Nasalimbengan Itayo no Anapen Tayo so Inkatunong

“Anapen yo nin unona so . . . inkatunong [na Dios].”​—MATEO 6:33.

1, 2. Anto so desisyon na sakey a malangwer a Kristiano, tan akin ya ontan so desisyon to?

 WALAY sakey a malangwer a Kristianon bii diad Asia a mantratrabaho bilang sekretarya ed sakey ya opisina na gobierno. Sikato so mapeleng a mantratrabaho, masakbay ya onloloob tan agmanngingiras ed kimey to. Balet ta nakaukolan nin surien so kualipikasyon tan agawaan to lapud aliwa nin permanente ed trabaho to. Imbaga na mangaasikaso ed departamento a sikatoy magmaliw a permanente ed trabaho tan naikdan ni ingen na mas atagey a posisyon daput no sikatoy mirelasyon ed saman a laki diad imoral a paraan. Satan so prangkaan ya impulisay to, anggaman pansengegan itan na pakabalang to ed trabaho to.

² Kasin aliwan realistiko itan a malangwer a Kristianon bii? Andi, sikato so maalwar ya anumbok ed saray salita nen Jesus: “Anapen yo nin unona so . . . inkatunong [na Dios].” (Mateo 6:33) Parad sikato, mas importante ni so panumbok ed matunong iran prinsipyo nen say pakawalaan na bentaha diad panggawa na seksual ya imoralidad.​—1 Corinto 6:18.

Say Kaimportantian na Inkatunong

3. Anto so inkatunong?

³ Say “inkatunong” et mankabaliksan na pagmaliw a matoor tan matua ed moral a paraan. Diad Biblia, say Griego tan Hebreo iran salita na satan so mankabaliksan na “pagmaliw a maptek.” Aliwa itan a pantunongtunongan, ya uusisaen labat na sakey so inkasikato unong ed dili iran estandarte to. (Lucas 16:15) Satan so kaptekan unong ed saray estandarte nen Jehova. Satan so inkatunong na Dios.​—Roma 1:17; 3:21.

4. Akin ya importante so inkatunong parad sakey a Kristiano?

⁴ Akin ya importante so inkatunong? Lapud ta aabobonan na ‘matunong a Dios’ a Jehova so totoo to sano gagawaen da so inkatunong. (Salmo 4:1; Uliran 2:20-22; Habacuc 1:13) Siopaman a manggagaway ag-inkatunong et agnayarin nawalaan na maapit a relasyon ed sikato. (Uliran 15:8) Satan so rason no akin ya oniay impaseseg nen apostol Pablo ed si Timoteo: “Taynan ka ed saray ib-ibeg ya inuugaw, tan tumbo’ka ed kaptekan,” ontan met ed arum niran importantin kalidad. (2 Timoteo 2:22) Satan met so rason no akin ya inlaktip nen Pablo so “kinlong na kaptekan” sanen indalatdat to so nanduruman parte na espiritual a kinlong tayo.​—Efeso 6:14.

5. Panon a naanap na saray ag-ayadyarin pinalsa so inkatunong?

⁵ Siempre, anggapo so too a matunong ed sigpot a pantalos. Amin so akatawir na ag-inkayadyari ed si Adan, tan amin et makasalanan, agmatunong, manlapu la’d inkianak. Ingen, imbaga nen Jesus a nepeg tayon anapen so inkatunong. Panon itan a posible? Posible itan lapud inter nen Jesus so ayadyarin bilay to bilang dondon ed sikatayo, tan no agamilen tayo so pananisia ed satan a bagat, si Jehova so mabulos a mamerdona ed saray kasalanan tayo. (Mateo 20:28; Juan 3:16; Roma 5:8, 9, 12, 18) Lapu ed satan, legan tayon naaaralan so matunong iran estandarte nen Jehova tan gagawaen tayo so anggaay nayarian tayo pian unoren iratan​—a manpikasi pian natulongan itayon manalona ed saray kaleteyan tayo​—awaten nen Jehova so panagdayew tayo. (Salmo 1:6; Roma 7:19-25; Apocalipsis 7:9, 14) Agaylan makapaligliwa itan!

Magmaliw a Matunong ed Mundon Agmatunong

6. Akin a say mundo et mapeligron pasen parad saray akadkaunan Kristiano?

⁶ Sanen naawat na saray babangatan nen Jesus  so ganggan a magmaliw ira a tasi to “angga ed kasampotan na dalin,” nipaarap ira ed mairap a kipapasen. (Gawa 1:8) Amin a teritorya a niasain ed sikara so “walad silong na pakauley na samay mauges,” si Satanas. (1 Juan 5:19, Maung a Balita) Say mundo so naimpluensyaan la na marelmeng ya espiritu ya ikakayat to, tan nipapaarap iray Kristiano ed satan a makaderal ya impluensya. (Efeso 2:2) Parad sikara, say mundo et mapeligron pasen. Makapansungdo tan makapanmatoor ira no anapen da nin unona so inkatunong na Dios. Maslak ed sikara et akapansungdo, balet walaray pigara a kinmasipa ed “dalan na inkatunong.”​—Uliran 12:28; 2 Timoteo 4:10.

7. Antoran responsabilidad so mankaukolan na panresisti na sakey a Kristiano ed makaderal iran impluensya?

⁷ Kasin say mundo et aliwan mapeligro parad saray Kristiano natan? Andin balot! Mas mauges ni ingen itan nen say kipapasen nen inmunan siglo. Niarum ni, nibantak la si Satanas diad dalin tan sikatoy maruksan mibabakal ed saray alanaan a Kristiano, “saray nakdaan a kailalakan [na bii], a sikara so manguunor ed ganggan na Dios, tan wala ed sikara so impantasi nen Jesus.” (Apocalipsis 12:12, 17) Aatakien met nen Satanas so siopaman ya onsusuporta ed satan a “bini.” On, agnaarawian na saray Kristiano so kipaarap ed mundo. Anggaman ag-ira kabiangan ed satan, sikara so nakaukolan a manayam ditan. (Juan 17:15, 16) Tan kinaukolan a sikara so manpulong ditan pian naanap da iray totoon nikiling ed kaptekan tan sikara so bangatan da a magmaliw a babangatan nen Kristo. (Mateo 24:14; 28:19, 20) Kanian, lapud agnayarin sigpot a napaliisan na saray Kristiano so makaderal iran impluensya na sayan mundo, nakaukolan a resistian da iratan. Konsideraen tayo so apatira ed saratan ya impluensya.

Say Patit na Imoralidad

8. Akin a saray Israelita et nandayew ed dirios na saray Moabita?

⁸ Diad pansamposampot na 40 a taon na panteteyengteyeng da ed kalawakan, dakel ya Israelita so kinmasipa ed basbas na inkatunong. Naimatonan da so dakel iran impangiliktar nen Jehova, tan diad saman et magano la iran onloob ed Insipan a Dalin. Ingen, diad saman ya importantin panaon, sikara so ginmapon nanlingkor ed dirios na saray Moabita. Akin? Sikara so nampadaeg ed “kilalawan na laman.” (1 Juan 2:16) Oniay ibabaga na salaysay: “Say katooan ginapoan da so nanggawa na lawalawan ed saray anak nen Moab.”​—Numeros 25:1.

9, 10. Anto so kipapasen natan ya importante so pagmaliw a maimano ed makaderal ya impluensya na mauges iran kagletan na laman?

⁹ Satan ya agawa so mangipapatnag ed no panon a deralen na mauges iran kagletan na laman so agmaalwar a totoo. Nepeg itayon makaaral la ed satan, nagkalalo la ta say imoralidad et ipapasen na karaklan bilang naabobonan ya estilo na kabibilay. (1 Corinto 10:6, 8) Oniay kuan na sakey a report ed Estados Unidos: “Sakbay na 1970, say piamong [say agamil a panamong na agkasal a sankapareha] so aliwan legal ed interon Amerika. Natan et kaslakan la itan ya agamil. Masulok a kapaldua ed amin a nankasal ed primero so nanamong la sakbay na kasal da.” Satan a kagagawa tan ed mipara iran mabanday ya agamil ed moral so nagagawa met ed arum iran bansa. Naiimatonan itan diad interon mundo, tan makapaermen ta walaray Kristiano a tinmumbok ed satan​—ya abalang da ni ingen so talindeg da ed Kristianon kongregasyon.​—1 Corinto 5:11.

 ¹⁰ Niarum ni, say propaganda a mangiyaalibansa na imoralidad so ompatnag a nagagawa ed nanduruman pasen. Saray pelikula tan programa ed telebisyon so mangipaparungtal a maabig labat parad saray kalangweran so pansekso sakbay a mankasal. Nipaparungtal iray relasyon na homoseksual bilang normal labat. Tan dakel a programa so mabitabitar tan detalyadon mangipaparungtal ed saray agamil ed sekso. Saray litrato na agamil ed sekso so mainomay a nanengneng ed Internet. Singa bilang, inreport na sakey a kolumnista na peryodiko a say pitoy-taon ya anak ton laki so sinmempet a nanlapud eskuelaan tan maliket ton inistorya ed ama to a walay kaaro to ed eskuelaan ya akanengneng na saray labos-lakseb a bibii a mangaagamil na sekso diad Internet. Akigtot so ama, balet kaunongan karakel nin ugugaw so akanengneng la ed saratan a site ya agda ibabaga ed atateng da? Niarum ni, pigaran atateng so makaamta ed karga na video games a gagalawen na ananak da? Ipaparungtal na dakel a kabkabat a galaw ed kompyuter so makapadimlan imoralidad, ontan met ed demonismo tan karawalan.

11. Panon a nasalimbengan so pamilya manlapud imoralidad na sayan mundo?

¹¹ Panon a naresistian na pamilya so ontan a mabanbanday a “panagligliwaan”? Diad pangiyuna ra ed inkatunong na Dios, ya ag-ira mibibiang ed antokaman ya imoral. (2 Corinto 6:14; Efeso 5:3) Saray ateng a mangaasikason maong ed gagawaen na ananak da, ya ipupurek da ed ananak da so aro ed si Jehova tan ed matunong iran ganggan to, so mamapabiskeg ed sikara a manresisti ed pornograpiya, saray pornograpikon video game, imoral iran pelikula, tan arum niran agmatunong a tukso.​—Deuteronomio 6:4-9. *

Say Kapeligroan ed Pananesdes na Komunidad

12. Anton problema so linmesa nen inmunan siglo?

¹² Sanen si Pablo so walad Lystra diad Asia Minor, sikato so mamilagron amaabig ed sakey a too. Oniay inkuan na salaysay: “Sanen anengneng na saray karaklan so ginawa nen Pablo, inkasil da so boses da, a nankuan ed salita na Licaonia: Saray dirios linmasur ira ed sikatayo a kaulibay na totoo. Et inngaran da si Bernabe na Jupiter [odino Zeus], et si Pablo, Mercurio [odino Hermes], ta sikato nensaman so manunaan a mansasalita.” (Gawa 14:11, 12) Diad saginonor et saratan lanlamang a totoo so malabay a mamatey ed si Pablo tan si Bernabe. (Gawa 14:19) Malinew, saratan a totoo so mainomay a nadesdes na saray totoo ed komunidad da. Ompatnag a no walaray taga-ditan a nagmaliw a Kristiano, agda tampol niwaklit iray tendensia ra a magmaliw a maanito. Diad sulat to ed saray Kristiano ed Colosas, nampasakbay si Pablo sumpad panangidayew odino ‘panangigalang ed saray anghel.’​—Colosas 2:18.

13. Anto so pigaran kustombre a nepeg a paliisan na Kristiano, tan panon ton nagamoran so biskeg pian nagawaan itan?

¹³ Natan et nakaukolan met a paliisan na saray tuan Kristiano iray kustombre ya aawaten na karaklan a nibase ed palso iran relihyoson ideya a sumlang ed saray Makristianon prinsipyo. Alimbawa, diad arum a bansa, dakel ya akaugalian a seremonya nipaakar ed inkianak tan ipapatey so  nibase ed katilaan a walaan itayo na ag-ompatey ya espiritu. (Eclesiastes 9:5, 10) Walaray daldalin a kustombre ditan so panaggalsim ed saray kalangweran a bibii. * Satan so maruksa tan agmanepeg ya agamil ya agmitunosan ed maaron panangasikaso a nepeg ya ipatnag na Kristianon atateng ed ananak da. (Deuteronomio 6:6, 7; Efeso 6:4) Panon a resistian na saray Kristiano so pananesdes na komunidad pian nitalirak da iratan ya agamil? Diad pakawalaan da na sigpot a panagmatalek ed si Jehova. (Salmo 31:6) Say matunong a Dios so mamabiskeg tan mangasikaso ed saramay impapuson ontatawag ed sikato: ‘Sika so salimbeng ko tan kiyagelan ko; Dios ko, dia ed sika so panmatalkan ko.’​—Salmo 91:2; Uliran 29:25.

Aglilingwanan si Jehova

14. Anto so impasakbay nen Jehova ed saray Israelita sakbay ni na inloob da ed Insipan a Dalin?

¹⁴ Sakbay ni a linmoob iray Israelita diad Insipan a Dalin, impasakbay nen Jehova ed sikara a sikatoy agda lilingwanan. Oniay inkuan to: “Manlikas ka ta ompan nalingwanan mo si Jehova a Dios mo ed agpangunor na saray ganggan to, tan saray bilibilin to, tan saray pananontonan to, ya iganggan ko ed sika ed sayan agew: Ompan lamang, no akapangan ka la, tan napsel ka, tan akapaalagey ka na marakep ira ya abu-abung et panayaman mo ra: Tan no saray manada na angkabaleg ya ayep mo tan manada na karnerom et dinmakel ira, tan amin a kayarian mo et dinmakel ira; say pusom ed satan onkinon la et nalingwanan mo naani Jehova a Dios mo.”​—Deuteronomio 8:11-14.

15. Panon tayon makaseguro ya agtayo nalingwanan si Jehova?

¹⁵ Nayari met kasin nagawa natan so ontan a bengatla? On, no lingo iray prayuridad tayo. Balet, no anapen tayon unona so inkatunong na Dios, say puron panagdayew so magmaliw a sankaimportantian ed bilay tayo. Unong ed impaseseg la nen Pablo a gawaen tayo, ‘dondonen tayo so panaon’ tan nepeg ya ipatnag tayo so pankaganatan ed ministeryo tayo. (Colosas 4:5; 2 Timoteo 4:2) Balet, no agla tanton importante ed sikatayo so pipiaral tan panagpulong tan mas importante la ed sikatayo so panagrelaks odino panliliket, nalingwanan tayo si Jehova diad pantalos a sikato so ipasen tayo lan segundaryo ed bilay tayo. Imbaga nen Pablo a diad saray kaunoran ya agew et saray totoo so magmaliw a “maaro ed saray likeliket, a lalo nen say dia ed Dios.” (2 Timoteo 3:4) Naynay ya uusisaen na masimoon iran Kristiano so inkasikara pian naseguro ra ya ag-ira naimpluensyaan na ontan a klase na panag-isip.​—2 Corinto 13:5.

Manalwar ed Awawey ya Agpauleyan

16. Anton lingon awawey so impatnag nen Eva tan say arum ed panaon nen Pablo?

¹⁶ Diad Eden, matalonan asagyat nen Satanas so sinisiblet a pilalek nen Eva ya agpauleyan. Labay nen Eva so mandesisyon a bukor ed no anto so maptek tan makapuy. (Genesis 3:1-6) Nen inmunan siglo et agmet pauleyan so arum diad loob na kongregasyon na Corinto. Inisip dan mas dakel ni so amta ra nen si Pablo, kanian sikato so ansakit ya anawag ed sikara a manunaan odino mandunongdunongan ya apostoles.​—2 Corinto 11:3-5; 1 Timoteo 6:3-5.

17. Panon tayon napaliisan so awawey ya agpauleyan?

¹⁷ Diad mundo natan, dakel so “mayu-uges, mapasang,” tan arum a Kristiano so naiimpluensyaan  na ontan a klase na panag-isip. Arum ni ingen so nagmaliw a sumusumpa ed katuaan. (2 Timoteo 3:4; Filipos 3:18) No nipaakar ed puron panagdayew, importante a manilalo itayo ed panangidirehi nen Jehova tan mitulongan itayo ed “matoor tan makabat ya aripen” tan ed saray matatken ed kongregasyon. Ontan so pananap ed inkatunong, tan satan so manalimbeng ed sikatayo manlapud pakabayubo ed awawey ya agpauleyan. (Mateo 24:45-47; Salmo 25:9, 10; Isaias 30:21) Say kongregasyon na saray alanaan et “lusek tan sakurong na katuaan.” Inletneg itan nen Jehova ta pian manalimbeng tan mangigiya ed sikatayo. (1 Timoteo 3:15) No bidbiren tayo so importantin betang na satan, natulongan itayon ‘agmanggawa na antokaman lapu labat ed pampasirayew’ legan na mapaabeban pampapasakop tayo ed matunong a linawa nen Jehova.​—Filipos 2:2-4, MB; Uliran 3:4-6.

Aligen si Jesus

18. Sikatayo so napapaseseg ya aligen si Jesus ed antoran paraan?

¹⁸ Nipaakar ed si Jesus, oniay mapropetikon imbaga na Biblia: “Sika aroen mo so inkatunong, tan gulaen mo so kabaglan.” (Salmo 45:7; Hebreos 1:9) Agaylan abig ya awawey a nepeg tayon aligen! (1 Corinto 11:1) Aglambengat amta nen Jesus iray maptek ya estandarte nen Jehova, noagta pinabli to met iratan. Kanian sanen tinukso nen Satanas diad kalawakan, si Jesus so tampol tan mapekder ya angipulisay ed si Satanas pian ag-onkasipa ed “dalan na inkatunong.”​—Uliran 8:20; Mateo 4:3-11.

19, 20. Antoray maong a resulta na pananap ed inkatunong?

¹⁹ Tua, mabiskeg so agmatunong iran pilalek na laman. (Roma 7:19, 20) Balet, no papablien tayo so inkatunong, satan so mamabiskeg ed sikatayo sumpad karelmengan. (Salmo 119:165) Say aralem a panamabli ed inkatunong so manalimbeng ed sikatayo sano nipaarap itayo ed makapuy. (Uliran 4:4-6) Tandaan, no padadaeg itayo ed tukso, pambibiktoryaen tayo si Satanas. Agaylan magmaong so panresisti ed sikato tan si Jehova so pambiktoryaen tayo!​—Uliran 27:11; Santiago 4:7, 8.

²⁰ Lapud aanapen na saray tuan Kristiano so inkatunong, sikara so ‘napno na saray bungabunga na kaptekan, a nagamoran da so kakanaan nen Jesu-Kristo, ya onkanan gloria tan dayew na Dios.’ (Filipos 1:10, 11) Isusulong da so “too a balo, a sikato so pinalsay Dios ed loob na kaptekan tan matuan kasantosan.” (Efeso 4:24) Sikara so kien nen Jehova tan manbibilay ira pian manlingkor ed sikato, aliwan pian paliketen day inkasikaran dili. (Roma 14:8; 1 Pedro 4:2) Satan so mangigigiya ed kanonotan tan kiwakiwas da. Agaylan napapaliket da so mangatatawen ya Ama ra!​—Uliran 23:24.

[Saray paimano ed leksab]

Kasin Nipaliwawa Yo?

• Akin ya importante so pananap ed inkatunong?

• Panon ya anapen na ag-ayadyarin Kristiano so inkatunong?

• Antoray arum a bengatla ed mundo a nepeg a paliisan na Kristiano?

• Panon itayon nasalimbengan no anapen tayo so inkatunong?

[Tepetepet Parad Panagaral]

[Litrato ed pahina 26]

Parad saray patumbok nen Jesus, say mundo et mapeligron pasen

[Litrato ed pahina 27]

Saray ananak a nibangat a mangaro ed si Jehova so napabiskeg a mangipulisay ed imoralidad

[Litrato ed pahina 28]

Si Jehova so nilingwanan na arum ya Israelita kayari na impagmaliw dan maaligwas diad Insipan a Dalin

[Litrato ed pahina 29]

Singa si Jesus, gugulaen na saray Kristiano so ag-inkatunong