Sano Agamilen Yoy Autoridad yo, Aligen si Kristo

MANGA pigara lan taon so apalabas, walay ginawan eksperimento nipaakar ed walna na too a makapainteres iray resulta. Saramay kabiangan ed sayan eksperimento so inapag ed duaran grupo. Say sakey a grupo so intalaga a manguardia ed samay sananey a grupo ya intalaga bilang priso. Anto so agawa?

“Kalabas na pigaran agew,” nireport a “maslak ed [saray guardia] et nagmaliw a maabuso tan malames, a mabetbet iran manudusa, bangta saray priso so natatakot a maong tan unor-unor.” Oniay konklusyon na saray managsukimat: Amin lawarin totoo et nayarin napatitan ed lingon panangusar ed autoridad.

Susto tan Lingo a Panangusar ed Autoridad

Siempre, maabig so pansumpalan na suston panangusar ed autoridad. Makapangitarya itan na matukoy a panangidirehi tan makagunggona ed pisikal, emosyonal, tan espiritual. (Uliran 1:5; Isaias 48:17, 18) Balet, impatnag na asalambit ya eksperimento a naynay a wala so kapeligroan ed agmakatunongan a panangagamil na autoridad. Ipapaimano na Biblia itan a kapeligroan: “Sano say marelmeng a too manuley, say baley maningel.”—Uliran 29:2; Eclesiastes 8:9.

Mauges so epekto no abusoen na sakey so autoridad to, anggano maong so motibo to. Alimbawa, diad agano ni et kinmerew na dispensa ed publiko so sakey ya ulop na managbangat na relihyon diad Irlandya lapud arum a managbangat so angabuso ed autoridad da ed saray ugugaw a nipudir ed sikara. Maabig met iray gagala na dakel ed sarayan managbangat, balet saray metodon uusaren na arum et makaderal a tuloy. Inreport na sakey a peryodiko a “dakel ya ugugaw so ataktakot ed sobran inkabayolenti tan inkaruksa na dakel a managbangat ya agagi.” (The Irish Times) Diad ontan, panon mon naagamil so autoridad mo diad paraan a mamakiwas ed arum a gawaen so sankaabigan da imbes ya onarawi odino nasakitan ira ed ibabagam odino gagawaen mo?—Uliran 12:18.

“Amin a Pakauley” et Niiter ed si Jesu-Kristo

Konsideraen so alimbawa nen Jesu-Kristo. Sakbay a tuloy na intokotok to ed tawen, oniay inkuan to ed saray babangatan to: “Amin a pakauley niiter ed siak ed tawen tan dia ed dalin.” (Mateo 28:18) Kasin ataktakot iray babangatan lapud satan? Kasin inisip da ya ompan ipatnag met nen Jesus so awawey a singa saray Cesar na Roma, a kabkabat a managbuyak ed panagprotesta odino panagrebelde?

 Say rekord na Biblia so maranet ya oneebat na andi! Aagamilen nen Jesus so autoridad to a singa ed pangaagamil ed satan nen Ama to. Anggaman si Jehova so manepeg a makapanyarin-amin a Soberano ed Uniberso, pilalek to so mabulbulos a panaglingkor na saray uuleyan to, ya aliwan mangamanga, natatakot, odino napapasootan a katutulok. (Mateo 22:37) Agbalot aabusoen nen Jehova so autoridad to. Ipapatnag itan na nikadkaduman pasingawey ed si propetan Ezequiel.

Diad satan a pasingawey, anengneng nen Ezequiel so apatiran anghel a mangiyaalangon ed inkasoberano na Dios. Kada sakey et walaan na apatiran lupa. “Nipaakar ed kapadpara na saray lupa ra,” so insulat nen Ezequiel, “walaan ira na lupa na sakey a too: et sikara ya apat walaan ira na lupa na sakey a leon ed nikawanan a diking; et sikara ya apat walaan ira na lupa na sakey a baka ed nikawigi a diking; sikara ya apat met walaan ira na lupa na sakey ya agila.” (Ezequiel 1:10) Sarayan apatiran lupa so mangirerepresenta ed apatiran manunan kalidad, odino atributos, na Dios a nasnaspot ya asimbang. Nipabidbir iraya diad Salita na Dios bilang: aro, ya inrepresenta na lupa na too; inkahustisya, ya inrepresenta na lupa na leon; tan kakabatan, ya inrepresenta na lupa na agila. Saraya a taloran atributos na Dios so onkukurang a mitunosan ed say komapat—say pakapanyari, ya inrepresenta na lupa na baka. Anto so kabaliksan na sayan amin? Ipapatnag na pasingawey a lawas aagamilen nen Jehova so ag-agetaran a pakapanyari tan autoridad to diad paraan a mitunosan ed arum niran manunan kalidad to.

Bilang pangaalig nen Jesu-Kristo ed Ama to, lawas ton aagamilen so autoridad to diad paraan a naspot a mitunosan ed aro, kakabatan, tan inkahustisya. Nainawaan a tuloy iray babangatan a manlilingkor ed silong na autoridad nen Jesus. (Mateo 11:28-30) Say manunan atributo a mangipapabidbir  ed si Jehova a Dios tan si Jesu-Kristo et say aro, aliwan say pakapanyari odino autoridad!—1 Corinto 13:13; 1 Juan 4:8.

Panon Yon Aagamilen so Autoridad Yo?

Komusta so nagagawaan yo ed sayan pamaakaran? Alimbawa, kasin uusaren yoy autoridad yo pian uleyan so pamilya yo unong ed dili iran panlabayan yo? Kasin takot odino panangaro so mamapakiwas ed saray membro na pamilya yo a mipakna ed saray desisyon yo? Kasin tutuloken da kayo lapud inkabiskeg yo? Saraya so tepet a nayarin ikonsidera na saray ulo na pamilya pian napansiansia ra so teokratikon uksoyan ed loob na pamilya.—1 Corinto 11:3.

Panon to no walaan kayo na babaleg ya autoridad ed Kristianon kongregasyon? Pian naseguro a susto so pangaagamil yo ed saratan, usisa yo so inkasikayo unong ed saray onggendan a prinsipyo ya impuyan nen Jehova a Dios tan inyaplika nen Jesu-Kristo.

“Say aripen na Katawan . . . maamo ed ganagana, . . . matepel. A bangatan to a matayarno so saray masumpa.”—2 Timoteo 2:24, 25.

Saray arum ya indibidual diad inmunan Kristianon kongregasyon so awalaan na baleg ya autoridad. Alimbawa, ayarian nen Timoteo a ‘bilinen so arum a totoo ya ag-ira mangibangat na sananey a doktrina.’ (1 Timoteo 1:3) Balet, makaseguro itayo ya impatnag nen Timoteo iray maridios a kalidad ed amin ginawa to, lapud sikato so andi-duaruwan kinmiwas unong ed simbawa nen Pablo a manbangat a “matayarno” tan “maamo ed ganagana” diad pangaasikaso to ed Kristianon kongregasyon. Lapud sikatoy malangwer ni, kinaukolan to so onkiwas a singa sakey a galgalangen ya anak a laki dia ed saray mas matakken tan sakey a manangiyansakit ya agin laki ed saray mas malangwer. (1 Timoteo 5:1, 2) Diad ontan a maaron panangasikaso, nipatnag na Kristianon kongregasyon so maligsan espiritu tan panaaroan na pamilya, ya aliwan singa ed korporasyon na negosyo ya andiay pililikna tan maruksa.—1 Corinto 4:14; 1 Tesalonica 2:7, 8.

“Saray makauley na saray Gentiles sikara so katawan ed sikara, tan saray manunaan agamilen da so pakauley da ed sikara. Aliwan ontan naani dia ed sikayo; noag ingen siopaman a labay toy magmaliw a baleg ed sikayo sikato naani managlingkor yo.”—Mateo 20:25, 26.

Saray makapanyarin manuley ed mundo et ompapasen a “katawan” ed saray uuleyan da diad pangipipilit da ed panlabayan da tan diad pangididikta ra ed no panon a gawaen iray bengatla, a dusaen da ira no onsunggay ira. Balet, si Jesu-Kristo so angidanet ed panaglingkor ed arum, ya ag-ira dedesdesen. (Mateo 20:27, 28) Sikatoy lawas akideneng ed saray babangatan to diad maaro tan manangiyansakit a paraan. Sano aligen yo so ehemplo nen Jesus, main-inomay a  mikoopera ed sikayo so arum. (Hebreos 13:7, 17) Main-inomay met iran manggawa na labas ni nen say kekerewen ed sikara, a gawaen da itan a mabulbulos tan aliwan dia ed panamasoot.—Mateo 5:41.

‘Pastolan yo iray pulok na Dios a wala ed sikayo, ya agkayo pakatawan ed saray nimatalek a nitanda ed sikayo, noag ingen gawaen yoy inkasikayo a pinagkauliran a tumboken na saray pulok.’—1 Pedro 5:2, 3.

Bibidbiren na saray manangasikaso natan ya eebatan da ed Dios so pangasikaso ed espiritual a pankaabigan na amin a kabiangan na kongregasyon. Agda leleglemewen itan a responsabilidad. Sikaray mabulbulos, magunaet, tan maaron mangaasikaso ed pulok na Dios. Singa si apostol Pablo, sikaray mansasagpot a mamabiskeg tan mamaelet ed pananisia na saray walad panangasikaso ra, ya ag-ira onkikiwas bilang kakatawan na pananisia ra.—2 Corinto 1:24.

Sano saray mamatatken so kaukolan a mangiter na matukoy a simbawa, gagawaen da itan tekep na espiritu na tayadno pian nipetek so sakey a nankasalanan odino pian natulongan so kaparan Kristiano ya onaligwas ed espiritual. Nonodnonoten da so bilin nen apostol Pablo: “Agagi, no wala so nasagmakan ed anton pankasalananan, sikayo a naespirituan sikato komon so ipawil yo ed espiritu na tayadno; a motekteken mo so inkasikan dili, ta ompan lamang natukso ka met.”—Galacia 6:1; Hebreos 6:1, 9-12.

“Mantetepelan so sakey tan sakey, tan manpeperdonaan so balang sakey . . . Ikawes yo so aro, a sikato so singer yo ed inkayadyari.”—Colosas 3:13, 14.

Panon kayon mideneng no walaray agnaspot ya akakapet ed saray estandarte na Kristiano? Kasin ikokonsidera yo so ag-ayadyarin kipapasen da, a singa gagawaen nen Jehova tan si Jesu-Kristo? (Isaias 42:2-4) Odino ipipilit yo so mapeget a panangiyaplika ed walan nisulat ed ganggan diad amin a kipapasen? (Salmo 130:3) Tandaan a matukoy so pangipatnag na kauyamoan anggad posible bangta magmaliw a mapekder lambengat sano nakaukolan. Makatulong so ikiwas tekep na aro pian napabiskeg so kompiyansa tan panagmatalek yo ed sakey tan sakey, legan yon aagamilen so autoridad yo ed sikara.

No walay nimatalek ed sikayo ya autoridad, pansagpotan yon aligen si Jehova a Dios tan si Jesu-Kristo sano agamilen yo itan. Nodnonoten imay alay abig ya impaneskribe na salmista ed paraan na pangaagamil nen Jehova na autoridad to ed totoo to. Oniay inkanta nen David: “Si Jehova so managpastol ed siak; agak naani onkulang. Parukolen to ak ed malambot ira a pastolan: itonton to ak ed abay na saray mareen a danudanum. Pasimbaloen to so kamarerwak; ibasbas to ak ed saray pulpulong na inkatunong ed panamegley na ngaran to.” Nipaakar met ed si Jesus, oniay nabasa tayo: “Siak so maong a pastol, et kabat ko so saray kayarian ko, tan saray kayarian ko kabat da ak. Salanti unong a say Ama kabat to ak, tan siak kabat ko so Ama; et italagak so bilay ko nipaakar ed saray karnero.” Wala ta ni iray magmaong ya ehemplo tayo nipaakar ed maaron panangagamil na autoridad?—Salmo 23:1-3; Juan 10:14, 15.

[Blurb ed pahina 18]

Say panguusar nen Jehova ed pakapanyari to et lawas naspot a mitunosan ed inkahustisya, kakabatan, tan aro to

[Litrato ed pahina 18]

Walaray panaon a saray mamatatken so nepeg a maaron manimbawa ed saray nankasalanan

[Litrato ed pahina 19]

Sinimbawa nen Pablo si Timoteo ya onkiwas a singa galgalangen ya anak a laki tan sakey a manangiyansakit ya agi

[Litrato ed pahina 20]

Aagamilen nen Jesu-Kristo so autoridad to diad makabat, makatunongan, tan maaron paraan