Tepetepet Manlapud Saray Managbasa

Kasin say karga lambengat na kaban na sipanan et say duaran tapyas a bato, odino wala ni so arum a karga na satan?

Sanen indedika so templo nen Solomon nen 1026 K.K.P., “anggapo so wala ed Kaban nilikud so saray duaran [tapyas] a bato a si Moises inyan tod’man ed Horeb, sanen si Jehova nanggawa na sipan ed saray anak na Israel, sanen pinmaway ira nanlapu ed Ehipto.” (2 Awaran 5:10) Balet, aliwan naynay ya ontan so kipapasen.

“Dia ed komatlo a bulan ya intaynan na saray anak na Israel ed dalin na Ehipto,” akasabi ra ed kalawakan na Sinai. (Exodo 19:1, 2) Kayari na saman, tinmatdang si Moises ed Palandey Sinai tan inawat to so duaran tapyas a bato na saray Ganggan. Oniay insalaysay to: “Et siak pinmawil ak tan linmasur ak ed palandey, insan ko inlugan so saray tablan bato ed dalem na kaban a ginawak; et wadman ira ya unong na imbilin nen Jehova ed siak.” (Deuteronomio 10:5) Saya so temporaryon kaban, odino panagkargaan, ya impagawa nen Jehova ed si Moises pian pangisimpenan na saray tapyas a bato na Ganggan. (Deuteronomio 10:1) Say kaban na sipanan so agni akaparaan ya usaren anggad sanen mansamposampot so 1513 K.K.P.

Kayarin tuloy na inkiliktar na saray Israelita manlapud Ehipto, sikaray nanmeremere lapud panaanap da na tagano. Kanian angitarya si Jehova na mana parad sikara. (Exodo 12:17, 18; 16:1-5) Diad saman, oniay imbilin nen Moises ed si Aaron: “Mangala ka na sakey a banga tan mangikarga ka na sakey ya omer na mana ed banga, tan isinop mo a sankaimaton nen Jehova, pian yatol ya onkana ed saray kailalakan yo.” Oniay inkuan ni na salaysay: “Unong na impangiganggan nen Jehova ed si Moises, ontan so impangisinop nen Aaron ed arapan na Panamatua [say panagsimpenan na importante iran dokumento], a yatol.” (Exodo 16:33, 34) Anggaman seguradon nantipon si Aaron na mana ed sakey a banga diad saman a panaon, agto ni itan inyatol ed arapan na Panamatua anggad sanen asumpal nen Moises so Kaban tan inkarga ditan iray tapyas a bato.

Unong a nipaimano la, say kaban na sipanan et asumpal diad pansamposampot la na 1513 K.K.P. Diad saginonor et inyan met ed Kaban so tayukor nen Aaron, kayarin nanrebelde si Kora tan arum nira. Si apostol Pablo so analambit ed ‘kaban na sipanan a walad loob na satan so balitok a banga ya anginay mana, say nansimit a baston nen Aaron, tan say duaran tapyak a baton angisulatan na saray ganggan.’​—Hebreos 9:4, Maung a Balita.

Say mana et intarya na Dios legan na 40 a taon ya impanteyengteyeng na saray Israelita diad kalawakan. Agla itan intarya sanen ginmapo la ran ‘angan ed bunga na dalin’ ya insipan. (Josue 5:11, 12) Inyan ed kaban na sipanan so tayukor nen Aaron parad sakey a gagala​—pian onkana a panandaan odino pantasi sumpad masugnar a kailalakan. Ipapatnag na saya a nansiansia ditan so tayukor kaleganan na impanteyengteyeng da diad kalawakan. Makatunongan sirin ya ibaga a sanen akaloob la so Israel ed Insipan a Dalin tan sakbay na impangidedika ed templo nen Solomon, inekal la ed kaban na sipanan so tayukor nen Aaron tan say balitok a banga ya anginan na mana.