“Say Salita ed Kanepegan To, Agayla so Abig To!”

KALEGANAN na sanagew ya asamblea na saray Tasi nen Jehova, nanggunaetan a maong nen Kim so ontalineng tan mangalay nota legan a pansiasiansiaen ton mareen ya akayurong so anak ton bii a mantaon na duara tan kapaldua. Sanen asumpal lay programa, si Kim so inasinggeran na sakey a Kristianon agin bii a kadasig day yurongan tan sikatoy masimoon ton kinomendaan ed paraan na impangasikaso ra nen masiken to ed anak da legan na programa. Satan a komendasyon so makabkabaliksan a tuloy ed si Kim ya angga’d natan a pigay taon lay apalabas et oniay inkuan to: “Sano nakekesawan ak diad saray pantitipon, nononoten ko so imbaga na saman ya agi. Saray alay abig a salita to so kapapasesegan ko nin siansia pian mantultuloy a mangipasal ed anak mi.” Peteg, say nipanpanaon iran salita et mamaligsa ed sakey a too. Inkuan na Biblia: “Say salita ed kanepegan to, agayla so abig to!”​—Uliran 15:23.

Balet, nayarin mairap parad arum ed sikatayo so mangomenda ed arum. No maminsan, nairapan itayo lapud amta tayo iray dili tayon kakulangan. Oniay inkuan na sakey a Kristiano: “Parad siak, singa itan iyalagey ed lunek. No kapigan iyaatagey koy arum, diman ak lalon onlelereg.” Saray rason a singa say inkamabaing, kakulangay dilin-kompiyansa, odino takot ya ompan duma’y pakatalos na arum et nayarin gawaen to met a mairap so pangomenda. Niarum ni, no sikatayon mismo et mataltalag odino agni ingen nakokomendaan legan na ibabaleg tayo, nayarin nairapan itayon mangomenda ed arum.

Anggaman kuan, say pikabat tayon nayarin maabig so epekto na komendasyon ed angomenda tan say kinomendaan so nayarin mamakiwas ed sikatayon gawaen so anggaay nayarian tayo a mangibalikas na makapaseseg a salita ed suston panaon. (Uliran 3:27) Anto sirin iray positibon epekto na panggawa ed satan? Konsideraen tayon magano so pigara.

Positibo Iran Epekto

Say matukoy a komendasyon so mamabaleg ed dilin-kompiyansa na say kinomendaan. “Sano kokomendaan ak na totoo, naliliknak a walay kompiyansa ra ed siak, a manisia ra ed siak,” so inkuan nen Elaine, sakey a Kristianon asawan bii. On, say pangomenda ed toon anggapoy dilin-kompiyansa to so nayarin mamabiskeg ed sikaton mangarap ed saray kairapan tan sirin et sikatoy manliket. Saray kalangweran so nagkalautlan nagunggonaan ed komendasyon a kanepegan da. Oniay imbaga na sakey a tinedyer ya angaksobin pakadidismayaan to iray mismon negatibon kanonotan to: “Lawas kon gagawaey anggaay nayarian ko pian napaliket si Jehova, balet no maminsan say pakaliknak et anggan antoy gawaen ko, agni itan magenap. No walay mangomenda ed siak, bali-bali liknaan ko.” Peteg a tudtua so proverbio na Biblia a: “Say salita a makana so kisalita to sikato so singa saray mansanas a balitok ed iket a pilak.”​—Uliran 25:11.

Say komendasyon et mamakiwas tan mamaseseg ed sakey a too. Inkuan na sakey a sigpot-panaon a ministro, “Napapaseseg ak ed komendasyon pian lalon mankuli tan mamaaligwas ed kalidad na ministeryok.” Naimano na sakey ya inan walaan na duaran anak a sano kokomendaan na saray kakongregasyon da iray anak to lapud pankokomento ra ed saray pantitipon, lalon labalabay day mankomento. On, pakiwasen na satan iray kalangweran ya onprogreso ed Kristianon kabibilay. Diad tua, kaukolan tayon amin so napaseguroan a sikatayo so naaapresya tan papablien. Sayan makapadetdet a tuloy a mundo et nayarin  pakakesawan tan pakadismayaan tayo. Inkuan na sakey a Kristianon matatken, “Walaray panaon sano nadidismaya ak, say komendasyon et singa ebat ed saray pikakasik.” Mipadpara, inkuan nen Elaine, “No maminsan isipen kon ipapatnag nen Jehova so panangabobon to ed siak panamegley na saray balikas na arum.”

Say panangomenda so mangipalikna ed sakey a sikatoy kabiangan ed muyongan. Say masimoon a panangomenda so mangipatnag a manonot itayo ed arum tan mangipalikna na inkaligsa, inkaligen, tan panamabli. Paneknekan na satan a peteg tayon aaroen tan papablien iray kapara tayon Kristiano. Si Josie a sakey ya ina so nankuan: “Diad apalabas, kaukolan koy ondapag ed katuaan diad sankaabungan a naapag ed relihyon. Diad saman et apabiskeg so determinasyon kon ag-onsuko lapud panangapresya na saray matatken ed espiritual ya indibidual.” On, “kabiangan itayon amin na saksakey a laman.”​—Efeso 4:25, Maung a Balita.

Say pampilalek a mangomenda et ontulong ed sikatayon nanengneng so kamaongan na arum. Onnenengneng itayo ed kaabigan na arum, aliwan diad saray kakapuyan da. Inkuan na sakey a Kristianon matatken a manngaran na David, “Say pagmaliw a maapresya ed gagawaen na arum so ontulong ed sikatayon mas mabetbet a mangomenda ed sikara.” Diad pannodnonot tayon si Jehova tan say Anak to et makomendan tuloy ed saray ag-ayadyarin katooan, napakiwas itayon magmaliw a mabunlok ed sayan pamaakaran.​—Mateo 25:21-23; 1 Corinto 4:5.

Saray Makanepegan na Komendasyon

Lapud si Jehova a Dios so Manamalsa, sikato so sankamanunaan ed saramay makanepegan ya idayew. (Apocalipsis 4:11) Anggaman ag-itayo  kaukolan nen Jehova pian nawalaan na kompiyansa odino napakiwas, sano sikatoy idadayew tayo lapud inkamakapakelkelaw tan maaron kaabigan to, sikatoy onapit ed sikatayo tan nabayuboan tayo so siglaotan ed sikato. Say pangidayew ed Dios so ontulong met ed sikatayon nawalaan na maabig tan kabkaabigan a panangipasen ed saray agawaan tayo tan mamakiwas ed sikatayon bidbiren a si Jehova so sengegan na saray intalona tayo. (Jeremias 9:23, 24) Iyoopresi nen Jehova ed amin a makanepegan a totoo so ilalon manbilay ya andi-anggaan, tan satan so sananey nin rason a mamakiwas ed sikatayon mangidayew ed sikato. (Apocalipsis 21:3, 4) Labalabay nen Arin David nensaman ya ‘idayew so ngaran na Dios’ tan ‘sikatoy yabalbaleg diad pisasalamat.’ (Salmo 69:30) Ontan met komon so pilalek tayo.

Saray kapananisiaan tayo so makanepegan na matukoy a komendasyon. Sano gagawaen tayo itan, susumpalen tayo so madibinon ganggan a ‘manpapagalangan ed sakey tan sakey pian manaayatan ed aro tan ed saray maabig a gawa.’ (Hebreos 10:24) Si apostol Pablo so uliran ed saya. Insulat to ed kongregasyon na Roma: “Unona, misalamat ak ed Dios ko, lapu ed si Jesu-Kristo nipaakar ed sikayo ya amin, ta say pananisia yo nibawag ed sankamundoan.” (Roma 1:8) Mipadpara, inapresya nen apostol Juan so kapara ton Kristiano a si Gaio lapud ekselentin ehemplo to ed ‘panaakar ed katuaan.’​—3 Juan 1-4.

Natan, sano walay kaparan Kristianon matalonggaring a mangipapatnag na singa-Kriston kalidad, mangipaparungtal na imparaan a maong a betang ed pantitipon, odino impapuson mankokomento diad pantitipon, alay abig a pankanawnawa tayoy mangibalikas na apresasyon ed sikato. Odino sano walay ugaw a manggugunaet a mananap ed saray teksto legan na saray pantitipon na kongregasyon, sikatoy komendaan tayo. Oniay inkomento nen Elaine ya abitla niman: “Nandudumaan so langkap ed sikatayo. Diad pangimano tayo ed gagawaen na arum, ipapatnag tayoy panangapresya ed nanduruman langkap ed limog na totoo na Dios.”

 Diad Pamilya

Komusta met so pangibalikas na panangapresya ed saray kapamilyaan tayon mismo? Nakaukolan na sanasawa so pangusar na dakel a panaon, sagpot, tan maaron panangasikaso pian nitarya ra so espiritual, emosyonal, tan materyal a suporta ed pamilya ra. Peteg a kanepegan day makaawat na komendasyon manlapud sakey tan sakey tan ed saray anak da. (Efeso 5:33) Alimbawa, inkuan na Salitay Dios nipaakar ed maabilidar ya asawan bii: “Saray anak to ombangon ira, tan sikato so tawagen da a bendito; say asawa to met, tan sikato so idayew to.”​—Uliran 31:10, 28.

Makanepegan met iray anak na komendasyon. Makapaermen ta walaray ateng ya aliston mangibaga na iilaloan da ed ananak da, bangta mataltalag a mangomenda ed panggugunaet dan magmaliw a marespeto tan matulok. (Lucas 3:22) Sano say ugaw et nakokomendaan la ed kasakbayan ni labat na iyaaligwas to, nalikna ton sikatoy labalabay tan mas maligen so liknaan to.

Tua, nakaukolan so pansagpot ed pangomenda ed arum, balet nabendisyonan itayo na daakan diad panggawa ed satan. Diad tua, diad lalon pampeleng tayon mangomenda ed saramay makanepegan, mas lalo itayon naliketan.​—Gawa 20:35.

Mangawat tan Mangiter na Komendasyon Tekep na Dugan Awawey

Balet, nayarin pakasubokan na arum so pakaawat na komendasyon. (Uliran 27:21) Alimbawa, ompan lapud satan et ipasen laingen na saray indibidual a walaay tendensian manpaatagey a mas maong ira. (Uliran 16:18) Kanian, kaukolan so panag-alwar. Oniay inter nen apostol Pablo a praktikal a simbawa: “Kuan ko sirin ed balang sakey ed sikayo, ya agto nonoten so inkasikaton dili ya atagtagey nen say kanepegan a nonoten; noag ingen nonoten to ed kaabebaan na linawa, unong ed sukat na pananisia a say Dios inutob to ed sakey tan sakey.” (Roma 12:3) Pian natulongan tayo so arum ya agnapelag ed kalot na atagtagey a panangipasen ed dili, makabat ya aliwa lan saray kalidad a singa say inka-utek odino maong ya indengan so imanoen tayo. Imbes, nepeg tayon komendaan so arum lapud maabig a gawa ra.

Sano say komendasyon et initer tan inawat tekep na suston awawey, satan so mangunggona ed sikatayo. Nayarin napakiwas itayon bidbiren ya utang tayo ed si Jehova so antokaman a maabig ya agawaan tayo. Nayarin napaseseg itayo met na komendasyon a mamasiansia ed maabig a kondukta tayo.

Say masimoon tan manepenepeg a komendasyon et sakey a langkap a sarag tayon amin ya iter. Sano satan so masimoon tayon iter ed arum, say epekto na satan ed angawat et nayarin mas maabig ni nen say iilaloan tayo.

[Kahon/Litrato ed pahina 18]

Sakey a Sulat ya Anenyeg ed Puso To

Malinlinew ni’d nonot na sakey ya ombiabiahen manangasikaso so aminsan ya inkagawa kasempet dan sanasawa ed ayaman da, kayari na sanagew a makaketel a ministeryo. Inkuan to: “Nakeketel so asawak tan nadidismaya, imbaga to ed siak a pakalikna to et agto la nayarian. Inkuan ton, ‘Magmaong lay manserbi ta la’d sigpot-panaon a ministeryo ed sakey a kongregasyon, manpirmi ed sakey a pasen, tan mangikondukta na saray dili ta’n panangiyaral na Biblia.’ Agak nandesisyon a tampol, ya inkuan kon isumpal mi ni iman a simba insan likasen no onman ni liknaan to. No siansia nin labay to lay ontunda, respetoen koy liknaan to. Diad saman lanlamang ya agew, sinmamar kami ed post office tan walay sulat a nanlapud sangan opisina a parad sikaton mismo. Lugan na sulat so masimoon a panangomenda ed saray sagpot to ed lawak na ministeryo tan panagsungdo to, a bibidbiren na satan a talagan mairap so onugip ed nanduruman dukolan kada simba. Sikatoy atenyeg a maong ed saman a komendasyon ya agto lan balot asalambit so itunda ed panagbiahen kimey. Diad tua, aminpiga to ak a pinaseseg a mantultuloy sano nononoten ko lay ontunda.” Sayan sanasawa so nantultuloy ed panagbiahen kimey ed ngalngali 40 taon.

[Litrato ed pahina 17]

Siopa ed kongregasyon yo so makanepegan na komendasyon?

[Litrato ed pahina 19]

Ombulaslas iray anak ed maaron panangasikaso tan panangomenda