“Nakaukolan Ya Unoren Mi so Dios, nen Saray Totoo”

‘Si Jehova so Kilalaban Ko’

SARAY totoo nen Jehova so nipaarap ed sakey a pampilian. Kasin unoren da so marelmeng a manuley na kadaanan ya Ehipto? Odino si Jehova a Dios so unoren da diad itaynan da ed lugar a mangaaripen ed sikara pian manayam ira ed Insipan a Dalin?

Lapud ag-ibulos na maangat a Faraon na Ehipto so totoo nen Jehova, indapo na Dios so Samploran Bakbak ed satan a bansa. Agaylan pakapatnagan itan na pakapanyari to! Anggapoy nagawaan na saray dirios na Ehipto pian amperen iratan a bakbak.

Sanen imbaga ed si Faraon ya ibulos to la iray totoo na Dios, oniay inmudmora to: “Siopa ta si Jehova, a nepeg ko a dengelen so boses to ya abuloyan ko so Israel ya onla? Agko amta si Jehova, tan sakey ni agko abuloyan so Israel ya onla.” (Exodo 5:2) Bilang resulta, asagmak na Ehipto irayan bakbak: (1) say danum so nagmaliw a dala, (2) saray patang (3) timel, (4) bayangat, (5) salot ed saray ayayep, (6) pelpelsa ed too tan ayayep, (7) uran a kristal, (8) duroduron, (9) bilunget, tan (10) say impatey na saray panguloan na Ehipto, pati say anak nen Faraon. Diad kaunoran et imbulos la nen Faraon iray Hebreo. Dinagdag to ni ingen ira ya ontaynan la!​—Exodo 12:31, 32.

Nanapuran tinmaynan so manga taloran milyon a totoo, salanti, saray lalaki, bibii, tan ugugaw ya Israelita ontan met ed dakerakel a nanlalaok ya ulop. (Exodo 12:37, 38) Balet, agnambayag et sikara so inusilan nen Faraon a kaiba toy mabisbiskeg ya armada to. Ompatnag ya asaruko iray Israelita diad Ambalangan Dayat, ed desierton anggapo lay nabatikan, tan ed armada nen Faraon. Ingen, oniay imbaga nen Moises ed totoo: “Agkayo ontatakot, mandeen kayo labat, et nengneng yo so panangiliktar nen Jehova.”​—Exodo 14:8-14.

Mamilagron binelsay nen Jehova so danum na Ambalangan Dayat pian makatakas so Israel. Balet sanen onuusil iray Ehipsio, biglan pinapawil na Dios so danum. “Saray luganan nen Faraon tan say ehersito to [so] impataboy [nen Jehova] ed dayat.” (Exodo 14:26-28; 15:4) Lapud agto impanrespeto ed si Jehova, makadesyang so impatey nen matangsit a Faraon.

Diad Ambalangan Dayat et pinaneknekan nen Jehova a sikatoy “mibabakal.” (Exodo 15:3) “Anengneng na Israel so sankabalgan a kanonotan a ginawa nen Jehova ed saray Ehipsios,” kuan na apuyanan a salaysay, “et saray katooan tinmakot ira ed Jehova; tan anisia ra ed Jehova.” (Exodo 14:31; Salmo 136:10-15) Imbalikas da so impapuson pisasalamat da ed Dios sanen akiulop iray lalaki ed si Moises diad kanta na impanbiktorya tan say atsi ton si Miriam so angidaulo ed bibii pian onsayaw. *

Si Jehova so Siansia nin Manangiliktar

Walaray makapabiskeg-pananisian leksion a naaralan na saray modernon-agew a lingkor nen Jehova manlapud satan a matalonggaring ya impangiliktar na Dios. Say sakey a leksion et si Jehova so walaan na aglimitadon pakapanyari tan sigpot ton nasuportaan so totoo to. Diad kanta na impanbiktorya ra, si Moises tan saray Israelita so magaygayagan nankanta: “Say limam a kawanan, O Jehova, magloria ed inkabiskeg, say limam a kawanan, O Dios, binuyak to so kabusol.”​—Exodo 15:6.

Sakey nin leksion et say Makapanyarin-amin so walaan na aralem a pilalek a salimbengan so totoo to. Oniay inkansion na saray Israelita: “Si Jehova so biskeg ko tan kantak, tan sikato so nagmaliw a kilabanan ko; sikato ya so Dios ko, tan sikato so igalang ko.” Say sakey nin leksion et anggapo so matalonan makasumpa ed linawa nen Jehova a Dios. Diad magaygayagan kansion da,  oniay inkanta na saray niliktar a totoo: “Siopa ta ni makapipara ed sika, O Jehova, ed saray kinon-dirios? Siopa ta so mipara kasi ed sika, a magloria ka ed inkasantom, tatakotan ka ed saray kidaydayew, a manggawa ka na makapakelaw?”​—Exodo 15:2, 11.

Singa si Faraon na kadaanan ya Ehipto, saray manuley natan ed mundo so mamapasegsegang ed totoo nen Jehova. Saray arogante a lider so nayarin “mansalita naani na saray salita a sumpa ed Sankatagyan, tan pakapuyen [na saratan] . . . so saray sasanto na Sankatagyan.” (Daniel 7:25; 11:36) Balet oniay ipapaseguro nen Jehova ed totoo to: “Anggapo so ayura ya agawa a sumpa ed sika ya onaligwas naani; tan balang sakey a dila ya onsumpa ed sika ed pangukom dusaen mo naani. Saya sikato so tawir na saray ariripen nen Jehova.”​—Isaias 54:17.

Onsaew iray onsusumpa ed Dios, no panon a sinmaew si Faraon tan say armada to. Saray impangiliktar nen Jehova, a singa say impaway na totoo to manlapud Ehipto, so mamaneknek a susto so itumbok ed prinsipyon imbaga na saray apostol nen Jesus, ya oniay inyabawag da: “Nakaukolan ya unoren mi so Dios, nen saray totoo.”​—Gawa 5:29.

[Paimano ed leksab]

[Kahon/Litrato ed pahina 9]

KASIN AMTA YO?

• Sanlabin pinasiplog nen Jehova so maksil a dagem pian makabaliw iray Israelita ed Ambalangan Dayat diad amagan dalin.​—Exodo 14:21, 22.

• Ta pian maganon nabeltang na minilyon ya Israelita so Ambalangan Dayat, nakaukolan a say kaawang na dalanen da et sakey tan kapalduan kilometro odino onsulok ni.

[Saray litrato ed pahina 9]

Agnaamper na palson dirios na Ehipto so Samploran Bakbak nen Jehova

[Credit Line]

Amin a taloran pigurin: Nilitrato diad panangiyabuloy na British Museum