“Anto so Kabaliksan na Purpuran Trianggulo?”

“PIGARAN agew ed apalabas, akaawat ak na sakey a kopya na Say Panag-Bantayan manlapud sakey ed saray Tasi nen Jehova,” so insulat na sakey ya empleyado na gobierno diad departamento na hustisya ed Seoul, Republika na Korea. Oniay intuloy to: “Diad impanbasak ed satan, naamtaan ko so pigaran katuaan nipaakar ed impamasegsegang ed saray Tasi nen Jehova legan na saray uley na Nazi tan Komunista. Balet ta walay itepet ko. Ipapanengneng na litrato ed apis so indait ya abalintukar a purpuran trianggulo diad nikawigi na unipormi na saray Tasi nen Jehova. Anto so kabaliksan na purpuran trianggulo?”

Legan na impanuley na Nazi ed Alemanya, saray Tasi nen Jehova so agnansaludo ed si Hitler, a nansiansia ira a neutral ed politika tan panagsundalo. Kanian sikara so maruksan pinasegsegang na saray Nazi, diad impangipisok da na manga 12,000 a Tasi ed nanduruman kabayag diad saray prisoan tan panangipangawan a kampo. Manga 2,000 ed sikara so inatey, a nilasus ed saratan so ginagalan pinatey.

Anto so kabaliksan na purpuran trianggulo ed unipormi ra? “Saray nanduruman grupo na priso ed saray kampo [na Nazi] so walaan na nikaduman pangibiigan,” so isasalaysay na libron Anatomy of the SS State. “Say apasakey a sistema na panangibiig a ginmapo sakbay na bakal et say pangidait na trianggulon piraso a tela diad kada unipormi na priso, a say kolor et mandependi ed kawalaan ton grupo: ambalanga parad saray nipriso lapud politika; purpura parad saray Tasi nen Jehova; andeket parad saray sumpad sosyedad; birdi parad saray kriminal; de-rosa parad saray homoseksual; asul parad saray tinmaynan ed bansa ra. Nilikud ed de-kolor a trianggulo, kinaukolan iray Judio a priso a mangilatop na sakey nin duyaw a trianggulo ed samay de-kolor a trianggulo ta pian magmaliw a Bitewen nen David ya anemiran suyok.”

“No nanodnonotan ni ed arapen so kaimportantian na satan ed moral,” insulat nen Propesor John K. Roth ed libro ton Holocaust Politics, “magmaliw nin siansia a salimbeng so purpuran trianggulo sumpad trahedya, sakey a salimbeng a saray suyok na satan a trianggulo so mangipaarap ed imano tan responsabilidad tayo diad maabig a kondukta, a makanepegan a tuloy a respetoen na too.” Saray Tasi nen Jehova so amawala na dokumentaryon akalay-premyo a Jehovah’s Witnesses Stand Firm Against Nazi Assault. Akin ya agmo kerewen ed sakey ed saray Tasi nen Jehova a bantayan mo itan a video?