Kasin Nakaukolan Tayo so Mesias?

NAYARIN inumameng mo lan maong iyan tepet, “Kasin nakaukolan tayo so Mesias?” On, makatunongan ya umamengen no kasin wala so peteg ya epekto ed sika na Mesias.

Say arum, a nayarin rerespetoen mo so opinyon da, so mangipaseguro ed sika a say ebat et malinew tan mapekder: Talagan nakaukolan mo so Mesias, no panon a sikatoy nakaukolan met na amin. Oniay insulat na sakey ya eksperto ed Judion ganggan nen inmunan siglo nipaakar ed Mesias: “Anggan dakel so saray sipan na Dios, dia ed sikato [Mesias] so kawalaan na On.” Impabitar to sirin so makanan betang na Mesias ed gagala na Manamalsa tayo a bendisyonan so amin a nasyon na dalin. (2 Corinto 1:20) Importantin tuloy so gawaen na Mesias, kanian akasentro so propesiya na Biblia dia ed isabi to tan bilay to diad dalin. Oniay inkuan nen Henry H. Halley diad sakey a reperensya ya inusar na minilyon a totoo diad apalabas a 70 a taon: “Nisulat so Daan a Sipan pian mangisagyat na pantalaran ed, tan mangilukas na dalan parad, Isabi na [Mesias].” Balet kasin nakaukolan so isabi to? Akin a nepeg kan magmaliw ya interesado?

Diad tua, say “Mesias” et mankabaliksan na “Alanaan a Sakey” tan mipara itan ed kabkabat a terminon “Kristo.” Sayan Sakey, a tinukoy na 1970 ya Edisyon na Encyclopædia Britannica bilang “say ultimon mananondon,” so kaukolan ya onsabi lapu ed agmarespeton inkiwas na inmunan toon sanasawa, si Adan tan Eva. Sikaray pinalsa ya ayadyari, a walaan na makapaliket ya ilalon manbilay ya andi-angga diad Paraiso, balet ta abalang da itan. Samay rebelyoson anghel, a nagmaliw a Satanas a Diablo, so angipasagilig a mapegpeget so Manamalsa ra tan magmaong so kipapasen da no sikaray mandesidin bukor no anto so maong tan mauges.​—Genesis 3:1-5.

Si Eva so apalikdo tan anisia ed saman a tila. Si Adan, a mapatnag a mas pinabli to so relasyon to ed asawa to nen say katooran to ed Dios, so akinonong ed saman a panagrebelde ya inlagyat na Diablo. (Genesis 3:6; 1 Timoteo 2:14) Lapu ed inkiwas da, agda lambengat abalang so mismon ilalo ran manbilay ya andi-angga diad paraison ayaman. Impatawir da met ed saray magmaliw ya ilalak da so kasalanan tan say epekto na satan, say ipapatey.​—Roma 5:12.

Say Manamalsa tayo, si Jehova, so angiyuksoy a tampol na paraan pian paandien iray mauges ya epekto na mantutumbokan ya ebento a ginmapo lapud impanrebelde. Sumpalen to so pipupulangan panamegley na magmaliw a legal a totontonen ed Mosaikon Ganggan​—say pangibayar na kasimbangan. (Deuteronomio 19:21; 1 Juan 3:8) Kaukolan a nakapet iyan legal a totontonen ta pian amin a pakaskasin ilalak nen Adan tan Eva so makagamor na bilay ya andi-angga diad paraison dalin,  unong ya ontan so gagala na Manamalsa parad katooan. Lapud satan et nakaukolan tayo so Mesias.

Sanen senentensiaan nen Jehova a Dios so Diablo, oniay inyabawag To diad primeron propesiya ed Biblia: “Mangyan ak na gulaan ed sika tan say bii, tan gulaan ed saray ilalak mo tan ilalak to; sikato sugaten to so ulom, et sika sugaten mo so mukor to.” (Genesis 3:15) Inkuan na sakey ya iskolar na Biblia a “say salaysay nipaakar ed mesianiko iran sipan ya imparungtal na Kasulatan et ginmapo panamegley na [sayan] balikas.” Imbaga met na sananey nin iskolar a say Mesias so usaren na Dios a “mamaandi ed amin ya epekto na kasalanan,” tan kaleganan na satan et bendisyonan to so katooan.​—Hebreos 2:14, 15.

Balet, nayarin naiimatonan mo ya agbalot nabebendisyonan so katooan natan. Imbes, sikaray pirmin nadidismaya tan naandian na ilalo. Kanian imbaga na The World Book Encyclopedia a “dakel a Judio so manatalaran nin siansia ed isabi na Mesias” tan sikatoy “mangipetek ed saray lingo tan manaeg ed saray kabusol na totoo.” Anggaman ontan, ibabaga na Biblia a sinmabi la so Mesias. Wala ta so rason pian panisiaan so ibabaga na Biblia? Ebatan itan na onsublay ya artikulo.