Tuan Inkaaligwas Diad Balon Mundo na Dios

SI David, * a Kristianon asawan laki tan ama, so inmalis ed Estados Unidos, a matalek a duga so gagawaen to. Anggaman agto labay a taynan so asawa tan ananak to, naseseguro ton napaasenso toy bilay dan amin no sikatoy nawalaan labat na dakel a kuarta. Kanian inawat toy imbitasyon na kakanayon to ed New York tan ag-abayag et akalmoy trabaho diman.

Legan balet ya onlalabas so panaon, kalkalnan nabuburagas so positibon panmoria nen David. Dagdaiset lay panaon a nausar ed espiritual iran aktibidad. Walay bektan ngalngali la naandi pananisia to ed Dios. Insan to labat amoria so inkapeteg na situasyon to sanen sikatoy atukson manggawa na imoral. Say pangiyaapasakey to’d imano to ed materyal ya inkaaligwas so kalkalnan mangiyaarawi ed sikato ed amin a peteg ya importante ed sikato. Kaukolan toy manggawa na pananguman.

Singa si David, tinaon et dakel ed saray wala’d maniirap a bansa so onaalis ed biek taew, diad paniilalon onasenso so ekonomya ra. Ingen, kaslakan lan naaapektoan a maong so  espiritualidad da. Panumamengan na arum, ‘Kasin nagawaan na Kristiano so mantipon na materyal a kayamanan tan magmaliw met a mayaman ed Dios?’ Ibabaga na saray popular a managsulat tan pastor a posible itan. Balet unong a naaralan nen David tan saray arum, mairap itan a panbansagen.​—Lucas 18:24.

Aliwan Makapuy so Kuarta

Siempre, say kuarta et imbento na too. Singa saray arum ya inimbento, agmet itan mauges odino makapuy. Sakey lambengat itan ya uusaren pian makasaliw. Kanian, sano dugay pakausar ed satan, maabig so kikanaan to. Singa bilang, bibidbiren na Biblia a “say kuarta [et] sakey a sakurong” odino proteksion nagkalalo la ed saray probleman misiglaotan ed kairapay bilay. (Eclesiastes 7:12) Parad arum, “say kuarta” et singa ‘ebat ed amin a bengatla.’​—Eclesiastes 10:19.

Kokondenaen na Kasulatan so inkangiras tan ipapaseseg to so impasyan pantrabaho. Kaukolan tayon taryaan so pamilya tayo, tan no walay daiset a kera, walay ‘niiter tayo ed walaay pankaukolan.’ (Efeso 4:28; 1 Timoteo 5:8) Niarum ni, imbes a sibletan so dilin laman, papasesegen itayo na Biblia a panggayagaan iray kayarian tayo. Inkuan ed sikatayo ya ‘alaen tayo so betang tayo’ tan panggayagaan iray bunga na sagpot tayo. (Eclesiastes 5:18-20) Diad tua, walaray pigaran alimbawa ed Biblia na matoor a lalaki tan bibii a mayayaman.

Lalakin Matoor tan Mayaman

Si Abraham, a matoor a lingkor na Dios, so walaan na amayamay ya ayayep, dakel a pilak tan balitok, tan pami-pamilyan ariripen a manbilang na nilasus. (Genesis 12:5; 13:2, 6, 7) Say matunong a si Job so walaan met na baleg a kayamanan​—ayayep, ariripen, balitok, tan pilak. (Job 1:3; 42:11, 12) Sarayan lalaki so mayaman anggano ikompara ed estandarte natan, balet mayaman met ira ed Dios.

Say tawag nen apostol Pablo ed si Abraham et “ama na amin day manisia.” Si Abraham et aliwan masiblet nisay nigalet ed kaykayarian to. (Roma 4:11; Genesis 13:9; 18:1-8) Ontan met, si Job so deneskribe na Dios a mismo bilang “naskey tan matunong.” (Job 1:8) Sikatoy lawas akaparaan ya ontulong ed duka tan nalalames. (Job 29:12-16) Si Abraham tan Job so namparan nanmatalek ed Dios imbes a diad kaykayamanan da.​—Genesis 14:22-24; Job 1:21, 22; Roma 4:9-12.

Si Arin Solomon so sananey nin alimbawa. Bilang tomatawir ed trono na Dios diad Jerusalem, si Solomon so aglabat inikdan na Dios na aralem a kakabatan noag pati say daakan a kaykayamanan tan kagalangan. (1 Arari 3:4-14) Sikatoy matoor ed intero lawarin impanbilay to. Balet, diad kaunoran la ran taon nen Solomon, “say puso to . . . so aliwa a naskey ed Jehova.”  (1 Arari 11:1-8) Dia tua, say maermen ya eksperiensya to so mangiyiilustra ed pigara ed saray kaslakan a patit na inkadaakan ed materyal. Imanoen pa so pigara.

Saray Patit na Inkadaakan

Say sankaseryosoan a peligro et say pagmaliw a maaro ed kuarta tan ed say nasaliw na satan. Say kayamanan so mamapalesa ed arum a totoo na agbalot napenek a pampirawat. Diad gapo ni labat et naimano la nen Solomon iyan tendensia ed arum. Insulat to: “Say mangaro ed pilak agnapesel ed pilak; odino say mangaro ed daakan, agnapesel ed munat: saya met sikato so kaapaan.” (Eclesiastes 5:10) Diad saginonor et pinasakbayan nen Jesus tan Pablo iray Kristiano nipaakar ed sayan manamalikdon panangaro.​—Marcos 4:18, 19; 2 Timoteo 3:2.

Sano say kuarta et magmaliw lan ad-aroen tayo, imbes a sakey labat ya uusaren pian nagawaan so sakey a bengatla, magmainomay itayo lan naimpluensyaan na nambabangil a pakatuksoan ed moral, kaiba lay panagtila, panagtakew, tan panamalikdo. Si Judas Iscariote, a sakey ed saray apostol nen Kristo, so angitapat ed katawan to lapu labat ed 30 piraso a pilak. (Marcos 14:11; Juan 12:6) Saray arum ni ingen et inmabot ni ed punton diodiosen da la so kuarta. (1 Timoteo 6:10) Kanian, kaukolan a lawas panggunaetan na saray Kristiano so pagmaliw a matua ed peteg a motibo ra’d pakawalaan na dakel a kuarta.​—Hebreos 13:5.

Say pangegemtan ed kayamanan so mamawala met na agnaliklikas a kapeligroan. Unona, walay tendensian pawalaen na daakan a kayamanan so panagmatalek ed dili. Inlaktip iya nen Jesus sanen tinukoy to so “panamalingo na saray kayamanan.” (Mateo 13:22) Pinasakbayan met na managsulat na Biblia a si Santiago iray Kristiano ya agda lilingwanan so Dios anggan sano manplaplano iran mannegosyo. (Santiago 4:13-16) Lapud ompatnag a napagamoran itayo na kuarta na samet a kawayangan, parad saramay walaan na satan, lawas wadtan so peligron panmatalek ed kuarta imbes a dia ed Dios.​—Uliran 30:7-9; Gawa 8:18-24.

Komadua, unong a naamtaan nen David, ya asalambit niman, mabetbet a sasamsamen na panitipon na kayamanan so dakel ya oras tan sagpot na too, a kalkalna lan mangiyarawi ed sikato ed saray espiritual a gegemtan. (Lucas 12:13-21) Parad saray mayaman, lawas met a wadtan so tukson usaren so walad sikara a manunan parad saray makapaliket ya aktibidad odino personal iran gegemtan.

Nayari kasin sakey ed saray sengegan na inkaderal na espiritualidad nen Solomon et say impangiyabuloy to’d maluhon panagbilay a mamakapuy ed pakatebek to? (Lucas 21:34) Amta to so direktan pananebel na Dios sumpad panangasawan piaalyansa ed arum a bansa. Ingen ta diad kaunoran et sikatoy awalaan na ngalngali sanlibon asawa. (Deuteronomio 7:3) Diad pilalek ton napaliket iray sankailin kaasawaan to, sinali to so uksoyan a pansasamok na pananisia bilang serbisyo ed sikara. Unong a nikuan la niman, kalkalnan niyarawi ed si Jehova so puso nen Solomon.

Malinew ya ipapanengneng na sarayan alimbawa so katuaan na simbawa nen Jesus: “Agyo nayarian so manlingkor ed Dios tan saray kayamanan.” (Mateo 6:24) Panon, sirin, a matalonan napidenengan na Kristiano so kairapan ed ekonomya a nasasagmak na karaklan natan? Mas importante, wala tay nailaloan a maabig a bilay ed arapen?

Tuan Inkaaligwas ed Arapen

Miduma ed saray patriarkan si Abraham tan Job tan say nasyon na Israel, saray patumbok nen Jesus so ingganggan a “manggawa . . . na saray babangatan ed amin a nasyones.” (Mateo 28:19, 20) Say panumpal ed satan a ganggan so mankaukolan na panaon tan sagpot ya usaren komon ed sekular iran trabaho. Say sekreto sirin ed itatalona et walad samay pagagawa nen Jesus ed sikatayo: “Anapen yo nin unona so panarian [na Dios], tan say inkatunong to; et amin iraya a bengatla niarum ira ed sikayo.”​—Mateo 6:33.

Kayarin dawitdawit ya abalang nen David so pamilya tan espiritualidad to, nipetek to a siansia  so kabibilay to. Unong ya insipan nen Jesus, sanen ginapoan lamet nen David ya iyuna ed bilay to so panagaral na Biblia, pikakasi, tan ministeryo, ginmapon inmaligwas iray bengabengatla. Kalkalna ton apapawil so relasyon to ed asawa tan ananak to. Pinmawil so inkasayaksak tan inkakontento to. Siansia nin sikatoy impasyan mankikimey. Sikatoy aliwan sakey a mairap a nagmaliw a mayamyaman. Balet, lapud ansakit ya eksperiensya to, naaral toy pigaran makanan leksion.

Panduaruwaan la nen David no kasin makabat so inyalis to ed Estados Unidos, tan denesidi ton aglan balot paimpluensyaan ed kuarta sano mandedesisyon. Amta to la natan a say sankakanaan iran bengatla ed bilay​—say maaron pamilya, maong a kakaaro, tan say relasyon ed Dios​—so agnasaliw na kuarta. (Uliran 17:17; 24:27; Isaias 55:1, 2) Peteg, say moral ya integridad so mas makanakana nen say materyal iran kayamanan. (Uliran 19:1; 22:1) Si David tan say pamilya to so determinadon mangiyuna ed saray nepeg ya uunaen.​—Filipos 1:10.

Paulit-ulit lan sinmaew so sagpot na totoo a mangiletneg na sosyedad a tuan mayaman tan walaan na moral. Bangbalet, insipan na Dios ya itarya na Panarian to so inkadaakan ed materyal tan espiritual iran bengatla a kaukolan tayo pian manbilay a maliket. (Salmo 72:16; Isaias 65:21-23) Imbangat nen Jesus a say tuan inkadaakan so onggagapo ed espiritualidad. (Mateo 5:3) Kanian, balang lan mayaman itayo odino mairap, say pangiyuna natan ed saray espiritual a bengatla so sankaabigan a paraan a niparaan na anggan siopa ed sikatayo parad balon mundo na Dios ya asingsingger la. (1 Timoteo 6:17-19) Satan a mundo so sosyedad na peteg a mayaman ed materyal tan espiritual.

[Paimano ed leksab]

[Saray litrato ed pahina 5]

Nanmatalkan nen Job so Dios, aliwan say kaykayamanan to

[Saray litrato ed pahina 7]

Saray sankakanaan iran bengatla ed bilay et agnasaliw na kuarta