Tutulongan Itayo na Propesiya nen Oseas a Manakar a Kaibay Dios

“Manakar ira naani ya ontumbok ed Jehova.”​—OSEAS 11:10.

1. Anton simbolikon drama so naromog ed libron Oseas?

 KASIN labalabay yo iray drama a pandinayewan iray dramatista tan makapasagyat iray istorya? Lugan na libro na Biblia ya Oseas so sakey a simbolikon drama. * Satan a drama so manideskribe ed kipapasen na pamilya na propeta na Dios a si Oseas tan mikonektaan ed piguratibon panangasawa ya akikontrataan nen Jehova ed kadaanan ya Israel panamegley na Mosaikon Ganggan a sipanan.

2. Antoy naamtaan nipaakar ed Oseas?

² Say eksena na sayan drama et naromog ed Oseas kapitulo 1. Ompatnag a nanayam si Oseas ed teritorya na samploran-tribu na panarian na Israel (atawag met ya Efraim, lapud prominentin tribu na satan). Sikatoy nampropesiya legan na uley na unor a pitoran manuley na Israel tan uley na Arari a si Uzias, Jotam, Akaz, tan Ezekias na Juda. (Oseas 1:1) Kanian nampropesiya si Oseas ed loob na ag-onkulang ed 59 a taon. Anggaman say libro na Oseas et akompleto ag-abayag kayari na 745 K.K.P., satan so makabkabaliksan natan, lapud minilyon so manggugunaet a manumbok ed nipasakbay ed saray salitan: “Manakar ira naani ya ontumbok ed Jehova.”​—Oseas 11:10.

No Antoy Ipaparungtal na Sumaryo

3, 4. Ipaliwawa ed antikey no antoy akobrian ed Oseas kapitulo 1 anggad 5.

³ Say sumaryo ed Oseas kapitulo 1 anggad 5 so mamabiskeg ed determinasyon tayon manakar a kaibay Dios diad pangagamil na pananisia tan pangemtan ed kurang a mitunosan ed linawa to. Anggaman saray manaayam ed panarian na Israel so nankasalanan ed espiritual a pikakalugoran, sikaray kasian na Dios no magbabawi ira. Niyilustra iya ed paraan na impideneng nen Oseas ed asawa ton si Gomer. Kayarin inyanak nen Gomer so anak da nen Oseas, mapatnag a si Gomer so awalaan na duaran anak ed paway. Balet, sikatoy inawat nen Oseas, no panon a si Jehova so mabulos ya angasi ed magbabawi iran Israelita.​—Oseas 1:1–3:5.

⁴ Si Jehova so walaan na legal a kaso sumpad Israel lapud anggapo so katuaan, maaron-panangasi, odino pikakabat nipaakar ed Dios ed satan a nasyon. Sikatoy mikuentaan sumpad idolatroson Israel tan bangar a panarian na Juda. Balet, sano walad “kairapan” iray totoo na Dios, anapen da si Jehova.​—Oseas 4:1–5:15.

Say Gapo na Drama

5, 6. (a) Panon kakasmak so pilalawanan ed samploran-tribu na panarian na Israel? (b) Akin a makabkabaliksan ed sikatayo so pasakbay a niiter ed kadaanan ya Israel?

⁵ Ingganggan na Dios ed si Oseas: “Onla ka, mangala ka na sakey ya asawa ed inkabalangkantis tan saray anak na inkabalangkantis, ta say dalin manggawa na baleg ya inkabalangkantis ya onarawi ed Jehova.” (Oseas 1:2) Panon kalaknab so panagbalangkantis odino pilalawanan ed Israel? Oniay nibaga ed sikatayo: “Say espiritu na inkabalangkantis ginawa to [a say baley na  samploran-tribu na panarian et] nalingo, [tan] akibalangkantis ira, a sinmian ira a nanlapu ed Dios da. . . . Saray anak yo a bibii akibalangkantis ira, tan saray nobya [“manugang a bibii,” NW] yo mikalugoran ira. . . . Saray lalaki lanlamang onsian ira pati saray balangkantis tan sikara manbagat ira pati saray balangkantis.”​—Oseas 4:12-14.

⁶ Kasmak ed Israel so pisikal tan espiritual a pilalawanan. Kanian si Jehova so ‘ondalaw’ odino mikuentaan sumpad saray Israelita. (Oseas 1:4; 4:9) Sayan pasakbay so makabkabaliksan ed sikatayo lapud si Jehova so mikuentaan sumpad saramay mangaagamil na imoralidad tan mibibiang ed marutak a panagdayew natan. Balet saramay manaakar a kaibay Dios so makakakapet ed saray estandarte to parad malinis a panagdayew tan amta ran “anggapo so managlawan . . . a makatawir na antokaman ed panarian nen Kristo tan say Dios.”​—Efeso 5:5; Santiago 1:27.

7. Antoy insimbolo na impangasawa nen Oseas ed si Gomer?

⁷ Sanen inasawa nen Oseas si Gomer, mapatnag a sikatoy birhen, tan sakey a matoor ya asawan bii sanen sikatoy “angiyanak na sakey a laki,” ya anak to ed si Oseas. (Oseas 1:3) Unong ya ipapabitar na simbolikon drama, ag-abayag kayarin tuloy na inkibulos na saray Israelita ed inkaaripen ed Ehipto nen 1513 K.K.P., say Dios so mipadparan akisipanan ed sikara a singa sakey a kontrata parad mapagalang a panangasawa. Diad impipakna ed satan a sipanan, insipan na Israel a sikatoy manmatoor ed ‘asawa ton laki,’ si Jehova. (Isaias 54:5) On, sayan piguratibon impiasawa na Israel ed Dios so insimbolo na mapagalang ya impangasawa nen Oseas ed si Gomer. Balet agaylan anguman iray kipapasen!

8. Panon a niwala so samploran-tribu na panarian na Israel, tan antoy nibaga yo nipaakar ed panagdayew na satan?

⁸ Say asawa nen Oseas so “nanlukon lamet, tan angiyanak na bii.” Satan ya ugaw a bii tan say tinmumbok ya anak so nayarin innginew nen Gomer ed pikakalugoran. (Oseas 1:6, 8) Lapud irerepresenta nen Gomer so Israel, nayarin itepet yo: ‘Panon a say Israel so nagmaliw a balangkantis?’ Nen 997 K.K.P., sinmian so samploran-tribu na Israel manlapud mamaabalaten iran tribu na Juda tan Benjamin. Niletneg so panagdayew ed kilaw a baka ed mamaamianen a samploran-tribu a panarian na Israel ta pian saray totoo ditan so agla onla ed Juda pian mandayew ed si Jehova diad templo to ed Jerusalem. Say panagdayew ed palson dios a si Baal, tekep na saray alablabas a kagletan ed sekso na satan, so linmamut a maong ed Israel.

9. Unong a nipasakbay diad Oseas 1:6, antoy agawa ed Israel?

⁹ Diad impangiyanak nen Gomer ed komadua, a maseguron anak ed paway, inkuan na Dios ed si Oseas: “Tawagen mo so ngaran to a Lo-ruhaman [kabaliksan toy “Sikatoy Agkinasian”]; ta andian ak la naani na panangasi ed abung na Israel, a dia ed anggan anto a pamaakaran agko ra perdonaen.” (Oseas 1:6) ‘Ag-ira pinerdona’ odino inekal ira nen Jehova sanen kinautibo na saray Asiryano iray Israelita nen 740 K.K.P. Balet, kinasian na Dios so duaran-tribu a panarian na Juda tan inliktar to itan ingen ta aliwan diad panamegley na pana, kampilan, bakal, saray kabayo, odino saray de-kabayoan. (Oseas 1:7) Diad loob na sanlabi nen 732 K.K.P., tinigway na sakey labat ya anghel so 185,000 a sundalo na Asirya a mamapagyaw ed kabiseran syudad na Juda, say Jerusalem.​—2 Arari 19:35.

Say Legal a Kaso nen Jehova Sumpad Israel

10. Say pikakalugoran nen Gomer so angiyilustra ed anto?

¹⁰ Inkaindan nen Gomer si Oseas tan nagmaliw ya “asawa ed inkabalangkantis,” a miaamong  ed sananey a laki. Inyilustra na saya no panon a say panarian na Israel so akialyansa ed politika ed idolatroso iran nasyon tan nandependi ed saratan. Imbes a pagalangan na Israel si Jehova lapud inyaligwas to ed materyal, say pinagalangan to et saray dirios na saratan a nasyon tan sinunggay toy sipanan ed impiasawa ed Dios diad impibiang ed palson panagdayew. Agpankelawan a si Jehova so walaan na legal a kaso sumpad nasyon ya akikalugoran ed espiritual a paraan!​—Oseas 1:2; 2:2, 12, 13.

11. Antoy agawa ed Ganggan a sipanan sanen inabuloyan nen Jehova so Israel tan Juda a nibantak ed sananey a nasyon?

¹¹ Antoy dusa na Israel ed impangikaindan to ed Akan-asawa ed sikato? Say Dios so ‘angiyakar ed sikato ed kalawakan’ na Babilonia, say nasyon ya angubkob ed Asirya a nibantakan na saray Israelita nen 740 K.K.P. (Oseas 2:14) Sanen impanampot la nen Jehova so 10-tribu a panarian, agto kinansela so sipanan to ed impiasawa ed orihinal a 12-tribu na nasyon na Israel. Diad tua, sanen inabuloyan na Dios so Jerusalem a naderal nen 607 K.K.P. tan inabuloyan toy totoo na Juda a nakautibo, agto pinangangga so Mosaikon Ganggan a sipanan a diad panamegley na satan et say 12-tribu na Israel so piguratibon akiasawa ed sikato. Satan a relasyon so angangga lambengat sanen impulisay na saray Judion lider si Jesu-Kristo tan impapatey da nen 33 K.P.​—Colosas 2:14.

Bibilinen nen Jehova so Israel

12, 13. Antoy kabaliksan na Oseas 2:6-8, tan panon a saratan a salita so inmaplika ed Israel?

¹² Binilin na Dios so Israel ya ‘iwaklit to so inkabalangkantis to,’ balet nilabay toy ontumbok ed saramay manangaro to. (Oseas 2:2, 5) “Kanian,” inkuan nen Jehova, “nia alaren ko naani so dalan mo na sabisabit, tan mangipaalagey ak naani na sakey a bakor a sumpa ed sikato, pian agto naromog so saray basbas to. Et sikato ontumbok naani ed saray manangaro to, balet agto ra naabotan naani; et sikara naani anapen to, balet agto ra naani naromog; saman la inkuan to, Onla ak tan ompawil ed inmuna ya asawak; ta magmaong lanti nen saman ed siak nen say natan. Ta sikato agto naamtaan ya angiter ak ed sikato na bukel, tan say balo ya alak, tan say larak, tan pinarakel ko ed sikato so pilak tan balitok, a sikara so inagamil da a nipaakar ed Baal.”​—Oseas 2:6-8.

¹³ Anggaman patutulongan so Israel ed saray nasyon a “manangaro to,” anggapo ed sikara so akasarag a tinmulong ed sikato. Sikatoy naalar odino apaliberan na singano agnasupok a takel, ta pian ag-iran balot makapangitarya na anggan anton tulong ed sikato. Kayari na taloy-taon ya impangubkob na Asirya, say kabiseran syudad na Israel a Samaria, so nagba nen 740 K.K.P., tan say samploran-tribu a panarian so aglan balot niletneg lamet. Pigpigaran indibidual ed limog na saray kautibon Israelita so makamoria no panon kaabig iray kipapasen sanen saray inmuunan atateng da so nanlingkor ed si Jehova. Satan a nakdaan so mangipulisay ed panagdayew ed si Baal tan panggunaetan day apasimbalon pisisipanan ed si Jehova.

Sananey ya Anggulo na Drama

14. Akin ya intuloy nen Oseas so relasyon to ed asawa ton si Gomer?

¹⁴ Pian natalosan a nagkalalo so pisiglaotan na panamaley nen Oseas tan say relasyon na Israel ed si Jehova, nonoten irayan salita: “Si Jehova inkuan to ed siak, Onla ka lamet, mangaro ka na sakey a bii ya inararo na kaaro to, tan sakey a mikakalugoran.” (Oseas 3:1) Inunor nen Oseas iyan  ganggan diad impanondon to ed si Gomer manlapud piaamongan ton laki. Kayari na satan, mapekder a binilin nen Oseas so asawa to: “Sika mansiansia ka naani a nipaakar ed siak dia ed saray dakel ya agew; agka naani mibalangkantis, tan sika so ag-asawa naani na anggan siopa a laki.” (Oseas 3:2, 3) Kinmiwas si Gomer ed disiplina, tan intuloy nen Oseas so relasyon to ed asawa to. Panon iyan inmaplika ed pidedeneng na Dios ed totoo na Israel tan Juda?

15, 16. (a) Diad antoran sirkumstansya a naawat na adisiplinan nasyon na Dios so panangasi to? (b) Panon ya asumpal so Oseas 2:18?

¹⁵ Legan ya akautibo ed Babilonia iray puersaan a pinataynan ed Israel tan Juda, inusar na Dios iray propeta to pian ‘tangguyoren ira.’ Pian nakasian ira na Dios, saray totoo to so kaukolan a mangipatnag na panagbabawi tan ompawil ed Akan-asawa ed sikara, a singa si Gomer a pinmawil ed asawa to. Insan ipaway nen Jehova manlapud “kalawakan” na Babilonia so adisiplinan nasyon a pinagka-asawa to tan ipawil to ed Juda tan Jerusalem. (Oseas 2:14, 15) Tinoor to itan a sipan nen 537 K.K.P.

¹⁶ Sinumpal met na Dios iyan sipan: “Dia ed satan ya agew manggawa ak naani na sipan a nipaakar ed sikara a pati saray ayep ed uma, tan pati saray manok ed saray tawen, tan pati saray kurongkurong a bengabengatla ed dalin: tan puteren ko naani so bekang tan say kampilan tan say bakal a manlapu ed dalin, tan padukolen ko ra naani a maligeligen.” (Oseas 2:18) Saray Judion nakdaan a pinmawil ed binalegan dan dalin so nambilay a maligeligen, ya anggapoy nepeg dan takotan ya ayayep. Sayan propesiya so walaan met na kasumpalan nen 1919 K.P., sanen say nakdaan na espiritual ya Israel so nibulos ed “Babilonia a Baleg,” say sankamundoan ya empiryo na palson relihyon. Panggagayagaan da la natan so espiritual a paraiso kaiba iray kakaaro ra, a maniilalon manbilay ya ando lan ando ed dalin. Naandi laray inaayep a walna ed limog na sarayan tuan Kristiano.​—Apocalipsis 14:8; Isaias 11:6-9; Galacia 6:16.

Ipapuso Iray Leksion

17-19. (a) Antoran kalidad na Dios so ipapaseseg ed sikatayon aligen? (b) Panon itayon nepeg a naapektoan na panangasi tan panangabagey nen Jehova?

¹⁷ Say Dios so mapangasi tan maabagey, tan nepeg ya ontan itayo met. Sakey itan a leksion a naaralan ed unona iran kapitulo na Oseas. (Oseas 1:6, 7; 2:23) Say inkamabulos na Dios a mangasi ed saray magbabawin Israelita so mitunosan ed impuyan ya uliran a: “Say manakbong ed saray impakalukso to ag-onaligwas; balet say mangipatua tan mangikaindan ed sikara makagamor na panangasi.” (Uliran 28:13) Makaligliwa met ed saray magbabawin managgaway kasalanan iray salita na salmista: “Saray bagbagat ed Dios saray maralit ya espiritu: say sakey a puso a maralit tan mansisibkel, agmo la balbalawen, O Dios.”​—Salmo 51:17.

¹⁸ Say propesiya nen Oseas so mangipapabitar  ed panangabagey tan panangasi na Dios a dadayewen tayo. Anggan bilang ta walaray onkasipa ed saray matunong a dalan to, nayarian day magbabawi tan manpataoli. No gawaen da itan, si Jehova so mangabrasa ed sikara. Kinasian to so magbabawi iran membro na nasyon na Israel, a piguratibon inasawa to. Anggaman sinunggay da si Jehova tan ‘pinasanok da so Santo na Israel, sikato [so] napno na sibeg [odino panangasi] tan ninodnonot to a sikara et laman labat.’ (Salmo 78:38-41) Say ontan a panangasi so nepeg a mamakiwas ed sikatayon mantultuloy a manakar a kaiba so maabagey a Dios tayo, si Jehova.

¹⁹ Anggaman kasmak ed Israel so kasalanan a singa say panagpatey, panagtakew, tan pikakalugoran, si Jehova so ‘nanligliwa ed sikato’ odino akitongtong ed puso to. (Oseas 2:14; 4:2) Say mismon kapusoan tayo so nasagyat tan say personal a relasyon tayo ed si Jehova so napaelet sano molimolien tayoy panangasi tan panangabagey to. Tepetan tayo sirin so inkasikatayo: ‘Panon kon naalig a nagkalalo so panangasi tan panangabagey nen Jehova diad pidedeneng ko ed arum? No say sakey a kaparan Kristiano ya akaopendian ko et onkerew na panamerdona, kasin akaparaan ak a mamerdona a singa say Dios?’​—Salmo 86:5.

20. Mangiter na alimbawa pian ipabitar a nepeg itayon nawalaan na kompiyansa ed inter na Dios ya ilalo.

²⁰ Say Dios so mangiiter na tuan ilalo. Alimbawa, insipan to: “Iter ko naani ed sikato . . . [so] lawak na Acor a nipaakar a pinto ya ilalo.” (Oseas 2:15) Say pinagka-asawan organisasyon nen Jehova nensaman so walaan na seguradon ilalo a makapawil ed binalegan ton dalin, a pakaromogan ed “lawak na Acor.” Say kasumpalan na satan a sipan, nen 537 K.K.P., so mangiiter ed sikatayo na maabig a rason pian manggayaga ed seguradon ilalo ya itatarya nen Jehova ed sikatayo.

21. Antoy papel na kakabatan diad panakar tayo a kaibay Dios?

²¹ Pian mantultuloy a manakar a kaibay Dios, kaukolan so tuloytuloy ya igamor tayo na kakabatan ed sikato tan iyaplika itan ed bilay tayo. Makapaermen ya anggapoy kakabatan na Israel nipaakar ed si Jehova. (Oseas 4:1, 6) Ingen, arum so angapresyan maong ed bangat na Dios, a kinmiwas unong ed satan, tan atumangan a tuloy. Sakey lay Oseas. Ontan met ed say 7,000 ed panaon nen Elias ya agtinmalimukor ed si Baal. (1 Arari 19:18; Roma 11:1-4) Say mismon pisasalamat tayo ed madibinon bilin so ontulong ed sikatayon mantultuloy a manakar a kaibay Dios.​—Salmo 119:66; Isaias 30:20, 21.

22. Panon so nepeg a pangipasen tayo ed apostasya?

²² Iilaloan nen Jehova ya ipulisay na saray lalakin mangidadaulo ed totoo to so apostasya. Anggaman ontan, ibabaga na Oseas 5:1: “Dengel yo so saya, O sikayo saserdote, tan ontalineng ka, O abung na Israel, tan pakadengel mo, abung na ari; ta nipaakar ed sikayo so pangukom; ta sikayo nensaman so kalot ed Mizpa, tan sakey ya iket a nipanat ed Tabor.” Saray apostatan lider et patit tan kalot ed saray Israelita, a manasagyat ed sikaran mangagamil na idolatriya. Say Palandey Tabor tan say pasen ya atawag a Mizpa et nayarin sentro na ontan a palson panagdayew.

23. Panon kayon agunggonaan ed impanaral ed Oseas kapitulo 1 anggad 5?

²³ Diad sayan asingbat tayo, say propesiya nen Oseas so angipabitar ed sikatayo a si Jehova et mapangasin Dios a mangiiter na ilalo tan bebendisyonan to iramay mangiyaaplika ed bilin to tan mangipupulisay ed apostasya. Singa saray magbabawin Israelita nensaman, anapen tayo sirin si Jehova tan lawas panggunaetan a sikatoy napaliket. (Oseas 5:15) Diad panggawa ed satan, anien tayo so maong tan naeksperiensya tayo so agnaparaan a gayaga tan kareenan na amin na saramay sitotoor a manaakar a kaibay Dios.​—Salmo 100:2; Filipos 4:6, 7.

[Paimano ed leksab]

Panon Yon Ebatan?

• Antoy isisimbolo na impangasawa nen Oseas ed si Gomer?

• Akin a walaan si Jehova na legal a kaso sumpad Israel?

• Dinan a leksion ed Oseas kapitulo 1 anggad 5 so akasagyatan yo?

[Tepetepet Parad Panagaral]

[Litrato ed pahina 18]

Amta yo no siopay irerepresenta na asawa nen Oseas?

[Litrato ed pahina 19]

Saray manaayam ed Samaria so kinubkob na saray Asiryano nen 740 K.K.P.

[Litrato ed pahina 20]

Saray magayagan totoo so pinmawil ed binalegan dan dalin