Gawaen a Makapaliket so Panagdalepdep

PARAD arum a totoo et nayarin singa ambelabelat a gagawaen so pandalepdep. Nayarin isipen dan mairap itan a gawaen, a kaukolan na satan so pirmin konsentrasyon. Nayarin nakokonsiensia met iratan ya indibidual lapud agda naaarap so mandalepdep, lalo la no nabasa ray kaimportantian na satan. (Filipos 4:8) Balet, say panmorekdek ed saray naaralan tayon katuaan nipaakar ed si Jehova, saray alay abig a kalidad to, makapakelkelaw iran ginawa to, kakaukolanen to, tan say makapadinayew a gagala to so nayarin makapaliket a tuloy a pangusaran na panaon tan manepeg labat ya ontan. Akin?

Si Jehova a Dios so Supremon Mananguley na uniberso tan sikatoy okupadon mankikimey parad pakasumpal na alay abig a gagala to. (Juan 5:17) Anggaman ontan, sikatoy interesado ed saray nononoten na balang sakey a managdayew to. Amta iya nen salmistan David tan oniay insulat to diad impangipuyan na Dios: “O Jehova sika sinukayan mo ak, et akabatan mo ak. Sika antam so kayuyurong ko tan say kakaalagey ko; sika natalosan mo so nonot ko a wala ni ed arawi.”​—Salmo 139:1, 2.

Diad primero, nayarin negatiboy panmoria na sakey ed saratan a salita na salmista. Nayarin irason to, ‘Anggan say Dios et “arawi,” naimano to so kada mauges a nononoten ko.’ Siempre, wala met so kamaongan na ontan a panmoria. Ontulong itan ed sikatayo pian ipulisay iray makapuy a kanonotan tan pian ipatua iratan ed Dios sano ontan lay nononoten tayo, a matalek a perdonaen to itayo base ed pananisia tayo ed dondon bagat nen Jesus. (1 Juan 1:8, 9; 2:1, 2) Balet, nepeg tayo met a tandaan ya uusisaen nen Jehova iray managdayew to ed positibon paraan. Sikatoy maniimano no sikatoy nonodnonoten tayo tekep na pisasalamat.

“Talaga kasin iimanoen nen Jehova so amin a maabig a kanonotan na minilyon a managdayew to?” so nayarin itepet yo. Seguradon ontan. Indanet nen Jesus ya interesado si Jehova ed sikatayo sanen inkuan to ya anggan saray angkelag ya anuyaw et iimanoen nen Jehova, insan oniay inyarum to: “Mamabli kayo nen saray dakel ya anuyaw.” (Lucas 12:6, 7) Agsarag na saray anuyaw so mannonot nipaakar ed si Jehova. Kanian no sikatoy interesado ed sikara, seguradon sikatoy mas interesado ed sikatayo tan naliliketan ed saray maridios a kanonotan na balang sakey ed sikatayo! On, singa si David, matalek tayon nipikasi: “Abuloyan [a] say dalepdep na pusok naako ra ed pakanengneng mo, O Jehova, dampay ko, tan Mananondon ko.”​—Salmo 19:14.

Say kaaruman nin paneknek a peteg ya interesado si Jehova ed panagdalepdep na saray matoor a managdayew to et naromog ed impuyan iran salita nen propetan Malaquias. Diad impanukoy ed agew tayo, oniay impasakbay to: “Saman la saray tinmakot ed Jehova nansasalita ra ed sakey tan sakey; et si Jehova tinmalineng, tan dinmengel, et sakey a libro a pakanodnonotan so sinulatan ed arap to, nipaakar ed saray tinmakot ed si Jehova, tan saray manonot ed ngaran to.” (Malaquias 3:16) Peteg a magmaliw a makapaliket so maridios a panagdalepdep no tandaan tayon si Jehova et lawas ‘ontatalineng’ odino mangiimano sano sikatoy nonodnonoten tayo. Sirin, komon ta miabobon tayo ed saray salita na salmista sanen insulat to: “Umamengen ko so amin a kimey mo, tan mandalepdep ak ed saray gawagawam.”​—Salmo 77:12.