“Istoryaan Mo Kami Ni!”

DIAD syudad na Nezlobnaya, Russia, sakey a klase ed haiskul so manaaral ed saray insulat na Ruson autor a si Mikhail Bulgakov, diad asignatura dan literatura. Sakey ed saray insulat to et say nobela a mabanday ya aneskribe ed si Jesu-Kristo, bangta angilitrato ed si Satanas bilang palbayani. Kayari diskusyon ed klase, sikara so pinan-eksamin na maestra base’d saman a nobela. Balet, marespeton kinerew na sakey ed saray estudyante, say 16 años a Tasi nen Jehova a manngaran na Andrey, ya agla man-eksamin lapud ag-iyabuloy na konsiensia to so panaral ed ontan a literatura. Imbes, inyopresi to a sikatoy mansulat la na sakey a salaysay (essay) nipaakar ed panmoria to ed si Jesu-Kristo. Inmabobon so maestra to.

Diad insulat ton salaysay, impaliwawa nen Andrey ya anggaman rerespetoen toy opinyon na arum, amoria ton say sankaabigan a paraan pian naaralan so nipaakar ed si Jesus et diad pambasa na sakey ed apatiran Ebanghelyo. Diad ontan et “naaralan yo so nipaakar ed bilay tan saray bangat nen Jesus base’d saray salaysay na saramay mismon akaimaton.” Oniay inyarum ni nen Andrey: “Say sakey nin bengatla et say paraan na impaneskribe ed si Satanas. Nayarin panliketan na arum a basaen so sakey a libro a si Satanas so palbayani, balet agko itan panliketan.” Impaliwawa to a si Satanas et talagan sakey a makapanyari tan mauges ya espiritun pinalsa a sinmian ed Dios, ya angitarok na kaugsan, gonigon, tan kairapan ed katooan. Sinampotan nen Andrey so salaysay to: “Agko panisiaan a walay nagunggonak ed pambasa ed sayan nobela. Siempre, agko babalawen si Bulgakov. Balet parad siak, mas labay kon basaen so Biblia pian naaralan so maawaran a katuaan nipaakar ed si Jesu-Kristo.”

Lapud aliketan a tuloy so maestra ed salaysay, sikato so impanparaan to a manreport ed arap na klase nipaakar ed si Jesu-Kristo. Inmabobon a tampol si Andrey. Diad tinmumbok a klase ra ed literatura, binasa nen Andrey so report to ed arap na interon klase. Insalaysay to no akin ya impasen ton si Jesus so sankatalonggaringan a too a nambilay ed kapiganman. Insan binasa to so sakey a kapitulo ed libro na Biblia a Mateo nipaakar ed impatey nen Jesus. Lapud magano lan naupot so inggetar ya oras to, labay lan sampotan nen Andrey so report to, balet ta oniay inkerew ed sikato na saray kaklase to: “Istoryaan mo kami ni! Antoy tinmumbok ya agawa ey?” Kanian intuloy to nin binasa so salaysay nen Mateo nipaakar ed inkioli nen Jesus.

Sanen asumpal a nanreport si Andrey, dakel so intepet na saray kaklase to nipaakar ed si Jesus tan si Jehova. “Nampikasi ak ed si Jehova parad kakabatan, tan inebatan to so pikakasik,” so inkuan nen Andrey. “Naebatan kon amin so tepet da!” Kayari na klase, inikdan nen Andrey so maestra to na libron The Greatest Man Who Ever Lived, * a maliket ton inawat. Oniay inkomento nen Andrey: “Inikdan to ak na atagey a grado lapud report ko tan kinomendaan to ak lapud personal iran kombiksion ko tan agko imbaing iratan. Inkuan to a sikatoy mipakna ed arum a sisisiaen ko.”

Malikeliket si Andrey lapud denesidi ton tumboken so nibase’d Biblia a konsiensia to diad agto impanbasa ed saray literaturan agmamapagalang ed si Jehova tan ed Anak to, si Jesu-Kristo. Say ontan ya awawey so aglambengat analimbeng ed sikato manlapud agmakasulatan iran panmoria noagta angilukas met na alay abig a pankanawnawa pian ninabang to ed arum iray katuaan na Biblia.

[Paimano ed leksab]