“Nakaukolan ya Unoren Mi so Dios, nen Saray Totoo”

Niliktar Lapud “Mablin Dala”

SAY sankatalonggaringan ya impangipatnag nen Jehova ed aro To et say impangibaki To’d bogbogtong ya Anak To a mangiyapay ed ayadyarin bilay to bilang dondon. Bilang makasalanan a totoo, kakkaukolan tayo itan pian niliktar itayo manlapud kasalanan, lapud anggapo so ag-ayadyarin too a “makayari a manondon na agi to ed anggan anto a pangiparalanan, nisay nayarian to so mangiter ed Dios na sakey a panondon ed sikato . . . [et] sikato manbilay ni lawas.” (Salmo 49:6-9) Agaylay pisalsalamat tayo ta “inter [na Dios] so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan”!—Juan 3:16.

Panon itayon niliktar na dondon? Singbaten tayo so apatiran paraan a pakagamoran tayo na kawayangan lapud sayan matalonggaring a panangipatnag nen Jehova a Dios ed panangaro to.

Nibulos Lapud Dondon

Unona, nayarian itayon iliktar na bagat nen Jesus manlapud atawir a kasalanan. Amin tayo so nianak ed kasalanan. On, makasalanan itayo la antis nin makasumlang itayo ed ganggan nen Jehova. Panon ya ontan? Oniay kuan na Roma 5:12: “Say kasalanan linmoob ed mundo lapu ed sakey a too [si Adan], tan say patey lapu ed kasalanan.” Bilang ananak nen Adan, atawir tayo ed sikato so ag-inkayadyari. Balet lapud walay imbayar a dondon parad sikatayo, posible lay kibulos tayo manlapud panangaripen na atawir a kasalanan. (Roma 5:16) Si Jesus et ‘tinawayan to so ipapatey lapu ed amin a too,’ kanian inako to iray resulta na kasalanan diad biang na ilalak nen Adan.—Hebreos 2:9; 2 Corinto 5:21; 1 Pedro 2:24.

Komadua, nibulos itayo na dondon manlapud makapatey iran epekto na kasalanan. “Say bayar na kasalanan say patey.” (Roma 6:23) Say dusa ed kasalanan et ipapatey. Diad panamegley na masakripisyon impatey na Anak na Dios, ginawa ton posible so maandon bilay parad matulok a katooan. On, “say manisia ed Anak walay bilay ton andi-anggaan; balet say agmangunor ed Anak agto nanengneng so bilay.”—Juan 3:36.

Imanoen a sikatayo so nibulos lambengat manlapud saray epekto na kasalanan no agamilen tayo so pananisia ed Anak na Dios. Lalanoren na saya so panguman ed bilay tayo tan pangitunos ed satan diad linawa na Dios. Nepeg tayon iwaklit so antokaman a mauges a kurang a nayarin gagawaen tayo tan nepeg itayon onkiwas pian gawaen so makapaliket ed Dios. Inkuan nen apostol Pedro a kaukolan tayo so ‘magbabawi tan manpataoli ta pian napunas iray kasalanan tayo.’—Gawa 3:19.

Komatlo, say bagat ya inyapay nen Jesus so mangibulos ed sikatayo manlapud nagogonigon a konsiensia. Amin a dedikado ed si Jehova tan bautismado a babangatan na Anak to so nainawaan. (Mateo 11:28-30) Anggaman ag-itayo ayadyari, malikeliket itayon manlilingkor ed Dios tekep na malinis a konsiensia. (1 Timoteo 3:9; 1 Pedro 3:21) Diad pangipatua ed saray kasalanan tayo tan pangitalirak ed makasalanan iran agamil tayo, nagamoran tayo so panangasi tan pakainawaan manlapud nagogonigon a konsiensia.—Uliran 28:13.

Mangitatarya na Tulong tan Ilalo

Kaunoran, diad pangagamil na pananisia ed dondon, ag-itayo makalikna na takot nipaakar ed talindeg tayo ed Dios. Oniay insulat nen apostol Juan: “No wala so toon mankasalanan, wala so apireng tayo ya onarap ed Ama, si Jesu-Kristo.” (1 Juan 2:1) Nipaakar ed betang nen Jesus bilang mananulong, oniay insulat nen apostol Pablo:  “Nayarian to met ya ilaban angga ed kasumpalan so saray onasingger ed Dios dia ed panamegley to, ta manbilay lawas a mangyesel ed sikara.” (Hebreos 7:25) Anggad wala ni ed sikatayo so matik na kasalanan, nakaukolan tayo iray serbisyo na Atagey a Saserdoten si Jesu-Kristo pian natulongan itayon nawalaan na maptek a talindeg ed imaton na Dios. Panon ya inmakto si Jesus bilang atagey a saserdote ed biang tayo?

Apataplon agew kayari na inkioli to nen 33 K.P., si Jesus so tinmokotok ed tawen, ya inyawat to ed Dios so balor odino bili na “mablin dala” to. Bilang resulta, si Jesus so magano lan mangibulos ed matulok a katooan manlapud kasalanan tan ipapatey. * (1 Pedro 1:18, 19) Kanian, agkayo ta miabobon a si Jesu-Kristo et makanepegan na panangaro tan katutulok tayo?

Si Jehova a Dios so makanepegan met na panangaro tan katutulok tayo. Lapud panangaro to, ginawa ton posible so ‘pakarondon’ tayo. (1 Corinto 1:30) Agtayo lambengat utang ed sikato so bilay tayo natan noag pati say antokaman nin iilaloan tayo a panggayaga ed bilay ya andi-anggaan. Kanian, makatunongan lambengat ya ‘unoren tayo so Dios nen saray totoo.’—Gawa 5:29.

[Paimano ed leksab]

[Kahon/Saray litrato ed pahina 9]

KASIN AMTA YO LA?

• Si Jesus so tinmokotok ed tawen manlapud Palandey na saray Olibo.—Gawa 1:9, 12.

• Saray matoor lambengat ya apostol nen Jesus so akaimaton ed intokotok to.—Gawa 1:2, 11-13.