Panon so Kamaong Yon Mitalosan?

“SULAT na Panangaro na Sakey a 60-Años.” Ontan so tema na sweepstakes a pakontis na sakey a bangko ed Hapon diad agano niran taon. Pinaseseg na satan iray Hapones a mantaon na 50 ya anggad 70 ya ibalikas day “tuan nalilikna” ra ed kaasawaan da. Oniay insulat na sakey ya akikontis parad akulaw to: “Nayarin onelek ka, balet pagbabawian ko no agko ibaga, kanian ibandok so naliliknak: Salamat ed impiasawam ed siak.”

Diad nanduruman kultura, laktip lay pigaran kultura ed Bukig, ag-ipapaseseg so bulos a panangibesngaw na sakey a too ed liknaan to. Ingen, masulok a 15,000 so akikontis ed satan a panggaway sulat na panangaro. Labalabay itan na karaklan kanian pinatumbokan itan na sakey nin pakontis, tan walaray libron impalapag ya imbase ed saratan a sulat. Ipapatnag na saya a diad utel na nonot tan puso na dakel a totoo, pirpirawat dan ibesngaw so nalilikna ra ed pabpablien dan asawa. Balet, aglabay na arum a gawaen itan. Akin? Nayarin lapud nakaukolan da so pirmin pansagpot tan dunong pian nipatalos da ed arum so nalilikna ra​—a singa diad asawa ra.

Si Hitoshi Kato, a nansulat na libro nipaakar ed panagretiro, so angikuan a diad limog na saray maedad lan sanasawa ed Hapon, dakel a kaso na panagdiborsio so igagapo na asawan bibii lapu ed nilamut a sakit na linawa ya inem-eman da diad loob na dakel a taon. “Balet,” inkuan to a “resulta met itan na agpangibabalikas na sanasawa ed liknaan da ed sakey tan sakey sano walay problema ra.”

Sano manretiro la ed trabaho so asawan laki, nayarin sikatoy nabigla sano iyawat ed sikato na akulaw to so abiso nipaakar ed diborsio. Diad loob na dakel a taon et agnantongtongan lagi na sanasawa so nalilikna ra ed sakey tan sakey. Maseguron nanggunaetan met na sanasawa ya  ibalikas so liknaan da balet agda nagagawaan a makapabiskeg so tongtongan da. Imbes a paeleten day relasyon da, sikara la ingen so mabetbet a mansangsangan.

Panon a naresolbe na sanasawa so agda pantatalosan diad mareen a paraan tan nipasabi so liknaan da diad makapaliket a paraan? Nayarin interesado kan makaamta a say pakaromogan na sankaepektiboan iran suhestion et aliwan diad agano nin libro na sakey a managkonseho ed panamaley, noagta diad sakey a kadaanan a libro a pigay siglo lan papablien​—say Biblia.