Kasin Singa Ka Kiew a Lagani Auna?

DIAD sakey a baryo ed bandad ketegan na Port Moresby, Papua New Guinea, walay duaran ministron pasempet manlapud impanpulong da. Legan dan manaakar, akanengneng iray marakdakep a kiew. “Agi, lagani auna!” so kuan na samay mas panguloan a laki. Insan to imbaga ed mas ugaw: “Say kabaliksan to ’tan a ngaran et ‘tinaon a kiew.’ Aliwan singa saray arum a kiew ed tropiko, tinaon itan a manlologlog tan singano inatey la. Balet, kasabi mamauran, onsimit lamet itan, manrosas, tan marakdakep lamet.”

Walay leksion a naaralan ed lagani auna, odino saleng, say kabkabat a ngaran na satan. Inkuan na arum ya eksperto ya ipapasen itan bilang sakey ed saray limaran sankarakpan a manrorosas a kiew ed interon mundo. Anggaman napagpag iray rosas tan bulong na satan no tiagew, manitipon itan na suplay a danum. Saray lamot na satan et mabiskeg tan sarag toy onsengat-sengat ed aralem laran bato ed dalin. Satan so pinagka-angkla to, kanian agnabubual anggan mabanesbes so dagem. Diad antikey, nabibilay itan lapud iyaadapta na satan ed saray mairap a kipapasen.

Nayarin wala itayo ed sakey a kipapasen a pakasusubokan na pananisia tayo. Antoy ontulong ed sikatayon mansungdo? Singa say lagani auna, nayarian tayoy manepsep tan manipon na manangiter-bilay a danum na Salita na Dios. Nepeg itayo met ya ompeket a malet ed ‘dampay tayo,’ si Jehova, ontan met ed organisasyon to. (2 Samuel 22:3) Peteg a say lagani auna et sakey a marakdakep a panonot ya anggan diad mairap iran kipapasen et nasarag tayon pansiansiaen so espiritual a biskeg tan dakep tayo no anamoten tayo iray probisyon ya itatarya nen Jehova. Diad panggawa tayo ed satan, ‘tawiren tayo iray sipasipan’ to, laktip lay sipan ton andi-anggaan a bilay.​—Hebreos 6:12; Apocalipsis 21:4.