‘Ibalita so Kibulos Dia ed Saray Apriso’

DIAD kagapo na ministeryo nen Jesus, inyabawag to a kabiangan ed kimey to so ‘pangibalita ed kibulos la na saray apriso.’ (Lucas 4:18, Maung a Balita) Diad pangaalig da ed ehemplo na Katawan da, saray tuan Kristiano so mangipupulong na maong a balita ed “amin a nengneng na totoo,” ya ipapasabi ra ed sikara so kibulos manlapud espiritual ya inkipriso tan tutulongan da iran paaligwasen so bilay da.​—1 Timoteo 2:4, NW.

Natan, kabiangan ed sayan kimey so pampulong ed saray literal a priso​—saray totoon nipriso nisengeg ed nanduruman krimen balet ta mamapabli ed espiritual a kibulos. Panliketan yon basaen iyan makapaseseg a report nipaakar ed panagpulong a kimey na saray Tasi nen Jehova dia ed saray prisoan ed Ukraine tan ed arum nin pasen ed Europa.

Saray Datin Adik ed Druga a Nagmaliw a Kristiano

Dia ed 38 a taon ya impanbilay nen Serhii, * 20 a taon so inusar to ed prisoan. Diad loob ni ingen na prisoan so akasumpalan to na paneeskuela to. Inkuan to: “Nen imbeneg iran taon, siak so apriso lapud akapatey ak, tan pigara nin taon so palabasen ko pian makapaway ak. Diad prisoan et siak so ari-ari, tan tatakotan ak na arum a priso.” Kasin alikna to a sikatoy bulos lapud satan? Andi. Diad loob na dakel a taon, si Serhii so nigalet ed druga, alak, tan sigarilyo.

Insan innabang ed sikato na kapara ton priso so katuaan ed Biblia. Singa itan sinag na liwawa diad kabilungetan. Kayari na pigaran bulan, intunda to la iray bisyo to, nagmaliw a managpulong na maong a balita, tan abautismoan. Okupado la natan si Serhii ed loob na prisoan, lapud sikatoy manlilingkor ed si Jehova a sigpot-panaon. Pitoran kriminal so atulongan ton manguman ed kabibilay da tan magmaliw ya agagi to ed espiritual. Anemira ed sikara so nibulos la, balet atilak ni ed kulongan si Serhii. Agto itan paneermenan lapud sikatoy maliket a makatulong ni ed arum a nibulos manlapud espiritual ya inkipriso.​—Gawa 20:35.

Sakey ed saray inyaralan nen Serhii ed prisoan et si Victor, a datin managlako na druga tan adik. Kapaway nen Victor ed prisoan, sikatoy nantultuloy ya inmaligwas ed espiritual tan diad  saginonor et nangraduar ed Ministerial Training School ed Ukraine. Sikatoy manlilingkor la natan bilang espisyal payunir diad Moldova. Inkuan nen Victor: “Ginmapo ak a mansigarilyo sanen 8 años ko, nagmaliw ak a buanges diad edad a 12, tan nandruga ak diad edad a 14. Labalabay kon pasimbaloen so bilay ko, balet sinmaew ya amin so panggugunaet ko. Insan nen 1995, no kapigan a manplaplano kami lan sanasawa ya arawian iray mauges a kaulop ko, sikatoy inatey lapud sinaksak na sakey a manyak a managpatey. Nagmaliw a miserablen maong so bilay ko. ‘Kawalaan la kasi na asawak natan? Anto kasi nagawa sano ompatey so sakey a too?’ Dakdakel so tepet ko balet ta anggapoy naromog kon ebat. Nandruga ak lan nandruga pian natempey so kaermenan ko. Siak so inaresto lapud panlalakok na saray druga tan asentensiaan ak na limay taon a pakapriso. Ditan et tinulongan ak nen Serhii a naromog iray ebat. Aminpigak a sinali ya iwaklit so druga, balet ta tinmalona ak labat diad tulong na Biblia. Talagan mabiskeg so Salita na Dios!”​—Hebreos 4:12.

Anguman Iray Mauge-uges a Kriminal

Agbalot mandrudruga si Vasyl, balet ta siansia nin apriso. “Nailuam ak ed kickboxing,” so impaliwawa to. “Impasal koy inkasiak a mangabil ed totoo ya ag-ira nasugatan.” Impakana met nen Vasyl so inka-bayolenti to pian takewan so totoo. “Amitlo ak ya apriso, kanian siak so insian na asawak. Diad samay unor a limaran taon ko ed prisoan, akabasa ak na saray literatura na saray Tasi nen Jehova. Saman so amakiwas ed siak a manbasa na Biblia, balet gagawaen ko nin siansia imay labalabay ko​—say kickboxing (laban ya anggaporay totontonen).

“Balet, kayari na anemiran bulan a pambabasak ed Biblia, walay anguman ed siak. Agak la napepenek ed panatalok ed labanan, aliwan singa dati. Diad ontan et inusisak so bilay ko diad tulong na Isaias 2:4 tan amoriak a no agko umanen so panagnonot ko, dia ak la ompatey ed prisoan. Kanian imbantak ko iray kagawaan ko ed pilalaban tan pinaaligwas koy personalidad ko. Aliwan mainomay, balet kalkalnan nakal iray makapuy ya ugalik diad tulong na panagdalepdep tan pikakasi. No maminsan et siak so makalua ya onkekerew ed si Jehova na biskeg pian nibulos ak la ed inkailuaman ko. Diad kaunoran, tinmalona ak.

“Kapaway ko ed prisoan, akaibak lamet so pamilyak. Natan et mantratrabaho ak ed minasan na karbon. Lapud satan et magenap lay panaon ko a makapibiang ed panagpulong a kaibay asawak tan  pian nasumpal ko iray responsabilidad ko diad kongregasyon.”

Si Mykola tan saray kakaaro to so nanhoholdap na pigaran banko ed Ukraine. Lapud satan et sikatoy apriso ed loob na samploy-taon. Sakbay a nipriso, sikatoy aminpinsan a linma ed simbaan​—pian mantakew ditan. Sinmaew so getma to, balet say inyakar to ed simbaan so angipamoria ed sikato a say Biblia et napno na makapasawa iran istorya nipaakar ed saray parin Ortodokso, saray kandila, tan relihyoso iran selebrasyon. Oniay inkuan to: “Agko natalosan no akin, balet ginapoan kon binasa so Biblia. Nikelawan ak sanen naamtaan kon midumaan a maong itan ed samay inisip ko!” Sikatoy impaiyaralan ed Biblia tan abautismoan nen 1999. No sikatoy nanengneng yo natan, mairap yon panisiaan a sayan mapaabeban ministeryal a lingkor et datin mauge-uges tan onsianon manag-holdap na bangko!

Si Vladimir so asentensiaan na patey. Legan ton aalagaren so pamatey ed sikato, sikatoy nampikasi ed Dios tan insipan ton sikatoy manlingkor ed Sikato no agnatuloy ya ompatey. Kaleganan na satan, say ganggan so nauman, tan say dusa ton ipapatey et nagmaliw a kipriso legay bilay. Diad ontan, ginapoan nen Vladimir ya inanap so tuan relihyon pian tooren toy sipan to. Sikatoy nampalista ed sakey a kurso ed eskuelaan panamegley na korespondensia, tan sikatoy akaawat na diploma manlapud relihyon a Sabatista, balet sikatoy ag-apenek.

Balet, sanen abasa nen Vladimir iray magasin a Panag-Bantayan tan Awake! diad librarya na prisoan, sikatoy sinmulat ed sangan opisina na saray Tasi nen Jehova diad Ukraine, pian pabisita. Sanen sikatoy binisita na saray agagi diman, impasen to lay inkasikato bilang Tasi tan ginmapo lan manpulong ed prisoan. Sikatoy tinulongan ya onkualipika bilang manangipalapag na Panarian. Sanen isusulat iyan eksperiensya, si Vladimir tan say pitora ni diad satan a prisoan so manaalagar a nabautismoan. Balet walay problema ra. Saray priso a walaan na legay-bilay a sentensia so panuulopen ed saray selda base ed relihyon da, kanian saray kakaiba nen Vladimir ed selda et kapananisian to. No ontan, siopa so napulongan da? Innabang da so maong a balita ed saray guardia na prisoan tan diad panamegley na saray sulat.

Si Nazar et taga-Ukraine tan inmalis ed Czech Republic, a diman et sikatoy akiulop ed grupo na matatakew. Lapud satan et sikatoy apriso ed loob na talora tan kapaldua a taon. Legan a walad prisoan, sikatoy inmabuloy a dalawen na saray Tasi nen Jehova ed syudad na Karlovy Vary, akaaral na katuaan, tan sigpot lan anguman. Sanen naimano itan na sakey ed saray guardia, oniay inkuan to ed saray kaiba nen Nazar ed selda: “No amin yo et magmaliw a singa saman ya Ukrainiano, nayarian ko lay mananap na sananey a trabaho.” Oniay inkuan na sananey: “Talagan eksperto irayan Tasi nen Jehova. Onloloob ed prisoan so sakey a too bilang kriminal, balet ta ompapaway bilang makalakal.” Akapawil la natan si Nazar ed abung da. Naaralan to so panagkarpentero tan angasawa la, tan natan et sikaran sanasawa so manlilingkor a sigpot-panaon diad ministeryo. Sikatoy misalsalamat a tuloy lapud imbisita na saray Tasi diad prisoan!

Opisyal a Panamidbir

Aliwa labat a saray priso so misasalamat ed serbisyo na saray Tasi nen Jehova. Si Miroslaw Kowalski, say pinagkasangiyan na sakey ed saray prisoan diad Poland, so angikuan: “Papablien min tuloy so ibibisita ra. Walaray priso a makapaermen so abenegan da. Nayari a sikaray agbalot intrato bilang totoo. . . . Say itutulong [na saray Tasi] so makanakana lapud kulang kami na totoo tan managbangat [ed saray priso].”

Say warden na sananey nin prisoan ed Poland so sinmulat ed sangan opisina, a kinerew to ed saray Tasi a betbetan da so pankimey da diad prisoan. Akin? Oniay impaliwawa to: “Say mabetbet ya ibisita na saray manangilaman na Watchtower et makatulong ed saray priso pian nabayuboan iray maabig a kalidad ed pililimog tan napugeran so panggugulo ed limog da.”

Inreport na sakey a peryodiko ed Ukraine so nipaakar ed sakey a maer-ermen a priso a nanggetman manbikkel balet ta atulongan na saray Tasi nen Jehova. “Diad kaplesan, sayan laki so ompapawil la ed datin liknaan to,” so inkuan na report. “Sikatoy maunor ed totontonen ed prisoan tan sakey ya ehemplo parad arum a priso.”

 Saray Gunggona ya Angga ed Paway na Prisoan

Saray gunggona ed serbisyo na saray Tasi nen Jehova et aliwan dia labat ed loob na prisoan. Mantutultuloy iratan anggan akapaway la iray priso. Say duaran Kristiano, a si Brigitte tan Renate, so pigay taon lan ontutulong ed saray priso diad onian paraan. Oniay inreport na sakey a peryodiko ed Alemanya a Main-Echo Aschaffenburg nipaakar ed sikara: “Aasikasoen da iray priso [a bibii] ed loob na talora anggad limaran bulan kapaway da, a papasesegen da iran anapen so gagala na bilay. . . . Sikaray opisyal a binidbir bilang boluntaryo a probation officer. . . . Makapabiskeg tan maabig met so pidedeneng da ed saray empleyado ed prisoan.” Pigaran totoo so angidedikay bilay da ed si Jehova bilang resulta na sayan klase na pananulong.

Minanabang met iray opisyal na prisoan manlapud kimey na saray Tasi nen Jehova a panagbangat ed Biblia. Sakey la si Roman, a major na militar tan sikolohista ed sakey a prisoan ed Ukraine. Sanen binmisita ed ayaman to iray Tasi, sikatoy inmabobon ya iyaralan da na Biblia. Naamtaan to ed saman a saray Tasi so ag-aabobonan a mitongtong ed saray priso diad pantratrabahoan to. Kanian kinerew to ed warden a sikatoy abuloyan dan mangusar na Biblia diad trabaho to sano miarap ed saray priso. Sikatoy inabuloyan, tan samplora a priso so angipatnag na interes. Si Roman so maparanay a manginanabang ed ondaraak a kakabatan to ed Biblia diad saratan a priso, tan alay abig iray resulta na saray sagpot to. Kapaway na arum ed prisoan, sikara so nantultuloy ya inmaligwas tan abautismoan bilang Kristiano. Sanen naimano nen Roman so pakapanyari na Salitay Dios, lalon sineryoso to so panaaral to. Sikatoy inmekal ed militar tan nantultuloy ed saray kimey to a panagbangat ed Biblia. Natan et kaiba to lan manpupulong so sakey a datin priso.

Nansulat so sakey a priso: “Say mamapabiskeg ed sikami dia et say Biblia, saray publikasyon ed Biblia, tan say panagaral ed Biblia.” Sarayan salita et matukoy a manideskribe ed pankaukolan na pigaran priso parad literatura na Biblia. Oniay inreport na sakey a kongregasyon ed Ukraine nipaakar ed kimey a panagbangat ed Biblia diad sakey a prisoan diman: “Say administrasyon so misalsalamat ed literaturan itatarya mi. Iikdan mi ira na 60 a kopya na kada isyu na Say Panag-Bantayan tan Awake!” Oniay insulat met na sananey nin kongregasyon: “Inasikaso mi so sakey a prisoan a walaan na 20 ya angkekelag a librarya. Diad kada librarya et angitarya kami na saray manunan publikasyon tayo. Ami-amin et satan so 20 a kahon na literatura.” Diad sakey a prisoan, saray guardia so mangisasalansan na saray magasin tayo diad librarya ta pian minabang iray priso ed kada isyu.

Nen 2002, say sangan opisina ed Ukraine so angiletneg na Prison Desk. Diad kaplesan, sayan opisina so akapitalosan la ed manga 120 a prisoan tan angibaki la na saray kongregasyon a mangasikaso ed saratan. Kada bulan et manga 50 a sulat so naaawat manlapud saray priso, a maslak ed sikara so onkekerew na literatura odino malabay a paiyaralan ed Biblia. Say sanga so mangipapawit ed sikara na saray libro, magasin, tan brosyur ya angga ed makapitongtong la ed sikara iray lokal ya agagi.

“Nonot yo so saray nipangaw,” so insulat nen apostol Pablo ed saray kapara ton Kristiano. (Hebreos 13:3) Tutukoyen to iraman so nipangaw nisengeg ed pananisia ra. Natan et saray Tasi nen Jehova so mannonodnonot ed saramay walad prisoan, ondadalaw ed saray priso, tan ‘mangibabalita na kibulos dia ed saray apriso.’​—Lucas 4:18, MB.

[Paimano ed leksab]

[Litrato ed pahina 9]

Padir na prisoan ed L’viv, Ukraine

[Litrato ed pahina 10]

Si Mykola

[Litrato ed pahina 10]

Si Vasyl a kaiba toy misis ton si Iryna

[Litrato ed pahina 10]

Si Victor