Panaon na Krismas​—Anto so Akasentroan na Satan?

PARAD minilyon a totoo, say panaon na Krismas et sakey a panaon pian nakaiba so pamilya tan kakaaro, tan pian napaelet so bedber na panaaroan. Satan a panaon so ipapasen na dakel a totoo a pannodnonot ed inkianak nen Jesu-Kristo tan ed betang to ed kilalaban na katooan. Aliwan singa diad arum iran bansa, saray totoo ed Russia so agbulos a makapanselebra na Krismas. Anggaman diad apalabas iran siglo et maparungtal a nanselebra na Krismas iray kabiangan na Iglesia na Ortodokso ed Russia, diad maslak iran taon na koma-20 a siglo et sinebelan ira a manggawa ed satan. Anto so sengegan na pananguman?

Kayarin tuloy na rebolusyon na Komunistan Bolshevik nen 1917, saray autoridad ed Sobyet so angipaakseb na mapeget a totontonen ya agamilen so ateismo diad interon estado. Kanian say interon panaon na Krismas, pati saray relihyoson agamil a nisiglaot ditan, so pinegetan. Say Estado so ginmapon angikayat na propaganda sumpad panagselebra na Krismas tan Balon Taon. Parungtalan ni ingen a kinondena iray simbolo na satan ya okasyon​—say Christmas tree tan si Ded Moroz odino Grandfather Frost, say ipapasen a Santa Claus ed Russia.

Nen 1935, wala so agawa a sigpot ya akapanguman ed paraan na panagselebra na saray Ruso ed Krismas tan Balon Taon. Impawil na saray autoridad ed Sobyet si Grandfather Frost, say kiew a simbolo na okasyon, tan say selebrasyon na Balon Taon​—balet ta baleg la so angumanan. Ibabaga a si Grandfather Frost so mangawit na saray regalo diad Agew na Balon Taon, aliwan diad Krismas. Ontan met, anggapo la so Christmas tree. Gawaen la itan a kiew parad Balon Taon (New Year’s tree)! Kanian anguman a tuloy so pangiyaapasakeyan na selebrasyon diad Unyon Sobyet. Diad ontan, say selebrasyon a Balon Taon so sinmalat ed Krismas.

Say panaon na Krismas so nagmaliw lan sigpot a sekular a piesta, ya anggapo la so napatnagan a relihyoson kabaliksan na satan. Saray idedekorasyon ed kiew parad Balon Taon et aliwan relihyoso, noagta saray sekular a bengatla a mangililitrato ed iyaaligwas na Unyon Sobyet. Oniay insalaysay na dyurnal ed Russia a Vokrug Sveta (Diad Interon Mundo): “Posiblin nasuysoy so awaran na inkiletneg na Komunistan sosyedad diad saray akasabit a dekorasyon ed kiew parad Balon Taon a mangipapatnag ed nanduruman taon diad panaon na Sobyet. Nilikud ed saray kaslakan lan koneho, saray mansiayap a palagaygay, tan tinapay a malilimpek, wala met iray ginawan dekorasyon ya uhas-gamlang, martilyo, tan traktora. Diad saginonor et sinalatan iratan na saray pigurin na minero tan cosmonaut, saray makinan panag-agwat na oil, saray rocket, tan saray melag a luluganan ya inusar ed bulan.”

Komusta balet so mismon Agew na Krismas? Aglan balot binidbir itan. Imbes, satan so impasen na autoridad ed Sobyet a singa labat ordinaryon agew na trabaho. Saramay mankaliktan a manselebra na relihyoson Krismas so makapanggawa labat ed satan diad maamot a paraan, a niririsga ira ed agpanangabobon na Estado tan makapuy iran pansumpalan. On, diad koma-20 a siglo et anguman la so pangiyaapasakeyan na satan a selebrasyon diad Russia, a nagmaliw lan sekular a selebrasyon so datin relihyoso.

Say Aganggano nin Pananguman

Nen 1991 et abuyak so Unyon Sobyet tan niwala iray babaleg  a kawayangan. Naandi la so totontonen na Estado a pangagamil na ateismo. Saray balon aporma ya independentin estado et aliwa lan relihyoso, a nambiigan la so Iglesia tan Estado. Inisip na dakel a relihyoson totoo a nagawaan da la iray relihyoson sisisiaen da. Inkatunongan da a say sakey a paraan a nagawaan da itan et diad panselebra na relihyoson piesta a Krismas. Balet, agnambayag et dakel ed sikara so pirmin adismaya. Akin?

Diad ilalabas na kada taon, say selebrasyon so magmamaliw a komersyo. On, singa diad Sagur, say panaon na Krismas et nagmaliw a sankaabigan a pankanawnawa pian manubo iray managpabrika, managpapakyaw, tan managlako. Saray pandekorasyon ed Krismas so manunan akaparungtal ed arap na saray lakoan. Saray musika tan karoling ed Krismas a nanlapud Sagur, a datin agkabat ed Russia, so wala la natan ed saray lakoan. Saray managlako a di-awit na angkakabaleg a bag a nankarga na lak-lako parad Krismas so manlalako diad saray pasahero na tren tan arum nin luluganan a pampubliko. Ontan so nanengneng yo natan.

Anggan saramay mangipapasen ya aliwan mauges iyan pirmin komersyalismo et nayarin nadidismaya ed sananey nin agmakapaliket a nagagawa diad sayan okasyon, salanti, say alabas a panag-inum na alak pati say amin a makapuy ya epekto na satan. Oniay insalaysay na sakey a doktor ed emergency room na ospital ed Moscow: “Iilaloan la na saray doktor a diad selebrasyon na Balon Taon et dakdakel so narisgo​—manlapud pakadumbo, pakasaksak, pakapaltog, a say maslak a sengegan et karawalan ed ayaman, panagbuanges, tan saray aksidente ed luluganan.” Say senior staff a sientista ed sanga na Russian Academy of Sciences so angikuan: “Biglan inmatagey so bilang na ompapatey a makasengeg ed panag-inum na alak. Dakdakel a tuloy itan diad taon 2000. Dinmakel met iray kason panagbikkel tan panagpatey.”

Makapaermen ta antokaman ed satan a paraan na ikikiwas diad panaon na Krismas et Russia so palolooren na sananey nin sengegan. Oniay inreport na peryodikon Izvestiya diad silong na paulon-balita a “Mamiduan Seselebraan na Saray Ruso so Krismas”: “Ngalngalin 1 ed 10 a Ruso so mamiduan manseselebra na Krismas. Unong ya apaneknekan ed surbi na monitoring center na Russian Public Opinion and Market Research, 8 porsiento na saray ininterbio so angaksobi a seselebraan da so Krismas diad Disyembre 25, unong ed kalendaryo na Katoliko parad Krismas, tan diad Enero 7, unong ed Ortodokso . . . Parad arum, mapatnag ya aliwan say relihyoson kabaliksan na Krismas so importante noagta say pankanawnawa a manselebra.” *

 Peteg Kasin Mamapagalang ed si Kristo so Ontan a Klase na Selebrasyon?

Mabitar a napapatnagan so dakel ya agmaridios a kondukta diad panaon na Krismas tan Balon Taon. Talagan makapadismaya la, balet iisipen na arum a nepeg dan selebraan iratan lapud panagrespeto ra ed Dios tan ed Kristo. Nakomendaan so pilalek a mamaliket ed Dios. Balet peteg kasin napapaliket so Dios tan si Kristo ed panseselebra na Krismas? Konsideraen so lapuan na satan.

Singa bilang, antokaman so pangipasen na sakey ed awawey na Sobyet nipaakar ed Krismas, agnasuppiat iray onggendan a katuaan ed awaran a nidatak diad Great Soviet Encyclopedia: “Say Krismas . . . so inalig ed panagdayew ed saray ‘ompapatey tan onooli’d bilay’ a dirios sakbay na panaon na Kristiano, a kasmak lan tuloy ed limog na saray dumaralos a tinaon a nanselebra ed ‘inkianak’ na Dios a Manangilaban a mamapaoli ed bilay, diad panaon na winter solstice [panaon ya antiktikey so oras na kaagwan], salanti, diad Disyembre 21-25.”

Nayarin naliwawaan kayo ed walan impabitar na satan ya ensayklopedia: “Saray Kristiano nen inmuna iran siglo so agnanselebra na Krismas. . . . Manlapud kapegleyan na komapat a siglo, say selebrasyon ed panaon na winter solstice so inalig na Inkakristiano manlapud panagdayew ed si Mithra tan pinagmaliw da itan a selebrasyon na Krismas. Say primeron nanselebra na Krismas et saray relihyoson komunidad na Roma. Diad koma-samplon siglo, say Krismas tan Inkakristiano et kinmayat ed Russia, ya imbansag da itan ed selebrasyon na kadaanan ya Slavs diad panaon na ambetel, bilang panangigalang ed espiritu na inmuunan atateng [da].”

Oniay nayarin itepet yo, ‘Anto so ibabaga na Salitay Dios, say Biblia, nipaakar ed inkianak nen Jesus a Disyembre 25?’ Diad tua, ag-espisipikon sinaglawi na Biblia so petsa na inkianak nen Jesus, tan anggapoy pakabasaan a sinalambit itan nen Jesus, nisay ingganggan to a selebraan itan. Balet, tutulongan itayo na Biblia a naamtaan no kapigan so inkianak nen Jesus.

Unong ed Ebanghelyo nen Mateo, diad kapitulo 26 tan 27, si Jesus so pinatey nen Nisan 14, diad pansirunget na agew na Paskua na Judio a ginmapo nen Marso 31, 33 K.P. Naaralan tayo ed Ebanghelyo nen Lucas a si Jesus et mantaon na 30 sanen sikatoy abautismoan tan ginmapo ed ministeryo to. (Lucas 3:21-23) Satan a ministeryo et nambayag na talora tan kapaldua a taon. Kanian, 33 ¹⁄2 so taon nen Jesus sanen inatey. Sikato so man-34 diad Oktubre 1, 33 K.P. Insalaysay nen Lucas a diad samay panaon a nianak si Jesus, saray managpastol so “manaayam ed uma, tan babantayan da a pampupuyatan ed labi so ayayep da.” (Lucas 2:8) Agnayarin ompaway ed uma iray managpastol a kaiba so ayayep da legan na ambetel a panaon na Disyembre, ta diad satan a panaon et onuuran na yelo diad kaliberliber na Betlehem. Balet, nayarian day manayam diman a kaiba so ayayep da diad Oktubre 1, ya unong ed ebidensya et satan so petsa na inkianak nen Jesus.

Balet, komusta so nipaakar ed selebrasyon a Balon Taon? Unong a naimano tayo la, satan so napno na mabanday a kiwas. Anggaman ed panasalin  gawaen itan ya aliwan relihyoso, kuestionable met so lapuan na satan.

Malinew, base ed saray katuaan a nagagawa legan na satan a selebrasyon, say diparan a, Si Jesus so rason parad sayan panaon, so andiay kabaliksan. No naeermenan kayo lapud nagmaliw lan komersyo so Krismas tan nisiglaot la ed satan so makapuy a kondukta, ontan met ed say paganon lapuan na satan, agkayo nadidismaya. Wala so matukoy a paraan a nipatnag tayo so manepeg a panangigalang ed Dios tan ed si Kristo, a satan met so mamaelet ed siglaotan na pamilya.

 Say Magmaong a Paraan a Nigalang so Dios tan si Kristo

Ibabaga ed sikatayo na Biblia a linma dia si Jesu-Kristo pian “iter toy bilay to a panondon ed amayamay.” (Mateo 20:28) Inabuloyan toy inkasikato a napapatey, a mabulbulos ya ompatey nisengeg ed saray kasalanan tayo. Nayarin kaliktan na arum ya igalang si Kristo, a liknaen dan nagawaan da itan diad panaon na Krismas. Balet unong a naimano tayo la, say Krismas tan Balon Taon so agtanton misiglaotan ed si Kristo tan nanlapu iratan ed pagano iran selebrasyon. Ontan met, anggaman makapasagyat ed arum so panaon na Krismas, mapatpatnag a nagmaliw lan negosyo itan. Niarum ni, nepeg ya aksobien a say selebrasyon na Krismas et nisiglaot ed mabanday a kondukta ya agmamapaliket ed Dios tan ed si Kristo.

Panon so nepeg ya ikiwas na sakey a malabay a mamaliket ed Dios? Imbes ya ontumbok ed saray tradisyon na too a nayarin mangipaliknan sikatoy relihyoso balet ta sumlang iratan ed Kasulatan, say masimoon a too so mananap na dugan paraan na pangigalang ed Dios tan ed Kristo. Anto so dugan paraan, tan anto so nepeg tayon gawaen?

Si Kristo a mismo so mangibabaga ed sikatayo: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti [si] Jesu-Kristo.” (Juan 17:3) On, say peteg a masimoon a too et manggunaet ya onggamor na suston kakabatan no panon ton nigalang so Dios tan si Kristo. Insan to iyaplika iyan kakabatan aliwan dia labat ed nigetar a panaon ed taon noagta diad inagew-agew a kabibilay. Say Dios so napaliket a maong ed saratan a masimoon a sagpot, a mangitonton ed bilay ya andi-anggaan.

Labay yo ta a napibilang so pamilya yo ed saraman so peteg a mangigagalang ed Dios tan ed si Kristo unong ed Kasulatan? Minilyon lan pamilya ed sankamundoan so atulongan na saray Tasi nen Jehova ya onggamor na suston kakabatan manlapud Biblia. Maliket kami a mangimbita ed sikayo a mitongtong ed saray Tasi nen Jehova ed lugar yo odino mansulat ed sikara diad matukoy ya address a naromog ed pahina 2 na sayan magasin.

[Paimano ed leksab]

[Kahon/Litrato ed pahina 7]

Saray Lapuan na Selebrasyon a Balon Taon

Makpel a Nansalita so Sakey a Monghe na Ortodokso ed Georgia

“Say selebrasyon a Balon Taon et nanlapu ed pigaran paganon selebrasyon diad kadaanan a Roma. Say primeron agew na Enero so seselebraan parad paganon dios a si Janus, tan say ngaran to so angaonan ed ngaran na bulan [January ed Ingles]. Saray litrato nen Janus et walaan na duaran lupa a nambenegan, a mankabaliksan a nanenengneng to so apalabas tan say arapen. Ibabaga a siopaman a mangibano ed primeron agew na Enero tekep na panliket, panelek, tan daakan a tagano, sikatoy maliket tan maaligwas a mamalabas ed interon taon. Say ontan ya anito so itetekep ed panseselebra ed balon taon na dakel ed saray kabaleyan tayo . . . Legan na saray paganon selebrasyon, saray totoo so direktan mangibagat diad sakey a talintao. Arum so kabkabat a manggagawa na imoral iran seremonya, pikakalugoran, tan pilalawanan. Diad arum ya okasyon, a singa diad panaon na selebrasyon parad si Janus, wala so alablabas a panangan tan panag-inum, panagbuanges, tan amin a nengneng na karutakan. No nonoten tayo so paraan na impanselebra tayon mismo ed Balon Taon diad apalabas, nepeg tayon aksobien ya amin tayo so akapibiang ed sayan paganon selebrasyon.”​—Sakey a peryodiko ed Georgia.

[Litrato ed pahina 7]

Agnayarin ompaway ed uma iray managpastol a kaiba so ayayep da diad ambetel a panaon na Disyembre