Kaunongan Kabiskeg so Panagmatalek Yo ed Dios?
Kaunongan Kabiskeg so Panagmatalek Yo ed Dios?
“Anapen yo nin unona so panarian.”—MATEO 6:33.
1, 2. Anto so ginawa na sakey a laki nipaakar ed trabaho to, tan akin?
LABAY na sakey a laki so magmaliw a lalon mausar diad loob na kongregasyon. Balet, say problema et makakasbel so trabaho to diad regular ya iyaatendi to ed pantitipon. Panon ton aresolbe so kipapasen to? Pinasimpli to so bilay to, inmekal ed trabaho to, tan sinmabi panaon et sikatoy akaromog na trabaho ya agla makakasbel ed saray kimey to bilang Kristiano. Natan, agtanton baleg so sueldo to a singa ed dati, balet ta nalelegpet to nin siansia iray pankaukolan na pamilya to tan sikato so makakatulong lan maong diad loob na kongregasyon.
2 Kasin atebek yo no akin ya ontan a pananguman so ginawa na satan a laki? Ontan met kasi so gawaen yo sano nipaarap kayo ed kipapasen a singa ed sikato? Nakomendaan so dakel a Kristiano lapud ontan so ginawa ra, tan napatnagan ed saray kiwas da so panagmatalek da ed sipan nen Jesus: “Anapen yo nin unona so panarian, tan say inkatunong to; et amin iraya a bengatla niarum ira ed sikayo.” (Mateo 6:33) Nanmatalek ira ed si Jehova parad seguridad imbes a say sekular a mundo.—Uliran 3:23, 26.
3. Akin a nayarin uumamengen na arum no kasin praktikal ni natan so pangiyuna ed Panarian na Dios?
3 Lapud mairap a panaon a pambibilayan tayo, arum so maniisip no kasin makabat so desisyon na satan a laki. Natan, walaray totoo a mair-irap so panagbilay da bangta panggagayagaan na arum so mainawan panagbilay. Karaklan a totoo diad saray mairap a bansa so magunaet a mangaanamot ed antokaman a pakainawaan na panagbilay da. Diad biek a dapag, dakel a totoo diad mayayaman a bansa so nadedesdes a mamasiansia ed mainawan estandarte na panagbilay da anggaman oniirap so ekonomya, manguuman iray kipapasen ed panag-empleyo, tan ondarakel iray amo a sobran manpapatrabaho ed saray empleyado ra. Nipaakar ed desdes ed panag-anap na pambilay, arum so nayarin manumameng, ‘Praktikal ni kasi so pangiyuna ed Panarian?’ Pian naebatan itan a tepet, nodnonoten pa iray dumerengel a katongtong nen Jesus nensaman.
‘Agkayo la Manpapaga’
4, 5. Panon ya inyilustra nen Jesus a makatunongan parad totoo na Dios so agmagmaliw a mapagpaga ed inagew-agew iran pankaukolan da?
4 Si Jesus so walad Galilea, a mansasalita ed arap na dakel a totoo a nanlapud nanduruman pasen. (Mateo 4:25) Dagdaiset ed saratan a totoo so mayaman. Segurado a karaklan ed sikara et mairap-bilay. Ingen ta pinaseseg ira nen Jesus ya agda iyuuna so pakagamor na materyal a kayamanan noagta mantipon ira na mas mabli ni, salanti, say espiritual a kayamanan. (Mateo 6:19-21, 24) Oniay inkuan to: “Agkayo mapaga’d panagbila’yo no anto so kanen yo, ono anto so inumen yo; agyo met kapagaay laman yo, no anto so ikawes yo. Agta kasi mamabli bilay nen say kanen, tan say laman nen say kawes?”—Mateo 6:25.
5 Saratan a salita nen Jesus so ompatnag ya aliwan praktikal parad saramay karaklan ya onderengel ed sikato. Amta ra a no ag-ira mankuli et manirap so pamilya ra. Anggaman ontan, sikara so pinanonotan nen Jesus nipaakar ed saray siwit odino billit. Diad kada agew et saratan so kinaukolan a mananap na naakan da, ingen ta aasikasoen ira nen Jehova. Impanonot met nen Jesus ed sikara so pangaasikaso nen Jehova ed saray karosasan diad uma, a say karakep na saratan et nagkalalo ni nen say amin a karakpan nen Solomon. No aasikasoen nen Jehova iray manok tan rosas, agta nagkalalo ni so pangasikaso to ed sikatayo? (Mateo 6:26-30) Unong ed inkuan la nen Jesus, say bilay (kamarerwa) tan laman tayo so mas importante ni nen say taganon sasaliwen tayo pian nasustuni so bilay tayo tan say kawesen ya isulong tayo. No iyapasakey tayo labat iray sagpot tayo ed pananap na tagano tan kawesen tayo, ya anggapo lay magenap a panaon tayon manlingkor ed si Jehova, nasasaew tayo so mismon gagala na bilay.—Eclesiastes 12:13.
Asimbang a Panmoria
6. (a) Saray Kristiano so responsable ed anton bengatla? (b) Siopa so sigpot a panmamatalekan na saray Kristiano?
6 Siempre, ag-impaseseg nen Jesus ed saray ondedengel ed sikato ya agla ra mantrabaho, a manilalo labat ira ed Dios a mangitarya ed saray pankaukolan na pamilya ra. Anggan saray manok et nakaukolan a mananap na kanen da tan parad saray sibong da. Kanian, kinaukolan met parad saray Kristiano so mantrabaho no labay dan walay naakan da. Kinaukolan dan asikasoen iray responsabilidad da ed pamilya. Saramay miteteger tan aripen so kinaukolan met a mankuli parad saray amo ra. (2 Tesalonica 3:10-12; 1 Timoteo 5:8; 1 Pedro 2:18) Nantrabaho si apostol Pablo bilang managgaway tolda pian walay pansuporta to ed inkasikato. (Gawa 18:1-4; 1 Tesalonica 2:9) Balet, saraman a Kristiano so agnanmatalek ed sekular a trabaho parad seguridad da. Nanmatalek ira ed si Jehova. Bilang resulta, walay deen na nonot da ya anggapo ed arum. Oniay inkuan na salmista: “Saray manmatalek ed Jehova singa ra palandey na Sion, ya agnaalis, noag say maligen lawas.”—Salmo 125:1.
7. Anto so nayarin panmoria na sakey ya agmanmamatalek a maong ed si Jehova?
7 Nayarin miduma so panmoria na siopaman ya agmanmamatalek a maong ed si Jehova. Momoriaen na karaklan a totoo a say materyal a kayamanan et manunan lapuan na seguridad. Kanian, papasesegen na atateng so ananak da ya usaren da so kaksilan da pian makagamor na atagtagey ya edukasyon, ya iilaloan dan pakalmoan da itan na trabahon walaay atagey a sueldo. Makapaermen balet ta lapud satan a gegemtan et mas baleg so abalang na arum a Kristianon pamilya sanen agla iyaapasakey na ananak da so espiritual a bengatla tan saray kalat da la et nipaakar ed materyal.
8. Anton inkasimbang so pansiasiansiaen na saray Kristiano?
8 Sirin, namomoria na makabat iran Kristiano ya onaplika so simbawa nen Jesus ed panaon tayo a singa met nen inmunan siglo, tan panggugunaetan da so mansiansian asimbang. Anggaman kaukolan da so mantrabaho na dakel ya oras pian naasikaso da iray Makasulatan a responsabilidad da, agdan balot aabuloyan so panag-anap na kuarta a pansengegan lay pangibaliwala ra ed mas importante iran bengatla ed espiritual.—Eclesiastes 7:12.
“Agkayo Sirin Mapaga”
9. Panon a pinaseguroan nen Jesus iramay sigpot a manmamatalek ed si Jehova?
9 Diad Sermon to ed Palandey, oniay impaseseg nen Jesus ed saray ondedengel ed sikato: “Agkayo sirin mapaga, ya ikuan yo, Anto kasi kanen mi? ono, Anto kasi inumen mi? ono, Anto kasi pankawes mi? Ta saraya ya amin a bengatla so anapen na saray Gentiles; et say Ama yon mangatatawen amta to a nakaukolan yo so saraya ya amin a bengatla.” (Mateo 6:31, 32) Agaylan makapaseseg iratan a salita! No sigpot itayon manmatalek ed si Jehova, sikato so akaparaan lawas ya ontulong ed sikatayo. Balet, makapatenyeg-kanonotan met iray salita nen Jesus. Ipapanonot na saratan ed sikatayo a no magunaet tayon ‘aanapen’ iray materyal a bengatla, say panag-isip tayo et singa say panag-isip na “Gentiles” odino saray nasyon, salanti, saray totoon aliwan tuan Kristiano.
10. Sanen inmasingger ed si Jesus so laki pian onkerew na simbawa, panon ya impabitar nen Jesus no anto so mas aaroen na satan a laki?
10 Diad aminsan ya inkagawa, nantepet ed si Jesus so mayamyaman a laki no anto so nepeg ton gawaen pian nagamoran to so andi-anggaan a bilay. Sikato so pinanonotan nen Jesus nipaakar ed saray kakaukolanen na Ganggan, a siansia nin tutumboken ed saman. Oniay impaseguro na laki ed si Jesus: “Amin so saraya inuunor ko ra: dinan ni kakulangan ko?” Say inyebat nen Jesus so ompatnag ya aliwan praktikal ed dakel a totoo. Oniay kuan to: “No pirawat mo so kayadyarim, laka, ilakom so walad sika, tan iter mo’d saray duruka, et wala naani kayamanan mo ed tawen; et gala, tumbok mo ak.” (Mateo 19:16-21) Maermen ya inmarawi so laki, lapud agto naawat so pakaandi na kayamanan to. Anggan panon lay panangaro to ed si Jehova, mas inaro to iray kayamanan to.
11, 12. (a) Anton makapatenyeg-kanonotan iran salita so imbaga nen Jesus nipaakar ed kayamanan? (b) Panon a magmaliw a babeng so kaykayarian diad panaglingkor ed si Jehova?
11 Lapud satan ya agawa, oniay ag-inilaloan ya imbaga nen Jesus: “Mairap ed mayaman a too so iloob to’d panarian na tawen. . . . Main-inomay ni ya onlabot so sakey a kamelyo ed abot na sakey a dagum, nen say sakey a toon mayaman ya onloob ed panarian na Dios.” (Mateo 19:23, 24) Kasin say labay ya ibaga nen Jesus et anggapo so mayaman a too a makatawir ed Panarian? Andi, lapud oniay intuloy ton imbaga: “Diad Dios ami’ bengabengatla nayari.” (Mateo 19:25, 26) On, diad tulong nen Jehova et say arum a mayaman a totoo nensaman et nagmaliw ya alanaan a Kristiano. (1 Timoteo 6:17) Anggaman kuan, imbaga nen Jesus iratan a makapabiglan salita lapud walay makatunongan a rason. Sikato so angiter na pasakbay.
12 No mas papablien na sakey a too iray kayarian to a singa ed samay mayaman a laki, saratan so magmaliw a babeng ed sigpot-puson pakapanlingkor to ed si Jehova. Tua itan parad sakey a mayaman la tan ed sakey a ‘manpipirawat ya onyaman.’ (1 Timoteo 6:9, 10) No say sakey a too et manmatalek a maong ed materyal iran bengatla, sikato so magmaliw ya agla tanton ‘sinononot ed espiritual a pankaukolan to.’ (Mateo 5:3, NW) Bilang resulta, nayari met ya isipen to ya agto la nakaukolan so tulong nen Jehova. (Deuteronomio 6:10-12) Nayarin iilaloan ton sikatoy makaawat na nikabkabiig a panagtrato diad loob na kongregasyon. (Santiago 2:1-4) Tan nayarin usaren to so dakel a panaon to pian panliketan so kayamanan to imbes a panlingkoran to si Jehova.
Bayuboan so Suston Panmoria
13. Anto so lingon panmoria na saray taga-Laodicea?
13 Say sakey a grupo na totoo a walaan na lingon panmoria ed saray kaykayamanan et say kongregasyon na Laodicea nen inmunan siglo. Oniay inkuan nen Jesus ed sikara: “Sika kuan mo, Siak mayaman ak, tan akala ak na kaykayamanan, tan anggapo so kaukolan ko a bengatla; tan agmo kabat a sika sakey ka a pakaskasi tan makibot tan duka tan bulag tan labos-lakseb.” Aliwan say kayamanan da so sengegan no akin a saray taga-Laodicea et nagmaliw a pakaskasi ed espiritual, noagta say impanmatalek da diad kayamanan, aliwan diad si Jehova. Bilang resulta, sikara so malainem-em ed espiritual, a magano lan ‘iyuta nen Jesus.’—Apocalipsis 3:14-17.
14. Akin a makanepegan iray Hebreon Kristiano ed komendasyon nen Pablo?
14 Diad biek a dapag, kinomendaan nen Pablo iray Hebreon Kristiano lapud awawey da sanen agawa nensaman so panamasegsegang. Oniay inkuan to: “Aliwa labat a kinasian yo so saray wala a nipangaw, noag ingen inako yo a sililiket so panamsam ed saray kayarian yo, ta amta yo a wala ed sikayon dili ed tawen so sakey a magmaong a kayarian yo tan maando.” (Hebreos 10:34) Saratan a Kristiano so agnaapektoan a maong ed inkabalang na kaykayarian da. Apansiansia ra so liket da lapud binembenan da so sankamablian a kayarian da, say ‘magmaong tan maandon kayarian da.’ Singa say managtagilako ed parabolo nen Jesus ya angisakripisyo ed amin a bengatla parad sakey a mabmablin perlas, sikara so determinadon mamemben a maong ed ilalo ra ed Panarian, antokaman so nagawa. (Mateo 13:45, 46) Agaylan abig ya awawey!
15. Panon ya inyuna na sakey a Kristianon bii ed Liberia so intereses na Panarian?
15 Ontan met a maabig ya awawey so binayuboan na dakel natan. Alimbawa, diad Liberia et walay malangwer a Kristianon bii a naopresian a manaral diad unibersidad. Diad satan a bansa et ipapasen so ontan ya opresi bilang paraan pian nawalaan na maligen ya arapen. Balet, sikatoy sakey a payunir, a sigpot-panaon ya ebanghelisador, tan akaawat na imbitasyon a manlingkor bilang temporaryon espisyal a payunir. Pinili ton anapen nin unona so Panarian tan mansiansia ed sigpot-panaon a serbisyo. Sikato so linma ed asainmin to tan akapangigapo na 21 a panangiyaral na Biblia ed loob na taloy bulan. Sayan kalangweran ya agin bii tan ed nilibo nin agagi so angiyuna ed Panarian, anggaman insakripisyo ra so posiblin pakagunggonaan ed materyal. Panon dan apansiansia so ontan ya awawey ed sayan materyalistikon mundo? Abayuboan da so dakel a maabig iran kalidad. Singbaten tayo so arum ed saratan.
16, 17. (a) Akin ya importante so kapaabebaan ta pian makapanmatalek itayo ed si Jehova? (b) Akin a nepeg tayon bayuboan so panagmatalek ed saray sipan na Dios?
16 Kapaabebaan: Oniay ibabaga na Biblia: “Manmatale’ka ed Jehova ed simoon a pusom, tan agka onsaral ed tapew na dili a pakatalos mo: Dia ed saray amin a dalan mo sikato so bidbiren mo, et sikato itonton to so saray basbas mo. Agka komon makabat dia ed saray dili a matam.” (Uliran 3:5-7) No maminsan, walay kurang ya ompatnag a praktikal ed panmoria na sekular a mundo. (Jeremias 17:9) Balet, say paniilaloan na sakey a masimoon a Kristiano parad panangigiya et si Jehova. (Salmo 48:14) ‘Diad amin a dalan to’—diad saray pamaakaran ed kongregasyon, edukasyon odino sekular a trabaho, panagrelaks, odino antokaman ni—sikato so mapaabeban maniilalo ed simbawa nen Jehova.—Salmo 73:24.
17 Panagmatalek ed saray sipan nen Jehova: Oniay inkuan nen Pablo: “Say ondago ed Dios nakaukolan a sisiaen to a wala, tan sikato so niiyan a mananumang ed saray mananap ed sikato.” (Hebreos 11:6) No panduaruwaan tayo so panusumpal nen Jehova ed saray sipan to, nayarin ompatnag a singano makatunongan so ‘alabas a pangagamil ed sayan mundo.’ (1 Corinto 7:31) Diad biek a dapag, no mabiskeg so pananisia tayo, sikatayo so determinadon mangiyuna ed Panarian. Panon tayon nabayuboan so ontan a mabiskeg a pananisia? Diad iyapit ed si Jehova panamegley na maparanay, impapuson pikakasi tan diad panamegley na regular a personal a panagaral. (Salmo 1:1-3; Filipos 4:6, 7; Santiago 4:8) Singa si Arin David, nayarian tayon ipikasi: “Nanmatalek ak ed sika, O Jehova: inkuan ko a, Sika so Dios ko. Alay kinabalgan na kaabigan mo!”—Salmo 31:14, 19.
18, 19. (a) Panon ya ombiskeg so panagmatalek tayo ed si Jehova diad pagmaliw tayon maseet? (b) Akin a nepeg a mabulos a mansakripisyo so sakey a Kristiano?
18 Inkaseet ed panaglingkor ed si Jehova: Insiglaot nen Pablo so panagmatalek ed saray sipan nen Jehova ed pagmaliw a makuli sanen insulat to: “Pampirpirawatan mi a balang sakey ed sikayo ipanengneng to so onman a seet nipaakar ed inkapno na andi-kaatapan ya ilalo angga ed kasampotan.” (Hebreos 6:11) No okupado itayo ed panaglingkor ed si Jehova, tulongan to itayo. No naeeksperiensya tayo so pananulong to, lalon ombibiskeg so panagmatalek tayo ed sikato, tan magmamaliw itayon ‘malet, agnagiing.’ (1 Corinto 15:58) Ombiskeg so pananisia tayo, tan omputel so ilalo tayo.—Efeso 3:16-19.
19 Inkamabulos a mansakripisyo: Insakripisyo nen Pablo so sakey a karera a pakaasensoan ta pian ontumbok ed si Jesus. Mapatnag a susto so pinili to, anggaman say bilay to et mairap no maminsan no nipaakar ed materyal. (1 Corinto 4:11-13) Ag-isisipan nen Jehova so mainawan panagbilay, tan no maminsan et aanosan na saray lingkor to iray kairapan. No mabulos tayon pasimplien so panagbilay tayo tan mansakripisyo itayo, paneknek itan a mabiskeg so determinasyon tayon manlingkor ed si Jehova.—1 Timoteo 6:6-8.
20. Akin ya importante so pananos na sakey a mangiyuuna ed intereses na Panarian?
20 Inkaanos: Oniay impaseseg nen babangatan a Santiago ed saray kapara ton Kristiano: “Mantepel kayo komon sirin, agagi, angga ed isabi Katawan.” (Santiago 5:7) Diad sayan okupadon tuloy a mundo, mairap so magmaliw a maanos. Labay tayon nagawan tampol iray bengatla. Balet sikatayo so pinaseseg nen Pablo ya aligen iramay “lapu ed pananisia tan anos tawiren da so saray sipasipan.” (Hebreos 6:12) Magmaliw a mabulos a manalagar ed si Jehova. Seguradon makagunggona so panalagar tayo ed bilay ya andi-anggaan diad paraison dalin!
21. (a) Anto so nipapatnag tayo sano iyuna tayo so intereses na Panarian? (b) Anto so singbaten tayo ed ontumbok ya artikulo?
21 On, praktikal so simbawa nen Jesus ya anapen nin unona so Panarian. Sano gawaen tayo itan, nipatnag tayo a talagan manmamatalek itayo ed si Jehova tan pinili tayo so alenleneg a maligen a panagbilay parad sakey a Kristiano. Balet, insimbawa met nen Jesus ed sikatayo a mantultuloy tayon ‘anapen nin unona so inkatunong na Dios.’ Diad ontumbok ya artikulo et naamtaan tayo no akin a lalon nakaukolan tayo itan a panamaseseg.
Kasin Nipaliwawa Yo?
• Nipaakar ed saray materyal a bengatla, anton inkasimbang so impaseseg nen Jesus a bayuboan tayo?
• Anto so naaralan tayo ed ilustrasyon nen Jesus nipaakar ed kamelyo tan say abot na dagum?
• Antoran kalidad na Kristiano so ontulong ed sikatayo pian niyuna so Panarian na Dios?
[Tepetepet Parad Panagaral]
[Litrato ed pahina 21]
Mairap-bilay so dakel ed saray akadngel ed saray salita nen Jesus
[Litrato ed pahina 23]
Insakripisyo na managtagilako ed parabolo nen Jesus so amin a bengatla parad sakey a mabmablin perlas
[Litrato ed pahina 23]
Mas pinabli na mayaman a laki so kaykayarian to nen say Dios
[Litrato ed pahina 24]
Tulongan itayo nen Jehova no okupado itayo ed panaglingkor ed sikato