Armagedon​—Makadesyang ya Anggaan?

ARMAGEDON! Kasin ipapanonot ed sika na sayan salita so turobos a desyang odino kapoolay uniberso? Diad dakel a parte na mundo, pigpigara ed saray salitan walad Biblia so lanang a nabibitla a singa say “Armagedon.” Sayan termino so malaknab ya uusaren pian deskribien so mauddiem ya arapen na katooan. Say industriya na pelikula so mangipapaslep ed nonot na katooan na makapakebbiew iran eksena ed isabi na “Armagedon.” Sayan salita so napno na misteryo tan lingo iran impakatalos. Anggaman amayamay so ideya nipaakar ed kabaliksan na saya, kaslakan ed saraya et agmitunosan ed ibabangat na Biblia, say lapuan na sayan balikas.

Lapud ikokonekta na Biblia so Armagedon ed “anggaan na mundo,” agta mipakna ka ya importante so pakawalaan na malinew a pakatalos ed peteg a kabaliksan na satan a salita? (Mateo 24:3) Tan agta makatunongan so itupleg ed sankatagyan a lapuan na katuaan, say Salita na Dios, pian naamtaan iray ebat nipaakar ed Armagedon tan no antoy epekto na satan ed sika tan ed pamilyam?

Ipanengneng na ontan a panangusisa ya agmangitarok na makadesyang ya anggaan so Armagedon noagta mangiparungtal itan na maliket a gapoan parad totoon manpirawat a manbilay tan onaligwas ed matunong a balon mundo. Natumangan ka na malinew a pakatalos ed sayan importantin Makasulatan a katuaan leleg mon uusisaen so impaningbat ed peteg a kabaliksan na Armagedon diad onsublay ya artikulo.

[Kahon/Litrato ed pahina 3]

ANTOY PAKAAMTAM ED ARMAGEDON?

• Nuklear a kaderal

• Desyang ed kaliberliber

• Idumbo ed dalin na bengatlan walad liwang

• Paneral na Dios ed marelmeng