Talaga Kasin Panisiaan Mo a Walay Diablo?

SAY Kasulatan so mangidedeskribe ed Diablo bilang peteg a persona. Sikato so agnanengneng na totoo, a singa say Dios ya agda met nanengneng. Ibabaga na Biblia a “say Dios sikatoy sakey ya Espiritu.” (Juan 4:24) Say Diablo et sakey ya espiritun pinalsa. Balet, aliwan singa say Manamalsa, say Diablo so walaan na gapoan.

Sakbay a pinalsa nen Jehova a Dios so totoo, sikatoy abayag lan nanggawa na dakerakel ya espiritun pinalsa. (Job 38:4, 7) Sarayan espiritu so tinukoy ed Biblia bilang angheles. (Hebreos 1:13, 14) Amin da so pinalsa na Dios ya ayadyari​—ya anggapon balot ed sikara so diablo odino walaan na antokaman a mauges a walna. Panon sirin a linmesa so Diablo? Say salitan “diablo” et mankabaliksan na “managpauges” tan sirin et tutukoyen na satan so sakey a mansasalita na katilaan nipaakar ed arum. Say “Satanas” et mankabaliksan na “Mananumlang,” odino sumusumpa. No panon a say sakey a datin matua a too et ginawa toy inkasikato a matakew diad impangala na bengatlan agto kayarian, ontan met so sakey ed saray ayadyarin espiritun ananak na Dios a ginawa to so inkasikato a Satanas a Diablo sanen kinmiwas unong ed mauges a pilalek to. Oniay impangipaliwawa na Biblia no panon a magmaliw a mauges so sakey: “Natukso so too no sikatoy ibalang tan tangguyoren na dilin mauges iran pilalek to. No manlukon so mauges a pilalek na laman, mananak na kasalanan. Tan no ombaleg so kasalanan, mambungay patey.”​—Santiago 1:14, 15, Maung a Balita.

Ontan so peteg ya agawa. Sanen pinalsa nen Jehova a Dios so inmunan toon sanasawa, si Adan tan Eva, maniimaton so anghel a mannononot lan manrebelde ed Dios. Amta to ya ingganggan nen Jehova ed si Adan tan Eva a panoen da na matunong a totoo so dalin, pian mandayew ed Manamalsa. (Genesis 1:28) Anengneng na sayan anghel so posibilidad a sikatoy nayarin galgalangen tan bidbiren. Lapud pinakiwas na agum, pinilalek to so bengatlan kanepegan lambengat na Manamalsa, salanti, say panagdayew na totoo. Imbes ya iwaklit to itan a mauges a pilalek, satan so binayuboan na sayan espiritun anak na Dios anggad nanresulta itan ed panagtila insan panagrebelde. Isipen pa so ginawa to.

 Inusar na sayan rebelyoson anghel so sakey ya uleg pian mitongtong ed inmunan bii, si Eva. Oniay intepet na uleg ed si Eva: “Imbaga ta’n tua na Dios ya agyo kanen so bunga na dinanman a kiew ed tanamanan?” Sanen imbaga nen Eva so ganggan na Dios tan say dusa ed panumlang ed satan, inkuan na uleg: “Aliwan tua ‘tan; agkayo ompatey. Imbagay Dios itan ta amta to a no kanen yo, magmaliw kayon singa Dios, ya amta yo no anto so maong tan mauges.” (Genesis 3:1-5, MB) Inyakusa to ya ag-imbaga na Dios so katuaan ed si Adan tan Eva. Diad pangan ed bunga na satan a kiew, imbaga to a si Eva et magmaliw a singa Dios, a nawalaan na kanepegan a mandesidi no anto so maong tan mauges. Satan so sankaunaan ya impantila. Diad ontan et nagmaliw a managpauges itan ya anghel. Sikatoy nagmaliw met a sumusumpa ed Dios. Kanian impabidbir na Biblia iyan kabusol na Dios bilang “say daan ya uleg, a manngaran na Diablo tan si Satanas.”​—Apocalipsis 12:9.

“Manbantay Kayo”

Tinmalona so impantila na Diablo ed si Eva unong ed getma to. Oniay ibabaga na Biblia: “Anengneng na samay bii a marakerakep imay kiew tan masamsamit a kanen so bunga to, tan sakey a pampilalekan a pakagamoray kakabatan. Kanian amurbor na bunga, insan to kinan. Inikdan toy asawa to tan kinan to met.” (Genesis 3:6, MB) Sinisia nen Eva si Satanas tan sinumlang to so Dios. Atangguyor met nen Eva si Adan a sumlangen so ganggan na Dios. Kanian tinmalona so Diablo diad impangilagyat to ed inmunan sanasawa a manrebelde ed Dios. Manlapu la’d saman, si Satanas so agnanenengneng a mangiimpluensya ed saray pakurang na too. Anto so getma to? Pian pabenegen so totoo diad panagdayew ed tuan Dios tan sikaton mismo so dayewen da. (Mateo 4:8, 9) Makatunongan sirin so pamapasakbay na Kasulatan: “Mandangka kayo, manbantay kayo; ta say kabusol yo, say diablo, wala ed kaliberliber yo a singa omoang a leon a mananap na buagen to.”​—1 Pedro 5:8.

Malinlinew so impangideskribe na Biblia ed Diablo bilang peteg ya espiritun persona​—sakey ya anghel a nagmaliw a mauges tan mapeligro! Say sankaimportantian a kundang a gawaen tayo pian mansiansia itayon akabantay et say pamidbir a sikatoy talagan peteg a persona. Balet wala ni so nakaukolan nilikud ed pandangka tan pansiansia tayon akabantay. Importante met ya amta tayo ‘iray kasiliban’ nen Satanas tan saray metodo to ed pamapalikdo ed totoo. (2 Corinto 2:11) Anto iray pakana to? Tan panon tayon naresistian iratan?

Aanamoten na Diablo so Nisipor a Pankaukolan na Too

Naoobserbaan la na Diablo so katooan manlapu la’d inkapalsa ra. Amta to so inkagawa na too​—saray pankaukolan to, paniinteresan to, tan saray pilalek to. Kabkabat nen Satanas a Diablo ya apalsa so too a mankaukolan na espiritual, kanian sikatoy masilib a mangaanamot ed sayan pankaukolan. Panon? Diad pangibabangat ed katooan na relihyoson katilaan. (Juan 8:44) Dakel a relihyoson bangat nipaakar ed Dios so mansusumlangan tan makapawetwet. Diad padesir mo, siopa kasi so akan-getma ed satan? Amin a mansusumlangan a bangat et palso. Kanian, agta posible a dakel a relihyoson bangat et talagan denesinyo tan uusaren nen Satanas pian ibalang so totoo? Diad tua et sikatoy tinukoy na Biblia bilang “dios na sayan panaon,” a mamubulag ed kaisipan na saray totoo.​—2 Corinto 4:4.

Say madibinon katuaan so makasalimbeng sumpad saray panamalikdo na relihyon. Inyaliling na Biblia so katuaan na Salitay Dios ed sakey a balkes ya isusulong na sakey a sundalo nensaman pian protektaan so awak to. (Efeso 6:14) No onggamor ka na kakabatan ed Biblia tan  pansiansiaen mo ed inkasika so mensahe na satan, a singano akabalkes itan ed sika, say Salita na Dios so manalimbeng ed sika pian agka napalikdo na relihyoson katilaan tan kalilingoan.

Say espiritual ya inklinasyon na too so mamapakiwas ed sikaton manusisa na bengatlan ag-amta. Lapud satan et sikatoy nipapaarap ed sananey nin masilib a pakana nen Satanas. Diad pangaanamot nen Satanas ed inkamaupapet na too nipaakar ed bengatlan nikadkaduma tan misteryoso, uusaren toy espiritismo pian nakontrol to so dakel a totoo. No panon a manguusar na tapang so sakey ya umaanop pian ayaten so biktima to, si Satanas met so manguusar na panagparles, astrolohiya, hipnotismo, panananem, panagpalar, tan mahiko pian ayaten tan kalotan so totoo ed interon mundo.​—Levitico 19:31; Salmo 119:110.

Panon mon napaliisan so pakakalotan ed espiritismo? Oniay ibabaga na Deuteronomio 18:10-12: “Anggapo naani naromog ed sika ya anggan sakey ya ama a mamalabas na anak to a laki odino bii ed apoy, a sakey a manaagamil na panagparles, sakey a managsuma, odino sakey a managsalamangka, odino manag-anito. Odino sakey a manangipelag, odino miaanito ed saray mankukulam, odino sakey ya aswang, odino sakey a wala so anti-anting to. Ta say siopaman a manggawa ra nia sikato so kadimdimla nen Jehova: et lapu ed saraya a kadimlaan, pataynanen ira nen Jehova a Dios mo ed arap mo.”

Direkta so simbawa na Kasulatan: Sigpot a paliisan so espiritismo. Panon to no sikay datin mangaagamil na espiritismo tan labay mo la natan a paliisan itan? Nayarian mon aligen so alimbawa na saray inmunan Kristiano diad syudad na Efeso. Sanen inawat da so “salita na Katawan,” so kuan na Biblia, “aliwan daiset ed saray maanito so nantipon na saray libro ra, et pinoolan da ra ed arap da ya amin.” Ankabli iraman a libro. Say balor na saraman et 50,000 a denario a pilak. (Gawa 19:19, 20) Ingen, saratan so agkinawanan a dineral na saray Kristiano ed Efeso.

Aanamoten nen Satanas Iray Kakapuyan na Too

Say ayadyarin anghel et nagmaliw a Satanas a Diablo lapud sikatoy nampilalek ya itandoro so inkasikaton dili. Sinagyat to met si Eva a magmaliw a makinon tan sinisiblet a manpirawat a magmaliw a singa Dios. Anggad natan et kokontrolen nen Satanas so dakel a totoo diad panasagyat to ed sikaran magmaliw a makinon. Alimbawa, liknaen na arum a totoo ya atagtagey ira nen say arum lapu ed rasa ra, etnikon grupo ra, odino nasyonalidad da. Agaylan misunian iya ed ibabangat na Biblia! (Gawa 10:34, 35) Malinlinew so inkuan na Biblia: “Manlapud saksakey a too, pinalsa [na Dios so] katooan ed amin a bansa.”​—Gawa 17:26, MB.

Say kapaabebaan so epektibon depensa ed pananagyat nen Satanas a magmaliw a makinon. Sisimbawaen itayo na Biblia ya ‘agtayo nonoten so inkasikatayon dili ya atagtagey nen say kanepegan a nonoten.’ (Roma 12:3) “Say Dios sumpaen to so atagey a linawa,” so inkuan na satan, “bangbalet mangiter na grasya ed mauyamo.”  (Santiago 4:6) Say epektibon paraan pian naresistian mo iray sagpot nen Satanas et say pangipatnag na kapaabebaan tan arum niran kalidad ya aabobonan na Dios diad personal a bilay mo.

Say Diablo so magunaet met a manganamot ed kakapuyan na too a nadaeg ed agmanepeg a pilpilalek na laman. Getma nen Jehova a Dios a panggayagaan na totoo so bilay. Sano peneken iray pilalek unong lambengat ed inggetar na Dios, nagamoran so tuan liket. Balet si Satanas so manutukso ed totoo a peneken iray pilalek da diad imoral a paraan. (1 Corinto 6:9, 10) Nagkalalon maabig no pansiansiaen ya akasentro so kanonotan ed saray bengatlan masimpit tan maabig. (Filipos 4:8) Ontulong itan ed sika pian mabiskeg mon nakontrol so kanonotan tan emosyon mo.

Itultuloy a Resistian so Diablo

Kasin naresistian mo so Diablo? On. Oniay ipapaseguro ed sikatayo na Biblia: “Onsumpa kayo ed Diablo, et sikato onarawi ed sikayo.” (Santiago 4:7) Anggano susumpaen mo si Satanas, sikatoy agtampol ya onsuko tan ontundan mangiter ed sika na saray problema legan mon gagamoran so kakabatan nipaakar ed Dios. Andi, sika so tuksoen lamet na Diablo diad arum niran “pankanawnawa.” (Lucas 4:13, MB) Balet, agmo kaukolan a takotan so Diablo. No sikatoy lawas mon resistian, agto ka napabeneg manlapud tuan Dios.

Balet, pian naresistian so Diablo, kaukolan a nawalaan ka na kakabatan nipaakar ed sikato tan no panon so pamapalikdo to ed totoo tan no anto iray nepeg mon gawaen pian agka nakalotan ed saray pakana to. Saksakey so suston lapuan na satan a kakabatan​—say Salita na Dios, say Biblia. Kanian magmaliw kan mapekder ed desisyon mon manaral ed impuyan a Kasulatan, tan iyaplikam ed bilay mo iray naaaralan mo. Saray Tasi nen Jehova ed lugar yo so maliket ya ontulong ed sikan makaaral ya anggapoy bayar diad panaon a kombeniente ed sika. Sika komon so agmasuyat a mitalosan ed sikara odino mansulat ed saray manangipalapag na sayan magasin.

Legan kan manaaral na Biblia, kaukolan mon bidbiren a si Satanas et mangikana na isusumpa odino panamasegsegang pian patundaen to ka ed panaaral mo na katuaan ed Salitay Dios. Arum ed saray inad-arom ed bilay so nayarin onsanok ed sika lapud panaaral mo na Biblia. Nayarin nagawa itan lapud agda amta so alay abig a katuaan a naromog ditan. Nayarin sikay ludlureyen met na arum. Balet kasin say isuko ed saratan a pananesdes et talagan mamaliket ed Dios? Labay na Diablo a nadismaya ka ta pian agka la manaral nipaakar ed tuan Dios. Akin ya abuloyan mon manalo si Satanas? (Mateo 10:34-39) Anggapo so utang mo ed sikato. Si Jehova so akautangan mo na mismon bilay mo. Sirin, magmaliw kan determinado a manresisti ed Diablo tan ‘paliketen so puso nen Jehova.’​—Uliran 27:11.

[Litrato ed pahina 6]

Saraman so nagmaliw a Kristiano et pinoolan da iray libro ran nipaakar ed espiritismo

[Litrato ed pahina 7]

Mapekder a mandesisyon diad panaral ed Salita na Dios