Maabig a Panagligliwaan a Pakarepreskoan

“Anggan mangan kayo sirin, odino oninum, odino antokaman a gawaen yo, gawa yo ya amin ed gloria na Dios.”​—1 CORINTO 10:31.

1, 2. Akin a saray makapaliket ya aktibidad et ipasen a ‘palangkap na Dios,’ ingen anto so diretsaan ya ipapasakbay na Biblia?

 NATURAL labat so panlabay tayon mibiang ed saray aktibidad a panliketan tayo. Labay na maliket a Dios tayo, si Jehova, a panggayagaan tayo so bilay, kanian itatarya to so daakan a probisyon pian magmaliw itan a posible. (1 Timoteo 1:11; 6:17) Oniay insulat nen makabat ya Arin Solomon: “Amtak ya anggapo so bengatla a magmaong . . . nen say panliket . . . et ontan met a balang too mangan tan oninum, tan manliket a maong ed amin a kimey to, sikato so pamalangkap na Dios.”​—Eclesiastes 3:12, 13.

² Say ontan a panliket sano manpainawan magano manlapud agawaan a maong a kimey so talagan makaparepresko, nagkalalo la diad maabig a pilimog ed pamilya odino kakaaro. Satan so suston ipasen bilang ‘palangkap na Dios.’ Siempre, sayan daakan a probisyon na Manamalsa et aliwan baraan pian sikatayo lay mibiang ed alablabas a panliliket. Kokondenaen na Biblia so panagbuanges, inkasiba, tan imoralidad, a papasakbayan iramay manggagawa ed satan ya “agda natawir so panariay Dios.”​—1 Corinto 6:9, 10; Uliran 23:20, 21; 1 Pedro 4:1-4.

3. Anto so makatulong pian mansiansia itayon aliing ed espiritual tan magmaliw a lawas sinononot ed asingger lan baleg ya agew nen Jehova?

³ Diad sarayan maatap a kaunoran ya agew, lalon nipapaarap iray Kristiano ed angat a pambilay a makabat diad sayan mauges a mundo, ya agda gagawaen iray agamil na satan. (Juan 17:15, 16) Unong a nipasakbay la, say kailalakan natan so nagmaliw lan ‘maaro ed likeliket nen say maaro ed Dios,’ ya ‘agni ira ingen maniimano’ ed ebidensya ya asingsingger lay ‘baleg a kairapan.’ (2 Timoteo 3:4, 5; Mateo 24:21, 37-39) Oniay impasakbay nen Jesus ed saray patumbok to: “Manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed sayan bilay, et onsabi ed sikayo ed kasanlilikna so saman ya agew a singa sakey a patit.” (Lucas 21:34, 35) Bilang lingkor na Dios, sikatayo so determinadon manimano ed pasakbay nen Jesus. Aliwan singa saramay manbibilay ed agmaridios a mundo, sikatayo so manggugunaet a mansiansian aliing ed espiritual tan sinononot ed baleg ya agew nen Jehova.​—Sofonias 3:8; Lucas 21:36.

4. (a) Akin a mairap so pampili na maong a panagligliwaan? (b) Anton simbawa ed Efeso 5:15, 16 so labay tayon iyaplika?

⁴ Aliwan mainomay so ipaliis ed mauges iran agamil na mundo lapud say Diablo et pagmamaliwen to iratan a makapasagyat tan naromog ed anggan iner a pasen. Kanian lalon mairap so pampili na panliketan odino panagligliwaan. Karaklan ed saray iyoopresi na mundo so adesinyon managyat ed “kalamanan na lawan.” (1 Pedro 2:11) Say mapeligron panagligliwaan so wala la’d saray mapublikon pasen, balet nayarin makaloob itan ed mismon ayaman panamegley na saray babasaen, TV, say Internet, tan saray video. Kanian, makabat so isisimbawa na Salitay Dios: “Nengneng yo sirin a tinekepan na panlikas no panon so panakar yo, aliwan singa andi kalakal, noag ingen singa makalakal; ya anamoten yo so panaon, ta saray agew sikara so mauges.” (Efeso 5:15, 16) No tumboken tayon maong iyan simbawa, naseguro tayo ya ag-itayo nasagyat na makapuy a panagligliwaan, a mangupot ed panaon tan biskeg tayo, tan maneral ni ingen ed relasyon tayo ed si Jehova, a mansumpal ed kaderal tayo!​—Santiago 1:14, 15.

5. Anto so pakagamoran tayo na sankaabigan a pakarepreskoan?

⁵ Lapud okupado so kabibilay na saray Kristiano, natural labat so sagpaminsan a pankaliktan dan manggayaga ed pigaran panagligliwaan. Diad tua, ibabaga na Eclesiastes 3:4 a walay “panaon a panelek” tan “panaon a pansayaw.” Kanian ag-ipapasen na Biblia so panagligliwaan bilang panagdarak na panaon. Balet say panagligliwaan so nepeg a makarepresko ed sikatayo, ya agmameligro ed espiritualidad tayo odino onsalet ed maespiritual iran kimey tayo. Naeksperiensya la na saray Kristianon matatken ed espiritual a walay babaleg a liket ed panangiter. Iyuuna ra ed bilay da so panggawa na linawa nen Jehova kanian naeeksperiensya ra so tuan ‘pakarepreskoan na saray kamarerwa ra’ diad impanakbat da ed anlemew a pako nen Jesus.​—Mateo 11:29, 30; Gawa 20:35.

Pampili ed Matukoy a Panagligliwaan

6, 7. Anto so makatulong ed sikayon mangibiig ed no anto so matukoy odino agmatukoy a panagligliwaan?

⁶ Panon tayon naseguro a say sakey a klase na panagligliwaan et matukoy parad sakey a Kristiano? Wala so panangigiya na atateng ed ananak da, tan ontutulong iray mamatatken no nakaukolan. Diad tua, agla kaukolan ya ibaga ed sikatayo na arum a totoo a say sakey a libro, pelikula, pagalaw, sayaw, odino kansion et agmatukoy. Imbaga nen Pablo a saray matatken ed espiritual odino “ayadyarin totoo . . . [et] saray pakalikna ra apasal ed panangibiig na maong tan mauges.” (Hebreos 5:14; 1 Corinto 14:20) Indatak na Biblia iray manangigiyan prinsipyo. Say konsiensia yo, a nipasal ed Salitay Dios, so ontulong ed sikayo no talinengen yo itan.​—1 Timoteo 1:19.

⁷ Imbaga nen Jesus a “say kiew nibiig lapu ed bunga to.” (Mateo 12:33) No say sakey a panagligliwaan et walaay mauges a bunga odino epekto na pakakasagyat la’d karawalan, imoralidad, odino espiritismo, nepeg ya ipulisay itan. Agmet matukoy no satan so mangipeligro ed bilay odino bunigas na sakey, pansengegan na irap na bilay odino pakadismayaan, odino pakagapolan na arum. Sikatayo so pinasakbayan nen apostol Pablo a no naapektoan tayo so konsiensia na arum, mankakasalanan  itayo. Oniay insulat nen Pablo: “[No] mankasalanan kayo na onia ya onsumpa ed saray agagi, tan sinugatan yo so linawa na puso [“konsiensia,” NW] ra bangnen makapuy, mankasalanan kayo na onsumpa ed Kristo. Kanian no say kanen so makalanor a katiroran na agik, agak mansira na asalian a balot anggan kapiganman, ta pian aliwan siak so sengeg na katiroran na agik.”​—1 Corinto 8:12, 13.

8. Antoray niwalan kapeligroan diad pangusar na elektroniko iran pagalaw tan video?

⁸ Saray saliwan natan et napno na saray elektronikon pagalaw tan video. Nayarin arum ed saratan et agmet mapeligron panliketan, balet saratan a klase na panagligliwaan so lalon mangipapabitar ed kokondenaen na Biblia. Seguradon mapeligro la so sakey a pagalaw sano saray manay-ayam ed satan et kinaukolan a manbaldado odino mamatey odino onkiwas ed imoral a tuloy a paraan! Kabusol nen Jehova iramay ‘labalabay da so karamsakan.’ (Salmo 11:5; Uliran 3:31; Colosas 3:5, 6) Tan no say pagalaw et mangipapaseseg ed sikayo na inkaagum odino panaglames, mamapakapuy ed liknaan yo, odino manguupot ed importante iran panaon yo, amtaen yo sirin a walay mauges ya epekto na satan ed espiritualidad yo tan manggawa lan tampol na pananguman.​—Mateo 18:8, 9.

Pamenek ed Pankaukolan Tayo Parad Panagligliwaan Diad Makagunggona Iran Paraan

9, 10. Anto so nagawaan na saramay walaay pakatebek pian napenek da so pankaukolan da ed panligliwaan?

⁹ No maminsan et nayarin oniay itepet na saray Kristiano: “Anto so matukoy a panagligliwaan? Dakerakel so iyoopresi na mundo a sumlang ed saray estandarte na Biblia.” Napaseguroan kayo a walay naromog a makapnek a panagligliwaan, balet nakaukolan so pansagpot. Nakaukolan so maalwar a panagplano, nagkalalo la ed biang na atateng. Diad makagunggonan paraan, dakel so makapanrerelaks a kaiba so pamilya odino say kongregasyon. Say relaks a panangan legan a pantotongtongan iray agawa ed sanagew odino sakey a tema na Biblia so alay abig tan makapabiskeg. Nayarin iyuksoy iray piknik, matukoy iran pagalaw, pampasyar, odino pan-hiking. Makapaliket tan makapnek so ontan a makagunggonan panagligliwaan.

¹⁰ Oniay inkuan na sakey a matatken tan say akulaw to ya amabaleg na taloran ananak: “Manlapud inkaugaw da, saray ananak mi so kaiba min manpipili na lugar a pambakasyonan mi. No maminsan, aabuloyan mi so kada sakey ed sikara a mangimbita na maong a kaaro to, pian lalon makapaliket so bakasyon. Nakaukolan ya ikonsidera iray importantin nagawa ed bilay na ananak mi. Panapanaon et imbitaan mi ed abung mi so sakey a pamilya tan saray kakaaro ed kongregasyon. Manluto kami ed paway tan manggalaw kami. No maminsan et manpaspasyar kami diad saray palandey, ya aanamoten mi iratan a pankanawnawa ya aralen so nipaakar ed saray pinalsa nen Jehova.”

11, 12. (a) Anto so nagawaan yo pian nipila yo so arum diad saray plano yon manligliwa a sagpaminsan? (b) Antoran klase na pandaragup so agnalingwanan na dakel?

¹¹ Sarag yo kasin palaknaben so pilimog yo bilang indibidual odino bilang pamilya, ya ipila so arum ed saray plano yon manligliwa a sagpaminsan?  Arum, a singa say balo, walad kasuloan, odino sakey a pamilyan saksakey so ateng, so nayarin mankaukolan na panamaseseg. (Lucas 14:12-14) Nayarin ipila yo so pigaran balo niran akapilimog, balet ta manalwar ya ag-ira naimpluensyaan na antokaman a mauges. (2 Timoteo 2:20, 21) No nairapan ya ompaway iray masakit la, nayarin iyuksoy so pangawit na naakan diad abung da pian napidungoan ira.​—Hebreos 13:1, 2.

¹² Agnalingwanan na dakel ya indibidual iray pandaragup a panggayagaan na saray bisita so simplin panangan, idengel ed saray eksperiensya na arum no panon so impagmaliw dan Kristiano, tan naamtaan da no anto so akatulong ed sikara pian mansiansian matoor ed Dios. Nayarin pantotongtongan iray nipaakar ed Biblia, ya imbitaan a mibiang so amin a presente, pati say ananak. Saratan a pantotongtong so magmaliw a makagunggonan pampapasesegan, ya agpapabaingan odino ipapalikna ed arum ya anggapoy kakanaan da.

13. Panon ya impatnag nen Jesus tan si Pablo so alimbawa ed panagparawes tan panangawat ed panamarawes?

¹³ Impatnag nen Jesus so suston alimbawa ed panagparawes tan pangawat ed panamarawes. Naynay ton uusaren iratan a pankanawnawa pian inabang iray maespiritual a bengatla. (Lucas 5:27-39; 10:42; 19:1-10; 24:28-32) Satan ya ehemplo to so inalig na saray akadkaunan babangatan to. (Gawa 2:46, 47) Oniay insulat nen apostol Pablo: “Pampirawatan ko so pakanengneng ko ed sikayo, pian nipanabang ko ed sikayo so maespiritu a palangkap, pian napaletan kayo: salanti, dia ed abay yo naligliwa ak ed sikayo, balang sakey ed sikatayo ed pananisia na sananey, say pananisia yo, tan say pananisiak.” (Roma 1:11, 12) Mipadpara, say pandaragup tayo so nepeg a mamawala na kipapasen parad pakapampapasesegan.​—Roma 12:13; 15:1, 2.

Arum Iran Panonot tan Pasakbay

14. Akin ya agnipapaseseg so pangiyuksoy na angkabaleg iran panduroypo?

¹⁴ Agnipapaseseg so pangiyuksoy na angkakabaleg iran panduroypo, lapud mabetbet a mairap so pangasikaso ed satan. Diad panaon ya ag-ombana ed maespiritual iran kimey, nayarin desidien na pigaran pamilya so pampiknik odino panggalaw ed sakey a pagalaw ya anggapoy kompetisyon. Sano presente ed sosyal a pandaragup so arum ed saray mamatatken, ministeryal a lingkor, odino arum niran matakken ed espiritual, magmaliw iran maong ya impluensya pian lalon makaparepresko so okasyon.

15. Akin a kaukolan so suston panangasikaso no manparawes diad sakey ya okasyon?

¹⁵ Diad saray sosyal a panduruypo, saramay manggagawa na uksoyan so agnepeg a mangibaliwala ed pankaukolan na suston panangasikaso. Anggaman panliliketan yo so manparawes, agta pagbabawian yo no naamtaan yon walay apaulyanan yo ya agawa ed abung yo, ya akagapolan na bisita yo? Konsideraen pa so prinsipyon siningbat ed Deuteronomio 22:8. Say Israelita ya angipaalagey na balon abung to so kinaukolan a manggawa na kinsikinsi odino barandilyas diad paliber na palatas ya atep, a mabetbet a pamaparawesan ed saray bisita. Akin? “Pian agmo nagawa a pakapatedteran na dala so abung mo naani no napelag diman so siopaman a too.” Mipadpara, say gawaen yo—ya anggapo iray agmakatunongan a panameget​—pian salimbengan iray bisita yo diad sosyal a pandaragup so nepeg a mangikonsidera ed pisikal tan espiritual a pankaabigan da.

16. Anton panag-alwar so nepeg ya agamilen no walay alak ya iserbi ed sosyal a panduroypo?

¹⁶ No walay alak ya iserbi ed sosyal a panduroypo,  nepeg a gawaen itan tekep na pirmin panag-alwar. Dedesidien na dakel a Kristianon manpaparawes so mangiserbi na de-alkohol ya iinumen no personal dan naasikaso so niseserbi odino karakel na inumen na saray bisita ra. Anggapo so naabuloyan a mangigapol ed arum odino managyat ed arum ya oninum na dakel. (Efeso 5:18, 19) Lapud nanduruman rason, nayarin desidien na arum a bisita so ag-iyinum na alak. Dakel a pasen so walaay ley nipaakar ed no antoy edad a nayari lay oninum, kanian tutuloken na saray Kristiano iray ganggan nen Cesar anggaman saratan a totontonen et ompatnag a singa estrikton tuloy.​—Roma 13:5.

17. (a) No manpatogtog na musika diad sosyal a panduroypo, akin ya importante a pilien a maong itan na manpaparawes? (b) No walay sayaw diad sakey a panduroypo, panon a nepeg ya ipatnag so kasimpitan?

¹⁷ Nepeg a seguroen na sakey a manpaparawes ya antokaman a musika, sayaw, odino arum nin panagligliwaan so mitunosan ed Makristiano iran prinsipyo. Mandurumaan so labay a klase na musika, tan wala so dakel a klase na musika. Balet, dakel ed saray musika natan so mangiyaalibansa na espiritu na panagrebelde, imoralidad, tan karawalan. Wala so pankaukolan na pagmaliw a mapili. Say desentin musika so agmet nakaukolan a mapalna balet nepeg ya aliwa itan a minumundo odino imoral, a nipapatogtog a maingal tan mabanugbog. Manalwar kayo a say panagpili na musika et agnimatalek ed sakey ya andian na magenap a pakatalos ed pankaukolan na pamasiansia ed kabkaabigan a kakasil. Say sayaw a mangilalanor ed agmasimpit a kakikiwas, a mangidadanet ed imoral iran galaw na balangbang tan pagew, so mapatnag ya agmanepeg parad sakey a Kristiano.​—1 Timoteo 2:8-10.

18. Panon a naprotektaan na atateng so ananak da diad pangiwanwan da ed sikara diad sosyal a panduroypo?

¹⁸ Nepeg ya amtaen nin unona na Kristianon atateng so niplano parad antokaman iran sosyal a panduroypo a pangiimbitaan ed ananak da, tan makabat no ulopen da ira diad maslak iran okasyon. Makapaermen ta inabuloyan na arum ya atateng so ananak da ya onatendi ed saray party ya anggapoy mangaasikaso, ya akasagyatan na arum ya inmatendi a manggawa na imoralidad odino arum nin agmanepeg a kondukta. (Efeso 6:1-4) Anggano saray tobonbalo et aliwa lan katayatdang tan napanmatalkan la ra, nakaukolan nin siansia a tulongan ira ya ‘ontaynan ed saray ib-ibeg ya inuugaw.’​—2 Timoteo 2:22.

19. Anton katuaan so makatulong ed sikatayo pian niyapasakey so nonot tayo ed nepeg tayon ‘iyuna’?

¹⁹ Lalon maliket so bilay no walay sagpaminsan a pandaragup tan panligliwaan a makagunggona tan makarepresko. Ag-ikikibot nen Jehova ed sikatayo so ontan a panliketan, balet diad tua et amta tayo ya agmakatulong so ontan iran aktibidad pian makapantipon tayo na antokaman ya espiritual iran kayamanan ed tawen. (Mateo 6:19-21) Tinulongan nen Jesus iray babangatan to a makatalos a ‘say pangiyuna ed panarian tan say inkatunong na Dios’ so importante ed bilay, ya aliwan say kanen, inumen, odino isulong tayo, a ‘saraya so aanapen na saray Gentil.’​—Mateo 6:31-34.

20. Antoran maabig a bengatla so nailaloan na saray lingkor nen Jehova manlapud sikato bilang Engranden Manangitarya?

²⁰ On, balanglan ‘mamangan odino oniinum, odino manggawa na antokaman ni,’ nagawaan tayo ya ‘amin parad gloria na Dios,’ a pisalamatan so Engranden Manangitarya lapud maong iran panggayagaan tayo diad kabkaabigan a paraan. (1 Corinto 10:31) Diad Paraison dalin a magano lan onsabi, agnasabaan so kipapasen a panggayagaan a nagnap so inkamabunlok nen Jehova, pati say makagunggonan pantutuyaw na amin a manggagawa ed matunong iran kakaukolanen to.​—Salmo 145:16; Isaias 25:6; 2 Corinto 7:1.

Kasin Nanonotan Yo?

• Akin a mairap parad saray Kristiano natan so pampili na panagligliwaan a makagunggona?

• Anto so arum iran klase na panagligliwaan ya apaneknekan a makapaliket parad saray Kristianon pamilya?

• Sano panggagayagaan so makagunggonan panagligliwaan, antoran panonot tan pasakbay so nepeg a tandaan na sakey?

[Tepetepet Parad Panagaral]

 [Litrato ed pahina 18]

Pilien so panagligliwaan a mamawala na maong a bunga odino resulta

[Saray litrato ed pahina 19]

Antoran nengneng na panagligliwaan so nepeg ya ipulisay na saray Kristiano?