Sakey a Panangipakurang Parad Kasumpalan na Gagala na Dios

‘Say Dios so manggagawa ed saray amin a bengatla unong ed linawa ton dili.’​—EFESO 1:11.

1. Akin a mantitipon so amin a kongregasyon na saray Tasi nen Jehova no Abril 12, 2006?

 NO Mierkoles na labi, Abril 12, 2006, manga 16 milyon a totoo so mandaragup pian manselebra ed Pangdem na Katawan. Diad kada pasen a pantitiponan da, wala so sakey a lamisaan a pangitapewan na andi-lebaduran tinapay, a mangirerepresenta ed laman nen Kristo, tan ambalangan alak, a mangisisimbolo ed nipaagus a dala to. Diad pansampot na paliwawa a mangisasalaysay ed kabaliksan na Memoryal na impatey nen Jesus, nipasa ed amin ya inmatendi iray emblema​—say unona et say tinapay, insan say alak. Diad pigaran kongregasyon na saray Tasi nen Jehova, walay sakey odino onsulok nin mibiang ed saratan ya emblema. Balet, diad dakel a kongregasyon et anggapo ed saray inmatendi so mibiang ed saratan. Akin a daiset lambengat a Kristiano so mibibiang, salanti, saramay maniilalon manbilay ed tawen, bangta agmibibiang so karaklan ed saramay inmatendi a maniilalon manbilay diad dalin?

2, 3. (a) Panon a ginapoan nen Jehova so panamalsa unong ed gagala to? (b) Anto so gagala nen Jehova diad impamalsa to ed dalin tan katooan?

² Si Jehova et Dios na gagala. Pian nasumpal so gagala to, sikatoy ‘manggagawa ed saray amin a bengatla unong ed linawa ton dili.’ (Efeso 1:11) Pinalsa ton unona so bogbogtong ya Anak to. (Juan 1:1, 14; Apocalipsis 3:14) Insan, diad panamegley na Anak to, pinalsa nen Jehova so pamilya na espiritun ananak to tan diad saginonor et say uniberso, pati say dalin tan say too.​—Job 38:4, 7; Salmo 103:19-21; Juan 1:2, 3; Colosas 1:15, 16.

³ Agpinalsa nen Jehova so dalin bilang pasen a panubokan ed totoo ya onkualipikan onarum ed pamilya na espiritun ananak to diad tawen, unong ya ibabangat na dakel a relihyon na Kakristianoan. Malinlinew so gagala to ed dalin sanen pinalsa to itan, salanti, ‘pian panayaman.’ (Isaias 45:18) Pinalsa na Dios so dalin parad too tan say too parad dalin. (Salmo 115:16) Say interon globo so magmaliw a paraiso, a napano na matunong a totoo a mantanem tan mangasikaso ed satan. Agbalot niyopresi ed inmunan sanasawan too so ilalo ya onla ed tawen.​—Genesis 1:26-28; 2:7, 8, 15.

Naangat so Gagala nen Jehova

4. Panon a sinuppiat so paraan na pangaagamil nen Jehova ed inkasoberano To diad kagapo na awaran na too?

⁴ Nanrebelde so sakey ya espiritun anak na Dios tan sikatoy porsigidon maneral ed gagala nen Jehova, ya inabuso to so inter na Dios ed sikato a kawayangan a mandesidi. Dineral to so kareenan a panggagayagaan na amin a maaron  manpapasakop ed inkasoberano nen Jehova. Nilagyat nen Satanas so inmunan sanasawan too a mankurang ya independente ed Dios. (Genesis 3:1-6) Binidbir to so pakapanyari nen Jehova, balet sinuppiat to so paraan na pangaagamil To ed inkasoberano To, salanti, say kanepegan Ton manuley. Kanian, say manunaan ya isyu nipaakar ed inkasoberano nen Jehova so linmesa la diad dalin, diad kagapo na awaran na katooan.

5. Anton komaduan isyu so apalesa, tan siopa iray alanor?

⁵ Maapit a misiglaotan ed satan a manunaan ya isyu na sankatalbaan ya inkasoberano so komaduan isyu a pinalesa nen Satanas diad panaon nen Job. Sinuppiat nen Satanas so motibo na saray pinalsa nen Jehova diad pampapasakop da tan panlilingkor da ed Sikato. Papabitaren nen Satanas a gagawaen da itan lapud sinisiblet a motibo ra tan no niiyan ira ed subok et sumpaen da lanlamang so Dios. (Job 1:7-11; 2:4, 5) Anggaman apalesa itan ya angat nipaakar ed toon lingkor nen Jehova, satan so angilanor met ed saray espiritun ananak na Dios, pati ed bogbogtong ya Anak nen Jehova.

6. Panon a pinaneknekan nen Jehova a sikatoy matoor ed gagala to tan ed ngaran to?

⁶ Lapud sikatoy matoor ed gagala to tan ed kabaliksan na ngaran to, pinagmaliw nen Jehova so inkasikato a Propeta tan Manangilaban. * Oniay imbaga to ed si Satanas: “Mangiyan ak na gulaan ed sika tan say bii, tan gulaan ed saray ilalak mo tan ilalak to; sikato sugaten to so ulom, et sika sugaten mo so mukor to.” (Genesis 3:15) Diad panamegley na Bini na “bii,” odino say mangatatawen a kabiangan na organisasyon to, ebatan nen Jehova so angat nen Satanas tan itarya to ed saray kapolian nen Adan so ilalon kililiktar tan bilay.​—Roma 5:21; Galacia 4:26, 31.

Say ‘Sagradon Sekreto na Linawa To’

7. Anton gagala so imparungtal nen Jehova diad panamegley nen apostol Pablo?

⁷ Sanen sinulat to iray Kristiano ed Efeso, alay abig so impangisalaysay nen apostol Pablo ed pangipapakurang nen Jehova ed saray bengatla pian nasumpal so gagala to. Oniay insulat to: “Impakaba’to ed sikatayo so misteryo na linawa to, unong ed apaabig [“panlabayan,” NW] to a sikato so ninonot to ed sikaton dili, say kipaakaran na pamaakaran [“panangipakurang,” NW] a pakasumpal na saray panaon, say panagtipon ed saray amin a bengatla ed Kristo, na saray bengatlan wala ed tawen, a singa met saray wala ed tapew na dalin.” (Efeso 1:9, 10) Say maglorian gagala nen Jehova et say pamawala na uniberso a walaan na pankakasakey, a panayaman na saray pinalsa a maaron manpapasakop ed inkasoberano to. (Apocalipsis 4:11) Napasantos sirin so ngaran To, napaneknekan a matila si Satanas, tan nasumpal so linawa To, “ed tawen, ontan met ed dalin.”​—Mateo 6:10.

8. Anto so kabaliksan na salitan nipatalos a “panangipakurang”?

⁸ Say “panlabayan,” odino gagala nen Jehova,  so nasumpal diad panamegley na sakey a “panangipakurang.” Inusar nen Pablo so salita a literal a mankabaliksay “panangasikaso ed sankaabungan.” Say tutukoyen na satan et aliwan sakey a gobierno, a singa say Mesianikon Panarian, noagta sakey a paraan na panangasikaso ed saray bengatla. * Say alay abig a pangipakurang nen Jehova ed saray bengatla pian nasumpal so gagala to et angilanor ed sakey a “misteryo” odino sagradon sekreto a kalkalnan nipaamta diad ilalabas na saray siglo.​—Efeso 1:10; 3:9, saray paimano’d-leksab na New World Translation.

9. Panon so kalkalnan pangipaparungtal nen Jehova ed sagradon sekreto na linawa to?

⁹ Diad panamegley na nantutumbokan a sipanan, kalkalnan imparungtal nen Jehova no panon a nasumpal so gagala to nipaakar ed Bini ya insipan ed Eden. Say impisipanan nen Jehova ed si Abraham so angiparungtal ed isabi na insipan a Bini diad dalin panamegley na linya na poli nen Abraham tan magmaliw itan a paraan pian ‘say amin a nasyon ed dalin’ et papalaren day inkasikara. Impatnag met na satan a sipanan a walaray nakaiba na manunan kabiangan na bini. (Genesis 22:17, 18) Say Ganggan a sipanan diad nasyon na Israel so angiparungtal ed gagala nen Jehova a mamawala na “panarian na saray saserdote.” (Exodo 19:5, 6) Say impisipanan ed si David so angiparungtal a say Bini so magmaliw a Pangulo na sakey a Panarian diad andi-anggaan. (2 Samuel 7:12, 13; Salmo 89:3, 4) Sanen impaarap la na Ganggan a sipanan iray Judio a mangawat ed Mesias, imparungtal nen Jehova so kaaruman iran aspekto na kasumpalan na gagala to. (Galacia 3:19, 24) Saratan a totoo a nakaiba na manunan kabiangan na bini so manugyop ed nipasakbay  a “panarian na saray saserdote” tan magmaliw a kabiangan na ‘balon sipanan’ bilang say balon “Israel,” say espiritual ya Israel.​—Jeremias 31:31-34; Hebreos 8:7-9. *

10, 11. (a) Panon ya imparungtal nen Jehova so nipasakbay a Bini? (b) Akin a linma diad dalin so bogbogtong ya Anak na Dios?

¹⁰ Mitunosan ed panangipakurang ed gagala na Dios, sinmabi lay panaon pian ompatnag ed dalin so nipasakbay a Bini. Imbaki nen Jehova so anghel a Gabriel pian ibaga ed si Maria a sikato so mangiyanak na sakey a laki ya ingaran a Jesus. Oniay inkuan na anghel ed sikato: “Sikato naani baleg, et ningaran ya Anak na Sankatageyan; et iter na Dios a Katawan ed sikato so trono nen David ya ama to; et manari lawas ed abung nen Jacob; et say panarian to andi angga to.” (Lucas 1:32, 33) Diad ontan, nagmaliw a malinew so pakabidbiran ed insipan a Bini.​—Galacia 3:16; 4:4.

¹¹ Say bogbogtong ya Anak nen Jehova so linma diad dalin pian nasubok anggad patey. Say naspot ya ebat ed angat nen Satanas so akadepende ed si Jesus. Manmatoor kasi si Jesus ed Ama to? Lalanoren na saya so sakey a sagradon sekreto. Oniay insalaysay ed saginonor nen apostol Pablo nipaakar ed betang nen Jesus: “Baleg so misteryo na kasantosan; say nipatnag ed laman apatunong ed espiritu, anengneng na saray anghel, nipulpulong ed saray nasyon, asisia dia ed mundo, naawat diman ed tagey ed gloria.” (1 Timoteo 3:16) On, diad panamegley na agnagiing a katooran to anggad impatey to, intarya nen Jesus so naspot ya ebat ed angat nen Satanas. Balet say arum iran detalye na sagradon sekreto so iparungtal ni labat.

“Say Misteryo na Panarian na Dios”

12, 13. (a) Anto so sakey ya aspekto na “misteryo na panariay Dios”? (b) Anto so nalalanor ed impamili nen Jehova ed limitadon bilang na saray totoo ya onla ed tawen?

¹² Diad sakey ed saray impanbaroy nen Jesus diad Galilea pian manpulong, impabitar to a say sagradon sekreto so maapit a misiglaotan ed panuley na Mesianikon Panarian. Oniay imbaga to ed saray babangatan to: “[Dia] ed sikayo niiter ya amtaen yo so saray misteryo na panarian na tawen [panariay Dios,” Marcos 4:11].” (Mateo 13:11) Sakey ya aspekto na satan a sekreto et mangilalanor ed impamili nen Jehova ed “melag a pulok” na 144,000 a totoo a miulop ed Anak to bilang kabiangan na bini, pian miuley ed sikato diad tawen.​—Lucas 12:32; Apocalipsis 14:1, 4.

¹³ Lapud apalsa so totoo a manbilay diad dalin, kinaukolan so ‘balon panamalsa’ nen Jehova ta pian say pigaran totoo et makakar ed tawen. (2 Corinto 5:17) Oniay insulat nen apostol Pedro bilang sakey ed saramay apilin walaan na onian nikabiig ya ilalo ed tawen: “Nagalang so Dios tan Ama na Katawan tayo a Jesu-Kristo, ya unong na baleg a panangasi to pinabilay to itayo lamet ed mabilay ya ilalo, lapu ed inkioli ed bilay nen Jesu-Kristo, nanlapu ed saray inaatey, a mankayarian na tawir ya agnaderal, tan agnarumsisan tan agnaumas a dia ed katawenan nigana ed sikayo.”​—1 Pedro 1:3, 4.

14. (a) Panon a nalalanor iray aliwan Judio ed “misteryo na panariay Dios”? (b) Akin a natatalosan tayo irayan ‘aralem a bengatla na Dios’?

¹⁴ Say sakey nin kabiangan na sagradon sekreto nipaakar ed arapen a panuley na Panarian et say linawa na Dios ya ilaktip iray aliwan Judio ed daiset a bilang na saray totoon natawag a miuley ed si Kristo diad tawen. Insalaysay nen Pablo iyan aspekto na “panangipakurang” nen Jehova, odino paraan na pangaasikaso to ed kasumpalan na gagala to: “Dia ed saraman a nagsisananey a kapolian agnipakabat ed saray anak na saray totoo, a singa say inkipuyan to natan ed saray sasanton apostol to tan saray propeta ed inka-espiritu. Labay ton salitaen, a saray Gentiles sikara so makapitawir, tan kabiangan na saksakey a laman, tan kaapag ira ed sipan ed Kristo Jesus ed panamegley na ebanghelyo.” (Efeso 3:5, 6) Say pakatalos ed sayan kabiangan na sagradon sekreto so niparungtal ed saray ‘masanton apostol.’ Mipadpara natan, no aliwan diad tulong na masanton espiritu, agtayo natalosan irayan ‘aralem a bengatla na Dios.’​—1 Corinto 2:10; 4:1; Colosas 1:26, 27.

15, 16. Akin a diad limog na katooan so amilian nen Jehova ed saray nakaiba nen Kristo a manuley?

 ¹⁵ Say “sanlasus tan apataplo tan apat a libo” ya anengneng a manal-alagey a kaiba ra so “Kordero” diad mangatatawen a Palandey Sion so nibagan “asaliw dia ed saray taga-dalin,” “asaliw ira dia ed saray totoo, a pinagka-unonan bungabunga ed Dios tan Kordero,” si Kristo Jesus. (Apocalipsis 14:1-4) Pinili nen Jehova so manunaan ed saray mangatatawen ya ananak to pian magmaliw a manunan kabiangan na bini ya insipan ed Eden, balet akin a diad limog na katooan so amilian To ed saray nakaiba nen Kristo? Insalaysay nen apostol Pablo a sayan limitadon bilang et ‘unong ed getma nen Jehova,’ ‘unong ed panlabayan to.’​—Roma 8:17, 28-30; Efeso 1:5, 11; 2 Timoteo 1:9.

¹⁶ Say gagala nen Jehova et pian pasantosen so matalonggaring tan masanton ngaran to tan iyalangon so sankatalbaan ya inkasoberano to. Lapud makabat a tuloy a “panangipakurang” to, odino paraan na pangaasikaso to ed saray bengatla, imbaki nen Jehova so panguloan ya Anak to diad dalin, a sikatoy asubok anggad ipapatey. Niarum ni, denesidi nen Jehova a say uley na Mesianikon Panarian na Anak to so mangilaktip ed saray totoo ya angitandoro ed inkasoberano To anggad ipapatey da.​—Efeso 1:8-12; Apocalipsis 2:10, 11.

17. Akin a makapanliket itayo a si Kristo tan saray kaiba ton manuley et datin nambilay bilang totoo?

¹⁷ Imparungtal nen Jehova so matalonggaring a panangaro to ed saray kapolian nen Adan diad impangibaki to ed Anak to diad dalin tan diad impamili to na totoon magmaliw a kaiban manuley na Anak to diad uley na Panarian. Panon itan a mangunggona ed arum a matoor ed si Jehova, manlapud si Abel a manpatuloy ni? Lapud nianak iran aripen na kasalanan tan ipapatey, nakaukolan a napaabig iray ag-ayadyarin totoo diad espiritual tan pisikal a paraan tan magmaliw iran ayadyari, unong ed orihinal a gagala nen Jehova parad katooan. (Roma 5:12) Agaylan makaligliwa parad amin a maniilalo ed andi-anggaan a bilay diad dalin lapud naamtaan da a say Ari ra so mangipatnag ed sikara na panangaro tan mapangasin pakatalos a singa impatnag to la ed saray babangatan to legan na mangaraldalin a ministeryo to! (Mateo 11:28, 29; Hebreos 2:17, 18; 4:15; 7:25, 26) Tan agaylan panamaseguro ed sikara a saray akaiba nen Kristo ya arari tan saserdote ed tawen et saramay lalaki tan bibii a walaan na pananisia ya akipuligesgesan a mismo ed saray kaleteyan da tan akasagmak na saray angat ed bilay, a singa sikatayo!​—Roma 7:21-25.

Say Ag-onsaew a Gagala nen Jehova

18, 19. Akin a mas malinew la’d sikatayo iray salita nen Pablo ed Efeso 1:8-11, tan anto so konsideraen tayo ed onggendan ya artikulo?

¹⁸ Mas natalosan tayo natan so kabaliksan na saray salita nen Pablo ed saray alanaan a Kristiano, a naromog ed Efeso 1:8-11. Inkuan to ya impaamta la nen Jehova ed sikara so “misteryo na linawa to,” a sikara so “aturo bilang mananawir” a kaiba nen Kristo, tan sikara so ‘atandaan nen inmuna unong ed kanonotan na saman so manggagawa ed amin a bengatla unong ed kuan na linawa ton dili.’ Natebek tayo a saya so mitunosan ed alay abig a “panangipakurang” nen Jehova ed saray bengatla parad kasumpalan na gagala to. Satan so makatulong met ed sikatayon natalosan no akin a diad saray onaatendi ed Pangdem na Katawan et daiset labat so mibibiang ed saray emblema.

¹⁹ Diad onggendan ya artikulo, naaralan tayo so kabaliksan na Memoryal na impatey nen Kristo parad saramay Kristianon walaan na ilalo ed tawen. Naaralan tayo met no akin a say minilyon a walaan na ilalon manbilay ed dalin et interesadon tuloy ed walan isisimbolo na Memoryal.

[Saray paimano ed leksab]

Bilang Panrepaso

• Akin a pinalsa nen Jehova so dalin tan impasen to ditan so too?

• Akin a nakaukolan a nasubok diad dalin so bogbogtong ya Anak nen Jehova?

• Akin a diad limog na katooan so amilian nen Jehova ed saray nakaiba nen Kristo a manuley?

[Tepetepet Parad Panagaral]