?
7 Agpeteg ya impapuso so panagbabawi na Israel. Oniay ibabaga na Oseas 7:14 nipaakar ed impanermen nen Jehova ed totoo to: “Ag-ira tinmawag ed siak ed puso ra, noag ingen managlem ira ed saray dukolan da.” Inyarum na bersikulo 16: “Ompawil ira, balet aliwan dia ed saman so wala ed tagey,” salanti, aliwan diad nitandoron nengneng na panagdayew. Aglabay na totoo a pawilen so nitandoron panagdayew ed si Jehova diad panggawa na nakaukolan iran pananguman pian nipawil so relasyon da ed sikato. On, talagan agda labay so manakar a kaiba na Dios.
8 Wala ni sananey a problema ed panagbabawi na Israel. Saray totoo so manggagawa nin siansia na kasalanan—a diad tua et dakerakel a kasalanan, laktip lay panagsaol, panagpatey, panagtakew, panagdayew ed talintao, tan makulangkulang a piaalyansa ed arum iran nasyon. Diad Oseas 7:4, saray totoo so inyaliling ed “sakey a palbaan,” odino pugon na panadero, a maseguron ontan lapud pirmin pampilalek dan manggaway mauges. Lapud satan a mauges a kipapasen da ed espiritual, kasin manepeg niran kasian? Andin balot! Ibabaga nen Oseas ed saray rebelyoson totoo a si Jehova et “nanonotan to naani so inkauges da” tan “dalawen to naani so saray kasalanan da.” (Oseas 9:9) Agto ira kasian!
9. Antoy ibabangat ed sikatayo na saray salita nen Oseas nipaakar ed panagbabawi tan panangasi?
9 Legan tayon babasaen iray salita nen Oseas, antoy naaralan tayo nipaakar ed panagbabawi tan panangasi? Say manamasakbay ya alimbawa na saray agmatoor ya Israelita so mangibabangat ed sikatayo a pian nagunggonaan manlapud panangasi nen Jehova, nepeg tayon ipatnag so masimoon a panagbabawi. Panon a nipatnag so ontan a panagbabawi? Si Jehova so agnapalikdo ed saray lua odino salita lambengat. Napatnagan so tuan panagbabawi diad saray kiwas. Pian makagamor na panangasi, nepeg a sigpot ya ikaindan na managgaway-mauges so makasalanan a kurang to tan itunos toy bilay to ed atagey iran estandarte na nitandoron panagdayew ed si Jehova.
Agnapaliket si Jehova ed Saray Bagat Lambengat
10, 11. Unong a niyilustra ed kaso na Israel, akin a saray bagat lambengat et agmakapaliket ed si Jehova?
10 Natan et singbaten tayo so komaduan leksion a makatulong ed sikatayon manakar a kaiba si Jehova. Saya: Agnapaliket so Dios ed saray bagat lambengat. Ibabaga na Oseas 6:6: “Say kaabigan [“maaron-kaabigan,” NW] so pilalek ko [Jehova], ya aliwa a say bagat; tan say pikakabat ed Dios a magmaong nen saray bagat a napoolan.” Imanoen a panliliketan nen Jehova so maaron-kaabigan, odino matoor ya aro—sakey a kalidad na puso—tan say kakabatan nipaakar ed sikato. Balet nayarin panumamengan yo: ‘Akin ya ibabaga na sayan teksto ya aliwan maliket si Jehova ed “bagat” tan ed “saray bagat a napoolan”? Agta saratan so kinaukolan ed Mosaikon Ganggan?’
11 Kinaukolan na Ganggan iray bagat tan apay, balet walay seryoson problema ed saray kapanaonan nen Oseas. Mapatnag, walaray Israelita a naynay a mangiyaapay ed saratan a bagat pian ipangta so debosyon da. Kabansag balet na satan, sikaray mangaagamil na kasalanan. Lapud inkamakasalanan da et impatnag da a say kapusoan da so andian na matoor ya aro. Impatnag da met ya impulisay day kakabatan na Dios, lapud ag-ira nambilay a mitunosan ed satan. No saratan a totoo et andian na dugan kondisyon na puso tan agda panggugunaetan so dugan kabibilay, antoy kakanaan na saray bagat da? Makapadimla ed si Jehova a Dios iray bagat da.
12. Lugan na Oseas 6:6 so anton pasakbay parad saray totoo a manbibilay natan?
12 Saray salita nen Oseas so walaan na pasakbay ed dakel a mimimisa natan. Mangiyaapay ira ed Dios panamegley na relihyoson ag-agamil. Balet no wala man bilang so epekto na panagdayew da ed inagew-agew a kondukta ra, satan so samet labat. Kasin peteg a makapaliket ed Dios so ontan a totoo no ag-ira papakiwasen na kapusoan da ya onggamor na suston kakabatan nipaakar ed sikato tan iyaplika itan a kakabatan diad pangitalirak ed makasalanan ya ag-agamil? Anggapo komon so manisip a saray relihyoson kimey lambengat et mamaliket la ed Dios. Agnaliliketan si Jehova ed saray totoon manasalin onggamor na pabor to panamegley lambengat na porma na panagdayew imbes a manbilay unong ed Salita to.—2 Timoteo 3:5.
13. Antoran klase na bagat so iyaapay tayo, balet antoy nepeg a nonoten nipaakar ed kakanaan na saratan?
13 Bilang tuan Kristianos, nepeg tayon tandaan met ya agnapaliket so Dios ed saray bagat lambengat. Tua, ag-itayo la mangiyaapay ed si Jehova na saray bagat ya ayayep. Balet, sikatayo so ‘mangisasaklang ed Dios na bagat a panangidayew, salanti, say bunga na saray bibil a mangiwakawak na ngaran to.’ (Hebreos 13:15) Importante ya agtayo aaligen iray makasalanan ya Israelita ed panaon nen Oseas, ya isipen a nasakbongan tayo so gawan mauges diad pangiyapay na saray espiritual a bagat ed Dios. Konsideraen pa so alimbawa na sakey a kalangweran a masekreton nanggawa na seksual ya imoralidad. Inaksobi to ed saginonor: “Pinadaak ko so kimey ko ed lawak a ministeryo, ya inisip ko ya anggan panon et nasakbongan na saya so kasalanan ko.” Mipara itan ed sinalin ginawa na saray bangar ya Israelita. Balet, makapaliket iray bagat na panangidayew tayo ed si Jehova no atekepan itan na dugan motibo na puso tan maridios a kondukta.
Nasakitan si Jehova Sano Sikatoy Ikaindan na Saray Managdayew To
14. Antoy ipaparungtal na propesiya nen Oseas nipaakar ed liknaan na Dios?
14 Say komatlon leksion a naaralan tayo manlapud Oseas kapitulo 6 anggad 9 et no anto so nalilikna nen Jehova sano sikatoy ibeneg na saray mandadayew ed sikato. Say Dios so parehon walaan na mabiskeg tan matamoy a liknaan. Sikatoy walaan na matamoy a liknaan a gayaga tan panangabagey ed saramay magbabawi ed saray kasalanan da. Balet, no agmagbabawi iray totoo to, sikatoy mapekder ya onkiwas. Lapud mapaga so Dios ed pankaabigan tayo, panliketan to sano manmatoor itayon manakar a kaiba to. “Si Jehova naroyroyo ed katooan to,” so ibabaga na Salmo 149:4. Anggaman ontan, antoy nalilikna na Dios sano agmanmatoor iray lingkor to?
15. Unong ed Oseas 6:7, panoy inkiwas na pigaran Israelita?
15 Diad panutukoy ed saray agmatoor ya Israelita, inkuan nen Jehova: “Sikara singa si Adan sinmumlang ira ed sipan: Diman nanagamil ira a sililiput a sumpa ed siak.” (Oseas 6:7) Say Hebreon salita ya impatalos a ‘nanagamil a sililiput’ so mankabaliksan met na “manamalikdon pidedeneng, agmatoor (a pidedeneng).” Diad Malaquias 2:10-16, nausar so parehon Hebreon salita pian deskribien so agmatoor a kondukta na saramay Israelitan agnanmatoor ed kaasawaan da. Nipaakar ed impangusar ed sayan termino diad Oseas 6:7, inkuan na sakey a reperensya a satan et sakey a “metapora nipaakar ed panamaley a mangipaparungtal ed siglaotan na personal iran kalidad . . . Say situasyon so ontutukoy ed personal a bengatla a ditan et atraidor so aro.”
16, 17. (a) Panon so inkiwas na Israel nipaakar ed sipanan na Dios ed satan a nasyon? (b) Antoy nepeg tayon tandaan nipaakar ed saray kiwas tayo?
16 Impasen nen Jehova so Israel bilang piguratibon asawa to lapud impisipanan to ed satan a nasyon. Kanian sanen ginagala na totoo to a sinumlang iray kondisyon ed satan a sipanan, singano ra akikalugoran. Say Dios so singa sakey a matoor ya asawan laki, balet sikatoy inkaindan na saray totoo to!
17 Komusta itayo met? Say Dios so mapaga no kasin manaakar itayo a kaiba to odino andi. Maabig no nonoten tayo a ‘say Dios et aro’ tan sikatoy naapektoan na saray kiwas tayo. (1 Juan 4:16) No gegemtanen tayo so mauges a kurang, nasakitan tayo si Jehova tan seguradon sikatoy napaermen. Say lawas pannonot tayo ed saya et onkanan mabiskeg a pangamper ed isuko ed tukso.
No Panon Itayon Man-ani na Maabig
18, 19. Anton prinsipyo so naromog tayo ed Oseas 8:7, tan panon ya apaneknekan a tua itan a prinsipyo ed saray Israelita?
18 Konsideraen tayo so komapat a leksion ed propesiya nen Oseas, salanti, no panon itayon man-ani na maabig. Nipaakar ed saray Israelita tan say kaatiwan tan kaapaan na agmatoor a kurang da, insulat nen Oseas: “Nantanem ira na dagem, man-ani ra naani na alimbusabos.” (Oseas 8:7) Naromog tayo dia so sakey a prinsipyo a nepeg tayon nodnonoten lawas: Wala so direktan pikoneksionan na gagawaen tayo natan ed say nagawa ed sikatayo diad saginonor. Panon ya apaneknekan a tua iyan prinsipyo ed kaso na saray agmatoor ya Israelita?
19 Lapud impangagamil da na kasalanan, saraman ya Israelita so nantanem na mauges. Kasin makapantultuloy iran manggawa ed satan ya anggapo iray anien dan pansumpalan? Seguradon agda napaliisan so pirmin panangukom. Ibabaga na Oseas 8:13: “Nanonotan [nen Jehova] naani so inkauges da, et dalawen [odino kuentaen] to naani’ray kasalanan da.” Tan diad Oseas 9:17, nabasa tayo: “Sikara naani ibantak na Dios ko, lapu ed sikato so agda tinalineng; et sikara naani manteyengteyeng ed saray nasyon.” Si Jehova so mikuentaan ed saray Israelita lapud saray kasalanan da. Lapud nantanem ira na mauges, man-ani ira na mauges. Agawa so panangukom na Dios ed sikara nen 740 K.K.P. sanen kinobkob na saray Asiryano so panarian na samploran-tribu na Israel tan kinautibo daray manaayam ditan.
20. Antoy ibabangat ed sikatayo na asagmak na saray Israelita?
20 Say asagmak na saraman ya Israelita so mangibangat ed sikatayo na sakey a manunan katuaan: Anien tayo so intanem tayo. Papasakbayan itayo na Salitay Dios: “Agkayo komon nalingo: Say Dios agnayarin naludlurey. Ta say antokaman ya itanem na too satan met so anien to.” (Galacia 6:7) No mauges so itanem tayo, man-ani itayo na mauges. Alimbawa, saramay manbibilay ya imoral so man-ani na ampait iran pansumpalan. Aliwan maliket so pansumpalan na agmagbabawin manggagaway mauges.
21. Panon itayon man-ani na maabig?
21 Sirin, panon itayon man-ani na maabig? Naebatan tayo itan a tepet diad panamegley na simplin ilustrasyon. No labay na sakey a dumaralos so man-ani na pagey, kasin mantanem na trigo? Siempre andi! Sikatoy nepeg a mantanem na labay ton anien. Mipadpara, no labay tayoy man-ani na maabig, nepeg a mantanem itayo na maabig. Labay yo ta so mantultuloy a man-ani na maabig, salanti, makapenek a bilay natan tekep na ilalon manbilay ya andi-anggaan diad balon mundo na Dios? No ontan, nepeg yon itultuloy so mantanem na maabig diad panakar a kaibay Dios tan manbilay a mitunosan ed saray matunong ya estandarte to.
22. Antoran leksion so naaralan tayo manlapud Oseas kapitulo 6 anggad 9?
22 Manlapud Oseas kapitulo 6 anggad 9, akaaral itayo na apatiran leksion a makatulong ed sikatayon manakar a kaiba so Dios: (1) Napatnagan so tuan panagbabawi diad saray kiwas; (2) agnapaliket so Dios ed saray bagat lambengat; (3) nasakitan si Jehova no sikatoy ikaindan na saray managdayew to; tan (4) pian man-ani na maabig, nepeg a mantanem itayo na maabig. Panon a say unor a limaran kapitulo na sayan libro na Biblia so ontulong ed sikatayon manakar a kaibay Dios?
Panon Yon Ebatan?
• Panon a nipatnag so tuan panagbabawi?
• Akin a saray bagat lambengat et agmamaliket ed mangatatawen ya Ama tayo?
• Antoy liknaan na Dios no sikatoy ikaindan na saray managdayew to?
• Antoy nepeg tayon itanem no labay tayoy man-ani na maabig?
[Tepetepet Parad Panagaral]
[Litrato ed pahina 23]
Say matoor ya aro na Israel so naandipat a singa lurelurem ed kabuasan
[Litrato ed pahina 23]
Saray mauges a pilalek na Israel so manliyob a singa palbaan
[Litrato ed pahina 24]
Akin ya impulisay nen Jehova iray bagat na totoo to?
[Litrato ed pahina 25]
Pian man-ani na maabig, nepeg tayoy mantanem na maabig