Siopa so Unoren Yo​—Say Dios Odino Totoo?

“Nakaukolan ya unoren mi so Dios, nen saray totoo.”​—GAWA 5:29.

1. (a) Anto so tekston angibasiyan ed tema na sayan aaralen? (b) Akin ya inerel iray apostoles?

 SEGURADON sinmanok iray ukom a kabiangan na korte suprema na Judio. Anggapo laray priso. Saratan a priso et saray apostol nen Jesu-Kristo, say toon kinondena ed patey na atagey a korte pigaran simba ni labat ed akadkauna. Akaparaan la so korte a mangarap ed maapit iran patumbok to. Balet sanen sikara so alaen la na saray guardia, adiskobre ya anggapo lay karga na prisoan, anggaman akatalak iray puerta. Naamtaan met lanlamang na saray guardia a saray apostol et walad templo diad Jerusalem, a makpel a mangibabangat ed totoo nipaakar ed si Jesu-Kristo​—say mismon kimey ya angerelan ed sikara! Linman tampol iray guardia diman ed templo, inerel da lamet iray apostoles, insan inyarap da ira ed korte.​—Gawa 5:17-27.

2. Anto so ingganggan na anghel ed saray apostol?

² Walay anghel ya angibulos ed saray apostol manlapud prisoan. Kasin agawa itan pian nipaliis ira ed lalon panamasegsegang? Andi. Agawa iman ta pian narengelan na saray manaayam ed Jerusalem so maong a balita nipaakar ed si Jesu-Kristo. Say bilin na anghel ed saray apostol et ‘salitaen da ed saray ombaley so amin a salita na sayan bilay.’ (Gawa 5:19, 20) Kanian sanen saray guardia so akasabi ed templo, aromog da iray apostol a matulok a manusumpal ed satan a ganggan.

3, 4. (a) Sanen ingganggan ed sikara ya agla ra manpupulong, panon so inkiwas nen Pedro tan Juan? (b) Panon so inkiwas na arum iran apostol?

 ³ Duara ed saray agnagiing a managpulong, si apostol Pedro tan apostol Juan, so niyakar la’d korte nensaman, kanian si Joseph Caifas, say manunan ukom, so mapeget ya angipanonot ed sikara. Inkuan to: “Imbilin mi ed sikayo a malet ya agkayo manbangat ed [ngaran nen Jesus]: et nia, pinano yo so Jerusalem na bangat yo.” (Gawa 5:28) Agla nepeg a nikelawan si Caifas a nanengneng lamet si Pedro tan Juan diad korte. Lapud sanen diad primero a niganggan ed sikara ya agla ra manpupulong, onia lay inyebat na duaran apostol: “No katunongan kasi ed arap na Dios so pangunor a manuna ed sikayo nen say Dios, ukom yo pa; ta agmi nayarin agsalitaen so anengneng tan nadngel mi.” Singa si propeta Jeremias nensaman, agnapokpokan nen Pedro tan Juan so inkasikara a manumpal ed ganggan a manpulong.​—Gawa 4:18-20; Jeremias 20:9.

⁴ Natan, aliwa labat a si Pedro tan Juan noagta amin ya apostol​—pati say balo nin aturo a si Matias​—so awalaan na pankanawnawan mangiyabawag ed talindeg da diad korte. (Gawa 1:21-26) Sanen ingganggan ed sikara ya agla ra manpupulong, oniay makpel ya inyebat da: “Nakaukolan ya unoren mi so Dios, nen saray totoo.”​—Gawa 5:29.

Unoren so Dios Odino Too?

5, 6. Akin ya ag-inunor na saray apostol so ganggan na korte?

⁵ Saray apostol et maunor ed ley tan sipor lan ag-onsusumlang ed ganggan na korte. Balet, anggapo so too, anggan panon lay kabiskeg to, so walaan na autoridad a mangiganggan ed arum ya onsumlang ed saray ganggan na Dios. Si Jehova so ‘Sankatageyan a manuna diad amin a dalin.’ (Salmo 83:18) Aliwa lambengat a sikato so ‘Ukom ed amin a dalin’ noagta sikato so Supremon Manangiter-Ganggan, tan Ari ed andi-anggaan. Antokaman a ganggan na korte a walaan na getman manumlang ed sakey ed saray ganggan na Dios et andi-kana ed imaton na Dios.​—Genesis 18:25; Isaias 33:22.

⁶ Sayan katuaan so binidbir na pigara ed saray sankaekspertoan la ed ley. Alimbawa, say taga-Inglateran si William Blackstone, sakey a bantog a huis nen koma-18 siglo, so angisulat ya anggapo so ganggan na too a nepeg ya abuloyan ya onsumlang ed “ganggan na puyan” a naromog ed Biblia. Sirin, say Sanhedrin so nampalakbat sanen ingganggan da iray apostol ya agmanpulong. Agnayarian ya unoren na saray apostol itan a ganggan.

7. Akin a sinmanok iray manunan saserdote ed panagpulong a kimey?

⁷ Say determinasyon na saray apostol a mantultuloy ed pampupulong da so amasanok ed saray manunan saserdote. Say arum iran membro na inkasaserdote, a pati si Caifas a mismo, et Saduceo, ya agmanisia ed kioli. (Gawa 4:1, 2; 5:17) Ingen, impilit na saray apostol a si Jesus so apaoli manlapud inaatey. Niarum ni, nanggunaetan a maong na arum ed saray manunan saserdote so pakagamor na pabor na saray autoridad na Roma. Diad impan-usay ed si Jesus, sanen inyopresi ed saray manunan saserdote so pankanawnawan mangawat ed si Jesus bilang ari ra, oniay lalon inkelyaw da: “Anggapo so Ari mi noag si Cesar.” (Juan 19:15) * Aglambengat pinekderan na saray apostol a si Jesus et apaoli noagta imbangat da a nilikud ed ngaran nen Jesus et “anggapo so arum a ngaran ed lepsag na tawen, a niiter ed saray totoo, a nayarin kilabanan tayo.” (Gawa 2:36; 4:12) No nanilalo iray totoo ed say apaolin Jesus bilang Lider da, napagaan iray saserdote lapud nayarin onsabi iray Romano tan nayarin ‘ekalen da so pasen tan say nasyon’ na saray Judion lider.​—Juan 11:48.

8. Anto so makabat ya insimbawa nen Gamaliel ed Sanhedrin?

⁸ Makapagonigon so manatalaran ed saray apostol nen Jesu-Kristo. Determinado iray huis ed Sanhedrin a mamapatey ed sikara. (Gawa 5:33) Balet, agnailaloan ya anguman iray ebento.  Si Gamaliel, sakey ya eksperto ed Ganggan, so tinmalindeg tan pinasakbayan to iray kakaiba to ya ag-ira bengatbengat ya onkiwas. Oniay makabat a naimano to: “No sayan kanonotan odino sayan gawa nanlapu ed saray totoo, nabuyak naani: Balet no nanlapu ed Dios agyo ra nayarian a bagbagen.” Insan oniay makatantandan inyarum nen Gamaliel: “Ompan la ingen no ompatnag kayo a misepakan ed Dios.”​—Gawa 5:34, 38, 39.

9. Anto so mamaneknek a say kimey na saray apostol et nanlapud Dios?

⁹ Makapakelaw ta inawat na korte so bilin nen Gamaliel. “Impatawag [na Sanhedrin] so saray apostoles, tan kayari da ran nilewet imbilin da ed sikara ya agda salitaen so ngaran nen Jesus, et imbulos da ra.” Balet, saray apostol so agbalot apagyaw tan determinado ira ya angunor ed ganggan na anghel, salanti, say pampulong. Kanian, kayari na inkibulos da, saray apostol so “inagew-agew ed templo tan ed saray kaabungan, ag-ira tinmunda a nambabangat tan nampupulong a si Jesus et Kristo.” (Gawa 5:40, 42) Benendisyonan nen Jehova iray sagpot da. Kaunongan kalaknab? “Manbaleg so salita na Dios; et say bilang na saray binangatan dinmakerakel a tuloy ed Jerusalem.” Diad tua, “baleg ya ulop na saray saserdotes so tinmulok ed pananisia.” (Gawa 6:7) Agaylan makapakapuy itan parad saray manunan saserdote! Lalon binmiskeg so ebidensya: Say kimey na saray apostol so petepeteg a nanlapud Dios!

Ag-ontalona Iray Onlalaban ed Dios

10. Unong ed punto de bista na too, akin a matalek so liknaan nen Caifas ed posisyon to, balet akin a lingo so impanmatalek to?

¹⁰ Nen inmunan siglo, saray atagey a saserdote na Judio so tinuro na saray autoridad na Roma. Say mayaman a si Joseph Caifas so impuesto nen Valerius Gratus, tan mas abayag so impamemben nen Caifas ed satan a posisyon nen saramay tinumbokan to. Agamoran nen Caifas itan a posisyon lapud dunong to bilang sakey a diplomatiko tan lapud personal a pikakaaro to ed si Pilato imbes a panangigiya na Dios. Antokaman so kipapasen, lingo so impanmatalek to ed totoo. Taloy taon ni labat kayari  na impangiyarap ed saray apostol diad Sanhedrin, naandi so pabor na saray Romanon autoridad ed si Caifas tan sikato so inekal da bilang atagey a saserdote.

11. Anto so nansumpalan nen Poncio Pilato tan say Judion sistema na bengabengatla, tan anto so nibaga yo ed satan?

¹¹ Say ganggan ya ekalen si Caifas manlapud posisyon to so nanlapud superyor nen Pilato, si Lucius Vitellius, say gobernador na Sirya, tan ag-itan naamper na maapit a kaaro nen Caifas a si Pilato. Diad tua, sakey taon labat ni kayari na inkaekal nen Caifas, si Pilato a mismo so nakal ed posisyon to tan impatawag da ed Roma pian ebatan to iray seryoson akusasyon. Nipaakar ed saray Judion lider a nanmatalek ed si Cesar, inekal na saray Romano so ‘pasen da tan say nasyon da.’ Agawa itan ed taon 70 K.P. sanen sigpot a dineral na saray Romanon armada so syudad na Jerusalem, pati say templo tan say baleg a silir na Sanhedrin. Tua iray salita na salmista ed sayan kipapasen: “Agyo iyan so panmatalek yo ed saray priprinsipe, nisay dia ed anak na too, a dia ed sikato anggapo so tulong”!​—Juan 11:48; Salmo 146:3.

12. Panon ya apaneknekan ed biang nen Jesus a makabat so itulok ed Dios?

¹² Midumaan, tinuro na Dios so apaolin si Jesu-Kristo bilang Atagey a Saserdote na baleg ya espiritual a templo. Anggapo so too a makapangekal ed sikato. On, si Jesus so ‘walaan na inkasaserdote ya agnipatawir.’ (Hebreos 2:9; 7:17, 24; 9:11) Tinuro met na Dios si Jesus bilang Ukom na saray mabilay tan inaatey. (1 Pedro 4:5) Diad ontan a kipapasen to, desidien nen Jesus no kasin si Joseph Caifas tan si Poncio Pilato et walaan na antokaman a posibilidad a nawalaan na bilay diad arapen.​—Mateo 23:33; Gawa 24:15.

Saray Makpel a Manangipulong ed Panarian Natan

13. Diad moderno iran panaon, anton kimey so apaneknekan a nanlapud too, tan anton kimey so nanlapud Dios? Panon yon naseguro?

¹³ Diad panaon tayo, a singa nen inmunan siglo, dakerakel so onlalaban odino ‘misesepakan ed Dios.’ (Gawa 5:39) Alimbawa, sanen agbinidbir na saray Tasi nen Jehova ed Alemanya si Adolf Hitler bilang say Führer (Lider) da, insamba nen Hitler ya upoten to ira. (Mateo 23:10) Ompatnag a singano sarasarag na organisasyon to ya upoten iray Tasi nen Jehova. Naaresto na saray Nazi so nilibon Tasi tan impisok da ira diad saray panangipangawan a kampo. Apatey da ni ingen so pigaran Tasi. Balet ag-abuyak na saray Nazi so determinasyon na saray Tasi a mandayew labat ed Dios, tan agda apagit iray lingkor na Dios bilang grupo. Say kimey na sarayan Kristiano et nanlapud Dios, aliwan too, tan say kimey na Dios so agbalot nabagbag. Kayari na anemaplon taon, saray matoor ya akaliktar ed saray panangipangawan a kampo nen Hitler so siansia nin manlilingkor ed si Jehova ‘diad masimoon a puso ra tan kamarerwa tan kanonotan da,’ bangta naandi la si Hitler tan say partido ton Nazi.​—Mateo 22:37.

14. (a) Antoran sagpot so ginawa na saray onsusumpa pian paugesen iray lingkor na Dios, tan antoray resulta na saratan? (b) Kasin saratan a sagpot so walaan na antokaman a makapuy ya epekto ed totoo na Dios? (Hebreos 13:5, 6)

¹⁴ Diad saray taon manlapu la nen ginmapo iray sagpot na Nazi, arum so akiulop ed ag-ontalonan pibabakal ed si Jehova tan ed saray totoo to. Diad pigaran bansa ed Europa, walaray masilib a grupo na relihyon tan politika a nanggunaet a mangiparungtal ed saray Tasi nen Jehova bilang ‘mapeligron sekta,’ say miparan akusasyon  ed saray Kristiano nen inmunan siglo. (Gawa 28:22) Balet say katuaan et binidbir na European Court of Human Rights iray Tasi nen Jehova bilang sakey a relihyon, aliwan sakey a sekta. Amta itan na saray onsusumpa, balet ta nantultuloy da nin pinauges iray Tasi. Bilang direktaan ya epekto na satan a makapalikdon panagpauges, arum ed sarayan Kristiano so inekal ed pantratrabahoan da. Saray ananak na Tasi so ginonigon diad saray eskuelaan. Saray matakot lan makankayarian na bilding so angansela ed saray kontrata ra ed saray Tasi ya abayag lan manguusar ed satan bilang pantitiponan. Diad pigaran kipapasen, agni ingen inawat na saray ahensia na gobierno so pakabidbiran na saray indibidual bilang mibabaley lapud Tasi nen Jehova ira! Balet, ag-agiing iray Tasi.

15, 16. Panon so inkiwas na saray Tasi nen Jehova ed Pransya diad isusumpa ed Makristianon kimey da, tan akin a mantutultuloy iran manpupulong?

¹⁵ Alimbawa, diad Pransya et saray totoo so kaslakan a makatunongan tan asimbang-kanonotan. Balet, walaray onsusumpa a mangiyaalibansa na saray ley a mangaamper ed kimey ed Panarian. Panon so inkiwas na saray Tasi nen Jehova ditan? Lalon pinalaknab da so panagpulong a kimey da tan makapalikliket so resulta na saratan. (Santiago 4:7) Agayla, diad loob labat na anem-bulan a peryodo et say bilang na saray iyaaralan na Biblia ed satan a bansa so dinmaak na alay abig a 33 a porsiento! Seguradon amasanok itan ed Diablo lapud naiimatonan to iray matuan-impanpuso a mangaawat ed maong a balita. (Apocalipsis 12:17) Matalek iray kapara tayon Kristiano diad Pransya a tua ed biang da iray salita nen propeta Isaias: “Anggapo so ayura ya agawa a sumpa ed sika ya onaligwas naani; tan balang sakey a dila ya onsumpa ed sika ed pangukom dusaen mo naani.”​—Isaias 54:17.

¹⁶ Agpanliketan na saray Tasi nen Jehova so napasegsegang. Balet, bilang katutulok da ed ganggan na Dios a parad amin a Kristiano, agda nayarian so ontunda tan ag-ira ontundan mansalita nipaakar ed saray bengatlan nadngel da. Panggugunaetan da so magmaliw a maong a mibabaley. Balet, no wala so pansumlangan na ganggan na Dios tan ganggan na too, say Dios so unoren da bilang manuley da.

Ag-ira Tatakotan

17. (a) Akin ya agtayo nepeg a takotan iray kakabusol tayo? (b) Anto so nepeg ya awawey tayo ed saray managpasegsegang?

¹⁷ Saray kabusol tayo so walad mapeligron tuloy a kipapasen. Sikara so milalaban ed Dios. Kanian, mitunosan ed ganggan nen Jesus et ipikasi tayo iramay mamapasegsegang ed sikatayo imbes a takotan ira. (Mateo 5:44) Ipikasi tayo a no walaray onsusumpa ed Dios lapud anggapo ni so pikakabat da, a singa si Saulo na Tarso, mapangasin lukasan nen Jehova so kamataan da pian natalosan da so katuaan. (2 Corinto 4:4) Si Saulo so nagmaliw a Kristianon apostol Pablo tan nanirap a maong ed saray autoridad diad panaon to. Balet, intultuloy ton pinanonotan iray kapananisiaan to a “pauleyan ira komon ed saray manuley, tan pakauley ya ontulok ira, tan maralato ra ed amin a gawa a maabig, ya ag-ira mansalitay mauges nipaakar ed anggan siopaman [anggan diad saray pirmin mamapasegsegang ed sikara], ag-ira mikokolkol, maong komon so linawa ra, ya ipanengneng da so amin a kauyamoan ed saray amin a totoo.” (Tito 3:1, 2) Saray Tasi nen Jehova ed Pransya tan ed inerman a pasen so manggugunaet a mangiyaplika ed sayan simbawa.

18. (a) Diad antoran paraan a nayarin iliktar nen Jehova iray totoo to? (b) Anto so unor a pansumpalan?

¹⁸ Oniay imbaga na Dios ed si propeta Jeremias:  “Ilaban ta ka.” (Jeremias 1:8) Panon so nayarin pangiliktar nen Jehova ed sikatayo natan manlapud panamasegsegang? Nayarin patalindegen to so asimbang-kanonotan a huis a singa si Gamaliel. Odino nayarin seguroen to a say kurakot odino masumpan opisyal so agnailaloan a salatan na mas makatunongan a manuley. Balet, no maminsan et nayarin abuloyan nen Jehova a napasegsegang so totoo to. (2 Timoteo 3:12) No abuloyan na Dios a napasegsegang itayo, sikato so lawas mangiter ed sikatayo na biskeg pian nasungdoan so panamasegsegang. (1 Corinto 10:13) Tan antokaman so abuloyan na Dios, segurado itayo ed unor a pansumpalan: Saramay onlalaban ed totoo na Dios so milalaban ed Dios, tan ag-ontalona iray milalaban ed Dios.

19. Anto so teksto parad taon 2006, tan akin a matukoy itan?

¹⁹ Imbaga nen Jesus ed saray babangatan to a nailaloan da so kairapan. (Juan 16:33) Nisengeg ed satan, saray salitan nikurit ed Gawa 5:29 so lalon nipanpanaon: “Nakaukolan ya unoren mi so Dios, nen saray totoo.” Lapud satan a rason, sarayan makapalikliket a salita so apili bilang say teksto na saray Tasi nen Jehova parad taon 2006. Komon ta determinado tayo diad onsabin taon tan ed andi-anggaan ya unoren so Dios bilang Manuley tayo antokaman so nagawa!

[Paimano ed leksab]

Kasin Naebatan Yo?

• Anton makapaseseg ya alimbawa so impatnag na saray apostol diad impangarap da ed isusumpa?

• Akin a nepeg tayon unoren lawas so Dios imbes a say totoo?

• Siopa so talagan lalabanan na saray onsusumpa ed sikatayo?

• Anton pansumpalan so nailaloan tayo parad saramay mansungdo ed panamasegsegang?

[Tepetepet Parad Panagaral]

[Blurb ed pahina 23]

Say teksto parad taon 2006: “Nakaukolan ya unoren mi so Dios, nen saray totoo.”​—Gawa 5:29

[Litrato ed pahina 19]

“Nakaukolan ya unoren mi so Dios, nen saray totoo”

[Litrato ed pahina 21]

Si Caifas so nanmatalek ed totoo imbes a diad Dios