Magmaliw a Progresibon Ministros a Mabulos ya Onadapta
Magmaliw a Progresibon Ministros a Mabulos ya Onadapta
“Nagmaliw ak ya ami’ ganagana ed amin day totoo, ta pian dia ed ami’ gawa nilaban ko so saray arum.”—1 CORINTO 9:22.
1, 2. (a) Diad antoran paraan ya epektibon ministro si apostol Pablo? (b) Panon so impaneskribe nen Pablo ed mismon awawey to ed say asainmin to?
SIKATOY mainomay a mideneng ed saray de-aral tan ed saray ordinaryon managgaway-tolda. Sikato so nagmaliw a makatangguyor ed saray dederlengen a Romano tan ed saray dumaralos a taga-Frigia. Makapakiwas iray sulat to ed saray modernon Griego tan ed saray konserbatibon Judio. Agnasuppiat so panagkatunongan to tan mapuersa so pananagyat to ed liknaan. Sinali ton anapen so pakapipaknaan to ed amin ta pian natangguyor to so arum dia ed si Kristo.—Gawa 20:21.
2 Satan a too et si apostol Pablo, ya andi-duaruwan sakey ya epektibo tan progresibon ministro. (1 Timoteo 1:12) Naawat to ed si Jesus so ganggan ya “awiten to so ngaran [nen Kristo] ed arap na saray Gentiles, tan saray arari, tan saray anak na Israel.” (Gawa 9:15) Anto so awawey to ed sayan asainmin to? Oniay inyabawag to: “Nagmaliw ak ya ami’ ganagana ed amin day totoo, ta pian dia ed ami’ gawa nilaban ko so saray arum. Tan gagawaen ko ra ya amin nisengeg ed ebanghelyo, pian makapinabang ak ed sikato.” (1 Corinto 9:19-23) Anto so naaralan tayo ed alimbawa nen Pablo a makatulong ed sikatayon magmaliw a lalon epektibo ed panagpulong tan panagbangat tayo?
Sakey ya Apasimbalon Too a Tinmalona ed Mairap ya Asainmin To
3. Anto so liknaan nen Pablo ed saray Kristiano sakbay na inkakomberte to?
3 Kasin si Pablo et dati lan maanos tan makonsideran too, a manepeg ed asainmin ya inawat to? Andin balot! Lapud inkapanatiko to ed relihyon, si Saul (a datin pananawag ed si Pablo) so sakey a maramsak a managpasegsegang ed saray patumbok nen Kristo. Sanen kaksilan to ni, inabobonan to so impamatey ed si Esteban. Kayari na satan, maruksan inusil-usilan nen Pablo iray Kristiano. (Gawa 7:58; 8:1, 3; 1 Timoteo 1:13) Sikato so nantultuloy a “maningas ni ed pangigagaem tan panagpatey ed saray binangatan na Katawan.” Lapud agni kontento ed panguusil-usil to ed saray mananisia diad Jerusalem, inggapo to so kampanya ton panagbusol anggad amianen, salanti, diad Damasco.—Gawa 9:1, 2.
4. Anton pananguman so kinaukolan a gawaen nen Pablo pian nasumpal toy asainmin to?
4 Say manunan sengegan na pirmin pamubusol nen Pablo ed Inkakristiano et nayarin say kombiksion to a say balon pananisia et makaderal ed Judaismo no nalaokan itan na nikaduma tan agkalkaliktan iran ideya. Diad tua, si Pablo et sakey a “Fariseo,” a say kabaliksan na satan et “nibiig a sakey.” (Gawa 23:6) Isipen pa so inkabigla nen Pablo sanen naamtaan to a sikatoy pinili na Dios a mangipulong ed si Kristo, a diad amin a totoo et dia ni ed saray Gentil! (Gawa 22:14, 15; 26:16-18) Agayla, agni ingen midudungo iray Fariseo ed saray ipapasen dan managkasalanan! (Lucas 7:36-39) Andi-duaruwa a kinaukolan so baleg a sagpot ed biang to pian umanen so punto de bista to tan itunos itan ed linawa na Dios ya amin a nengneng na totoo so nepeg a nilaban.—Galacia 1:13-17.
5. Panon tayon naalig si Pablo diad ministeryo tayo?
5 Nayarin ontan met so kaukolan tayon gawaen. Legan ya ondarakel so totoo ed teritorya tayo a nanlalapud arum a bansa tan mansasalita na nanduruman lenguahe, nakaukolan tayon panggunaetan ya usisaen so awawey tayo tan iwaklit so antokaman a panangidumaduma. (Efeso 4:22-24) Balanglan namomoria tayo odino andi, sikatayoy naimpluensyaan na abangonan tayon sosyedad tan say agamoran tayon edukasyon. Nipurek na satan ed sikatayo iray panmoria tan awawey a walay panaglabi, panangidumaduma, tan agmabulos ya iyadapta. Nepeg tayon daegen so ontan iran liknaan no labay tayoy ontalona ed pananap tan panulong ed saray kinmarnero. (Roma 15:7) Ontan so ginawa nen Pablo. Inawat to so mairap ya asainmin pian palaknaben so ministeryo to. Lapud apakiwas unong ed aro, abayuboan to so dunong to’d panagbangat a manepeg ya aligen. On, say panaral ed ministeryo na ‘apostol na saray Gentil’ odino nasyon so mangipatnag a sikato so maimano, mabulos ya onadapta, tan maabilidar ed panagpulong tan panagbangat. *—Roma 11:13.
No Panon so Inyadapta na Sakey a Progresibon Ministro
6. Panon a nagmaliw a maimano si Pablo ed abenegan na saray ondedengel ed sikato, tan antoy resulta na satan?
6 Si Pablo so maimano ed saray sisiaen tan abenegan na saray onderengel ed sikato. Sanen katongtong to si Arin Agripa II, binidbir nen Pablo a say ari et ‘kabat to so amin a kaugalian tan siblangan a wala ed saray Judio.’ Insan marundunong si Pablo ya angusar ed pikakabat to ed saray sisiaen nen Agripa tan siningbat to iray bengatlan natatalosan a maong na ari. Ontan lan kalinew tan kabiskeg so paraan na panagkatunongan nen Pablo kanian oniay inkuan nen Agripa: “Dia ed dagdaiset a salita nauyot mo ak a man-Kristiano.”—Gawa 26:2, 3, 27, 28.
7. Panon ya impatnag nen Pablo so mabulos ya iyaadapta sanen pinulongan to so ulop na totoo diad Listra?
7 Si Pablo so mabulos met ya onadapta. Imanoen pa so metodo to sanen binano to so ulop na totoo ed syudad na Listra diad pandadayew da ed sikato tan ed si Bernabe bilang dirios. Nibaga a sarayan totoo, a mansasalita na Lycaonian, so ipapasen ya agtanton de-aral tan maan-anito a totoo. Unong ed Gawa 14:14-18, impabitar nen Pablo so palsa tan say daakan iran probisyon na satan bilang ebidensya na inkatalonggaring na tuan Dios. Mainomay a natalosan so argumento to, tan ompatnag a ‘naamper iman a dakel a totoo a mangiyapay na bagat’ ed si Pablo tan Bernabe.
8. Diad antoran paraan ya impatnag nen Pablo a sikatoy mabulos ya onadapta anggaman ed alabas a reaksion to no maminsan?
8 Siempre, aliwan ayadyari si Pablo, tan no maminsan et alabas so reaksion to ed pigaran bengatla. Alimbawa, diad aminsan ya inkagawa sanen sikato so pinabaingan tan agmakatunongan a nansalitaan, sikato so binmales met na ansakit a salita sumpad sakey a Judio a manngaray Ananias. Balet sanen nibaga ed si Pablo a say naiinsulto to la manaya et sakey ya atagey a saserdote, sikato so tampol a kinmerew na dispensa. (Gawa 23:1-5) Sanen sikato so walad Atenas, diad primero et “agotgot so espiritu to ed loob to lapud impakanengneng to ed baley a napno na talintao.” Ingen, diad paliwawa to ed Pukdol nen Mars, ag-itan napatnagan ed si Pablo. Imbes, sikato so akitongtong unong ed say pansisingbatan na saray taga-Atenas, a sikato so nankatunongan ed pakapampaknaan da diad impanukoy to ed altar a “Dia ed Sakey a Dios ya Ag-amta” tan inaon to so sakey ed saray manag-anlong da.—Gawa 17:16-28.
9. Panon ya impatnag nen Pablo so inkamaabilidar sanen midedeneng ed saray nanduruman dumerengel?
9 Diad pidedeneng to ed nanduruman dumerengel, impatnag nen Pablo so nikadkaduman inkamaabilidad. Inkonsidera to so kultura tan kaliberliber ya angimpluensya ed panag-isip na dumerengel to. Sanen sinulat to iray Kristiano diad Roma, kabisado to a sikara so manaayam ed kabisera na sankabiskegan a pakayari ed saman a panaon. Say manunan punto na sulat nen Pablo ed saray Kristiano ed Roma et say pakayari na kasalanan nen Adan a maneral so tinalonaan na pakayari nen Kristo a manondon. Sikato so nansalita ed saray Romanon Kristiano tan ed saramay walad kaliberliber da diad lenguahe a makasagyat ed puso ra.—Roma 1:4; 5:14, 15.
10, 11. Panon ya inyadapta nen Pablo iray ilustrasyon to diad saray ondedengel ed sikato? (Nengnengen met so paimano’d-leksab.)
10 Anto so ginawa nen Pablo sanen labay ton ipaliwawa so aralem iran katuaan na Biblia diad saray ondedengel ed sikato? Sikato so marunong a mangusar na simpli, mainomay a natalosan iran ilustrasyon pian ipaliwawa so komplikado iran ideya ed Kasulatan. Alimbawa, amta nen Pablo a saray totoo ed Roma so mikabat ed sistema na panangaripen diad interon Empiryo na Roma. Diad tua, karaklan ed totoo a sinulatan to et nayarin ariripen. Kanian inusar nen Pablo so panangaripen bilang ilustrasyon pian nidanet so mapuersan argumento to nipaakar ed pandeside na sakey a too no kasin diad kasalanan odino diad inkatunong so pampasakopan to.—Roma 6:16-20.
11 Oniay kuan na sakey a reperensya, “Diad limog na saray Romano, nayarian na katawan ya ibulos so sakey ya aripen ya anggapoy kondisyon, odino say aripen so nayarin manaliw ed kawayangan to diad pambayar ed katawan to. Say kawayangan so niyarunsa met no say pankayarian et iyalis ed sakey a dios.” Say nibulos lan aripen so makapantultuloy nin manlingkor ed katawan to a walaay sueldo. Mapatnag a si Pablo so anaglawi ed sayan kustombre sanen insulat to so nipaakar ed desisyon na indibidual no dinan a katawan so tuloken to—kasalanan odino inkatunong. Saray Kristiano ed Roma so nibulos la ed kasalanan tan kayarian la ra na Dios. Sikara so bulos a manlingkor ed Dios, ingen ta nayari da lamet a pilien so manlingkor ed kasalanan—say datin katawan da—no labayen da. Satan a simpli ingen ta kabisadon ilustrasyon so mamakiwas ed saramay Kristiano a walad Roma pian tepetan so inkasikara, ‘Dinan a katawan so panlingkoran ko?’ *
Makaaral ed Ehemplo nen Pablo
12, 13. (a) Anton sagpot so nakaukolan natan ta pian nasabi so kapusoan na nanduruman klase na dumerengel tayo? (b) Anto so aromog yon epektibo sano pupulongan yo iray totoo a nandurumay abenegan da?
12 Mipadpara ed si Pablo, nepeg a maimano, mabulos ya onadapta, tan maabilidar itayo ta pian nasabi tayo so puso na nanduruman klase na dumerengel tayo. Pian natulongan tayo iray dumerengel tayo a makatalos ed kabaliksan na maong a balita, aliwa lambengat a say apasakey a paraan na ibibisita, pangipasabi na imparaan a mensahe, odino pangitilak na literatura na Biblia so gawaen tayo. Panggunaetan tayon tebeken iray pankaukolan tan pampapagaan da, saray labay tan agda labay, tan saray katatakotan tan panangidumaduma ra. Anggaman mankaukolan iya na panagplano tan panagsagpot, saray manangipalapag na Panarian ed interon mundo so magunaet a manggagawa ed satan. Alimbawa, oniay report na sangan opisina na saray Tasi nen Jehova ed Hungary: “Rerespetoen na saray agagi so kustombre tan estiloy-kabibilay na totoo a nanlapud arum iran nasyon tan agda ira iilaloan ya onadapta ed lokal iran kustombre ra.” Ontan met so panggugunaetan a gawaen na saray Tasi ed arum a pasen.
13 Diad sakey a bansa ed Arawin Bukig, maslak a totoo so manpapaga ed bunigas, panagpasal ed anak, tan edukasyon. Saray manangipalapag na Panarian ditan so manggugunaet a mangipabitar ed saratan a tema imbes ya itongtong da iray pamaakaran a singa say onloloor iran kipapasen na mundo odino komplikado iran isyu na sosyedad. Ontan met, naimano na saray manangipalapag ed sakey a baleg a syudad ed Estados Unidos a say pampapagaan na totoo diad sakey a komunidad a walad teritorya ra et say panagkurakot, agmauksoy a trapiko, tan krimen. Saray Tasi so matalonan manguusar ed saratan a tema pian nigapo so pantotongtong nipaakar ed Biblia. Seseguroen na saray epektibon managbangat na Biblia ya antokaman so tema a pilien da, mansiasiansia ira a positibo tan makapaseseg, ya idadanet da so praktikal a kablian na panangiyaplika ed saray prinsipyo na Biblia natan tan ed maliket iran ilalo ya itatarya na Dios ed arapen.—Isaias 48:17, 18; 52:7.
14. Deskribien iray paraan a nayarian tayo so onadapta ed nanduruman pankaukolan tan kipapasen na totoo.
14 Makatulong met so panguman-uman tayo ed metodo tayo ed ministeryo, lapud say totoo so walaan na nanduruman abenegan ed kultura, edukasyon, tan relihyon. Say paraan na iyaasingger tayo ed totoo a manisia ed Manamalsa balet ta agmanisia ed Biblia so miduma ed samay paraan na iyaasingger tayo ed saramay manisia ya anggapo so Dios. No papanisiaan na sakey a say amin a literatura na relihyon et instrumento na sakey a propaganda, say presentasyon ya usaren tayo so miduma ed samay uusaren tayo ed sakey a toon mangaawat ed ibabangat na Biblia. Say mabulos ya iyaadapta so nakaukolan met ed pidedeneng tayo ed totoon nakakatongtong tayo a walaan na nanduruman inaral. Saray onsianon managbangat so manguusar ed panagkatunongan tan saray ilustrasyon a matukoy ed kipapasen a nanaabet da.—1 Juan 5:20.
Tulong ed Saray Balon Ministro
15, 16. Akin a wala so pankaukolan parad panangipasal ed balo iran ministro?
15 Si Pablo so aglambengat sinononot ed panamaaligwas to ed saray mismon paraan na panagbangat to. Amoria to so pankaukolan na pangipasal tan pangiparaan ed saramay wala ni’d kaksilan, a singa si Timoteo tan Tito, pian magmaliw ya epektibon ministro. (2 Timoteo 2:2; 3:10, 14; Tito 1:4) Mipadpara, kakkaukolan met natan so pangitarya tan pangawat ed ontan a panangipasal.
16 Nen 1914, wala so masulok a 5,000 a manangipalapag na Panarian ed sankamundoan; natan, diad kada simba et manga 5,000 a balo ni so nababautismoan! (Isaias 54:2, 3; Gawa 11:21) Sano walaray balo ni a ginmapo lan milimog ed Kristianon kongregasyon tan labay da la so mibiang ed ministeryo, nakaukolan da so panangipasal tan panangidirehi. (Galacia 6:6) Importante ya usaren tayo iray metodo na Katawan, si Jesus, diad panagbangat tan panangipasal ed saray babangatan. *
17, 18. Panon tayon natulongan iray balo ni a nawalaan na kompiyansa ed ministeryo?
17 Si Jesus et aglambengat nananap na ulop na totoo insan to la imbaki iray apostol to a mitongtong ed sikara. Indanet to nin unona so pankaukolan ed panagpulong a kimey insan impaseseg to so pampeleng ed pikakasi. Insan sikato so angitarya na taloran manunan probisyon: say kaiba, teritoryan pankimeyan, tan mensahe. (Mateo 9:35-38; 10:5-7; Marcos 6:7; Lucas 9:2, 6) Nagawaan tayo met itan. Balanglan tutulongan tayo so mismon anak tayo, balon iyaaralan, odino say sakey ya abayag lan agni akapampulong, matukoy so pansagpot pian nitarya so panangipasal ed ontan a paraan.
18 Saray balo ni so mankaukolan na baleg a tulong pian nawalaan na kompiyansa ed pangipresenta ed mensahe na Panarian. Sarag yo ra kasin tulongan a manparaan tan mangipasal ed simpli tan makapasagyat a presentasyon? Diad lawak, abuloyan ira a makaaral ed alimbawa yo diad pitongtong yo nin unona ed saray unabung. Nayarian yon aligen so alimbawa nen Gideon, ya oniay imbaga to ed saray kapara ton mibabakal: “Onnengneng kayo ed siak, tan gawaen yo so onia.” (Uko-ukom 7:17) Insan ikdan na pankanawnawa so balo ni pian mansalita. Komendaan iran maong lapud saray sagpot da, insan no matukoy, mangiter na antikey iran suhestion pian onaligwas.
19. Anto so determinasyon yo legan yon panggugunaetan so ‘sigpot a panumpal ed ministeryo yo’?
19 Ta pian sigpot tayon ‘nasumpal so ministeryo tayo,’ determinado itayon magmaliw a mas mabulos ya onadapta ed paraan tayo, tan kaliktanen tayon ipasal iray balo nin ministro ya ontan met so gawaen da. Sano nodnonoten tayo so kaimportantian na kalat tayo—pian inabang so mismon pikakabat ed Dios a mangitonton ed kilalaban—kombinsido itayo a makagunggonan tuloy so pagmaliw ya “ami’ ganagana ed amin day totoo, ta pian dia ed ami’ gawa nilaban [tayo] so saray arum.”—2 Timoteo 4:5; 1 Corinto 9:22.
[Saray paimano ed leksab]
^ par. 5 Parad saray alimbawa na ontan iran kalidad ed ministeryo nen Pablo, konsideraen so Gawa 13:9, 16-42; 17:2-4; 18:1-4; 19:11-20; 20:34; Roma 10:11-15; 2 Corinto 6:11-13.
^ par. 11 Mipadpara, diad pangisasalaysay to ed balon siglaotan ed baetan na Dios tan saray alanaan na espiritun “ananak” to, inusar nen Pablo so legal a termino a kabkabisado na saray manbabasa ed sulat to a walad Empiryo na Roma. (Roma 8:14-17) “Say panagtagibi so importantin kustombre diad Roma, tan maapit a misiglaotan ed saray ideya na Romano ed pamilya,” so kuan na libron St. Paul at Rome.
^ par. 16 Diad kaplesan, gagawaen so programan “Pioneers Assist Others” ed amin a kongregasyon na saray Tasi nen Jehova. Nikakana ed programa so eksperiensya tan panangipasal na sigpot-panaon iran ministro diad pananulong ed saray agtanton eksperiensyadon manangipalapag.
Kasin Nanonotan Yo?
• Diad antoran paraan a naalig tayo si Pablo diad ministeryo tayo?
• Antoran pananguman ed panag-isip tayo so seguradon nakaukolan a gawaen?
• Panon tayon napansiansian positibo so mensahe tayo?
• Anto so nakaukolan a gawaen na saray balon ministro pian nabayuboan da so panagmatalek?
[Tepetepet Parad Panagaral]
[Blurb ed pahina 29]
Si apostol Pablo so maimano, mabulos ya onadapta, tan maabilidar ed panagpulong tan panagbangat
[Blurb ed pahina 31]
Intarya nen Jesus so taloran manunan probisyon parad saray babangatan to: sakey a kaulop, teritoryan pankimeyan, tan mensahe
[Saray litrato ed pahina 28]
Tinmalona si Pablo ed impanabi to ed puso na nanduruman klase a dumerengel to diad impagmaliw ton mabulos ya onadapta
[Litrato ed pahina 30]
Ikokonsidera na saray epektibon ministro so kultura na saray ondedengel ed sikara
[Litrato ed pahina 31]
Tutulongan na saray progresibon ministro iray balo ni a manparaan ed ministeryo