Panlingkor ed Kongregasyon a Sananey so Lenguahe

“A NENGNENG ko so sananey ya anghel a mantektekkiab dia ed pegley na tawen,” so insulat nen apostol Juan, “a wala ed sikato so andi-angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley.” (Apocalipsis 14:6) Bilang kasumpalan na sayan mapropetikon pasingawey, say maong a balita na Panarian na Dios so nipupulong ed sankamundoan diad nanduruman salita, odino lenguahe. Dakel ed sarayan lenguahe so uusaren na saray imigrante a manaayam ed lugar ya arawi ed dilin bansa ra. Saraya met ya indibidual so makakarengel na maong a balita manlapud saray maseseg a Tasi nen Jehova a nanaral na sananey a lenguahe.

Kasin kaiba kayo ed saramay Tasin manlilingkor ed kongregasyon a sananey so lenguahe? Odino nayarin nononoten yon gawaen itan? Pian ontalona kayo ed satan, nakaukolan ya agsinisiblet so motibo yo tan duga so awawey na kanonotan yo. Lapud say gagala yo et tulongan so arum a makaaral na katuaan manlapud Salitay Dios, walaan kayo na sankaabigan lan motibo, salanti, say panangaro ed Dios tan ed kaparan too. (Mateo 22:37-39; 1 Corinto 13:1) Say mas mabiskeg a mamakiwas ed sikayo et say pilalek ya ontulong ed arum a makapikabat ed Dios, ya aliwan say panliket lambengat ed ulopan, tagano, tan kultura na totoo ed sananey a bansa odino grupo. Kasin mairap parad sikayo so panaral na sananey a lenguahe? No ontan, makatulong so pakawalaan na suston awawey. “Agkayo ontatalaw ed lenguahe,” so inkuan nen James, a nanaral na Hapones. No naamtaan yon dakel la so tinmalona, natulongan kayo pian makapantultuloy tan nawalaan na positibon awawey. Panon kayon makaaral sirin na balon lenguahe? Anto so ontulong pian makaadapta kayo ed kongregasyon a manguusar ed satan a lenguahe? Tan anto so nepeg yon gawaen pian mansiansian mabiskeg so espiritualidad yo?

Pansagpotan ya Aralen so Lenguahe

Dakel so paraan pian naaralan so sakey a lenguahe. Nanduruma so metodo na saray manaaral tan managbangat. Balet, maslak ya estudyante so maples tan mainomay a makaaral no onatendi ira ed pigaran sesyon a walay kualipikadon managbangat. Makatulong met so pambasa na Biblia tan saray nibase ed Biblia a publikasyon a walad lenguahen aaralen yo tan say idengel met ed antokaman a walan akarekord pian naaruman so bokabularyo yo tan onlaknab so pikakabat yo ed saray terminon uusaren diad kongregasyon. Saray matukoy a programa ed radyo, TV, tan video so ontulong met pian nakabisado yo so lenguahe tan kultura. No nipaakar ed karukey na saray sesyon ed panagaral, kaslakan a mas epektibo so panaral na sandaraiset ed kada agew nen say pananos ed makapakesaw tan andukey iran sesyon balet ta matalag.

Say panaral na lenguahe et singa panaral a manlangoy. Agkayo makaaral a manlangoy diad pambasa lambengat na sakey a libro. Kaukolan yoy ontiblong ed danum. Ontan met ed panaral na lenguahe. Mairap so manaral no anggapoy panangipasal. Nakaukolan yoy mitalosan ed arum a totoo kapiganman a posible—a dengelen so panagsalita ra, milimog ed sikara, tan siempre mansalita! Saray Makristianon aktibidad so  sankaabigan a kipapasen parad sayan gagala. Mabetbet a niyaplika yon tampol so naaaralan yo diad lawak a ministeryo. “Singano makapatalaw,” so inkuan nen Midori, a manaaral na Chinese, “balet naaapresya na saray unabung so panseseet tayo ran Tasi. Nayarin mamakiwas itan ed kapusoan da. Naliketan la ra diad pangibaga tayo labat na, ‘Maliket ak a makapikabat ed sika’ diad lenguahe ra!”

Baleg met so nitulong na saray Makristianon pantitipon. Diad kada pantitipon, panggunaetan yoy mankomento anggan maminsan labat. Anggaman makapatalaw itan diad gapo, agkayo mapaga. Labay na kongregasyon ya onaligwas kayo! Oniay inkuan nen Monifa, a manaaral na Koreano: “Misalsalamat ak ed samay agin bii ya onyuyurong ed abay ko legan na saray pantitipon, ya isusulat to parad siak iray kabaliksan na pigaran salita. Akatulong a maong ed siak so maaro tan maanos a pananuporta to.” Legan a naaaruman so bokabularyo yo, sikayoy makapannonot la diad lenguahen aaralen yo—a nibaga yo lan tampol iray kabaliksan na saray salita imbes ya ipatalos yo ni a sansakey so salita diad nonot yo.

Say manunan kalat yo ed panaaral na lenguahe et say ‘pakapansalita na mainomay a talosan.’ (1 Corinto 14:8-11) Anggaman walaray totoon makatalos ed panggugunaet yo, nayarin agda labay la ingen so ondengel ed mensahe yo no aliwa odino anawet so panagbalikas yo. Say pangimano ed dugan panagbalikas tan gramatika diad gapo ni labat et makatulong pian agyo napasalan so makapuy ya ugali a mairap lan umanen. Oniay insuheri nen Mark, a nanaral na Swahili: “Kerewen ed saramay marunong a mansalita ya ipetek iray baleg a lingo yo, insan pisalamatan ira ed satan!” Siempre, magmaliw a makonsidera ed panaon tan biskeg na saraman so ontutulong ed sikayo. Anggaman nayarian yon pakorehi iray insulat yo, panggunaetan yon iparaan iray paliwawa tan komento yo diad pangusar ed saray salitan kabisado yo la odino inanap yo. Saya so mamapeles ed panagaral yo tan ontulong ed sikayon makapansalita a walaan na kompiyansa.

Mantultuloy ya Onaligwas

“Say panaral na sananey a lenguahe so sankairapan lan kimey parad siak,” so inkuan nen Monifa. “Walaray panaon a labay ko lay ontunda. Balet ninonot ko so pirmin pampipilalek na say iyaaralan ko na Biblia a narengel so araralem ya espiritual a katuaan diad simplin pansasalitak na Koreano tan say panliket na saray agagi ed anggan daiset ni ya iyaaligwas ko.” Say leksion et agkayo onsusuko a tampol. Say kalat yo et nibangat ed arum so manangisalbay-bilay iran katuaan a manlalapud Kasulatan. (1 Corinto 2:10) Kanian, nakaukolan so niyapasakey tan mabayag a pansagpot pian naaralan yon ibangat so Biblia diad sananey a lenguahe. Diad pantutultuloy yo, paliisan ya ikompara ed arum so iyaaligwas yo diad negatibon paraan. Saramay manaaral na balon lenguahe et onaaligwas diad nanduruman kapeles tan nanduruman paraan. Balet, maabig no imanoen yo so dilin iyaaligwas yo. (Galacia 6:4) “Say progresibon panagaral ed lenguahe et kaparpara na itatakdang ed takayan,” so inkuan nen Joon, a nanaral na Chinese. “Diad paniisip yon agkayo onaaligwas, namoria yo ed satan a wala la manayay inaligwasan yo.”

Legay-bilay a gegemtan so panaral na balon lenguahe. Kanian, panliketan yon gawaen itan,  tan agyo ilaloan ya agkayo lan balot nalingo. (Salmo 100:2) Agnapaliisan iray pakalingo. Normal labat itan legan kan manaaral. Sanen ginmapon nampulong so sakey a Kristiano diad lenguahen Italyano, oniay intepet to ed unabung, “Amta yo ta so panis na bilay?” Say labay ton ibaga et say “gagala na bilay.” Sakey a Tasi ya agano nin manaaral na Polako so angimbita ed kongregasyon a mangansion na aso imbes a kanta. Tan diad daiset labat ya inkauman na tono, samay agin manaaral na Chinese so amaseseg ed saray dumerengel to a mangagamil iray pananisia ed kahon na libro nen Jesus imbes a diad dondon. Balet say gunggona ed pakalingo et agyo la nalingwanan iray dugan termino a naaralan yo.

Mitulongan ed Kongregasyon

Aliwa labat a say pandudumaan na lenguahe so sengegan na inkaapag-apag na totoo. Mabetbet a naaapag-apag so katooan lapud pandurumaan na kultura, rasa, tan bansa. Balet, natalonaan tayo irayan babeng. Sakey ya iskolar a manaaral nipaakar ed saray grupo na relihyon a manguusar na lenguahen Chinese diad Europa so angikuan a saray Tasi nen Jehova et “baliwala ed sikara so pandurumaan na saray rasa odino nasyon.” Inkuan to a diad limog na saray Tasi nen Jehova et “agmakasbel so pandurumaan na etniko, tan sakey labat a paraan so lenguahe pian natalosan so salitay Dios.” On, saray tuan Kristiano so agnaaamper na pandurumaan na nasyon lapud pangiyaaplika ra ed saray prinsipyo na Biblia. Parad saramay mangisusulong na ‘balon inkatoo, anggapo so pandumaan na Griego, Judio, tan say ag-asegat,’ odino sankaili.—Colosas 3:10, 11, Maung a Balita Biblia.

Kanian amin a kabiangan na kongregasyon so nepeg a mansagpot pian niyalibansa so pankakasakey. Kakaukolanen na saya a magmaliw a mabulos so sakey a mangawat ed balo iran paraan na panagnonot, liknaan, tan panagkimey. Say pandurumaan et agmanresulta ed inkaapag-apag no ag-ipilit na sakey iray dilin panlabayan to. (1 Corinto 1:10; 9:19-23) Aralen a panggayagaan iray sankaabigan ya aspekto na amin a kultura. Tandaan ya importante so agsinisiblet ya aro pian niwala so maabig a relasyon tan tuan pankakasakey.

Maslak a kongregasyon a sananey so lenguahe et onggagapo ed melag a grupo, a maslak a kabiangan ed satan et saramay manaaral na balon lenguahe, pati saramay kagapogapo da nin manaaral ed saray prinsipyo na Biblia. Diad ontan et mainomay ya onlesa iray agpantatalosan ed saratan a grupo nen say diad angkakabaleg tan niletneg lan kongregasyon. Kanian nepeg a manggunaet iray matakken ed espiritual a Kristiano a magmaliw a seklang diad kongregasyon. Say pangipatnag na aro tan kaabigan diad salita tan gawa so mamawala na kaliberliber a sengegan na iyaligwas ed espiritual na saray balo ni.

Saraman so manboluntaryon ontulong ed kongregasyon a sananey so lenguahe et nepeg a magmaliw met ya asimbang ed saray iilaloan da ed arum. Oniay impaliwawa nen Rick, a sakey a matatken ed ontan a kongregasyon: “Nayarin walaray balo nin Tasi ya agni nipasal a maong nipaakar ed panangorganisa, ya aliwan singa saramay kabiangan ed saray kongregasyon a manguusar na lokal a lenguahe. Balet, say kakulangan da na abilidad et mabetbet a nasasapotan na panangaro tan inkaligsa. Tan dakel ya interesado so onkakamang ed katuaan.” Diad regular a pibibiang tan diad mabulos a panggawa na anggaan na nayarian yo, peteg a nagunggonaan so kongregasyon ed sikayo, anggaman manaaral kayo ni labat na lenguahe. Diad pankimey a saniiba, amin so makatulong ed iyaligwas ed espiritual na kongregasyon.

Pansiansiaen a Mabiskeg so Espiritualidad

Sakey ya agin laki a balobalo ni ed kongregasyon a sananey so lenguahe so akaimano ed sakey ya ina ya ontutulong ed anak ton mangiparaan na komento. “Mommy, antikey labat komon so iyebat ko.” so inkerew na anak. “Andi, ana’ko,” so inyebat na ina to. “Saraman lay manaaral na lenguahe so onebat na antikey.”

Parad sakey a wala la’d edad, nayarin makapakesaw ed mental, emosyonal, tan espiritual so agpakapansalitan malinew diad loob na pigay bulan odino taon ni ingen. “Siak so mainomay a naermenan lapu ed saray limitasyon ko,” so nanonotan nen Janet, a natan et marunong lan mansalita na Español. Oniay inisip nensaman  nen Hiroko, a nanaral na Ingles: ‘Saray aso tan pusa diad teritorya mi so mas makatalos ni na Ingles nen say siak.’ Tan oniay inkuan nen Kathie: “Sanen inmalis ak ed kongregasyon ya Español, nauman so kipapasen ko, a natan et anggapo la iramay pigaran iyaaralan ko na Biblia tan dakel a papawilen ko. Pakaliknak et anggapoy nagagawaan ko.”

Importante dia so pakawalaan na positibon awawey. Oniay inkatunongan nen Hiroko sanen nadidismaya la: “No sarag na arum, sarag ko met.” Oniay inkuan nen Kathie: “Ninonot koy masiken ko, ya onaaligwas a maong tan dakel lay nagagawaan to diad kongregasyon. Tinmulong itan ed siak pian onaligwas ak. Dakel nin siansia so papaaligwasen ko, balet ta kalkalnan makakaaral ak lan manpulong tan manbangat, tan satan so mamapaliket ed siak.” Oniay inkuan met na masiken ton si Jeff: “Makapadismaya no agmo natatalosan so amin a nibabaga diad saray iyaanunsio tan diad saray miting na mamatatken. Kaukolan koy magmaliw a matua tan mapaabeba tan tetepeten ko no anto iray detalye, ingen malikeliket iray agagi ya ontulong.”

Pian agmakalikna na kesaw ed espiritual legan a mitutulongan ed kongregasyon a sananey so lenguahe, nepeg yon asikasoen ya unona so espiritualidad yo. (Mateo 5:3) Oniay inkuan nen Kazuyuki, a dakel lan taon a manlilingkor diad lawak a mansasalitay Portuges: “Importante a makapangan itayo na magenap ya espiritual a tagano. Lapud satan, sikamin sankapamilyaan et manaaral tan manpaparaan parad saray miting diad dilin lenguahe mi ontan met ed salitan Portuges.” Wala met iray onaatendi a sagpaminsan diad saray pantitipon a manguusar ed dilin lenguahe ra. Niarum ni, makana a walaan kayo na magenap a painawa.—Marcos 6:31.

Ikonsidera so Amin a Nalalanor

No sikayoy mannononot ya onalis ed kongregasyon a manguusar na sananey a lenguahe, nepeg yon ikonsidera so amin a nalalanor ed panggawa ed satan. (Lucas 14:28) Nipaakar ed saya, say sankaimportantian iran aspekto ya ikonsidera et say espiritualidad yo tan say relasyon yo ed si Jehova. Aral yon maong so situasyon yo tekep na pikakasi. Ikonsidera met so kipapasen na asawa yo odino ananak yo. Tepetan yoy inkasikayo, ‘Kasin wala ak ed kipapasen tan mabiskeg so espiritualidad ko tan emosyon ko pian gawaen itan a mabayag a proyekto?’ Sakey a makabat a kurang so panggawa na sankaabigan parad espiritualidad yo tan say pamilya yo. Dakel so kaukolan a gawaen tan naliknam so pirmin liket inerman so panlilingkoran mo bilang manangiyabawag na Panarian.

Parad saraman so makapanlingkor ed kongregasyon a sananey so lenguahe, dakel so nagamoran da a tumang. “Sakey iya ed saray sankaliketan a naeksperiensyak ed bilay ko,” so inkuan nen Barbara, a sikaran sanasawa et inmalis ed kongregasyon a mansasalitay Español. “Singa kami manaaral lamet ed katuaan na Biblia. Misalsalamat ak ed sayan pankanawnawa, nagkalalo la lapud agmi nayarian so man-misionaryo ed sananey a bansa.”

Diad sankamundoan, nilibo ya ordinaryon totoo a nandurumay edad da so mangaawat ed angat ed panaral na sananey a lenguahe pian nilaknab so maong a balita. No sakey ka ed sikara, pansiansiaen a duga so motibom tan positibo so awawey mo. Manuna ed amin, manmatalek ka ed si Jehova a bendisyonan to iray sagpot mo.—2 Corinto 4:7.

[Litrato ed pahina 18]

Maples tan mainomay a naaralan so lenguahe no onatendi ed saray klase a walay kualipikadon managbangat

[Litrato ed pahina 20]

Nepeg ya agmo papaulyanan so espiritualidad mo legan kan manaaral na sananey a lenguahe