Tua Kasi a Walay Diablo?

PANON so pangipapasen yo ed Diablo? Kasin iisipen yo a sikatoy peteg a persona a manutukso ed totoo pian manggawa na mauges iran bengatla, odino irerepresenta to lambengat so sakey a kalidad na kaugsan? Kasin nepeg a takotan so Diablo, odino sikatoy nepeg ya ibaliwala a singa sakey ya ideyan gawagawa lambengat odino is-istoryan anggapoy katuaan? Kasin say salitan “diablo” et manutukoy ed agnabidbir a makaderal a puersa ed uniberso? Kasin satan a termino et simbolo lambengat na mauges ya ug-ugali na totoo, a singa ibabaga na dakel a teologo natan?

Agpankelawan a nanduruma so opinyon na katooan nipaakar ed no siopa so Diablo. Isipen pa no panon kairap a naamtaan so tuan pakabidbiran na sakey ya onsianon manamalikdo! Nagkalautla ta sikatoy pursigidon mangiyaamot ed pakabidbiran to panamegley na maskara. Dedeskribien na Biblia ya ontan so personalidad na Diablo. Diad impanukoy ed sikato bilang Satanas, oniay imbaga na satan: “Si Satanas ni magmaliw a singa anghel na liwawa.” (2 Corinto 11:14) Anggaman mauges so Diablo, sikatoy mankunkunwarin maomaong ta pian nibalang to so arum. Tan no apanisia to lay totoo a sikatoy aliwan peteg a persona, lalon nagawaan to la ed satan so gagala to ya epektibo.

Sirin, siopan talaga so Diablo? Kapigan tan panon so inkiwala to? Panon so pangiimpluensya to ed katooan natan? Anto so nagawaan tayo, no wala man bilang, pian agto itayo naimpluensyaan? Nikurit ed Biblia so peteg ya awaran na Diablo manlapud mismon gapoan to tan naromog ditan so napanmatalkan iran ebat ed sarayan tepet.

[Litrato ed pahina 3]

Agaylan irap a nabidbir so sakey a pursigidon mangiyaamot ed pakabidbiran to panamegley na maskara!