Arawian so Palson Panagdayew!
Arawian so Palson Panagdayew!
“Ekal kayo ed leet da, tan onsian kayo, kuan na Katawan, tan agyo diwiten so marutak.”—2 CORINTO 6:17.
1. Anto so kipapasen ed espiritual na dakel a masimoon a totoo?
AG-AMTA na dakel a masimoon a totoo so katuaan nipaakar ed Dios tan ed arapen na katooan. Lapud anggapoy naromog dan ebat ed importantin tuloy iran tepet da ed espiritual, manbibilay ira ed inkawetwet tan agpakaseguroan. Minilyon so naaripen la ed saray anito, ritual, tan saray selebrasyon a mamapasakit ed liknaan na Manamalsa. Maseguron papanisiaan na saray kakaabay tan kakanayon yo so mandarlang ya impierno, trinitaryon Dios, imortalidad na kamarerwa, odino arum nin palson bangat.
2. Anto so ginawa na saray lider na relihyon, tan anto so resulta na satan?
2 Anto so makasengeg ed ontan lan kalaknab ya espiritual a kabilungetan? Makapasurprisa ta say makasengeg et say relihyon—nagkalalo la ed saray relihyoson organisasyon tan lider ya angibangat ed saray ideya a sumlang ed kanonotan na Dios. (Marcos 7:7, 8) Bilang resulta, apalikdo so dakel a totoo lapud papanisiaan da a mandadayew ira ed tuan Dios, anta diad tua et sikatoy papasakitan da. Say palson relihyon so direktan responsable ed sayan makapasinagem a kipapasen.
3. Siopa so manunan manangiyalibansa ed palson panagdayew, tan panon so inkideskribe to ed Biblia?
3 Wala so agnanengneng a persona a manusuporta ed palson relihyon. Oniay impanukoy ed sikato nen apostol Pablo: “Say dios na sayan panaon [et] binulag to so kaisipan da lapu’d agpanisia, pian say silew na ebanghelyo na gloria nen Kristo a sikato so talintao na Dios, agkomon onsinag ed sikara.” (2 Corinto 4:4) “Say dios na sayan panaon” so diad tua et si Satanas a Diablo. Sikato so manunan manangiyalibansa ed palson panagdayew. “Si Satanas ni magmaliw a singa anghel na liwawa,” so insulat nen Pablo. “Aliwa sirin a baleg a bengatla no saray ministro to met ompanengneng ira a singa ministros na katunongan.” (2 Corinto 11:14, 15) Gagawaen nen Satanas a maong iray mauges a bengatla tan papalikdoen to so totoo pian manisia ed saray katilaan.
4. Anto so kuan na Ganggan na Dios ed Israel nipaakar ed saray palson propeta?
4 Agpankelawan sirin no akin a mabiskeg a kokondenaen na Biblia so palson relihyon! Singa bilang, espisipikon pinasakbayan na Mosaikon Ganggan so totoon pinili na Dios sumpad saray palson propeta. Siopaman a mangiyaalibansa na palso iran bangat tan say panagdayew ed palson dirios so niiyan odino ‘niyakar ed ipapatey lapud mansasalita na isusumpa ed si Jehova.’ Niganggan iray Israelita ya ‘ipulisay da so kaugsan ed utel da.’ (Deuteronomio 13:1-5) On, momoriaen nen Jehova a mauges so palson relihyon.—Ezequiel 13:3.
5. Antoran pasakbay so nepeg tayon talinengen natan?
5 Impatnag nen Jesu-Kristo tan saray apostol to so mabiskeg a liknaan nen Jehova sumpad palson relihyon. Oniay impasakbay nen Jesus ed saray babangatan to: “Manalwar kayo ed saray aliwan tuan propeta, ya onla’rad sikayo a sikakawes na kawes na karnero, balet dia ed loob da sikaray lobon mangasiba.” (Mateo 7:15; Marcos 13:22, 23) Insulat nen Pablo a “nipatnag so sanok na Dios manlapu ed tawen sumpa ed ganagana ya ag-inkamaridios tan ag-inkatunong na saray totoo, ya amperen da so katuaan ed andi-katunongan.” (Roma 1:18) Agaylan makanakana a tumboken na saray tuan Kristiano irayan pasakbay tan paliisan da so siopaman a mangaamper ed kiyabawag na katuaan na Salitay Dios odino samay mangikakayat ed saray palson bangat! —1 Juan 4:1.
Ompaway ed “Babilonia a Baleg”
6. Panon a nilitrato ed Biblia so “Babilonia a Baleg”?
6 Konsideraen pa no panon a deneskribe na libro na Biblia ya Apocalipsis so palson relihyon. Adeskribe itan bilang abuanges a balangkantis a walaan na impluensya ed dakel a panarian tan saray sakop da. Sayan piguratibon bii so akilawanan ed dakel ya arari tan abuanges ed dala na saray tuan mandadayew ed Dios. (Apocalipsis 17:1, 2, 6, 18) Sikato so walaan na ngaran a nisulat ed moling to a mipetekan ed marutak tan makapadimlan kondukta to. Say ngaran et “Babilonia a Baleg, ina na saray balangkantis tan saray karimdimla dia ed dalin.”—Apocalipsis 17:5.
7, 8. Panon ya akibalangkantis so palson relihyon, tan tekep na antoran resulta?
7 Say Makasulatan ya impaneskribe ed Babilonia a Baleg so ontukoy ed amin a palson relihyon ed mundo. Anggaman aliwan pormal a nankakasakey so nilibo iran relihyon bilang sakey ya organisasyon ed mundo, sikara so nankakasakey ed gagala tan gawa. Unong ya inlitrato la na imoral a bii diad Apocalipsis, say palson relihyon so walaan na mabiskeg ya impluensya ed saray gobierno. Diad inkilitrato to bilang bii ya agmatoor ed saray sinambaan to ed kasal to, say palson relihyon so nambalangkantis diad impialyansa to ed dakerakel a mapolitikan gobierno. “Sikayo a palalawanan, agyo ta amta a say pikakaaro ed mundo et sikato so pibubusol ed Dios?” so insulat nen babangatan a Santiago. “Kanian siopaman a magmaliw naani a kaaro na mundo sikato so kabusol na Dios.”—Santiago 4:4.
8 Sayan impibali na palson relihyon ed saray gobierno so nanresulta ed pirmin paniirap na totoo. Inkuan na Aprikanon political analyst a si Dr. Xolela Mangcu a “say awaran ed mundo so walaan na dakel ya alimbawa na palanit a panagpatey makasengeg ed impanlaok na relihyon tan saray politika.” Oniay agano nin inkuan na sakey a peryodiko: “Say sankadalaan tan sankapeligroan a tuloy iran panlalaban natan . . . et akasentro ed relihyon.” Minilyon a bilay so atigway lapud panlalaban a suportado na relihyon. Say Babilonia a Baleg so amasegsegang tan amatey ni ingen ed saray tuan lingkor na Dios, ya abuanges itan ed dala ra, a singa panangibaga.—Apocalipsis 18:24.
9. Panon ya impabitar na libro na Apocalipsis so panggula nen Jehova ed palson panagdayew?
9 Mapatpatnag so panggula nen Jehova ed palson panagdayew diad walan nagawa ed Babilonia a Baleg. Oniay ibabaga na Apocalipsis 17:16: “Saray samploran saklor ya anengneng mo, tan say ayep, busolen da so balangkantis, tan sikato so gawaen da a maermen tan labos-lakseb, tan kanen da so laman to, tan sikato so lablabasen dan poolan ed apoy.” Unona, say baleg ya ayep so mamingbingkas ed sikato tan buagen to so laman na balangkantis. Insan, antokaman a nakera ed sikato so sigpot a poolan. Mipadpara, agmanbayag et ontan so gawaen na saray gobierno na mundo ed palson relihyon. Sikara so pakiwasen na Dios a manggawa ed satan. (Apocalipsis 17:17) Say Babilonia a Baleg, say sankamundoan ya empiryo na palson relihyon, so nigeter lan naderal. Sikato so “agla naromog a balot.”—Apocalipsis 18:21.
10. Anto so nepeg a talindeg tayo nipaakar ed palson relihyon?
10 Anto so talindeg na saray tuan managdayew nipaakar ed Babilonia a Baleg? Oniay mabitabitar ya ingganggan na Biblia: “Ompaway kayo ed sikato, baley ko, pian agkayo nalanor ed saray kasalanan to, tan agkayo manlikna ed saray bakbak to.” (Apocalipsis 18:4) Saramay labay day nilaban so nepeg ya ompaway ed palson relihyon sakbay a naatrasado. Sanen wadiad dalin, impasakbay nen Jesu-Kristo a diad saray kaunoran ya agew et dakel so mankuan a sikato so uunoren da. (Mateo 24:3-5) Oniay inkuan to nipaakar ed sikara: “Agta kayo apikabkabatan a balot: arawi kayo’d siak, sikayo a managgawa na kaugsan.” (Mateo 7:23) Say nitrono la natan ya Ari, si Jesu-Kristo, so angipulisay ed palson relihyon.
Onarawi—Panon?
11. Anto so nepeg tayon gawaen pian naarawian tayo so palson panagdayew?
11 Aarawian na saray tuan Kristiano so palson panagdayew, ya ipupulisay da iray palson relihyoson bangat. Kabaliksan na satan ya agtayo dengelen iray relihyoson programa ed radyo tan agtayo bantayan iratan ed telebisyon nisay basaen iray relihyoson literatura a mangiyaalibansa na katilaan nipaakar ed Dios tan ed Salita to. (Salmo 119:37) Makabat met so ipaliis ed saray sosyal a pandaragup tan panliliket a susuportaan na antokaman ya organisasyon a misiglaotan ed palson relihyon. Niarum ni, agtayo susuportaan so palson panagdayew diad antokaman a paraan. (1 Corinto 10:21) No paliisan tayo iratan a bengatla, nasalimbengan itayo manlapud pananagyat na sakey a “manggawa na deral ed sikayo lapu ed pilosopiya to tan andi-kakanaan a panamalingo, unong na daan ya ugali na totoo, unong ed saray dinaralin a bangat na mundo, tan aliwan unong ed Kristo.”—Colosas 2:8.
12. Panon a napakset na sakey a too so antokaman a pimemembro to ed saray palson relihyoson organisasyon?
12 Panon to no say sakey a too a labay toy magmaliw a Tasi nen Jehova et peles ya akarehistron membro na palson relihyon. Kaslakan et say sulat a mangipapabitar ed iyekal to so onkanan ebidensya ya agto la labay so magmaliw a membro na sakey a palson relihyon. Importantin tuloy so desididon ikiwas na sakey a too pian sigpot ton napaliisan so antokaman a pakarutakan ed espiritual manlapud palson panagdayew. Saray kiwas na sakey a malabay a magmaliw a Tasi so nepeg a napatnagan na relihyoson organisasyon tan publiko a pinakset to lay pimemembro to ed palson relihyon.
13. Anto so simbawa na Biblia nipaakar ed pankaukolan na iyarawi ed palson panagdayew?
13 “Agkayo miulop ed pako a duma na saray agmananisia,” so insulat nen apostol Pablo. “Ta anto so piulopan na katunongan ed kaugsan? Odino anto so piulopan na silew ed bilunget? Tan anto so pinonongan nen Kristo ed si Belial? Odino anto so pinabangan na mananisia ed agmanisia? Tan anto a pinonongan so wala ed templo na Dios ed saray talintao? . . . Kanian, ekal kayo ed leet da, tan onsian kayo, kuan na Katawan, tan agyo diwiten so marutak.” (2 Corinto 6:14-17) Natumbok tayo iratan a salita diad iyarawi ed palson panagdayew. Kasin kakaukolanen met na simbawa nen Pablo ya arawian tayo iray palson managdayew?
“Mankurang Kayo’d Karunongan”
14. Nepeg kasin sigpot tayon paliisan iramay kabiangan na palson panagdayew? Ipaliwawa.
14 Nepeg kasin paliisan na saray tuan managdayew so amin lan paraan a pakapilimog ed totoon kabiangan na palson panagdayew? Nepeg kasi ya agtayon balot pilimogan iramay agtayo kapananisiaan? Andi. Say komadua ed duaran sankabalegan a ganggan et say: “Aroen mo so kaparam a too unong ed sikan dili.” (Mateo 22:39) Maseguron nipatnag tayo so panangaro ed kapara tayon totoo sano inanabang tayo ed sikara so maong a balita na Panarian. Nipatnag met so panangaro tayo ed sikara sano iyaralan tayo ira na Biblia tan ipaamta tayo ed sikara so pankaukolan na iyarawi ed palson panagdayew.
15. Anto so kabaliksan na pagmaliw ya ‘ag-itayo taga-mundo’?
15 Anggaman ipupulong tayo so maong a balita ed kapara tayon totoo, ‘ag-itayo taga-mundo,’ a singa saray patumbok nen Jesus. (Juan 15:19) Say terminon “mundo” dia so manutukoy ed sosyedad na too a nisian ed Dios. (Efeso 4:17-19; 1 Juan 5:19) Sikatayo so biig manlapud mundo lapud ipupulisay tayo iray awawey, panagsalita, tan kondukta ya agmakapaliket ed si Jehova. (1 Juan 2:15-17) Niarum ni, mitunosan ed prinsipyon “saray mauges a kaulop deralen da so saray maong ya ugugali,” agtayo mikakaaro ed saramay agmanbibilay unong ed saray estandarte na Kristiano. (1 Corinto 15:33) Say pansiansian agkabiangan na mundo so mankabaliksan a mansiansia itayon ‘andian na mantsa na mundo.’ (Santiago 1:27) Sirin, say pagmaliw a biig manlapud mundo so agmankabaliksan ya agtayo la pilimogan a balot so arum a totoo.—Juan 17:15, 16; 1 Corinto 5:9, 10.
16, 17. Panon so nepeg a pantrato na saray Kristiano ed saramay agmakaamta na katuaan ed Biblia?
16 Panon tayo sirin a pidenengan iramay agmakaamta na saray katuaan na Biblia? Oniay insulat nen Pablo ed kongregasyon na Colosas: “Mankurang kayo’d karunongan ed saray wala ed paway, a dondonen yo so panaon. Say salita yo komon natekepan lawas na liga, alaokan na asin, pian nakabatan yo no panon so nepeg yo a yebat ed balang sakey.” (Colosas 4:5, 6) Oniay insulat nen apostol Pedro: “Dayewen yo so Katawan a Dios ed kapusoan yo; tan maparaan kayo lawas ya onebat ed siopakaman a mankaukolan ya ipaliwawa yo so gapo na satan ya ilalo a wala ed sikayo, balet siuuyamo tan sitatakot.” (1 Pedro 3:15) Insimbawa nen Pablo ed saray Kristiano ya “ag-ira mansalitay mauges nipaakar ed anggan siopaman, ag-ira mikokolkol, maong komon so linawa ra, ya ipanengneng da so amin a kauyamoan ed saray amin a totoo.”—Tito 3:2.
17 Bilang saray Tasi nen Jehova, paliisan tayo so pagmaliw a masebeg odino mapaatagey ed arum. Seguradon agtayo labay so mangusar na makapainsulto iran termino pian deskribien so totoo a kabiangan na arum iran relihyon. Imbes, sikatayo so mataktika, anggaman say unabung, kakaabay, odino katrabaho tayo et aliwan maabig so pidedeneng to odino ansakit iray panagsalita to.—Colosas 4:6; 2 Timoteo 2:24.
“Tandaan Mon Maong so Uliran na Saray Maabig a Salita”
18. Anton makapasinagem a kipapasen ed espiritual so nasasagmak na saramay pinmawil ed palson panagdayew?
18 Kayarin naaralan na sakey iray katuaan na Biblia, agaylan makapasinagem no sikatoy ompawil ed palson panagdayew! Oniay kuan na Biblia bilang panangideskribe ed mauges iran pansumpalan na ontan a kurang: “Tuan peteg a diad kayari inyarawi la ed karutakan na mundo lapu ed pikakabat da ed Katawan tan Manangilaban tayo a Jesu-Kristo, insan ira pasakop lamet, tan atalo ra, say kaunoran a kipapasen da maug-uges nen say inmuna. . . . Bangbalet agawa ed sikara so peteg ya uliran: say aso pinawil to so uta to lamet, tan say kaong a naurasan nantiblak lamet.”—2 Pedro 2:20-22.
19. Akin ya importante so pansiansia tayon maimano ed antokaman a nayarin mameligro ed espiritualidad tayo?
19 Sikatayo so nepeg a mansiansian maimano ed antokaman a mameligro ed espiritualidad tayo. Talagan walaray kapeligroan a manesesga ed sikatayo! Oniay impasakbay nen apostol Pablo: “Say espiritu kuan to ed maliwawa, a dia ed saray arapen a panaon [“kaunoran iran peryodo na panaon,” NW] saray arum onsian ira ed pananisia, a dengelen da so saray espiritu a manangilawan tan saray bangat na saray demonyo.” (1 Timoteo 4:1) Manbibilay itayo ed “kaunoran iran peryodo na panaon.” Saramay ag-onarawi ed palson panagdayew so ‘nipalirpalir dia tan diman tan nitektekkiab ed antokaman a dagem na bangat, unong ed saray kasiliban na totoo, dia ed kasaolan da, unong ed panamalingo na kalingo.’—Efeso 4:13, 14.
20. Panon tayon nasalimbengan so inkasikatayo sumpad makaderal ya impluensya na palson relihyon?
20 Panon tayon nasalimbengan so inkasikatayo sumpad makaderal ya impluensya na palson relihyon? Nodnonoten so amin ya intarya la nen Jehova. Walaan itayo na Salitay Dios, say Biblia. (2 Timoteo 3:16, 17) Si Jehova so angitarya met na daakan ya espiritual a tagano diad panamegley na “matoor tan makabat ya aripen.” (Mateo 24:45) Legan itayon onaaligwas ed katuaan, agta nepeg tayon bayuboan so pampilalek tayo ed ‘taganon anawet a kien na saray ayadyarin totoo’ tan say pilalek a mitipon dia ed pakakaaralan tayo na espiritual iran katuaan? (Hebreos 5:13, 14; Salmo 26:8) Determinado itayo sirin a sigpot a manganamot ed saray probisyon nen Jehova ta pian nabembenan odino ‘natandaan tayon maong so uliran na saray maabig a salita’ a nadngelan tayo. (2 Timoteo 1:13) Diad ontan et naarawian tayo so palson panagdayew.
Anto so Naaralan Yo?
• Anto so “Babilonia a Baleg”?
• Anto so nepeg tayon gawaen ta pian naarawian tayo so palson relihyon?
• Antoran kapeligroan ed espiritualidad tayo so nepeg tayon paliisan?
[Tepetepet Parad Panagaral]
[Litrato ed pahina 28]
Amta yo kasi no akin a say “Babilonia a Baleg” et nilitrato bilang imoral a bii?
[Litrato ed pahina 29]
Say “Babilonia a Baleg” so nigeter lan naderal
[Litrato ed pahina 31]
Ipatnag tayo a “siuuyamo tan sitatakot” odino mapagalang itayo ed saramay agtayo kapananisiaan