Narerengelan na Totoo na ‘Amin a Pansasalita’ so Maong a Balita

‘Samploran lalaki a manlapu ed saray amin a pansasalita na saray nasyon so mangikuan, Sikami mila kami naani ed sikayo, ta sikami nadngelan mi a say Dios wala ed sikayo.’​—ZACARIAS 8:23.

1. Panon ya intarya nen Jehova so sankaabigan a pankanawnawa tan kipapasen pian nigapo na saray Kristiano so pampulong ed totoon walaay nanduruman lenguahe tan nanlapud nanduruman bansa?

 ALAY abig ed saman so pankanawnawa tan kipapasen. Agew iman na Pentecostes 33 K.P. Pigaran simba ni ed akadkauna et nandaragup iray Judio tan proselita a nanlapud 15 a rehyon na maaw-awang ya Empiryo na Roma diad Jerusalem pian manselebra na Paskua. Diad saman ya agew et nilibo ed sikara so akadngel, ya ag-ira awetwet a singa agawa ed saramay walad kadaanan a Babel, noagta atalosan da iray ordinaryon totoo a napno na masanton espiritu a mangiyaabawag ed maong a balita panamegley na dakerakel a lenguahe a sasalitaen diad empiryo. (Gawa 2:1-12) Saman ya inkagawa so gapoan lay inkiletneg na Kristianon kongregasyon tan gapoan na edukasyonal a kimey parad totoon walaay nanduruman lenguahe tan nanlapud nanduruman bansa a nantultuloy anggad sayan agew.

2. Panon ya abigla iray nanduruman klase na ondedengel ed saray babangatan nen Jesus nen Pentecostes 33 K.P.?

² Saray babangatan nen Jesus so nayarin makapansalita na kaslakan a Griego, say bantog a lenguahen uusaren na karaklan diad panaon da. Inusar da met so Hebreo, say lenguahen uusaren diad loob na templo. Balet, diad saman ya agew na Pentecostes et “atalagnaw” odino abigla ed sikara so nanduruman klase na dumerengel da lapud sikaray nansalita ed dilin lenguahe na saraman a totoo. Anto so resulta? Atenyeg so kapusoan na saray ondedengel ed importante iran katuaan a nadngelan da diad dilin lenguahe ra. Diad saman ya agew, say melag a grupo na saray babangatan so dinmakel, a nagmaliw ya abalbaleg ya ulop na masulok a 3,000!​—Gawa 2:37-42.

3, 4. Panon a linmaknab so panagpulong a kimey sanen inmalis iray babangatan manlapud Jerusalem, Judea, tan Galilea?

³ Kayarin tuloy na saman a makatantandan inkagawa, linmesa ed Jerusalem so malaknab a panamasegsegang, tan “saray abuybuyak, nanakar-akar ira ed amin a kadalinan ya angipulong na Salita.” (Gawa 8:1-4) Alimbawa, nabasa tayo ed Gawa kapitulo 8 so nipaakar ed si Felipe, a mapatnag a sakey a mansasalitay-Griego ya ebanghelisador. Pinulongan nen Felipe iray Samaritano. Pinulongan to met so Etiopen opisyal a kinmiwas unong ed mensahe nipaakar ed si Kristo.​—Gawa 6:1-5; 8:5-13, 26-40; 21:8, 9.

⁴ Sanen inmalis iray Kristiano pian mananap na napanayaman da ed paway na Jerusalem, Judea, tan Galilea, nipaarap ira ed balo iran babeng a mangilalanor ed saray etnikon grupo tan lenguahe. Arum ed sikara so nayarin manpupulong labat ed saray Judio. Balet oniay report na babangatan a Lucas: “Walaray arum ed sikara a lalakin taga-Chipre tan Cirene, a nen akaloob ira ed Antioquia akisalita ra met ed saray Griego, ya impulong da so Katawan a si Jesus.”​—Gawa 11:19-21.

Say Agmanangidumaduman Dios so Walaan na Mensahe Parad Amin

5. Panon a napatnagan ed maong a balita so agpanangidumaduma nen Jehova?

⁵ Saratan ya agawa so mitunosan ed saray paraan na Dios; anggapo so panangidumaduma to. Sanen si apostol Pedro so tinulongan nen Jehova a  manguman ed panmoria to ed totoo na saray nasyon, oniay maliket ton inkuan: “Tua a nanengneng ko a say Dios anggapo so pangiduma to ed saray totoo; noag ingen dia ed balang nasyon akoen to so antakot ed sikato tan manggawa na matunong.” (Gawa 10:34, 35; Salmo 145:9) Sanen si apostol Pablo, a datin managpasegsegang ed saray Kristiano, so angiyabawag a say Dios et “labay to a saray amin a totoo nilaban ira komon,” pinekderan to ya anggapoy lalabien na Dios. (1 Timoteo 2:4) Napatnagan so agpanangidumaduma na Manamalsa lapud say ilalo na Panarian so lukas ed amin a lalaki tan bibii a walaan na nanduruman rasa, nasyonalidad, odino lenguahe.

6, 7. Antoran propesiya na Biblia so angipasakbay ed ikayat na maong a balita diad nanduruman bansa tan lenguahe?

⁶ Sayan ilalaknab ed nanduruman bansa so nipasakbay la pigaran siglo lay apalabas. Unong ed propesiya nen Daniel, “[si Jesus] so naikdan na panuley, tan gayaga, tan sakey a panarian, ya amin so saray baley, saray nasyon tan pansasalita manlingkor ira komon ed sikato.” (Daniel 7:14) Say katuaan a sayan magasin so nipapalapag la ed 151 a lenguahe tan nibubunog ed sankamundoan, a pakakabasaan yo nipaakar ed Panarian nen Jehova, so mangipapatnag ed kasumpalan na satan a propesiya na Biblia.

⁷ Impasakbay na Biblia so panaon sano saray totoo a walaan na nanduruman lenguahe so makadngel ed manangiter-bilay a mensahe. Diad impaneskribe nen Zacarias ed no panon a sagyaten na tuan panagdayew so dakel a totoo, oniay impropesiya to: “Dia ed saraman ya agew nagawa naani a samploran lalaki ompeket ira naani, manlapu ed saray amin a pansasalita na saray nasyon, sikara naani ompeket ed saloy na kawes na saman so Judio [alanaan na espiritun Kristiano, a kabiangan na “Israel na Dios”], a kuan da, Sikami mila kami naani ed sikayo, ta sikami nadngelan mi a say Dios a wala ed sikayo.” (Zacarias 8:23; Galacia 6:16) Tan insalaysay met nen apostol Juan so  anengneng to ed pasingawey, a kuan to: “Nia, so sakey a baleg ya ulop, a sikato so agnayari a bilangen na too a nanlapu ed balang nasyon tan amin na saray kailalakan, tan binaleybaley, tan salita, a mananalagey ira’d arap na trono, tan ed arap na Kordero.” (Apocalipsis 7:9) Nanenengneng tayo la so pakakasumpal na saratan a propesiya!

Sabien so Amin a Klase na Totoo

8. Anto so peteg a nagagawa natan a mankaukolan na saray pananguman ed panagpulong a kimey tayo?

⁸ Natan, lalon ondarakel so totoo ya onaalis ed arum a lugar. Lapud globalisasyon, dakel la so manaayam ed arum a bansa. Dakel a totoon nanlapud saray lugar a walay guerra tan mairap so ekonomya et inmalis ed mas maasenso iran pasen, pian makapambilay ira a maligen ed materyal. Diad dakel a bansa et dinmagsa iray imigrante tan saray tinmatalin (refugee) kanian walaray atiptipon ya etnikon grupo a mansasalita na arum a lenguahe. Singa bilang, diad Finland et walay masulok a 120 lenguahe a sasalitaen; diad Australia et masulok a 200 so lenguahe. Diad sakey labat a syudad ed Estados Unidos​—San Diego​—masulok a 100 a lenguahe so narerengelan!

9. Panon tayon moriaen iray totoo ed teritorya tayo a mansasalita na nanduruman lenguahe?

⁹ Bilang Kristianon ministros, kasin ipapasen tayon babeng ed ministeryo tayo so kiwawala na saray totoon mansasalitay nanduruman lenguahe? Andin balot! Imbes, ipapasen tayo itan ya alay abig ya ilalaknab na teritorya na ministeryo tayo​—‘saray kaumaan ya amputi la ra para ed panagani.’ (Juan 4:35) Pambabanikelan tayon asikasoen iray totoo a sinononot ed espiritual a pankaukolan da, antokaman so nasyonalidad odino lenguahe ra. (Mateo 5:3) Bilang resulta, kada taon et ondarakel so totoo na ‘balang pansasalita’ a magmamaliw a babangatan nen Kristo. (Apocalipsis 14:6) Alimbawa, kasabi na Agosto 2004, say panagpulong a kimey ed Alemanya so gagawaen la ed ngalngali 40 lenguahe. Ontan met, say maong a balita so nipupulong ed Australia diad ngalngali 30 lenguahe, a tinmagey ed loob labat na samploran taon manlapud 18 a lenguahe. Diad Gresya, pupulongan na saray Tasi nen Jehova so totoo diad ngalngali 20 a nanduruman lenguahe. Diad sankamundoan et manga 80 porsiento na saray Tasi nen Jehova so mansasalita na arum nin lenguahe nilikud ed Ingles, say internasyonal a lenguahe.

10. Anto so sinansakey a betang na manangipalapag diad panaggaway babangatan ed totoo a nanlapud ‘amin a nasyon’?

 ¹⁰ On, nasusumpal la so ganggan nen Jesus a ‘manggawa na saray babangatan ed amin a nasyon’! (Mateo 28:19) Lapud maliket dan inawat itan a ganggan, saray Tasi nen Jehova so aktibo diad 235 a daldalin, ya ibubunog da so literatura ed masulok ya 400 a lenguahe. Anggaman itatarya na organisasyon nen Jehova iray nakaukolan a probisyon pian nasabi so totoo, say kada sakey a manangipalapag na Panarian so nepeg ya onkiwas lan unona pian ipasabi so mensahe na Biblia ed ‘amin a klase’ diad lenguahe a natalosan dan maong. (Juan 1:7) Sayan nankakasakey a sagpot so makakatulong ed minilyon a totoo a walaan na nanduruman lenguahe pian nagunggonaan ira ed maong a balita. (Roma 10:14, 15) On, kada sakey ed sikatayo so walaan na importantin betang!

Arapen so Angat

11, 12. (a) Antoran angat so nepeg ya arapen, tan panon a nayarin makatulong so masanton espiritu? (b) Akin a mas makatulong so pampulong ed totoo diad dilin lenguahe ra?

¹¹ Natan, dakel a manangipalapag na Panarian so malabay a manaral na sananey a lenguahe, balet ta ag-ira makapandependi odino makapanilalo ed mamilagro iran langkap na espiritu na Dios. (1 Corinto 13:8) Say panaral na balon lenguahe et sakey a baleg a sagpot. Anggan saramay mansasalita la na arum a lenguahe so kinaukolan a mangiyadapta ed panag-isip tan metodo ra ta pian magmaliw a makapasagyat so mensahe na Biblia ed totoo a mansasalita ed satan a lenguahe, balet ta duma iray abenegan tan kultura da. Insan, wala met iray balon imigrante a mabaing kanian baleg a sagpot so nakaukolan pian natebek so panag-isip da.

¹² Anggaman kuan, say masanton espiritu so siansia nin onkukurang ed limog na saray lingkor nen Jehova diad saray sagpot dan natulongan so totoo a mansasalita na arum niran lenguahe. (Lucas 11:13) Imbes a manginabang na mamilagro iran pakayari a makapansalita na nanduruman lenguahe, say espiritu so mamapabiskeg ed pilalek tayon mitalosan ed totoo ya agmansasalita na lenguahe tayo. (Salmo 143:10) No ipulong odino ibangat tayo so mensahe na Biblia ed totoo diad lenguahe ya agda kabisado, nayarin nasabi tayo so kanonotan da. Balet, ta pian nasabi tayo so puso na onderengel ed sikatayo, magmaong so pangusar tayo ed dilin lenguahe ra​—say lenguahen manabi ed sankaaraleman iran pilalek, motibo, tan ilalo ra.​—Lucas 24:32.

13, 14. (a) Anto so mamapakiwas ed arum pian onloob ed ministeryo ya uusaren so sananey a lenguahe? (b) Panon a napapatnagan so espiritu na dilin-panagsakripisyo?

¹³ Dakel a manangipalapag na Panarian so linmoob ed ministeryo ya uusaren so sananey a lenguahe sano naobserbaan da so maabig a pangaawat ed katuaan na Biblia. Ombibiskeg so arum sano say serbisyo ra et magmaliw a mas makapaangat tan makapainteres. “Dakel ed saramay nanlapud Mamabukig a Europa so napepegaan ed katuaan,” so inkuan na sangan opisina na saray Tasi nen Jehova ed mamaabalaten a Europa. Agaylan makapnek so itulong ed ontan iran maawat ya indibidual!​—Isaias 55:1, 2.

¹⁴ Balet, ta pian magmaliw a mabunga ed sayan kimey, nakaukolan tayo so determinasyon tan dilin-panagsakripisyo. (Salmo 110:3) Singa bilang, pigaran pamilya a Tasin Hapones so angisakripisyo ed saray komportablen ayaman da a walad baleg iran syudad insan inmalis ira ed niyarawi iran pasen pian tulongan da iray grupo na imigranten Tsino a talosan so Biblia. Diad sagur a baybay na Estados Unidos, saray manangipalapag so naynay a manmamaneho na sakey anggad duaran oras pian iyaralan na Biblia iray totoo a walad lawak na saray Filipino. Diad Norway, sakey a sanasawa so mangiyaaral ed sakey a pamilyan taga-Afghanistan.  Uusaren na Tasi a sanasawa so Ingles tan Noruego iran edisyon na brosyur ya Anto so Kakaukolanen na Dios ed Sikatayo? * Basaen na pamilya iray parapo ed Persian, sakey a lenguahe a kaparpara na manunan lenguahe ra a Dari. Mantotongtong ira ed Ingles tan Noruego. Say ontan ya espiritu na dilin-panagsakripisyo tan mabulos ya iyaadapta so mapalabon natutumangan sano awaten na saray sankaili so maong a balita. *

15. Panon itayon makapibiang ed panagpulong a kimey ya uusaren so nanduruman lenguahe?

¹⁵ Sarag yo kasi so mibiang ed sayan kimey a mangokobre ed nanduruman lenguahe? Akin ta no anapen nin unona no dinan iran sankailin lenguahe so kaslakan ya uusaren ed teritorya yo? Insan nayarin mangawit kayo na pigaran tract odino brosyur ed saratan a lenguahe. Say bokletan Good News for People of All Nations, ya impaway nen 2004, so mausa-usar la ed panangikayat ed ilalo na Panarian lapud simpli tan positibon mensahe a wala ed dakel a lenguahe.​—Nengnengen so artikulon “Good News for People of All Nations,” ed pahina 32.

‘Aroen so Sankaili’

16. Panon a nipatnag na saray responsablin agagi so andi-siblet ya interes da ed pananulong ed totoon mansasalita na arum a lenguahe?

¹⁶ Balanglan manaaral itayo na arum a lenguahe odino andi, makatulong itayo pian nibangat ed espiritual iray sankaili ed lugar tayo. Binilin nen Jehova so totoo to ya ‘aroen so sankaili.’ (Deuteronomio 10:18, 19) Alimbawa, diad baleg a syudad ed Amianen ya Amerika, limaran kongregasyon so mantitipon ed parehon Kingdom Hall. Singa met ed dakel niran hall, wala so tinaon a pansasalatan na oras na aral ya angiyalis ed aral ya uusaren so lenguahen Chinese diad labi na Simba. Balet, pansengegan itan na agpakaatendi na dakel iran imigrante a mantratrabaho ed restawran. Saray mamatatken ed arum iran kongregasyon so mapangasin nanggawa na pananguman ta pian saray aral ya uusaren so lenguahen Chinese so nagawa ed masakbay ya oras na Simba.

17. Anto so nepeg a liknaan tayo no desidien na arum so onalis pian ontulong ed arum a grupo a walaay sananey a lenguahe?

¹⁷ Kokomendaan na saray maaron manangasikaso so kualipikado tan onsiano iran agagi a malabay ya onalis pian ontulong ed arum a grupo a manguusar na sananey a lenguahe. Saratan ya eksperiensyadon managbangat na Biblia so nayarin naandi ed kongregasyon da, balet say liknaan na saray manangasikaso et nepeg a mipara ed saramay mamatatken ed Lystra tan Iconio. Saraman a mamatatken so ag-angamper ed si Timoteo a mila ed pambabaroy nen Pablo, anggaman si Timoteo et baleg a katulongan ed mismon kongregasyon da. (Gawa 16:1-4) Niarum ni, saramay mangidadaulo ed panagpulong a kimey so agnaamper ed nanduruman mentalidad, kustombre, odino walna na saray sankaili. Imbes, aawaten da so pandurumaan tan aanapen da iray paraan pian nabayuboan so maong a pisisiglaotan nisesengeg ed maong a balita.​—1 Corinto 9:22, 23.

18. Anton baleg a pankanawnawa na kimey so lukas ed amin?

¹⁸ Unong a nipropesiya, say maong a balita so nipulong ed ‘amin a lenguahe na saray nasyon.’ Wala nin siansia so alay abig a posibilidad na idaraak diad saray lawak ya uusaren so sananey a lenguahe. Nilibo iran maabilidad a manangipalapag so linmoob ed sayan “baleg a kaput” odino pankanawnawa a mangitotonton ed kimey. (1 Corinto 16:9) Ingen, dakel ni so nakaukolan ta pian nakimeyan iratan a teritorya, a singa ipapatnag na ontumbok ya artikulo.

[Saray paimano ed leksab]

Kasin Nipaliwawa Yo?

• Panon tayon naalig si Jehova diad panangipatnag ed agpanangidumaduma ed amin a totoo?

• Panon so nepeg a panmoria tayo ed totoo diad teritorya tayo ya agmansasalita na lenguahe tayo?

• Akin a makatulong so pampulong ed totoo diad dilin lenguahe ra?

• Panon tayon nipatnag so panangiyansakit tayo ed saray sankailin walad lugar tayo?

[Tepetepet Parad Panagaral]

[Mapa/Litrato ed pahina 23]

(Parad aktual a format, nengnengen so publikasyon)

Roma

CRETA

ASIA

FRIGIA

PAMFILIA

PONTUS

CAPADOCIA

MESOPOTAMIA

MEDIA

PARTIA

ELAM

ARABIA

LIBYA

EHIPTO

JUDEA

Jerusalem

[Saray Dayat]

Dayat na Mediteraneo

Andeket a Dayat

Ambalangan Dayat

Gulpo na Persia

[Litrato]

Nen Pentecostes 33 K.P., saray totoo a nanlapud 15 a rehyon na Romanon Empiryo so akadngel ed maong a balita diad dilin lenguahe ra

[Saray litrato ed pahina 24]

Dakel a sankaili so angawat ed katuaan na Biblia

[Litrato ed pahina 25]

Sakey a karatula na Kingdom Hall a walad limaran lenguahe