Ipapatey—Sakey a Makapataktakot a Katuaan!

“MANLAPUD kianak et wadtan a naynay so posibilidad a nayarin ompatey so too ed anggan anton oras,” so insulat na Britanon historyador a si Arnold Toynbee. Inyarum to: “Tan agnapaliisan ya ontua iyan posibilidad.” Agaylay panermen tayo sano ompatey so sakey ya inad-aro tayon membro na pamilya odino maapit a kaaro!

Say ipapatey et sakey a katuaan a tatakotan na katooan diad nilibo lan taon. Anggapoy nagawaan tayo sano ompatey so sakey a pinabpabli tayo. Anggan siopa et manermen lapud satan. Anggapo so nipuera. “Say panermen et gagawaen to itayon amin ya ugaw lamet—eekalen toy pandurumaan ed inkautek. Anggapoy amta na sankakabatan lan too.” Ontan so insulat na koma-19 a siglo ya essayist. Magmaliw itayon singa angkelag ya ugugaw—ya anggapoy nagawaan tayo nisay nauman tayo so kipapasen. Anggan say kayamanan odino pakayari so agmakapangipawil ed naandi. Ag-itan nipaliwawa na saray makabat tan de-aral. Namparan onnangis iray mabiskeg tan makapuy.

Alikna nen Arin David na kadaanan ya Israel so ontan a kaermenan sanen inatey so ilalak ton si Absalom. Sanen akabatan na ari ya inatey so ilalak to, oniay inyugaog to: “O ana’ko, ana’ko, ana’ko. Inatey ak la komon lapu ed sika, O Absalom ana’ko ana’ko!” (2 Samuel 18:33) Sayan makapanyarin ari ya akatalo ed mabibiskeg iran kalaban et anggapoy nagawaan to noag say manpirawat lambengat a sikato la komon so tinalo na “kaunoran a kabusol . . . say patey,” imbes a say ilalak to.—1 Corinto 15:26.

Wala tay solusyon ed ipapatey? No wala, anto so ilalo na saray inaatey? Kasin napinengnengan tayo lamet iray inad-aro tayo? Say ontumbok ya artikulo so mangitatarya na Makasulatan iran ebat ed sarayan tepet.