“Saray Dalan nen Jehova Sikara so Maptek”

“Saray dalan nen Jehova sikara so maptek, tan saray matunong manakar ira naani ed sikara.”​—OSEAS 14:9.

1, 2. Pinagamoran nen Jehova iray Israelita na anton klase na gapoan, balet antoy agawa ed sikara?

 PINAGAMORAN nen Jehova iray Israelita na maptek a gapoan diad panaon nen propetan Moises. Balet, kasabi na komawalon siglo K.K.P., nagmaliw a mauge-uges so kipapasen da a nalmoan na Dios a graben tuloy so kasalanan da. Malinlinew iya diad Oseas kapitulo 10 anggad 14.

² Nagmaliw a mansimpisimpitan so puso na Israel. Saray totoo na satan a samploran-tribu a panarian so ‘nambaka na inkauges’ tan nan-ani na ag-inkatunong. (Oseas 10:1, 13) Inkuan nen Jehova: “Sanen say Israel sikato ni so ugaw, sikato so inarok, tan tinawag ko ya ana’ko a laki a nanlapu ed Ehipto.” (Oseas 11:1) Anggaman inliktar na Dios iray Israelita ed impangaripen na Ehipto, say imbales da ed sikato et panagtila tan panamalikdo. (Oseas 11:12) Kanian onia so simbawa ya inter nen Jehova ed sikara: “Sika ompawil ka ed Dios mo, unoren mo so inkamapangasi tan kaptekan.”​—Oseas 12:6.

3. Antoy nagawa ed rebelyoson Samaria, balet panon a makaawat na panangasi iray Israelita?

³ Say rebelyoson Samaria tan say ari na satan so manampot ed desyang. (Oseas 13:11, 16) Balet ginmapo so unor a kapitulo na propesiya nen Oseas ed onian kerew: “O Israel ompawil ka ed Jehova a Dios mo.” No onkerew iray Israelita na perdona tekep na panagbabawi, sikaray kasian na Dios. Siempre, kaukolan dan bidbiren a ‘maptek iray dalan nen Jehova,’ tan manakar ira ed saratan.​—Oseas 14:1-6, 9.

4. Singbaten tayo so antoran prinsipyo manlapud propesiya nen Oseas?

⁴ Lugan na sayan seksion na propesiya nen Oseas iray dakel a prinsipyo a makatulong ed sikatayon manakar a kaibay Dios. Singbaten tayo iraya: (1) Kakaukolanen nen Jehova so agmansimpisimpitan a panagdayew, (2) ipapalikna na Dios ed totoo to so matoor ya aro, (3) kaukolan tayoy naynay a manilalo ed si Jehova, (4) saray dalan nen Jehova so maptek lawas, tan (5) saray makasalanan so makapawil ed si Jehova.

Kakaukolanen nen Jehova so Agmansimpisimpitan a Panagdayew

5. Anton klase na serbisyo so iilaloan na Dios ed sikatayo?

⁵ Iilaloan nen Jehova a sikatayoy mangisaklang ed sikato na sagradon serbisyo diad malinis tan agmansimpisimpitan a paraan. Balet, say Israel so nagmaliw a “malambot ya ubas” ya agmakapambunga. Saray manaayam ed Israel so ‘amarakel na saray altar’ pian usaren da ed palson panagdayew. Saraya ni ingen ya apostata so amaalagey na saray seklang​—a nayarin pautok pian usaren ed marutak a panagdayew. Deralen nen Jehova iratan ya altar tan igeba to iratan a seklang.​—Oseas 10:1, 2.

6. Pian manakar a kaibay Dios, nepeg tayon iwaklit so anton awawey?

⁶ Agnaabuloyan so pansimpisimpitan ed limog na saray lingkor nen Jehova. Balet antoy agawa ed saray Israelita? Agayla, ‘say puso ra so naapag [odino mansimpisimpitan]’! Anggaman sikara so datin akisipanan ed si Jehova bilang dedikadon totoo to, inyabawag toran makasalanan lapud pansimpisimpitan da. Antoy naaralan tayo ed saya? No indedika tayo lay inkasikatayo ed Dios, nepeg ya ag-itayo mansimpisimpitan. Ipapasakbay na Uliran 3:32: “Say marumsis sikato so sakey a kadimla nen Jehova; balet say pikakaaro to wala ed maptek.” Ta pian makapanakar itayo a kaibay Dios, nepeg tayon ipatnag so aro a “nanlapu ed sakey a puso a malinis tan dia ed maabig a linawa tan dia ed pananisian aliwan kunwari.”​—1 Timoteo 1:5.

 Ipapalikna na Dios ed Totoo To so Matoor ya Aro

7, 8. (a) Diad silong na antoran sirkumstansya a napanggayagaan tayoy matoor ya aro na Dios? (b) Antoy kaukolan tayon gawaen no sikatayoy graben nankasalanan?

⁷ No dayewen tayo si Jehova ed agmansimpisimpitan tan maptek a paraan, nagamoran tayoy maaron-panangasi, odino matoor ya aro to. Onia so bilin ed saray bangar ya Israelita: “Mantanem kayo ed sikayo lanlamang na inkatunong, man-ani kayo na unong ed kaabigan; buyaken yo so uma a pinaulyan yo; ta panaon na pananap yo ed Jehova, angga ed sikato so onsabi tan pauranen to so inkatunong ed sikayo.”​—Oseas 10:12.

⁸ No nagbabawi labat komon iray Israelita tan inanap da si Jehova! Diad ontan et sikato so maliket a mangiter ed sikara na bilin ‘diad inkatunong.’ No sikatayoy graben nankasalanan, anapen tayo si Jehova, ya ipikasi ed sikato so pakaperdona tan kerewen so espiritual a tulong na saray Kristianon mamatatken. (Santiago 5:13-16) Kaukolan tayon kerewen met so panangiwanwan na masanton espiritu na Dios, lapud “say mantanem na nipaakar ed laman ton dili, dia ed laman man-ani na kabulok; balet say mantanem na nipaakar ed espiritu, dia ed espiritu man-ani na bilay ya andi-angga.” (Galacia 6:8) No sikatayoy ‘mantanem na nipaakar ed espiritu,’ mantultuloy tayon panggayagaan so matoor ya aro na Dios.

9, 10. Panon ya onaplika ed Israel so Oseas 11:1-4?

⁹ Nawalaan itayoy talek a si Jehova so lawas midedeneng ed totoo to diad maaron paraan. Naromog so paneknek ed saya diad Oseas 11:1-4, ya oniay nabasa tayo: “Sanen say Israel sikato ni so ugaw, sikato so inarok, tan tinawag ko ya ana’ko a laki a nanlapu ed Ehipto. . . . Nambabagat ira ed saray Baalim, tan nampasob ira na insenso ed saray imbolik a talintao. Anggan ontan imbangat ko si Efraim [saray Israelita] a manakar, sinayakup ko ra ed saray taklay ko; balet agda naamtaan a tinambal ko ra. Ginuyor ko ra ed saray lubir na sakey a too, ed saray singer na aro: ed siak nensaman ed sikara so singa saray mangawit na pako ed saray aping da: et inyan ko so kanen ed arap da.”

¹⁰ Dia et inkompara so Israel ed sakey a melag ya ugaw. Simamaaron imbangat nen Jehova iray Israelita a manakar, a sinayakup tora ed saray taklay to. Tan naynay toran intabin panamegley na “saray singer na aro.” Agaylan makatenyeg na liknaan a panangilitrato! Isipen pa a sakey kayon ateng ya ontutulong ed melag nin anak yo a primero toy onkupbang. Akaunat iray taklay yo. Nayarin mangusar kayo na lubir a peketan na melag nin anak yo pian agnatumba. Mipadpara, ontan met ya inkatamoy so panangaro nen Jehova ed sikayo. Sikatoy naliliketan a mangitonton ed sikayo panamegley na “saray singer na aro.”

11. Diad anton dalan a say Dios so ‘singa manangawit na pako’?

¹¹ Diad impideneng to ed saray Israelita, si Jehova so “singa saray mangawit na pako ed saray aping da, et inyan [to] so kanen ed arap da.” Kinmiwas so Dios a singa sakey ya angawit odino angekal ed pako pian agnairapan a mankabkab so sakey ya ayep. Sanen pinuter na totoo na Israel so pako na panagpasakop da ed si Jehova, sikara laingen so niiyan ed makapairap a pako na saray kabusol da. (Deuteronomio 28:45, 48; Jeremias 28:14) Komon ta ag-itayon balot napelag ed panangontrol na manunan kabusol tayo, si Satanas, pian ag-itayo managmak na ot-ot na makapairap a pako to. Imbes, itultuloy tayoy manakar a matoor a kaibay maaron Dios tayo.

Naynay a Manilalo ed si Jehova

12. Unong ed Oseas 12:6, antoy kakaukolanen pian makapantultuloy itayon manakar a kaibay Dios?

¹² Pian makapanakar a kaiba na Dios, nepeg  itayon naynay a manilalo ed sikato. Onia so imbaga ed saray Israelita: “Kanian sika ompawil ka ed Dios mo: unoren mo so inkamapangasi tan kaptekan, tan manalagar [odino, manilalo] ka ed Dios mo a naynay.” (Oseas 12:6) Nayarian na saray manaayam ed Israel a paneknekan a sikaray ompapawil ed si Jehova tekep na pagbabawi diad pangipatnag da na maaron-kaabigan, pangagamil na inkahustisya, tan ‘panalagar ed Dios da a naynay.’ Anggan panon lan kabayag so panaakar tayo a kaibay Dios, nepeg itayon determinadon mangipatnag na maaron-kaabigan, agamilen so inkahustisya, tan naynay a manilalo ed Dios.​—Salmo 27:14.

13, 14. Panon ya inyaplika nen Pablo so Oseas 13:14, a mangiiter ed sikatayo na anton rason pian manilalo ed si Jehova?

¹³ Say propesiya nen Oseas a manasaglawi ed saray Israelita so mangiiter ed sikatayo na nikaduman rason pian manilalo ed Dios. Inkuan nen Jehova: “Dondonen ko ra naani a manlapu ed pakayari na Sheol; dondonen ko ra naani a manlapu ed patey. O patey, iner so kawalaan na saray bakbak mo? O Sheol, iner so kawalaan na pamagbag mo?” (Oseas 13:14) Aggagala nen Jehova ya iliktar ed patey iray Israelita diad saman a panaon, balet diad kaunoran et akmonen toy patey ed ando lan ando tan panampoten toy panatalo na satan.

¹⁴ Sanen susulaten nen Pablo iray kapara ton alanaan a Kristiano, inaon toy propesiya nen Oseas tan insulat to: “Sano saya a naderal nakawesan naani na agnaderal, tan saya ya ompatey nakawesan naani na ag-ompatey, sirin nasumpal so salita a nisulat, Say patey inakmon na impanalo. O patey, iner so kawalaan na impanalom? O patey, iner so kawalaan na ot-ot mo? Say ot-ot na patey say kasalanan; tan say pakayari kasalanan say Ganggan: Et salamat ed Dios, ta ikdan to itayo na panalo lapu ed Katawan tayo a Jesu-Kristo.” (1 Corinto 15:54-57) Pinaoli nen Jehova si Jesus, ya angitarya na makaligliwan garantiya a saray totoon walad pakanodnonotan na Dios so napaoli. (Juan 5:28, 29) Agaylan makapaliket a rason pian manilalo ed si Jehova! Balet, nilikud ed ilalon kioli et wala ni bengatlan mamakiwas ed sikatayon manakar a kaibay Dios.

Saray Dalan nen Jehova so Maptek Lawas

15, 16. Antoy nipasakbay nipaakar ed Samaria, tan panon ya asumpal so propesiya?

¹⁵ Say kombiksion tayon ‘maptek iray dalan nen Jehova’ so ontulong ed sikatayon mantultuloy a manakar a kaibay Dios. Saray manaayam ed Samaria so agnanakar ed matunong iran dalan na Dios. Kanian, sinagmak daray nansumpalan na mauges a gawa tan kaandian na pananisia ra ed si Jehova. Oniay nipasakbay: “Say Samaria awiten to naani so kasalanan to; lapu ed sinmumpa ed Dios to. Nipasag ira naani ed kampilan; saray anak da ya angkekelag nibasig ira naani a nalinglingkay, tan saray malukon a bibii nabotyakan ira naani.” (Oseas 13:16) Ipapanengneng na awaran a saray Asiryano, ya angubkob ed Samaria, so makasarag a manggawa na ontan iran makapakebbiew a karelmengan.

¹⁶ Say Samaria so kabiseran syudad na samploran-tribu a panarian na Israel. Balet, say ngaran a Samaria dia so nayarin onaplika ed interon teritorya na satan a panarian. (1 Arari 21:1) Say Ari na Asirya a si Shalmaneser V so angubkob ed syudad na Samaria nen 742 K.K.P. Sanen nagba so Samaria nen 740 K.K.P., dakel ed saray prominentin manaayam ditan so nibantak ed Mesopotamia tan Media. Agni naseguro no kasin si Shalmaneser V odino say sinmalat ed sikato a si Sargon II so akasamsam ed Samaria. (2 Arari 17:1-6, 22, 23; 18:9-12) Anggaman kuan, saray rekord nen Sargon so manutukoy ed impamagit ed 27,290 ya  Israelita ya inyakar ed saray lugar diad Niyatagey a Eufrates tan Media.

17. Imbes a leglemewen iray estandarte na Dios, antoy nepeg tayon gawaen?

¹⁷ Sinagmak na saray manaayam ed Samaria iray makapasinagem a nansumpalan na agda impangunor ed saray maptek a dalan nen Jehova. Bilang dedikadon Kristiano, nasagmak tayo met so makapasinagem iran pansumpalan no mangagamil itayo na kasalanan, a leleglemewen iray matunong ya estandarte na Dios. Komon ta agtayon balot gegemtanen so ontan a marelmeng a kurang! Imbes, balang sakey ed sikatayo so mangiyaplika komon ed simbawa nen apostol Pedro: “Aleg komon ya anggan siopa ed sikayo manlikna na irap a singa sakey ya akapatey, o matakew, o managgaway-mauges, o lapud pibiang to ed gawa na arum a too: Balet ta no wala so napairap a singa Kristiano, agto ibaing; noag ingen igalang to so Dios ed sayan ngaran.”​—1 Pedro 4:15, 16.

18. Panon tayon nitultuloy a ‘nigalang so Dios’?

¹⁸ Nitultuloy tayon ‘igalang so Dios’ diad panakar ed maptek iran dalan to imbes a gawaen iray bengatla ed dilin paraan tayo. Si Cain so akapatey lapud ginawa to no antoy dilin panlabayan to tan sinmaew a mangunor ed pasakbay nen Jehova a say kasalanan so manatambang ed sikato. (Genesis 4:1-8) Inawat nen Balaam so bayar manlapud ari na Moab balet ta agtinmalona a mangisamba ed Israel. (Numeros 24:10) Tan pinatey na Dios so Levitan si Kora tan arum nira lapud impanrebelde ra ed autoridad nen Moises tan Aaron. (Numeros 16:1-3, 31-33) Segurado, agtayo labay a tumboken so manamatey a “dalan nen Cain,” tan manapuran onsugba ed “kalilingo nen Balaam,” odino natawtaw lapud “kasebegan nen Kora.” (Judas 11) Balet, no makapankasalanan itayo, say propesiya nen Oseas so manligliwa ed sikatayo.

Saray Makasalanan so Makapawil ed si Jehova

19, 20. Saray magbabawin Israelita so makasarag a mangiyapay na antoran bagbagat?

¹⁹ Anggan saramay naplag lapud ambelat ya agawaan dan kasalanan so makapawil ed si Jehova. Diad Oseas 14:1, 2, nabasa tayo iyan kerew: “O Israel ompawil ka ed Jehova a Dios mo; ta naplag ka lapu ed inkauges mo. Alaen yo ed sikayo so saray salita, et ompawil kayo ed Jehova: Ikuan yo ed sikato, Ekalen mo ya amin so inkauges, tan awaten mo so maong; dia ed ontan yapay mi naani a singa saray baka a kalakian so bagat na saray bibil mi.”

²⁰ Sarag na saray magbabawin Israelita so mangiyapay ed Dios na ‘kalakian a baka na saray bibil da.’ Saraya so bagbagat na masimoon a panangidayew. Tinukoy nen Pablo iyan propesiya sanen pinaseseg toray Kristiano a ‘mangisaklang ira ed Dios na bagat a panangidayew, salanti, say bunga na saray bibil a mangiwakawak na ngaran to.’ (Hebreos 13:15) Agaylan kagalangan so panakar a kaibay Dios tan pangiyapay na ontan iran bagat natan!

21, 22. Anton panangipawil so naeksperiensya na saray nagbabawin Israelita?

²¹ Saray Israelita ya angitalirak ed pikewet a kurang da tan pinmawil ed Dios so angiyapay ed sikato na ‘kalakian a baka na saray bibil da.’ Kanian naeksperiensya ra so espiritual a panangipawil, unong ed insipan a mismo na Dios. Ibabaga na Oseas 14:4-7: “Tambalen ko naani so inkamanangibeneg da,” kuan nen Jehova, “aroen ko ra naani a mabulbulos; ta say sanok ko naekal la ed sikato. Siak singa ak naani linaew ed Israel; sikato manbolaklak naani a singa lirio, et ikayat to naani so saray lamot to a singa say Libano. Saray sanga to mansalompapak ira naani, et say kalimgasan to singa naani say kiew ya olibo, tan say balingit to singa naani Libano. Saray manaayam  ed silong na sirum to ompawil ira naani, sikara naani napabilay a singa sakey a bukel tan manbolaklak ira naani a singa say ubas; say balingit to naani singa say alak na Libano.”

²² Saray nagbabawin Israelita so atambal ed espiritual a paraan tan nanggayagaan da lamet so aro na Dios. Si Jehova so nagmaliw a makarepreskon linaew ed sikara lapud sikato so daakan ya amendisyon ed sikara. Say nipawil a totoo to so awalaan na dignidad a ‘singa kiew ya olibo,’ tan sikaray peteg a nanakar ed saray dalan na Dios. Lapud determinado itayon manakar a kaiba si Jehova a Dios, antoy kakaukolanen ed sikatayo?

Mantultuloy a Manakar ed Saray Maptek a Dalan nen Jehova

23, 24. Sinampotan so libro na Oseas panamegley na anton makapaseseg a propesiya, tan panon itan a mangaapekta ed sikatayo?

²³ Pian makapantultuloy itayon manakar a kaibay Dios, nepeg tayon agamilen so “kakabatan a wala a manlapu ed tagey” tan lawas onkiwas a mitunosan ed saray maptek a dalan to. (Santiago 3:17, 18) Oniay nabasa ed unor a bersikulo na propesiya nen Oseas: “Siopa so makabat a makatalos na saraya a bengatla? Makalakal, pian naamtaan to ra? Ta saray dalan nen Jehova sikara so maptek, tan saray matunong manakar ira naani ed sikara; balet saray masusumpa napelag ira naani ed sikara.”​—Oseas 14:9.

²⁴ Imbes a sikatayoy paigiya ed kakabatan tan saray estandarte na sayan mundo, komon ta determinado itayon manakar ed maptek iran dalan na Dios. (Deuteronomio 32:4) Ginawa itan nen Oseas ed loob na 59 a taon odino masulok ni. Sikatoy matoor ya angipasabi ed saray mensahe na Dios, a kabat ton saramay makabat tan makalakal so makatalos ed saratan a salita. Komusta itayo met? Legan ya iyaabuloy ni nen Jehova a mantasi itayo, itultuloy tayon anapen iramay sikakabat a mangawat ed agkanepegan a panangasi to. Tan naliliketan itayon manggawa ed saya diad sigpot a pitulongan ed “matoor tan makabat ya aripen.”​—Mateo 24:45-47.

25. Say impaningbat tayo ed propesiya nen Oseas so nepeg ya ontulong ed sikatayon manggawa na anto?

²⁵ Say impaningbat tayo ed propesiya nen Oseas so nepeg ya ontulong ed sikatayon mantultuloy a manakar a kaibay Dios tekep na ilalon bilay ya andi-anggaan diad balon mundo ya insipan to. (2 Pedro 3:13; Judas 20, 21) Agaylan abig ya ilalo! Satan ya ilalo so personal tayon naeksperiensya no paneknekan tayo ed salita tan gawa a pekderan tayo itan sano ibabaga tayon: ‘Maptek iray dalan nen Jehova.’

Panon Yon Ebatan?

• No mangiyapay itayoy malinis a panagdayew ed Dios, panon so pideneng to ed sikatayo?

• Akin a nepeg itayon naynay a manilalo ed si Jehova?

• Akin a kombinsido kayon maptek iray dalan nen Jehova?

• Panon itayon makapantultuloy a manakar ed maptek iran dalan nen Jehova?

[Tepetepet Parad Panagaral]

[Litrato ed pahina 28]

Awaten so espiritual a tulong na saray Kristianon mamatatken

[Litrato ed pahina 29]

Say propesiya nen Oseas so mangiiter ed sikatayo na rason pian manilalo ed sipan nen Jehova a kioli

[Saray litrato ed pahina 31]

Mantultuloy a manakar a kaibay Dios tekep na ilalon bilay ya andi-anggaan