Anto so Ontulong ed Sikayo a Natalosan so Biblia?

“INYAMOT mo so sarayan bengatla ed saray makabat tan makatalos, et sikara so impasingawey mo ed saray ugugaw.” (Lucas 10:21) Sarayan salita ya imbalikas nen Jesus ed Ama ton walad tawen so mangipapabitar a pian natalosan so Biblia, nepeg a walaan itayoy dugan awawey odino ugali. Say kakabatan nen Jehova so niparungtal diad impangiter to na libro a talagan natalosan labat na saray mapaabeba tan paibangat a totoo.

Maslak ed sikatayo et nairapan a manpaabeba. Amin tayo so akatawir ed tendensian manpaatagey. Niarum ni, manbibilay itayo ed “saray kaunoran ya agew” diad limog na totoo a ‘mangaaro ed lamalaman da, mayu-uges, mapasang.’ (2 Timoteo 3:1-4) Saraya so ug-ugalin mangamper ed pakatalos tayo ed Salita na Dios. Makapaermen ta amin tayo anggan panon et naiimpluensyaan na kaliberliber tayo. Panon kayo sirin a nawalaan na ugalin nakaukolan pian natalosan so Biblia?

Pangiparaan ed Puso tan Nonot

Si Esdras, a lider na totoo na Dios nensaman, so ‘angipasen [odino, angiparaan] ed puso to a mananap ed tunong nen Jehova.’ (Esdras 7:10) Wala kasi nagawaan pian niparaan tayo so puso tayo? On, wala. Nayarin gapoan tayo diad pakawalaay dugan panmoria ed Kasulatan. Oniay insulat nen apostol Pablo ed saray kapara ton Kristiano: “Sanen inawat yo ed sikami so salita ya ingganggan, a salanti salita na Dios, inako yo ya aliwan singa salita na totoo, balet unong ed katuaan, say salitay Dios.” (1 Tesalonica 2:13) Anggaman totoo so inusar a mangisulat ed Kasulatan, nanlapud si Jehova so insulat da. No bidbiren tayo itan ya importantin katuaan et magmaliw a mas lukas so nonot tayo ed babasaen tayo.—2 Timoteo 3:16.

Say sananey nin nagawaan pian niparaan so puso tayo et say pampikasi. Lapud pinuyanan na masanton espiritu so Biblia, natalosan tayo so mensahe na satan diad tulong na satan ya espiritu. Kaukolan tayon kerewen itan a tulong diad pikakasi. Imanoen no panon iyan nampagaan na salmista ya angisulat: “Ikdan mo ak na pakatalos, et unoren ko so ganggan mo; on, sikato so sumpalen ko ed sankasimoonan a pusok.” (Salmo 119:34) Kaukolan ya aliwa labat lan say mental ya abilidad so ipikasi tayo pian natalosan so akasulat noag pati say sakey a puson mangawat ed ibabaga na satan. Pian natalosan so Biblia, kaukolan a mabulos itayon mangawat ed no anto so katuaan.

Legan yon mandadalepdep pian nawalaay dugan disposisyon, nonoten no antoy nitulong ed sikayo na panagaral na Biblia. Dakel iray maabig a rason tayo pian basaen so Salita na Dios, balet say sankaimportantian ed amin et tulongan itayo na satan ya onapit ed Dios. (Santiago 4:8) Legan tayon babasaen so nipaakar ed saray  reaksion nen Jehova ed nanduruman sirkumstansya, no panon ton papablien iramay mangaaro ed sikato, tan no panoy pidedeneng to ed saramay mangikakaindan ed sikato, natebek tayo so personalidad to. Nepeg a say lawas manunan motibo tayo ed pambasa na Biblia et say pakapikabat a nagkalalo ed Dios pian onelet so relasyon tayo ed sikato.

Saray Amper ed Pakawalaay Dugan Ugali

Antoy nayarin makasbel ed pakatalos tayo ed Salita na Dios? Say sakey et say lingon katooran. Alimbawa, nayarin sisiaen yoy ibabaga tan opinyon na saray dederlengen yo. Balet, panon to no sarayan indibidual et agtalaga manusuporta tan mamapabli ed katuaan na Salita na Dios? No ontan iray sirkumstansya, nayarin magmaliw a mairap so pantalos ed peteg ya ibabangat na Biblia. Kanian, papasesegen itayo na Biblia ya usisaen a maong so nibangat ed sikatayo.—1 Tesalonica 5:21.

Naeksperiensya na ina nen Jesus a si Maria so ontan ya angat. Abangonan to so panrespeton maong ed saray tradisyon na Judio. Maseet ton tinulok so Mosaikon Ganggan tan seguradon sikatoy linma ed sinagoga. Sanen ontatatken la, atebek to a say paraan na panagdayew ya imbangat ed sikato na saray atateng to et agla aabobonan na Dios. Kanian inawat nen Maria so bangat nen Jesus tan sikatoy kaiba ed saray sankaunaan a membro na Kristianon kongregasyon. (Gawa 1:13, 14) Aliwa iyan agpangitaltalek ed saray atateng to odino ed saray tradisyon da; noagta satan so balikas na panangaro to ed Dios. Pian pinabangan tayo so Biblia, kaukolan a manmatoor itayo ed Dios, a singa si Maria, imbes a diad siopaman.

Makapaermen, dakel a totoo so agmamapabli ed katuaan na Biblia. Kontento la so arum a manumbok ed saray relihyoson tradisyon a nibase ed katilaan. Napatnagan ed pananalita tan paraan na kabibilay na arum so agda pangingalngalep ed katuaan. Tua, say pangawat ed katuaan na Biblia et mankaukolay panagsakripisyo: nayarin lapud satan et agmipakna ed sikayo iray kakaaro, kakaabay, katrabahoan, tan anggan say pamilya yo. (Juan 17:14) Anggaman ontan, oniay insulat na makabat a too: “Saliwen mo so tua, tan sikato so agmo ilako.” (Uliran 23:23) No pablien yon maong so katuaan, tulongan kayo nen Jehova a natalosan so Biblia.

Say sananey nin makasbel ed pakatalos ed mensahe na Biblia et say agpanlabay a pangiyaplika ed ibabaga na satan. Inkuan nen Jesus ed saray babangatan to: “Ed sikayo niiter ya amtaen yo so saray misterios na panarian na tawen, ingen ed sikara agniiter. Ta say puso na sayan baley abalang toy liknaan to; tan saray layag da mairap a mandengel.” (Mateo 13:11, 15) Kaslakan ed saramay kinalaran odino pinulongan nen Jesus et agkinmiwas tan agmalabay a manguman. Agaylay pidumaan da ed samay manbiabiahen negosyante a tinukoy nen Jesus diad sakey ya ilustrasyon! Sanen nalmo na negosyante so mabmablin perlas, tampol ton inlako so amin a walad sikato pian nasaliw itan. Nepeg ya ontan met kaimportante ed sikatayo so pakatalos ed katuaan na Biblia.—Mateo 13:45, 46.

Say Angat ed Pakawalaay Awawey a Paibangat

Say baleg ya angat ed pakatalos ed Biblia et no kasin paibangat itayo. Nayarin nairapan so sakey a mangawat ed saray balon ideya manlapud sakey a toon ompatnag ya ordinaryo lambengat. Balet, saray apostol nen Jesu-Kristo et totoon “andi aral tan kabanyakan.” (Gawa 4:13) Impaliwawa nen Pablo so rason sanen insulat to: “Nengneng yo, agagi, so katawagan yo, ta anggapo so dakel a makabat unong ed laman, anggapo so dakel a makapanyari, anggapo so dakel a mabli a too, ed saray natawag: Noag ingen pinili Dios so saray bengatla a makulangkulang na mundo ya onkana a pamabaing to ed saray makabat.” (1 Corinto 1:26, 27) No nairapan kayo a manpaabeban paibangat ed ordinaryon too, tandaan a sikatoy uusaren lambengat na Dios pian ibangat kayo. Anto ni babaleg a kagalangan nen say paibangat ed si Jehova, say ‘[Matalonggaring a] Managbangat’ tayo?—Isaias 30:20; 54:13.

Sakey a nairapan a mangawat ed instruksion na ordinaryon too et say Siryanon militar a komander a si Naaman. Sanen manaanap na tambal ed kating to, nila to so propeta nen Jehova a si  Eliseo. Balet say instruksion na Dios parad iyabig nen Naaman so nipasabi ed sikato panamegley na sakey a lingkor. Nairapan si Naaman a manpaabeban mangawat lapu ed mensahe tan ed paraan na inkipresenta na satan, kanian diad gapo et agto tinulok so imbilin na propeta na Dios. Ag-abayag, inuman nen Naaman so ugali to tan sikatoy inmabig. (2 Arari 5:9-14) Naeksperiensya tayo met so ontan a subok sano manbasa itayo na Biblia. Nayarin naaralan tayo a pian onabig ed espiritual tan moral et kaukolan tayon tumboken so balon paraan na kabibilay. Kasin mapaabeba tayon abuloyan so sakey a mangibangat ed nakaukolan tayon gawaen? Saraman labat so mabulos a paibangat so makatalos ed Biblia.

Angipanengneng na maabig ya ugali so sakey a makapanyarin laki diad uley nen Candace, a reyna na saray Etiope. Sikatoy akalugan ed karwahe to pian onsempet la ed Aprika sanen sikatoy binatik ya inamparan nen babangatan a Felipe. Tinepetan nen Felipe so laki no kasin natatalosan to so babasaen to. Et say opisyal so mapaabeban tuloy ya inmebat: “Panon so pakayarik, no anggapo so mangiwanwan ed siak?” Sanen atalosan na laki so salita na Dios, sikatoy abautismoan. Kayari na saman, “intuloy to so dalan to a malikeliket.”—Gawa 8:27-39.

Kaslakan ed saray Tasi nen Jehova et ordinaryon totoo. Sinimba iran mangikokondukta na saray panangiyaral na Biblia ed kaabungan na masulok ya anem milyon a totoo. Lapud ibabangat na Biblia so sankaabigan a paraan na kabibilay, ipapaliwawa na satan so alenleneg a seguradon ilalo na katooan, tan ipapanengneng na satan no panon a nakabat so Dios, naamtaan na minilyon a say panaral na Biblia tan pantalos ed ibabaga na satan et agnaparaan a panliket. Satan so makapaliket a pankanawnawan lukas ed sikayo.

[Litrato ed pahina 7]

Nairapan si Naaman a mangawat ed saray instruksion na ordinaryon lingkor

[Litrato ed pahina 7]

Mamaligsa ed puso tayo so pakatalos ed Biblia