Pankurang ed Basbas na Onsisinag a Liwawa
Pankurang ed Basbas na Onsisinag a Liwawa
“Say basbas na matunong sikato so singa liwawa na kabuasan, ya onsinag ya onsinag angga ed nagnap ya agew.”—ULIRAN 4:18.
1, 2. Anto so naeksperiensya na totoo na Dios bilang resulta na onsisinag ya espiritual a liwawa manlapud si Jehova?
SIOPA so magmaong a makapangideskribe ed epekto na ompepelnak ya agew diad kabilungetan na labi noagta say mismon Lapuan na liwawa, si Jehova a Dios? (Salmo 36:9) Oniay inkuan na Dios: ‘No say liwawa ed kabuasan et bembenan to iray sampot na dalin, say dalin so nauman a singa say pitek ed leksab na tatak, tan amin a bengabengatla ompatnag ira a singa kawes.’ (Job 38:12-14) Lapud onliliwawan sinag na agew, lalon ombibitar so itsura na planetan dalin, a singa say anlemek a pitek a nauman sano nabaltawan itan na simbolo na panagtatak.
2 Si Jehova so Lapuan met na espiritual a liwawa. (Salmo 43:3) Anggaman say mundo so walad pirmin kabilungetan, say tuan Dios so mantultuloy a mangisindag na liwawa ed totoo to. Anto so resulta? Oniay ebat na Biblia: “Say basbas na matunong sikato so singa liwawa na kabuasan, ya onsinag ya onsinag angga ed nagnap ya agew.” (Uliran 4:18) Say onsisinag a liwawan manlalapud si Jehova so tuloytuloy a manliliwawa ed basbas na totoo to. Satan so mamipino ed sikara nipaakar ed organisasyon, doktrina, tan moralidad.
Saray Pananguman ed Loob na Organisasyon Lapud Pakakaliwawaan
3. Anto so nisipan diad Isaias 60:17?
3 Diad panamegley nen propeta Isaias, oniay impasakbay nen Jehova: “Lapu ed gansa mangiyakar ak naani na balitok, et lapu ed balatyang mangiyakar ak naani na pilak, et lapu ed kiew mangiyakar ak na gansa, tan lapu ed saray bato mangiyakar ak na balatyang.” (Isaias 60:17) No panon a say abeban klase na materyal a nasalatan na mas maabig a materyal et mankabaliksan na iyaaligwas, saray Tasi nen Jehova so akaeksperiensya la na iyaaligwas ed saray uksoyan da diad organisasyon legan na “kasampotan na sistema na bengabengatla,” odino “saray kaunoran ya agew.”—Mateo 24:3; 2 Timoteo 3:1.
4. Anton uksoyan so inggapo nen 1919, tan panon itan ya akagunggona?
4 Diad akadkaunan parte na saray kaunoran ya agew, saray kongregasyon na saray Estudyante na Biblia, a tawag nensaman ed saray Tasi nen Jehova, so manpipili na saray magmaliw a mamatatken tan diakono diad demokratikon paraan. Balet, arum a mamatatken so andian na peteg ya espiritu na panag-ebanghelyo. Aglambengat masuyat so arum diad pibibiang ed panagpulong a kimey noagta didismayaen da ni ingen so arum a mibiang ed satan. Kanian nen 1919 et walay balon responsablin posisyon ya inggapo ed kada kongregasyon—salanti, say manangiwanwan diad serbisyo (service director). Say manangiwanwan diad serbisyo so agla tuturoen na kongregasyon noagta tuturoen diad teokratikon paraan panamegley na sangan opisina na totoo na Dios. Saray responsabilidad na aturon manangiwanwan et say pangorganisa ed panagpulong a kimey, pangiyasain ed saray teritorya, tan pamaseseg ed pibibiang diad lawak na ministeryo. Diad tinmumbok iran taon et dakdakel so anuporta ed kimey a panangipulong ed Panarian.
5. Anton pananguman so agawa diad dekada na 1920?
5 Amin ed kongregasyon so lalon apabiskeg diad panamaseseg ya “Iyabawag, iyabawag, iyabawag, so Ari tan say panarian to,” a niiter ed kombension na saray Estudyante na Biblia nen 1922 diad Cedar Point, Ohio, E.U.A. Kasabi 1927, naorganisa so panagpulong, a say Simba so impasen a sankamatukoyan ya agew a pibiang ed panagpulong ed kabkaabungan. Akin a satan ya agew? Lapud diad agew na Simba et anggapoy trabaho na maslak a totoo. Ontan met ya espiritu so ipapatnag na saray Tasi nen Jehova natan diad panggugunaet dan ondalaw ed totoo diad saray oras a segseguradon nasabi ira ed kaabungan, a singa diad saray sampot-simba tan ed saray labi.
6. Nen 1931, anton resolusyon so inawat, tan panon itan ya angapekta ed kimey a panangiyabawag ed Panarian?
6 Niwala so baleg a panamaseseg ed kimey a panangiyabawag ed Panarian diad ngarem na Simba, Hulyo 26, 1931, sanen inawat so sakey a resolusyon diad kombension ed Columbus, Ohio, E.U.A., tan kayari na satan et diad interon mundo. Oniay kuan na kabiangan na satan a resolusyon: “Sikatayo so lingkor nen Jehova a Dios a niganggan a manggawa ed kimey unong ed ngaran to, tan, bilang katutulok ed ganggan to et ipasabi tayo so testimonya nen Jesu-Kristo, tan ipaamta ed totoo a si Jehova so tua tan Makapanyarin-amin a Dios; kanian maliket tayon akbibiten tan awaten so ngaran ya imbaga na Katawan a Dios, tan pilalek tayon nakabatan tan natawag ed ngaran a, saray tasi nen Jehova.” (Isaias 43:10) Agaylan mabitabitar so panedeskribe na satan a balon ngaran ed manunan kimey na amin na saramay mangaakbibit ed satan! On, walay pagagawa nen Jehova ed amin a lingkor to. Talagan maligligsa so ebat na amin!
7. Anton pananguman so inggapo nen 1932, tan akin?
7 Dakel a mamatatken so mapaabeban akibiang ed panagpulong a kimey. Balet diad arum a pasen, saray mamatatken ya imbotos na kongregasyon so kinmontra a maong ed gagala ya amin a membro na kongregasyon so nepeg a mibiang ed mapublikon ministeryo. Balet, wala ni so kaaruman a panamaaligwas. Nen 1932, naawat na saray kongregasyon so bilin diad panamegley na Say Panag-Bantayan nipaakar ed pangitunda la ed panagpili na kongregasyon ed saray mamatatken tan diakono. Imbes, sikara so kinaukolan a mamili na komite parad serbisyo a tugyopen na maespiritual a lalaki a mibibiang ed panagpulong ed publiko. Say panangasikaso so nimatalek sirin ed saramay aktibon mibibiang ed ministeryo, tan say kimey so nantultuloy ya inmaligwas.
Apawala so Kaaruman a Panamaaligwas Lapud Lalon Inliwawa
8. Anton pananguman so agawa nen 1938?
8 Say liwawa so “onsinag lan onsinag.” Nen 1938, sigpot lan intunda so gagawaen a panagpili ed saray lingkor ed kongregasyon. Amin a lingkor ed kongregasyon so kinaukolan lan turoen diad teokratikon paraan diad silong na panangasikaso na “matoor tan makabat ya aripen.” (Mateo 24:45-47) Satan a pananguman so mabulos ya inawat na amin lawarin kongregasyon na saray Tasi nen Jehova, tan nantultuloy a nambunga so panagpulong a kimey.
9. Nen 1972, anton uksoyan so inggapo, tan akin a sakey itan ya inyaligwas?
9 Kagapo na Oktubre 1, 1972, ginmapo so sananey nin pananguman diad panangasikaso ed kongregasyon. Say uksoyan nipaakar ed panangasikaso na ulop na mamatatken so inggapo diad saray kongregasyon na saray Tasi nen Jehova ed sankamundoan, a sinmalat la ed panangasikaso na saksakey a congregation servant, odino manangasikaso na kongregasyon. Sayan balon uksoyan so pirmin amaseseg ed saray lalakin matakken ed espiritual ya onkualipikan mangidaulo ed kongregasyon. (1 Timoteo 3:1-7) Bilang resulta, dakel ya agagin lalaki so awalaan na eksperiensya ed panangasikaso ed saray responsabilidad ed kongregasyon. Talagan mausausar ira ed panagpastol ed dakel iran balo ni ya angawat ed katuaan na Biblia!
10. Anton uksoyan so inggapo nen 1976?
10 Saray membro na Mananguley ya Ulop so naorganisa ed anemiran komite, tan manlapu nen Enero 1, 1976 et amin a kimey na organisasyon tan saray kongregasyon diad interon dalin so aasikasoen la na sarayan komite. Agaylan makagunggona itan lapud ta amin ya aspekto na kimey ed Panarian so iwawanwan la na ‘dakel a mananimbawa’!—Uliran 15:22; 24:6.
11. Anton pananguman so nigapo nen 1992, tan akin?
11 Nen 1992 et wala ni so agawan pananguman, a mipadpara ed samay agawa sanen akapawil iray Israelita tan arum nira manlapud inkadakep da ed Babilonia. Diad saman a panaon et agmagenap so bilang na saray Levita a mangasikaso ed serbisyo diad templo. Kanian saray aliwan Israelita a Netineo so naikdan ni na kaaruman a kimey ya ontulong ed saray Levita. Mitunosan ed satan, pian natulongan so matoor tan makabat ya aripen a klase ed pangaasikaso ra ed ondaraak a responsabilidad da ed dalin, nen 1992 et akaawat so pigara ed saray kabiangan na “arum a karnero” na kaaruman iran responsabilidad ed serbisyo. Sikara so aturo bilang katulongan na saray komite na Mananguley ya Ulop.—Juan 10:16.
12. Panon a tinuro nen Jehova so kareenan bilang saray manangasikaso tayo?
12 Anto so resulta na sayan amin? “Turoen ko so kareenan bilang saray manangasikasom tan say inkatunong bilang saray manangipabtang na kimey ed sika,” so inkuan nen Jehova. (Isaias 60:17, NW) Wala so “kareenan” ed limog na saray lingkor nen Jehova natan, tan say aro ed “inkatunong” so nagmaliw a ‘manangipabtang ed sikara na kimey’—say mamapakiwas ed sikaran manlingkor ed Dios. Sikara so organisadon tuloy a manumpal ed kimey a panangipulong ed Panarian tan panaggawa na babangatan.—Mateo 24:14; 28:19, 20.
Liliwawaan nen Jehova so Basbas Nipaakar ed Saray Doktrina
13. Nen dekada na 1920, panon a niliwawaan nen Jehova so basbas na totoo to nipaakar ed saray doktrina?
13 Si Jehova so progresibo met a manliliwawa ed basbas na totoo to nipaakar ed saray doktrina. Ipapabitar na Apocalipsis 12:1-9 so sakey ya alimbawa. Diad sayan salaysay et walay taloran nisimbolo: say “bii” a malukon tan nananak, say “dragon,” tan say “anak a laki.” Kasin amta yo no siopa so irerepresenta na kada sakey ed saratan? Saratan so nipabidbir ed sakey ya artikulo ya apauloay “Birth of the Nation,” a pinmaway ed Marso 1, 1925, a paway na The Watch Tower. Satan ya artikulo so angiter ed totoo na Dios na magmaong a pakatalos ed saray propesiya nipaakar ed kianak na Panarian, sakey ya aralem a pakatalos a lalon amalinew ed duaran nambiigan ya organisasyon, salanti, say organisasyon nen Jehova tan organisasyon nen Satanas. Insan nen taon 1927 odino 1928, atebek na saray totoo na Dios ya aliwan Makasulatan so panselebra na Krismas tan inkianak kanian intunda da la iratan.
14. Antoran katuaan nipaakar ed doktrina so apalinew nen dekada na 1930?
14 Nen 1930, wala so kaaruman a liwawa ed katuaan nipaakar ed taloran doktrina. Diad loob na dakel a taon, impasen na saray Estudyante na Biblia a say baleg a karaklan, odino “baleg ya ulop,” ya asaglawi ed Apocalipsis 7:9-17 so midumaan ed 144,000, a miuley ed si Kristo bilang arari tan saserdote. (Apocalipsis 5:9, 10; 14:1-5) Balet, agni tanton malinew ed saman so pakabidbiran ed baleg a karaklan. No panon a say onsisinag a liwawa ed kabuasan et papabitaren to so uhas tan kolor na saray bengatla, nen 1935 et abidbir a say baleg a karaklan et saramay makaliktar ed ‘baleg a kairapan,’ a walaan na ilalon manbilay na andi-anggaan diad dalin. Diad saman met a taon et wala so panamalinew nipaakar ed saray maneeskuelan ananak na saray Tasi nen Jehova diad pigaran bansa. Anggaman pirmi so pangiyaalibansa ed patriotismo diad interon mundo, atebek na saray Tasi a say panagsaludo ed bandira et aliwa lambengat a pormalidad. Diad tinmumbok a taon et nipaliwawa so sakey nin katuaan ed doktrina, salanti, si Kristo so impasak ed sakey a lusek, aliwan diad sakey a krus.—Gawa 10:39.
15. Kapigan tan panon a nidanet so inkasagrado na dala?
15 Kagapo na Guerra Mundial II, a say kaslakan ya uusaren ed saman diad pantambal ed saray asugatan a sundalo et say pangisaksak na dala, linmiwawa so pakatalos nipaakar ed inkasagrado na dala. Nipaseseg ed Hulyo 1, 1945, a paway na The Watchtower ya “amin a mandadayew ed si Jehova a manpipirawat a manbilay na andi-anggaan diad balon mundo na inkatunong so nepeg a manrespeto ed inkasagrado na dala tan itunos day inkasikara ed saray matunong a pananontonan na Dios nipaakar ed sayan importantin bengatla.”
16. Kapigan impaway so New World Translation of the Holy Scriptures, tan anto so duaran alay abig a kabiangan na satan?
16 Nen 1946, kinaukolan so balon patalos na Biblia a niparaan diad panamegley na sankabaloan iran paraan na saray iskolar, ya ag-alaokan na saray doktrina a nibase ed saray tradisyon na Kakristianoan. Ginmapo itan a panagpatalos nen Disyembre 1947. Nen 1950 et impaway so Ingles a New World Translation of the Christian Greek Scriptures. Say Hebreon Kasulatan ed Ingles so niyimprinta ed limaran tomo, a nantutumbokan iratan ya impaway a ginmapo nen 1953. Say unor a tomo so impaway nen 1960, a masulok a 12 taon kayarin ginmapo so proyekto na panagpatalos. Say kompleton New World Translation of the Holy Scriptures so impaway ed sakey lan tomo nen 1961. Naala la itan natan ed dakel a lenguahe tan sayan patalos so walaan na pigaran alay abig iran kabiangan. Pinansiansia na satan so ngaran na Dios, a Jehova. Niarum ni, say literal ya impangipatalos na satan ed orihinal iran sulsulat so angitarya na basiyan parad tuloytuloy ya ibubulaslas na pakatalos ed madibinon katuaan.
17. Anton nagkalalon liwawa so sinmindag nen 1962?
17 Nen 1962 et walay panamalinew nipaakar ed ‘atagtagey a pakauley’ ya asaglawi ed Roma 13:1 tan say laknab na pampasakop na sakey a Kristiano ed saratan. Lapud aralem ya impanaral ed koma-13 a kapitulo na Roma tan saray bersikulo na Kasulatan a singa say Tito 3:1, 2 tan 1 Pedro 2:13, 17, atalosan a say tutukoyen na ‘atagtagey a pakauley’ et saray manuuley a gobierno na totoo, aliwan si Jehova a Dios tan si Jesu-Kristo.
18. Anto so pigaran katuaan ya apalinew nen dekada na 1980?
18 Diad tinmumbok iran taon, nantultuloy ya aliwawaan so basbas na saray matunong. Nen 1985, sinmindag so liwawa ed kabaliksan na kiyabawag a matunong “parad bilay” tan pagmaliw a matunong bilang kaaro na Dios. (Roma 5:18; Santiago 2:23) Say kabaliksan na Makristianon Jubileo so sigpot ya impaliwawa nen 1987.
19. Panon ya intarya nen Jehova so nagkalalon liwawa ed espiritual parad totoo to diad imbeneg iran taon?
19 Nen 1995, lalon linminew so pakatalos ed kibiig na “karnero” manlapud “kanding.” Diad taon 1998 et walay detalyadon impangipaliwawa ed pasingawey ed si Ezequiel nipaakar ed templo, a nagagawa la so kasumpalan na satan. Nen 1999 et walay panamalinew no kapigan tan no panon ya ‘inmalagey so makapadimlan bengatla diad masanton pasen.’ (Mateo 24:15, 16; 25:32) Nen 2002 et agamoran so kaaruman a pakatalos nipaakar ed kabaliksan na pandayew ed Dios dia “ed espiritu tan katuaan.”—Juan 4:24.
20. Diad anto nin aspekto a naeksperiensya na totoo na Dios iray pananguman?
20 Niarum ni ed saray pananguman ed organisasyon tan doktrina, wala iray inaligwasan nipaakar ed Makristianon kondukta. Alimbawa, nen 1973 et atalosan a say panagtabako et “tilol ed laman” tan kaukolan ya ipasen itan bilang seryoson kasalanan. (2 Corinto 7:1) Kayari na sakey dekada, say Hulyo 15, 1983, a paway na The Watchtower so amalinew ed talindeg tayo nipaakar ed panag-usar na saray armas. Saraya so pigara lambengat ya alimbawa ed onsisindag a liwawa ed panaon tayo.
Mantultuloy a Mankurang ed Basbas na Onsisinag a Liwawa
21. Say pakawalaan na anton awawey so ontulong ed sikatayon mankurang ed basbas na onsisinag a liwawa?
21 “Mairap so pangawat tan iyadapta ed sakey a pananguman,” so inaksobi na sakey ya abayag lan matatken. Anto so akatulong ed sikaton mangawat ed dakel iran pananguman a naimatonan to diad loob na 48 a taon to bilang manangiyabawag na Panarian? Oniay inyebat to: “Importante so pakawalaan na dugan awawey. Say agpangawat ed sakey a pananguman et mankabaliksan ya agtayo la makakapibansag ed iyaabante na organisasyon. No bilang ta nidunget ak ed kipapasen a singano mairap ya awaten iray pananguman, momorekdeken ko iray salita nen Pedro ed si Jesus: ‘Katawan, siopa so laen mi? Wala ed sika so saray salita na maando a bilay.’ Insan oniay itepet ko’d dilik, ‘Iner ni so laen ko—diad kabilungetan na mundo?’ Saya so akatulong ed siak pian mansiansia ed organisasyon na Dios.”—Juan 6:68.
22. Panon itayon nagugunggonaan ed pankurang ed liwawa?
22 Say interon mundo so talagan walad pirmin kabilungetan. Legan ya isisindag nen Jehova so liwawa ed totoo to, mantutultuloy a manarawi so pidumaan da ed saramay walad mundo. Anto so nagagawaan na sayan liwawa ed sikatayo? On, no panon a say pakasilew ed sakey a kutlaong diad ambilunget a karsada et agmangekal ed abot, say liwawa na Salitay Dios so agmakapangekal ed saray pakakulasbongan. Ingen, say liwawa na Salitay Dios so seguradon ontutulong ed sikatayon ompaliis ed saratan ta pian makapantultuloy itayon mankurang ed basbas na onsisinag a liwawa. Komon ta mantultuloy tayo sirin a manimanon maong ed mapropetikon salita nen Jehova, “bilang sakey a silewan ya onsisinag ed pasen ya ambilunget.”—2 Pedro 1:19.
Kasin Natandaan Yo?
• Antoran panamaaligwas ed loob na organisasyon so ginawa nen Jehova parad totoo to?
• Antoran pananguman nipaakar ed doktrina so intarok na sinminag a liwawa?
• Antoran pananguman so personal a naimatonan yo, tan anto so akatulong ed sikayon mangawat ed saratan?
• Akin a labay yo so mantultuloy a mankurang ed basbas na onsisinag a liwawa?
[Tepetepet Parad Panagaral]
[Saray litrato ed pahina 27]
Say kombension ed Cedar Point, Ohio, nen 1922 so amabiskeg ed saray Estudyante na Biblia a manggawa ed kimey na Dios
[Litrato ed pahina 29]
Say “New World Translation of the Christian Greek Scriptures” so impaway nen 1950, nen N. H. Knorr
[Picture Credit Line ed pahina 26]
© 2003 BiblePlaces.com