‘Wala Ak ed Sikayo’
‘Wala Ak ed Sikayo’
‘Say imbaki nen Jehova insalita to so pabano nen Jehova ed baley, Siak wala ak ed sikayo, kuan nen Jehova.’—AGGEO 1:13.
1. Anton propesiya a walaay pipadparaan ed panaon tayo so tinukoy nen Jesus?
MANBIBILAY itayo ed makatantandan panaon ed awaran. Unong a papaneknekan na kasumpalan na propesiya na Biblia, manlapu la’d 1914 et manbibilay itayo la ed “agew na Katawan.” (Apocalipsis 1:10) Nayarin kabisado yo la iyan tema, kanian amta yon inkompara nen Jesus so “agew na Anak na too” a walad pakayari na Panarian dia ed “agew nen Noe” tan “agew nen Lot.” (Lucas 17:26, 28) Ipapabitar sirin na Biblia a saya so propesiyan walaay pipadparaan. Ingen, wala ni so sananey a pipadparaan a makanepegan na seryoson panangonsidera tayo.
2. Anton kimey so impagawa nen Jehova ed si Aggeo tan Zacarias?
2 Konsideraen tayo so sakey a situasyon ya agawa nensaman diad panaon na saray Hebreon propeta a di Aggeo tan Zacarias. Anto so mensahe na sarayan duaran matoor a propeta ya espisipikon onaplika ed totoo nen Jehova diad panaon tayo? Si Aggeo tan Zacarias so ‘mensaheros nen Jehova’ ed saray Judion pinmawil manlapud inkakautibo ra ed Babilonia. Sikaray ingganggan a paseguroan iray Israelita nipaakar ed pananulong na Dios diad pangipaalagey da lamet ed templo. (Aggeo 1:13; Zacarias 4:8, 9) Anggaman antikey labat iray libro ya insulat di Aggeo tan Zacarias, saratan so kabiangan na ‘amin a Sulat ya impuyan na Dios a maabig a pakaaralan, pakasumalan, pakasimbawaan, tan pakapanontonan a wala ed katunongan.’—2 Timoteo 3:16.
Importante Iratan ed Sikatayo
3, 4. Akin a nepeg a magmaliw itayon interesado ed saray mensahe di Aggeo tan Zacarias parad sikatayo?
3 Seguradon makagunggona iray mensahe nen Aggeo tan Zacarias ed saray Judio diad panaon da, tan saray impropesiya ra so awalaan na kasumpalan nensaman. Balet, akin a makaseguro itayo a sayan duaran libro so importante ed sikatayo natan? Naromog tayo so ebat diad Hebreos 12:26-29. Diad satan et angaon si apostol Pablo ed Aggeo 2:6, a manutukoy ed ‘panyegyeg na Dios ed tawen tan dalin.’ Diad kaunoran et satan a panagyegyeg so ‘mangigeba ed trono na saray panarian tan maneral ed biskeg na saray panarian na saray nasyon.’—Aggeo 2:22.
4 Diad impangaon nen Pablo ed Aggeo, imbaga to so nagawa ed “saray panarian na saray nasyon” tan impabitar toy inkatalonggaring na agnatenyeg a Panarian ya awaten na saray alanaan a Kristiano. (Hebreos 12:28) Natalosan yo ed saya a saray propesiya nen Aggeo tan Zacarias so mangipapabitar ed panaon a nagawa ni ed arapen sanen nisulat so libron Hebreos nen inmunan siglo na Komon a Panaon tayo. Wala nin siansia diad dalin so nakdaan na saray alanaan a Kristiano, a manawir ed Mesianikon Panarian a kaiba nen Jesus. Kanian say Aggeo tan Zacarias so walaan na kaimportantian ed panaon tayo.
5, 6. Anto so kipapasen sakbay a nampropesiya si Aggeo tan Zacarias?
5 Say libro nen Esdras so mangitatarya na maawaran ya impormasyon nipaakar ed satan. Sanen akapawil la iray Judio manlapud inkakautibo ra ed Babilonia nen 537 K.K.P., inwanwan di Gobernador Zorobabel tan say Atagey a Saserdote a si Josue (odino Jeshua) so panangiletneg na pundasyon na balon templo nen 536 K.K.P. (Esdras 3:8-13; 5:1) Anggaman lapuan itan na baleg a liket, agnambayag et tinmakot iray Judio. Unong ed si Esdras, saray kakabusol da, salanti, ‘say baley ed dalin so amakapuy ed saray lima na baley na Juda, tan ginonigon da ira ed panangipaalagey.’ Saratan a kakabusol, nagkalautla ed saray Samaritano, so palson angakusa ed saray Judio. Asagyat na saratan a sumusumpa so ari na Persia a mangisebel ed panagpaalagey ed templo.—Esdras 4:10-21.
6 Linmetey so inkagunaet da ed kimey ed templo. Inyapasakey na saray Judio so inkasikara ed personal a pankaabigan da. Balet, nen 520 K.K.P., 16 taon kayari na inkiletneg na pundasyon na templo, ingganggan nen Jehova si Aggeo tan Zacarias a mamaseseg ed totoo ya ituloy da so kimey ed templo. (Aggeo 1:1; Zacarias 1:1) Lapud saray Judio so pinabiskeg na saray mensahero na Dios tan awalaan ira na mapatnag ya ebidensya na pananulong nen Jehova, intuloy da so kimey ed templo anggad asumpal da itan nen 515 K.K.P.—Esdras 6:14, 15.
7. Say kipapasen ed panaon na saray propeta so walaan na anton pipadparaan ed modernon panaon tayo?
7 Amta yo kasi so kabaliksan na sayan amin parad sikatayo? Walaan itayo na kimey a sumpalen so panangipulong ed “ebanghelyo na panarian.” (Mateo 24:14) Nipurek so kaimportantian na satan a kimey kayari na Guerra Mundial I. No panon a nibulos iray Judio nensaman manlapud literal ya inkakautibo ra ed Babilonia, saray totoo nen Jehova ed panaon tayo so nibulos met ed Babilonia a Baleg, say sankamundoan ya empiryo na palson relihyon. Nanseet a maong iray nilanaan na Dios diad kimey a panagpulong, panagbangat, tan panangiwanwan ed totoo diad tuan panagdayew. Satan a kimey so mantutultuloy ni anggad natan diad mas malaknab a kipapasen, tan nayarin mibibiang kayo la ed satan. Natan la so panaon pian sumpalen itan, lapud asingsingger la so anggaan na sayan sistema na bengabengatla! Sayan kimey ya inter na Dios so nepeg a mantultuloy anggad onsalet si Jehova ed saray pakurang na totoo diad ‘baleg a kairapan.’ (Mateo 24:21) Satan so mangekal ed karelmengan tan nagnap lan niletneg so tuan panagdayew diad interon dalin.
8. Akin a makapanmatalek itayo ed pananulong na Dios ed kimey tayo?
8 Singa ipapabitar la na saray propesiya nen Aggeo tan Zacarias, makaseguro itayo ed pananulong tan panamendisyon nen Jehova legan a sigpot-puso itayon mibibiang ed sayan kimey. Anggaman ed saray sagpot na arum ya amperen iray lingkor na Dios odino sebelan so niganggan a kimey da, anggapo so gobierno a makaamper ed iyaaligwas na panag-ebanghelyon kimey. Isipen pa so impamendisyon nen Jehova ed kimey na Panarian diad inyaligwas na satan ed apalabas iran dekada kayari na Guerra Mundial I ya anggad panaon tayo. Ingen, wala ni so dakel a kimey a gawaen.
9. Anton kipapasen nensaman so nepeg tayon imanoen, tan akin?
9 Panon a say naaralan tayo ed Aggeo tan Zacarias so lalon managyat ed sikatayon ontulok ed madibinon ganggan a manpulong tan manbangat? Bueno, imanoen tayo pa so pigaran leksion a nayarin naaralan tayo ed sayan duaran libro na Biblia. Alimbawa, konsideraen tayo so pigaran detalye nipaakar ed kimey a panagpaalagey ed templo a kinaukolan a sumpalen na saray nipawil a Judio. Unong ya asalambit la, saray Judio a pinmawil ed Jerusalem manlapud Babilonia so agnansiansia ed kimey da diad templo. Kayari ran inletneg so pundasyon, sikara so kalkalnan tinmunda. Anton lingon panmoria so niwala ed limog da? Tan anto so naaralan tayo ed satan?
Pakawalaan na Suston Panmoria
10. Saray Judio so awalaan na anton lingon panmoria, tan anto so resulta?
10 Ibabaga na saray akapawil a Judio ya: “Aliwa nin panaon.” (Aggeo 1:2) Sanen ginapoan dan impaalagey so templo diad impangiletneg na pundasyon nen 536 K.K.P., agda imbagan “aliwa nin panaon.” Balet ag-abayag et impaapektoan ira ed isusumpa na saray nasyon a walad kabangibang da tan ed isasalet na gobierno. Saray Judio so ginmapon angiyuna ed dili ran kaabungan tan dilin pakainawaan da. No imanoen so pandumaan na saray abung dan dili ya inusaran na mararakep a tabla tan say agni asumpal a templo, oniay intepet nen Jehova: ‘Panaon ta a nipaakar ed sikayo so panayam ed saray abobedaan ya abung yo, leleg a sayan abung et mankibalatar?’—Aggeo 1:4.
11. Akin a kinaukolan a simbawaen nen Jehova iray Judio diad panaon nen Aggeo?
11 On, anguman so prayuridad na saray Judio. Imbes ya iyuna ra so gagala nen Jehova a pangipaalagey lamet ed templo, saray totoo na Dios so angiyapasakey na imano ra ed inkasikaran dili tan ed saray ayaman da. Apaulyanan la so kimey ed abung a panagdayewan ed Dios. Say salita nen Jehova a nikurit ed Aggeo 1:5 so amaseseg ed saray Judio a manmotektek odino ‘manisip ed saray dalan da.’ Imbaga nen Jehova ya umamengen tan dalepdepen da so gagawaen da tan nonoten da no panon iran naaapektoan na agda pangiyuuna ed panagpaalagey ed templo diad bilay da.
12, 13. Panon ya indeskribe na Aggeo 1:6 so situasyon na saray Judio, tan anto so kabaliksan na satan a bersikulo?
12 Unong a naisip yo la, saray Judio so apektadon mismo ed lingo iran prayuridad da? Imanoen pa so nipabitar a panmoria na Dios diad Aggeo 1:6: “Sikayo nantanem kayo na dakel, et daiset so niloob yo; mangan kayo, balet agkayo napesel; oninum kayo, balet agkayo napenek na inumen; mankawes kayo, balet anggapo so salimuot; et saman so makagamor na up-upa gamoran to so up-upa pian sikato so ’yan to ed supot a botbot.”
13 Saray Judio so walad dalin ya inter na Dios ed sikara, balet ag-itan manbubunga unong ed kaliktan da. Inkibot nen Jehova so panamendisyon to, unong ya impasakbay to la. (Deuteronomio 28:38-48) Lapud anggapoy pananulong to, saray Judio so nantanem na bini balet ta daiset so naani ra, ya aliwan magenap so tagano a mamesel ed sikara. Anggapoy maimeng iran kawes a nisulong da lapud anggapoy panamendisyon to ed sikara. Ompatnag ni ingen a say kuarta ya aromog da so niiyan ed supot a botbot, ya anggapoy gunggona na saray miuupa. Anto so kabaliksan na balikas ya: “Oninum kayo, balet agkayo napenek na inumen?” Seguradon agkabaliksan na satan a say pakabuanges et paneknek na panamendisyon na Dios lapud kokondenaen to so panagbuanges. (1 Samuel 25:36; Uliran 23:29-35) Imbes, satan a balikas so manutukoy ed impakaandi na panamendisyon na Dios ed saray Judio. Limitado labat so napawala ran alak, ya agmagenap pian nabuanges ira. Onia so patalos na Revised Standard Version ed Aggeo 1:6: “Oninum kayo, balet agkayon balot napenek.”
14, 15. Anton leksion so naaralan tayo ed Aggeo 1:6?
14 Say leksion a naaralan tayo nipaakar ed saray ayaman na saray Judio et aliwan say nipaakar ed desinyo odino dekorasyon na abung. Sakbay ira ya adestiero, binaat nen propeta Amos iray mayayaman ed Israel lapud “saray abung [da] a garing” tan lapud “saray dukolan [da] a garing.” (Amos 3:15; 6:4) Saray madekorasyon a kaabungan tan naarkosan iran muebles da et agnansiansia. Saratan so sinamsam na saray managsakop a kakabusol. Ingen ta pigaran taon ed saginonor, kayari na 70 a taon na inkadestiero ra, ag-itan nanmadmaran na dakel a totoo na Dios. Makaaral tayo met kasi ed satan? Matukoy no oniay itepet tayo ed inkasikatayo: ‘Diad tua, kaunongan so pamapasyak a mamarakep ed ayaman ko? Komusta met so nipaakar ed kaaruman lamet ya edukasyon a mamaaligwas ed sakey a karera, anggaman say panggawa ed satan et mangalay dakel a panaon diad loob na pigaran taon, a napaulyanan laray importantin aspekto na espiritual ya aktibidades ko?’—Lucas 12:20, 21; 1 Timoteo 6:17-19.
15 Say nabasa tayo ed Aggeo 1:6 so mamakiwas ed sikatayon manisip a nakaukolan tayoy panamendisyon na Dios ed bilay tayo. Ag-itan agamoran na saray Judio nensaman lapud ginawa ra. Balanglan walaan itayo na daakan a materyal a bengatla odino andi, satan so seguradon mangapektan maong ed espiritualidad tayo no agtayo nagamoran so panamendisyon nen Jehova. (Mateo 25:34-40; 2 Corinto 9:8-12) Ingen, panon tayon nagamoran itan a bendisyon?
Ontutulong si Jehova Panamegley na Espiritu To
16-18. Diad kipapasen nensaman, anto so kabaliksan na Zacarias 4:6?
16 Say kapara nen Aggeo a propeta, si Zacarias, so apuyanan a mangipabitar ed saray mismon paraan ya inusar nen Jehova pian pakiwasen tan bendisyonan iray debosyonado nensaman. Tan saya so mangipatnag no panon so pamendisyon to met ed sikayo. Oniay nabasa tayo: “Agnisengeg ed kabayanian, odino dia ed pakayari, noag ingen dia ed espirituk, kuan nen Jehova na saray ehersito.” (Zacarias 4:6) Nayarin mabetbet yon narengelan iyan inaon a bersikulo, balet anto so kabaliksan na satan parad saray Judio diad panaon nen Aggeo tan Zacarias, tan anto met so kabaliksan na satan parad sikayo?
17 Nonoten a say apuyanan iran salita nen Aggeo tan Zacarias so walaan na alay abig ya epekto ed saman a panaon. Say imbaga na saratan a duaran propeta so amabiskeg ed saray matoor a Judio. Inggapo nen Aggeo so manpropesiya diad komanem a bulan na 520 K.K.P. Nampropesiya si Zacarias diad komawalon bulan ed satan met a taon. (Zacarias 1:1) Unong a naimano yo la ed Aggeo 2:18, say impankimey ed pundasyon so magunaet ya intuloy ed komasiam a bulan. Kanian apakiwas iray Judio a mankimey, tan tinulok da si Jehova tekep na panagmatalek ed pananuporta to. Saray salita ed Zacarias 4:6 so manutukoy ed pananulong na Dios.
18 Sanen pinmawil iray Judio ed binalegan dan dalin nen 537 K.K.P., andian ira na puersa-militar. Anggaman kuan, sikaray sinalimbengan nen Jehova tan inwanwan to ira diad impanbaroy da manlapud Babilonia. Tan say espiritu to so angiwanwan ed saray pamaakaran sanen inggapo ran tampol so mankimey ed templo kayari na satan. Sanen inggapo ra lamet so mankimey ya impapuso, sikaray tinulongan to panamegley na masanton espiritu to.
19. Anton mabiskeg ya impluensya so dinaeg na espiritu na Dios?
19 Diad panamegley na nantutumbokan a waloran madibinon pasingawey, apaseguroan si Zacarias a si Jehova so walad dapag na totoo to a matoor a mangisumpal ed kimey diad templo. Say komapat a pasingawey a nikurit ed kapitulo 3, so mangipapabitar a si Satanas so aktibon mangaamper ed saray sagpot na saray Judio a manumpal ed kipaalagey na templo. (Zacarias 3:1) Seguradon ag-aliketan si Satanas ed anengneng ton panlilingkor na Atagey a Saserdote a si Josue ed biang na totoo diad balon templo. Anggaman aktibo so Diablo ya angamper ed saray Judio manlapud panangipaalagey ed templo, say espiritu nen Jehova so walaan na importantin betang ed impangekal ed saray babeng tan impamabiskeg ed saray Judio a mantutultuloy anggad nasumpal so templo.
20. Panon a tinmulong so masanton espiritu ed saray Judio pian nasumpal so linawa na Dios?
20 Ompatnag a singano walay abalbaleg a babeng na isusumpa, a nanlapud opisyales na gobierno ya akapangisebel ed kimey. Ingen, insipan nen Jehova a sayan singa “palandey” a babeng so naekal tan magmaliw a “sakey a patar.” (Zacarias 4:7) Tan ontan so agawa! Nansukimat si Arin Darius I tan nalmo toy orihinal a ganggan nen Ciro a nan-autorisa ed saray Judio a mangipaalagey lamet ed templo. Kanian inekal nen Darius so pananebel tan inautorisaan to a say kuarta manlapud kayamanan na ari so iter ed saray Judio pian ontulong ed saray gastos ed panagpaalagey. Agaylan makapakelaw ya inkauman na saray sirkumstansya! Wala kasi so betang na espiritu na Dios ed satan? Makaseguro itayo a wala. Asumpal so templo nen 515 K.K.P., diad komanem a taon na uley nen Darius I.—Esdras 6:15.
21. (a) Diad kadaanan iran panaon, panon a ‘niyegyeg na Dios so nasyones’ tan panon ya ompaway so “mabli iran bengatla”? (b) Anto so modernon-agew a kasumpalan na satan?
21 Diad Aggeo 2:5, pinanonotan na propeta iray Judio nipaakar ed impisipanan na Dios ed sikara diad Palandey Sinai sanen say ‘kapalandeyan so ayegyeg a mapalalo.’ (Exodo 19:18) Diad panaon nen Aggeo tan Zacarias, amawala si Jehova na sananey ya impanyegyeg, unong ya adeskribe ed piguratibon lenguahe na bersikulo 6 tan 7. Say inkalapagan a kipapasen na Empiryo na Persia so nagulo, balet say kimey ed templo so mantultuloy anggad nasumpal itan. Saray aliwan Judio, “saray mabli a bengatla na saray amin a nasyon,” so diad kaunoran et mangigloria ed Dios a kaiba na saray Judio diad satan a pasen na panagdayewan. Diad manunan kasumpalan ed panaon tayo, ‘niyegyeg na Dios iray nasyon’ diad panamegley na panagpulong tayo bilang Kristiano, tan say “mabli iran bengatla na amin a nasyon” so dinmagsa pian mandayew ed Dios a kaiba iray alanaan a nakdaan. On, saray alanaan tan saray arum a karnero so sankaiba natan a mamapano ed maglorian abung nen Jehova. Tekep na pananisia a tatalaranan na saratan a tuan managdayew so panaon sano ‘yegyegen nen Jehova so tawen tan dalin’ diad arum a pantalos. Nagawa itan ta pian nabagbag tan naupot so pakayari na saray panarian na saray nasyon.—Aggeo 2:22.
22. Panon a ‘nayegyeg’ iray nasyones, tan tekep na anton resulta, tan anto ni so nagawa?
22 Napapanonotan itayo nipaakar ed gulo ya agawa ed nanduruman aspekto ya inlitrato na “saray tawen, tan say dalin, tan say dayat, tan say amagaan a dalin.” Sakey lan bengatla et nibasileng si Satanas a Diablo tan saray demonyo to diad kaliberliber na dalin. (Apocalipsis 12:7-12) Niarum ni, say panangipulong ya idadaulo na saray nilanaan na Dios so talagan nanyegyeg ed mangaraldalin iran elemento na sayan sistema na saray bengatla. (Apocalipsis 11:18) Anggaman ed satan, say “baleg ya ulop” na saray makaparoyroyon bengatla na amin a nasyones so akibiang ed espiritual ya Israel diad panaglingkor ed si Jehova. (Apocalipsis 7:9, 10) Say baleg ya ulop so mankikimey a kaiba na saray alanaan a Kristiano diad panangipulong ed maong a balita a magano lan yakayaken na Dios so nasyones diad Armagedon. Lapud satan a nagawa, say tuan panagdayew so magmaliw lan nagnap diad interon dalin.
Kasin Natandaan Yo?
• Kapigan tan diad antoran sirkumstansya a nanlingkor si Aggeo tan Zacarias?
• Panon yon niyaplika so mensahe ya impasabi nen Aggeo tan Zacarias?
• Akin a makapaseseg ed sikayo so Zacarias 4:6?
[Tepetepet Parad Panagaral]
[Saray litrato ed pahina 20]
Papaseguroan itayo na saray sulat nen Aggeo tan Zacarias nipaakar ed pananulong na Dios
[Litrato ed pahina 23]
‘Panaon ta a nipaakar ed sikayo so panayam ed saray abobedaan ya abung yo, leleg a sayan abung et mankibalatar?’
[Litrato ed pahina 24]
Mibibiang so totoo nen Jehova pian sabien ‘iray mablin bengatla na saray nasyon’