Tepetepet Manlapud Saray Managbasa
Tepetepet Manlapud Saray Managbasa
Inkuan na Salmo 102:26 a say dalin tan katawenan et “mangangga.” Kabaliksan kasi na satan a balikas a say planetan Dalin et naderal?
Inkuan na salmista diad pikakasi to ed si Jehova: “Dia ed una, impasen mo so panangiletnegan na dalin: tan saray katawenan sikara so gawa na limalimam. Sikara mangangga ra, balet sika maando ka; on, amin da ondaan ira a singa sakey a kawes; salatan mo ra a singa sake’ya ikakawes, et sikara nasalatan ira.” (Salmo 102:25, 26) Ipapabitar na konteksto a sarayan bersikulo et manutukoy ed inkaando na Dios, aliwan say kaderal na dalin. Ipapabitar met na konteksto no akin a satan ya importantin katuaan et makaligliwa ed saray lingkor na Dios.
Say salmista, a nayarin adestiero ed Babilonia, so ginmapo diad impaneskribe ed saray paniirap to. Iyeey-ey ton say bilay to so magangganon naandipat a “singa asewek.” Singa nalulupok lay laman to lapud pirmin pakakagonigon, a pakalikna to et saray pukepukel to so ‘napopoolan a singa tungo.’ Sikatoy naknaksawan, ‘a singa dika ya amagaan,’ tan maermen a ‘singa sakey ya anuyaw a manbukbukor ed toktok na abung.’ Anggapo lay ganas ton mangan lapu ed saray subok ed sikato tan saray agew to so napnoy pannangis. (Salmo 102:3-11) Anggaman ontan, agnaandian na ilalo so salmista. Akin? Lapu ed insipan nen Jehova a gawaen to ed Sion, odino Jerusalem.
Anggaman say Sion so dineral, insipan nen Jehova a nipawil itan. (Isaias 66:8) Kanian, matalek a nibaga na salmista ed si Jehova: “Sika . . . kasian mo so Sion; ta panaon na panangasi ed sikato, on, say tinandaan a panaon asabi la. Ta si Jehova pinaalagey to so Sion.” (Salmo 102:13, 16) Insan pinmawil so salmista ed panutukoy ed personal a paniirap to. Singa inkatunongan to a no say nankibalatar a Jerusalem et nipawil panamegley na pakayari na Dios, seguradon sikatoy niliktar nen Jehova ed miserablen kipapasen to. (Salmo 102:17, 20, 23) Tan wala ni sananey ya amakiwas ed salmista pian sigpot a manmatalek ed si Jehova. Anto itan? Say katuaan a say Dios so maando.
Midumaan a maong so maandon kiwawala nen Jehova ed inkatikey na mismon bilay na salmista. “Manbibilay kan anggad angga,” so inkuan to ed si Jehova. (Salmo 102:24, Maung a Balita) Insan inkuan na salmista: “Diad una impasen mo so panangiletnegan na dalin: tan saray katawenan sikara so gawa na limalimam.”—Salmo 102:25.
Ingen ta anggan say inkabayag lan maong na dalin tan katawenan et agmakakompara ed maandon kiwawala nen Jehova. Inyarum na salmista: “Sikara [say dalin tan katawenan] mangangga ra, balet sika maando ka.” (Salmo 102:26) Say pisikal a dalin tan katawenan et nayarin mangangga. Tua, imbaga nen Jehova ed arum a teksto a saratan so mansiansia lawas. (Salmo 119:90; Eclesiastes 1:4) Balet ta nayari iratan a deralen no ontan komon so inggagala na Dios. Diad pisunian, say Dios et ag-ompatey. Saray pisikal a palsa so ‘niletneg lawas’ lapu labat ta mimintinaen na Dios iratan. (Salmo 148:6) No itunda nen Jehova a pasimbaloen iray pisikal a palsa, sirin et ‘ondaan iratan a singa sakey a kawes.’ (Salmo 102:26) No panon a mas ombayag so too nen say kawes to, ontan met a si Jehova mas ombayag nen say pinalsa to—no pilien ton gawaen itan. Balet, amta tayo manlapud arum a teksto ya aliwan ontan so linawa to. Ipapaseguro ed sikatayo na Salitay Dios ya inggeter la nen Jehova a mansiansia lawas so literal a dalin tan katawenan.—Salmos 104:5.
Makapaligliwa a naamtaan a si Jehova so lawas wadtan pian manumpal ed amin ya insipan to. Antokaman a subok so nasagmak tayo, no oney-ey itayo ed sikato, makapanmatalek itayo a ‘pablien to so pikakasi na naukolan, tan agto balawen so pikakasi ra.’ (Salmo 102:17) On, say suportan impaseguro nen Jehova a naromog ed Salmo 102 et mas polido nen sayay dalin a totoonan tayo.