Tepetepet Manlapud Saray Managbasa
Tepetepet Manlapud Saray Managbasa
Kasin angusar na nikadkaduman pilak a kopa si Jose, a sakey a matoor a lingkor nen Jehova, pian manparles, unong a singano napatnagan ed Genesis 44:5?
Anggapoy basiyan pian panisiaan a si Jose et aktual a nanggawa na antokaman a nengneng na panagparles.
Imparungtal na Biblia so peteg a pakatalos nen Jose nipaakar ed panangusar na mahiko ed pangamta ed arapen. Diad asasakbay, sanen sikatoy akerew a mangipatalos ed kugip nen Faraon, aminpigan impurek nen Jose a say Dios labat so ‘makapangiter’ odino makapangipaamta ed saray nagawa ed arapen. Bilang resulta, anisiaan nen Faraon a mismo a say Dios a dadayewen nen Jose, say tuan Dios, aliwan say panagparles, so akapikabatan nen Jose na saray detalye nipaakar ed arapen. (Genesis 41:16, 25, 28, 32, 39) Diad samay Ganggan ya inter ed si Moises ed saginonor, insebel nen Jehova so panangusar ed mahiko odino panagparles, sirin et pinekderan To a Sikato lambengat so makapangipasakbay ed arapen.—Deuteronomio 18:10-12.
Sirin, akin ya impasagilig nen Jose panamegley na say lingkor to a sikatoy manguusar na kopa pian ‘makapanparles’? * (Genesis 44:5) Kaukolan tayon ikonsidera iray kipapasen sanen nibalikas iya.
Lapud pirmin eras, linma ed Ehipto iray agagi nen Jose pian mangalay tagano. Pigaran taon antis na satan, si Jose so inlako ed inkaaripen na saraya lanlamang ya agagi to. Natan, agda am-amtan sikaray kinmerew manaya na tulong ed agi ran mismo a nagmaliw a manangimaton na tagano ed Ehipto. Ag-impaamta nen Jose so inkasikato ed sikara. Imbes, denesidi ton suboken ira. Mitukoyan ed satan, labay nen Jose a determinaen no kasin petepeteg so pagbabawi ra. Labay to met ya amtaen no inaro ra kasi, tan no kaunongan kaaralem so panangaro ra, ed agi ran si Benjamin tan say ama ran si Jacob, a paborito toy Benjamin. Sirin, angusar si Jose na sakey a taktika.—Genesis 41:55–44:3.
Ingganggan nen Jose so sakey ed saray lingkor to a panoey tagano iray supot na agagi to, ipawil so kuarta na balang sakey ed sangab na supot to, insan iyan ed sangab na supot nen Benjamin so kopa nen Jose. Diad amin na saraya, inmakto si Jose a singa sakey a manangimaton na paganon bansa. Inyadapta to so inkasikato, saray inkiwas to, tan pananalita to ed karakter na ontan a klase na manangimaton, a singa ompatnag ed pakanengneng na saray agagi ton agbalot naninap.
Sanen kinompronta nen Jose iray agagi to, sikatoy siansia nin mankunkunwari, ya intepet to: “Agyo ta amta a say onian too a singa siak nayarian to’n peteg so manparles?” (Genesis 44:15) Sirin, say kopa et sakey lambengat a kabiangan na taktika to. Tan no panon ya agmet tua a tinakew nen Benjamin so kopa, ontan met ya aliwan tuan uusaren nen Jose so kopa pian manparles.
[Paimano ed leksab]
^ par. 5 Diad impaneskribe ed sayan abayag lan agamil, oniay impaliwawa na The Holy Bible, With an Explanatory and Critical Commentary, ya inuksoy nen F. C. Cook: “Gagawaen itan diad balanglan pangipelag na balitok, pilak, odino ankabli iran bato, diad danum, insan analisaen so itsura na saratan; odino kuninengan lambengat so danum a singa onnenengneng ed espiho.” Oniay inkuan nen Christopher Wordsworth a komentarista na Biblia: “No maminsan et papanoen na danum so kopa, insan naala so ebat ed saray iisipen iran uhas a pinawala na agew ed danum a walad kopa.”