Balo Iran Membro na Mananguley ya Ulop

NEN Mierkoles na kabuasan, Agosto 24, 2005, saray pamilyan Bethel ed Estados Unidos tan Canada so bansag ya akadngel na sakey a makapaliket ya anunsio, panamegley na video. Manlapud Setyembre 1, 2005, duaran balon membro so niarum ed Mananguley ya Ulop na saray Tasi nen Jehova—di Geoffrey W. Jackson tan Anthony Morris III.

Si Brother Jackson so ginmapon nampayunir nen Pebrero 1971 diad Tasmania, say islan estado na Australia. Nen Hunyo 1974, inkasal toy Jeanette (Jenny). Agnambayag kayari na satan, sikaray aturo a manlingkor bilang espisyal payunir. Manlapud 1979 anggad 2003, sikaray nanlingkor bilang misionaryo ed Tuvalu, Samoa, tan Fiji—saray islan nasyon ed Abalaten Pasipiko. Legan dan walad ka-islaan, baleg met so nitulong di Brother tan Sister Jackson ed panangipatalos na saray literatura na Biblia. Nen 1992, si Brother Jackson so ginmapon nanlingkor ed Komite na Sanga diad Samoa, tan manlapud 1996, dia ed Komite na Sanga ed Fiji. Nen Abril 2003, sikato tan si Jenny so nagmaliw a kabiangan ed pamilyan Bethel na Estados Unidos tan ginmapo ran nantrabaho ed Translation Services Department. Ag-abayag kayari na satan, si Brother Jackson so nagmaliw a mananulong ed Teaching Committee na Mananguley ya Ulop.

Si Brother Morris so ginmapo ed panagpayunir a serbisyo nen 1971 diad Estados Unidos. Diad Disyembre na satan a taon, inkasal toy Susan, tan nantultuloy iran nampayunir ed ngalngali apatiran taon anggad inkianak na panguloan ya ilalak da, si Jesse. Agnambayag, sikaray nanilalak lamet, si Paul. Intubat lamet nen Brother Morris so sigpot panaon a serbisyo nen 1979 bilang regular payunir. Si asawa to so nampayunir met a kaiba to sanen naneskuela la ray ugugaw. Say pamilya so nanlingkor ed baleg so pankaukolan diad Isla na Rhode tan Amianen Carolina, diad Estados Unidos. Diad Amianen Carolina, si Brother Morris so nanlingkor bilang kasandi na manangasikaso na sirkito, tan saray ilalak to so nanregular payunir. Si Jesse tan Paul so naimbitaan ed sanga na Estados Unidos sanen asabi na balang sakey ed sikara so edad a 19, bangta si Brother Morris so ginmapo ed sirkiton kimey. Insan nen 2002, naimbitaan iran dua nen Susan ed Bethel, tan inggapo ra so balon asainmin da nen Agosto 1. Si Brother Morris so nantrabaho ed Service Department diad Patterson tan diad saginonor, bilang mananulong ed Service Committee na Mananguley ya Ulop.

Nilikud ed sayan duaran balon membro, say Mananguley ya Ulop so tugyopen di C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; tan D. Sydlik. Amin a membro na Mananguley ya Ulop et alanaan iran Kristiano.