Kapeten Iray Kakaukolanen Parad Makristianon Bautismo

“Anto so makasbel a nabinyagan ak?”—GAWA 8:36.

1, 2. Panon ya inggapo nen Felipe so impitongtong to ed Etiopen opisyal, tan anto so mamekder a sayan too et maespiritual?

 SAKEY odino duaran taon kayari na impatey nen Jesus, walay sakey ya opisyal na gobierno a nampaabalaten diad karsadan manlapud Jerusalem anggad Gaza. Makapakesaw so impanbiahe to diad panamegley na karwahe, a nayarin manga 1,500 a kilometro so kaarawi. Sayan debosyonadon too so nanlapud Etiopia ya amaarap ed Jerusalem pian mandayew ed si Jehova. Diad andukey a biahe to a papawil, makabat ton inusar so panaon diad impanbasa ed Salitay Dios, a talagan pakapatnagan na pananisia to. Naimano nen Jehova iyan masimoon a too, tan diad panamegley na sakey ya anghel et inwanwan Toy babangatan a Felipe a manpulong ed sikato.—Gawa 8:26-28.

² Mainomay a nigapo nen Felipe so impantongtong da, lapu ed maksil a pambabasa na Etiopen opisyal, unong a kustombre la ed saraman a panaon. Sirin, nadngel nen Felipe so pambabasa na saman ya opisyal ed lukot nen Isaias. Asagyat so interes na too lapud simplin intepet nen Felipe: “Natalosan mo so babasaen mo?” Saya so angitonton ed impantotongtong da nipaakar ed Isaias 53:7, 8. Diad kaunoran, si Felipe so ‘nampulong ed sikato nipaakar ed si Jesus.’—Gawa 8:29-35.

3, 4. (a) Akin a tampol a binautismoan nen Felipe so Etiope? (b) Antoran tepet so konsideraen tayo natan?

³ Diad loob na antikey a panaon, atalosan na Etiope so betang nen Jesus ed gagala na Dios, ontan met ed pankaukolan a magmaliw a bautismadon babangatan nen Kristo. “Anto so makasbel a nabinyagan ak?” so intepet to ed si Felipe sanen  anengneng to so kawalaan na danum. Siempre, saraya so nikadkaduman kipapasen. Sakey iyan too a walaan lay pananisia tan mandadayew la ed Dios bilang Judion proselita. Nayarin mabayag ni so panalagar to pian makapampabautismo. Mas importante et atalosan la na sayan too no anto so kakaukolanen na Dios ed sikato, tan labay toy onkiwas a sigpot-puso. Si Felipe so maliket ya inmabobon ed kerew to, tan say Etiope, kayari ton abautismoan, so ‘nantultuloy ed dalan to a malikeliket.’ Maseguron sikato so nagmaliw a maseseg a manangipulong na maong a balita diad mismon bansa to.—Gawa 8:36-39.

⁴ Anggaman say dedikasyon tan bautismo et seryoso odino agbengatbengat a gawaen, say ehemplo na Etiopen opisyal so mangipapatnag a walaray pankanawnawa sano saray indibidual so nampabautismo a tampol kayari ran nadngelan so katuaan na Salitay Dios. * Kanian, matukoy lambengat ya ikonsidera iray onggendan a tepet: Panon so nepeg a pamparaan na sakey parad bautismo? Kapigan a nepeg ya ikonsidera so edad? Anton iyaaligwas ed espiritual so nepeg a napatnagan ni sakbay a nabautismoan so sakey a too? Manuna ed amin, akin a kakaukolanen nen Jehova ed saray lingkor to so panggawa ed sayan kundang?

Sakey a Masimoon a Pipapaknaan

5, 6. (a) Panon so inkiwas na saray totoo nen Jehova nensaman diad panangaro to? (b) Anton maapit a relasyon ed Dios so napanggayagaan tayo sano abautismoan tayo la?

⁵ Kayari ton inliktar iray Israelita manlapud Ehipto, sikara so mabulos ya inawat nen Jehova bilang say ‘pinabpabli ton kayarian,’ pian aroen tan salimbengan ira tan gawaen ira a ‘masanton nasyon.’ Balet, pian nagamoran iratan a bendisyon, saray totoo so kinaukolan ya onkiwas ed panangaro na Dios diad espisipikon paraan. Ginawa ra itan diad inyabobon dan gawaen so ‘amin a sinalita nen Jehova’ tan akisipanan ira ed sikato. (Exodo 19:4-9) Nen inmunan siglo, ingganggan nen Jesus iray patumbok to a manggawa ira na babangatan a totoo ed amin a nasyon, tan saramay angawat ed bangat to so abautismoan. Say maong a relasyon ed Dios so akadepende ed pananisia ed si Jesu-Kristo tan pampabautismo.—Mateo 28:19, 20; Gawa 2:38, 41.

⁶ Ipapatnag na sarayan Makasulatan a salaysay a bebendisyonan nen Jehova iramay mipapaknaan tan manotoor ed masimoon ya impisipanan dan manlingkor ed sikato. Parad saray Kristiano, say dedikasyon tan bautismo et importante iran kundang a mangitonton ed panamendisyon nen Jehova. Determinado itayon ontumbok ed saray dalan to tan anapen so panangigiya to. (Salmo 48:14) Bilang resulta, si Jehova so piguratibon mangitatabin ed sikatayo diad dalan a nepeg tayon pankurangan.—Salmo 73:23; Isaias 30:21; 41:10, 13.

7. Akin a personal a desisyon tayo so panggawa na dedikasyon tan bautismo?

⁷ Say nepeg a mamakiwas ed sikatayon manggawa ed sarayan kundang et say panangaro ed si Jehova tan say pilalek a manlingkor ed sikato. Agnepeg a manpabautismo so sakey lapu lambengat ta walay angibagan sikatoy abayag lan manaaral odino lapud manpabautismo laray kakaaro to. Natural lambengat a pasesegen na saray ateng tan arum niran matakken a Kristiano so sakey a mannonot nipaakar ed dedikasyon tan bautismo. Pinaseseg nen apostol Pedro iramay akadngel ed sikato nen Pentecostes a ‘manpabinyag’ ira. (Gawa 2:38) Anggaman kuan, say dedikasyon tayo et personal a pamaakaran, tan anggapo so makapanggawa ed satan parad sikatayo. Desisyon tayon mismo so panggawa ed linawa na Dios.—Salmo 40:8.

Magenap a Pamparaan Parad Bautismo

8, 9. (a) Akin ya agmitunosan ed Biblia so panagbautismo ed kapangiyanak? (b) Anton iyaaligwas ed espiritual so nepeg a gawaen la na saray kalangweran sakbay a manpabautismo?

⁸ Sarag la kasi na ananak so mangidedika ed inkasikara a nibase ed suston pakatalos? Anggapo so ibabaga na Kasulatan no anton edad so kakaukolanen parad bautismo. Balet, saray kapangiyanak so seguradon agnayarin magmaliw a mananisia, mangagamil na pananisia, odino  manggawa na dedikasyon ed Dios. (Gawa 8:12) Nipaakar ed saray Kristiano nen inmunan siglo, oniay inkuan na historyador a si Augustus Neander diad libro ton General History of the Christian Religion and Church: “Nen inmuna, say bautismo so gagawaen lambengat ed saray walad edad, lapud natatalosan da so maapit ya impansiglaotan na bautismo tan pananisia.”

⁹ Diad biang na saray tobonbalo, arum so inmaligwas la ed espiritualidad da anggaman malangwer niran tuloy, bangta say arum et kaleganan na itatakken da. Balet, sakbay a manpabautismo, say kalangweran so nepeg a nawalaan na personal a relasyon ed si Jehova, suston pakatalos ed saray manunan bangat na Kasulatan, tan malinew a pakatalos ed lalanoren na dedikasyon, a singa diad biang na saray wala la’d edad.

10. Antoran kundang so nepeg nin gawaen sakbay na dedikasyon tan bautismo?

¹⁰ Binilin nen Jesus iray babangatan to ya ibangat da iray balo ni nipaakar ed amin a bengatlan ingganggan to. (Mateo 28:20) Kanian diad primero et nakaukolan ed saray balo ni so onggamor na suston pikakabat ed katuaan, tan bilang resulta et natulongan ira a makabayubo ed pananisia ra ed si Jehova tan ed Salita to. (Roma 10:17; 1 Timoteo 2:4; Hebreos 11:6) Insan, sano natenyeg so puso na sakey a too ed Makasulatan a katuaan, satan so mamakiwas ed sikaton magbabawi tan mangibeneg ed datin kabibilay to. (Gawa 3:19) Diad kaunoran, say too so onsabi ed punto a kaliktan to lan idedika so inkasikato ed si Jehova tan manpabautismo, a singa ingganggan nen Jesus.

11. Akin ya importante a regular itayon mibiang ed panagpulong a kimey sakbay a manpabautismo?

¹¹ Say sakey nin importantin kundang ed iyaaligwas ed bautismo et say pibibiang ed panangipulong ed maong a balita na Panarian. Saya so importantin tuloy a kimey a pagagawa nen Jehova ed totoo to legan na sarayan kaunoran ya agew. (Mateo 24:14) Naliketan sirin iray agbautismadon manangipalapag ya itongtong ed arum so nipaakar ed pananisia ra. Say pibiang ed sayan kimey so mangiparaan met ed sikara parad regular tan maseseg a pibibiang ed lawak na ministeryo kayari na bautismo.—Roma 10:9, 10, 14, 15.

Wala Kasi so Mangaamper ed Sikayo a Manpabautismo?

12. Anto so mangaamper ed arum diad pampabautismo ra?

¹² Walaray arum a masuyat nin manpabautismo lapud agda ni labay so mangawat ed responsabilidad a katekep ed satan. Nononoten da a kaukolan so manggawa na importante iran pananguman ed bilay da pian nakapet da iray estandarte nen Jehova. Odino nayarin tatakotan da a sikara so nairapan a manggawa ed saray kakaukolanen na Dios kayari ran manpabautismo. Arum ni ingen so nayarin mankatunongan, “Nayarin onsabi so agew et makagawa ak na mauges tan nadispelosip ak ed kongregasyon.”

13. Diad panaon nen Jesus, anto so angamper ed pigaran indibidual a magmaliw komon a papatumbok to?

¹³ Diad panaon nen Jesus, inabuloyan na arum so personal iran interes da tan say relasyon da ed pamilya a mangamper ed sikara manlapud pagmaliw a babangatan to. Imbaga na sakey ya eskriba a tumboken to si Jesus inerman so laen To. Balet impabitar nen Jesus a mabetbet ya anggapo so pasen a pampainawaan to ed labi. Sanen inimbitaan nen Jesus so sakey nin ondedengel pian magmaliw a patumbok to, inmebat iyan too a sikato so kinaukolan nin ‘mangiponpon’ ed ama to. Nayarin say labay to et mansiansia ni ed abung da tan alagaren to nin ompatey so ama to, imbes a tumboken to si Jesus tan asikasoen itan a responsabilidad ed pamilya to no nasabi la itan. Diad kaunoran, inkuan na komatlon indibidual a sakbay ton tumboken si Jesus, kinaukolan to so ‘manpatanir’ ni ed sankaabungan to. Deneskribe nen Jesus itan a panangipaleen bilang ‘ilingay ed  saray binenegan.’ Kanian, ompatnag a saramay malabay a manggawa na ontan so naynay a manbabaraan pian napaliisan da so Makristianon responsabilidad da.—Lucas 9:57-62.

14. (a) Panon so inkiwas di Pedro, Andres, Santiago, tan Juan sanen inimbitaan ira nen Jesus a magmaliw a managsigay na totoo? (b) Akin ya agtayo nepeg a magmaliw a masuyat a mangawat ed pako nen Jesus?

¹⁴ Midumaan a tuloy balet so alimbawa di Pedro, Andres, Santiago, tan Juan. Sanen sikara so inimbitaan nen Jesus ya ontumbok ed sikato pian magmaliw a managsigay na totoo, oniay kuan na Biblia: “Tampol a tinaynan da so saray iket da, tan tinmumbok ira ed sikato.” (Mateo 4:19-22) Diad impandesisyon dan tampol, naeksperiensya ran mismo imay imbaga nen Jesus ed saginonor: “Ala yoy pakok ed sikayo, tan manaral kayo’d siak; ta mauyamo ak tan mapaabeba ak a puso; et naromog yoy inawa nipaakar ed saray kamarerwa yo. Ta say pakok mainomay, tan anlemew so awit ko.” (Mateo 11:29, 30) Anggaman walay responsabilidad a tarok na pampabautismo, sikatayo so pinaseguroan nen Jesus a satan so maong tan anlemew, a mangiter ed sikatayo na baleg a pakainawaan.

15. Panon ya ipapatnag na saray alimbawa nen Moises tan Jeremias a makapanmatalek itayo ed pananulong na Dios?

¹⁵ Siempre, normal labat so panlikna na agpakasarag. Alikna met nen Moises tan Jeremias ya agda sarag a sumpalen iray pagagawa nen Jehova ed sikara. (Exodo 3:11; Jeremias 1:6) Panon ira a pinaseguroan na Dios? “Agka antakot nisengeg ed sikara,” so inkuan to ed si Moises. “Wala ak ed sika pian ilaban ta ka,” so insipan to ed si Jeremias. (Exodo 3:12; Jeremias 1:8) Sikatayo met so makapanmatalek ed pananulong na Dios. Say aro tan panagmatalek ed Dios so ontulong ed sikatayo pian natalonaan so sebangsebang a panduaruwa no kasin nasumpal tayo so dedikasyon tayo. “Dia ed aro anggapo so takot,” so insulat nen apostol Juan, “bangbalet say ayadyarin aro ipaliis to so takot.” (1 Juan 4:18) Nayarin antakot so melag ya ugaw a laki sano sikato so manakar a bukor, balet ta sikato so matalek sano manaakar a sankatabin na ama to. Ontan met, no manmatalek itayo ed si Jehova diad amin a puso tayo, isisipan to ya ‘itonton to so saray basbas tayo’ a singa panaakar tayon walad dikingan to.—Uliran 3:5, 6.

Sakey a Mapagalang ya Okasyon

16. Akin a say bautismo so mangilalanor ed sigpot a kipalseb ed danum?

¹⁶ Sakbay na bautismo et wala ni so Makasulatan a paliwawa a mangipalinew ed kaimportantian na Makristianon bautismo. Diad pansampot na satan a paliwawa, kekerewen ed saray kandidato ya iyabawag da ed publiko so pananisia ra diad iyebat ed duaran tepet ed bautismo. (Roma 10:10; nengnengen so kahon ed pahina 22.) Insan ipalseb ed danum iray kandidato, a tumboken so padron a ginawa nen Jesus a mismo. Ipapabitar na Biblia a kayarin abautismoan si Jesus, sikato so “tinmatdang a tampol a nanlapu ed danum.”  (Mateo 3:16; Marcos 1:10) Malinew, si Jesus so sigpot ya impalgep nen Juan a Managbautismo. * Say sigpot a panangipalseb so matukoy a mangisisimbolo ed makatantandan pananguman a ginawa tayo la ed bilay—sikatayo so piguratibon inatey ed datin kabibilay tayo tan onggapo lamet ed balon bilay diad panaglingkor ed Dios.

17. Panon a makatulong iray kandidato na bautismo tan saray maniimaton ed pagmaliw a mapagalang na okasyon?

¹⁷ Say bautismo so seryoso tan maliket ya okasyon. Ipapabitar na Biblia a si Jesus so manpipikasi sanen sikato so impalgep nen Juan diad Ilog Jordan. (Lucas 3:21, 22) Mitunosan ed sayan alimbawa, saray kandidato na bautismo natan so nepeg a mangipatnag na manepeg ya awawey. Tan lapud ipapaseseg ed sikatayo na Biblia a mankawes na masimpit diad inagew-agew a panagbilay, agta nagkalalo la so panumbok tayo ed satan a simbawa diad agew na bautismo tayo! (1 Timoteo 2:9) Nipatnag met na saray maniimaton so manepeg a panagrespeto diad maalwar ya italineng ed paliwawa nipaakar ed bautismo tan diad panimaton ed nagagawa diad organisadon paraan.—1 Corinto 14:40.

Saray Bendisyon a Panggagayagaan na Saray Bautismadon Babangatan

18, 19. Antoran pribilehyo tan bendisyon so tarok na pambautismo?

¹⁸ No nidedika tayo lay inkasikatayo ed Dios tan abautismoan tayo la, sikatayo so nagmaliw lan kabiangan na nikadkaduman pamilya. Unona, si Jehova so nagmaliw ya Ama tan Kaaro tayo. Sikatayo so arawi ed Dios sakbay itayon nampabautismo, balet natan et sikatayo lay akapipulangan ed sikato. (2 Corinto 5:19; Colosas 1:20) Diad panamegley na bagat nen Kristo, sikatayo so inmapit la ed Dios tan sikato so onapit ed sikatayo. (Santiago 4:8) Dedeskribien nen propeta Malaquias no panon ya iimanoen tan dedengelen nen Jehova iramay manguusar tan mangaakbibit ed ngaran to, tan ilalaktip to so kangaranan da ed libro na pakanodnonotan to. “Sikara naani so kien ko,” so inkuan na Dios, “et imasakit ko ra naani, singa sakey a too imasakit to so dili ya anak to a laki a manlingkor ed sikato.”—Malaquias 3:16-18.

¹⁹ Say bautismo so ontulong met ed sikatayo pian magmaliw a kabiangan na sankamundoan ya impanaagi. Sanen intepet nen apostol Pedro no antoray bendisyon a nagamoran na saray babangatan nen Kristo lapud impansakripisyo ra, oniay insipan nen Jesus: “Balang sakey a tinaynan to ray kaabungan, ono agagi a lalaki, ono bibii, ono ama, ono ina, ono saray anak, ono daldalin, nisengeg ed ngaran ko, makaawat naani maminlasus, tan tawiren to naani so bilay a maando.” (Mateo 19:29) Kayari na pigaran taon, insulat nen Pedro so nipaakar ed interon “impanaagi” a “wala ed mundo.” Personal a naeksperiensya nen Pedro so tulong tan saray bendisyon na maaron impanaagi, tan naeksperiensya tayo met itan.—1 Pedro 2:17; 5:9.

20. Anton alay abig ya ilalo so iyoopresi na bautismo?

²⁰ Niarum ni, impabitar nen Jesus a saramay ontumbok ed sikato so ‘manawir ed maandon bilay.’ On, say dedikasyon tan bautismo so mangiyoopresi ed sikatayo na ilalon ‘nabembenan so bilay a peteg’—say andi-anggaan a bilay diad balon mundo na Dios. (1 Timoteo 6:19) Anton magmaong a pundasyon ed arapen so posiblin nagawaan tayo parad inkasikatayon dili tan ed pamilya tayo? Sayan alay abig ya ilalo so ontulong ed sikatayon ‘manakar ed ngaran nen Jehova a Dios tayo ed ando lan ando lawas.’—Miqueas 4:5.

[Saray paimano ed leksab]

Kasin Nipaliwawa Yo?

• Panon tan akin a nepeg itayon onkiwas ed panangaro nen Jehova?

• Anton iyaaligwas ed espiritual so nepeg nin gawaen sakbay a manpabautismo?

• Akin ya agtayo nepeg ya abuloyan so takot ya agmakasumpal odino say inkamasuyat a mangawat ed responsabilidad a mangamper ed sikatayo ed pampabautismo?

• Antoran nikadkaduman bendisyon so napanggayagaan na saray bautismadon babangatan nen Jesu-Kristo?

[Tepetepet Parad Panagaral]

[Litrato ed pahina 26]

“Anto so makasbel a nabinyagan ak?”

[Saray litrato ed pahina 29]

Say bautismo et seryoso tan maliket ya okasyon