Say Kanepegan a Nawalaan na Ngaran

KANEPEGAN na balang too so nawalaan na ngaran. Diad Tahiti, anggan say inabandonan kapangiyanak ya ag-amta no siopay ama tan ina to so iikdan na ngaran. Say parehistroan so mangiiter na ngaran tan apelyido ed sakey ya inabandonan ugaw.

Balet, walay sakey a persona a nibaga tayon nisiblet ed sikato iyan manunan kanepegan, say kanepegan a nipapagamor ed amin lawarin totoo. Makapakelkelaw ta sikato so ‘Ama a panlalapuan na ngaran na balang pamilya a walad tawen tan dalin’! (Efeso 3:14, 15, Maung a Balita) Dakel a totoo so talagan agmalabay a mangusar ed ngaran na Manamalsa a walad Biblia. Mas labay dan salatan itan na saray titulo a singa say “Dios,” “say Katawan,” odino “say Magnayon a Sakey.” Anto sirin so ngaran to? Oniay inyebat na salmista ed satan a tepet: “Say ngaran mo a bukbukor et Jehova, Sankatageyan ka a manuna nen say amin a dalin.”​—Salmo 83:18.

Diad baetan na 1800 tan 1850 K.P. sanen sinmabi ed Tahiti iray misionaryo na London Missionary Society, pigaran dirios so pandadayewan la na saray Polynesian. Balang sakey ed saratan a dirios so walaan na ngaran, a say manuna ed saratan et si Oro tan Taaroa. Pian nibiig so Dios a sinalambit na Biblia manlapud arum a dirios, malaknab ya inusar na sarayan misionaryo so ngaran na Dios a nipatalos bilang Iehova ed salitan Tahitiano.

Satan a ngaran so akabkabat tan mabetbet ya inusar ed inagew-agew a pantotongtong tan korespondensia. Si Arin Pomare II na Tahiti, a nanuley ed asasakbay na koma-19 siglo, so naynay ya angusar ed satan diad saray personal a sulat to. Napatnagan itan diad sulat a nipanengneng dia. Nisulat itan ed Ingles, tan niparungtal diad Museum of Tahiti and Its Islands. Sayan sulat so mamaneknek a saray totoo so mabulos ya angusar ed ngaran na Dios diad saman a panaon. Niarum ni, say personal a ngaran na Dios so nilibon danay a pinmatnag diad inmunan bersion na Biblia a Tahitiano, ya akompleto nen 1835.

[Litrato ed pahina 32]

Arin Pomare II

[Picture Credit Line ed pahina 32]

Say ari tan sulat to: Collection du Musée de Tahiti et de ses Îles, Punaauia, Tahiti