Ag-ontatakot​—Si Jehova so Walad Sikayo!

MASULOK lan 50 a taon so apalabas, kayarin tuloy na primeron insabog na bomban nuklear, say sientistan analo na Nobel Prize a si Harold C. Urey so nankomento nipaakar ed arapen, a kuan to: “Sikatayo so mangan ed takot, onugip ed takot, manbilay ed takot tan ompatey ed takot.” Natan et talagan dakel lay pakatatakotan ed mundo tayo, tan agpankelawan itan! Inagew-agew ya ibabalita na saray peryodiko iray makapakebbiew a report nipaakar ed terorismo, maramsak a krimen, tan agnipaliwawa iran sakit.

Bilang Kristiano et amta tayo lay kabaliksan na saratan a kipapasen. Ipapatnag na saratan a manbibilay itayo la ed “saray kaunoran ya agew” na sayan marelmeng a sistema, ya impasakbay na Biblia a pakabidbiran na “saray panaon a maatap [a mairap a pidenengan].” (2 Timoteo 3:1) Diad ontan et napabiskeg so kompiyansa tayo a magano lan itarok nen Jehova a Dios so sakey a balon mundo a panayaman na inkatunong. (2 Pedro 3:13) Balet, legan itayon manaalagar ed satan, kasin ag-itayo la makalikna na takot?

No Anto so Panmoria na Saray Lingkor na Dios ed Itatakot

Si Jacob, David, tan Elias so pigara ed saray lingkor nen Jehova ya akalikna na takot sanen nidunget ira ed kaatapan. (Genesis 32:6, 7; 1 Samuel 21:11, 12; 1 Arari 19:2, 3) Aliwan makapuy so pananisia na sarayan lalaki. Imbes, sikaray angipatnag na agnagiing a panagmatalek ed si Jehova. Anggaman kuan, si Jacob, David, tan Elias et totoo met; kanian sikaray tinmakot met. “Si Elias sakey a too a nitalaga ed ontan lan kairapan a singa sikatayo,” so insulat nen babangatan a Santiago.​—Santiago 5:17.

Nayarin ontalaw itayo met sano nodnonoten tayo so subok a kipapaarapan tayo natan odino say nayarin nagawa ed sikatayo diad arapen. Natural labat itan ya itatakot. Diad tua, ibabagan mismo na Biblia a si Satanas a Diablo so determinadon ‘mibakal’ ed saramay “manguunor ed ganggan na Dios, tan wala ed sikara so impantasi nen Jesus.” (Apocalipsis 12:17) Anggaman saray alanaan a Kristiano so espisipikon kiyaplikaan na saratan a salita, nansulat si Pablo: “Amin so saray malabay a manbilay ed sinasanto ed Kristo Jesus, manako’ra naani pamasegsegang.” (2 Timoteo 3:12) Siansia ni, nepeg ya ag-itayo padaeg ed takot sano wala iray problema tayo. Akin?

Say ‘Dios na Kililiktar’

Oniay insulat nen salmistan David: “Say Dios, onkana ed sikatayo, a Dios na kiliktar.” (Salmo 68:20) Aminpiga lan impatnag nen Jehova so pakayari ton mangiliktar ed totoo to, balanglan diad pangiliktar to ed mapeligro iran kipapasen odino diad pangiter to ed sikara na biskeg pian makapansungdo. (Salmo 34:17; Daniel 6:22; 1 Corinto 10:13) Diad panaaral yo na Biblia, pigara ed saratan a ‘panangiliktar’ so nanonotan yo?

Diad pangusar ed Watch Tower Publications Index, * akin ya agmansukimat nipaakar ed saray ebenton peteg ya agawa, a singa say sankagloboan a Delubio ed panaon nen Noe, say inkiliktar nen Lot tan saray mamarikit to manlapud Sodoma tan Gomorra, say Impaway na Israel manlapud Ehipto tan say imbeltang da ed Ambalangan Dayat, odino say naamper a pakana nen Haman a pamalanit ed saray Judio? Say pambasa tan pandalepdep ed sarayan makapainteres a salaysay so mamabiskeg ed pananisia yo a si Jehova et sakey a Dios na kililiktar. Tan saya met so ontulong ed sikayon mangarap ya andi-takot ed saray subok ed pananisia yo.

Saray Alimbawa ed Modernon Panaon

Wala ta iray nanonotan yo diad lugar yo a  mangipapatnag natan na alimbawa nipaakar ed panagsungdo? Nayarin wala so sakey a nipriso lapud katooran to ed Dios. Nayarin walay kabat yo a maedad lan Kristiano a manlilingkor ni ed si Jehova anggaman maletey lay bunigas to. Odino nonoten pa iray kalangweran a mansiasiansian biig ed mundo anggaman dedesdesen iran maong na kaeskuelaan da. Wadtan met iray mansusulon atateng, a bukbukor day mamapabaleg ed ananak da, odino saray andian na asawa a manlilingkor ed si Jehova anggaman begtebegtew ira. Anto so naaralan yo ed sikara? Say pandalepdep ed panmamatoor da so makatulong ed sikayo a mansungdo tan mansiansian andi-takot antokaman iray subok ya onsabi ed sikayo.

Nakaukolan so inkakpel, aliwa labat a no nidunget itayo ed isusumpa tan panamasegsegang, noagta no panduaruwaan tayo met la so panangaro nen Jehova ed sikatayo. Kaukolan tayoy nawalaan na kompiyansa a say dondon nen Kristo et onaaplika ed kada sakey ed sikatayo. (Galacia 2:20) Diad ontan et makaasingger itayo ed si Jehova ya andian na agmatukoy ya itatakot odino itatalaw. No liknaen tayo ya ag-itayo makanepegan ed panangaro nen Jehova, nayarian tayon dalepdepen iray imbalikas nen Jesus ed saray patumbok to: “Agta nalako so duaran anuyaw ed sakey a kuarta? Et ag napelag naani sakey ed sikara ed dalin no agyabuloy nen Ama yo. Et anggan saray buek na ulo yo abilang ira ya amin. Agkayo antakot sirin; ta mamabli kayo nen saray amayamay ya anuyaw.”​—Mateo 10:29-31.

Saray magasin a Panag-Bantayan tan Awake! so mabetbet a mangipapalapag na saray eksperiensya na saray Tasi nen Jehova ed modernon-panaon ya andi-takot ya angarap ed saray subok. Agkabaliksan na satan ya anggapoy alikna ran negatibo nipaakar ed asagmakan da. Balet agda inabuloyan iratan a liknaan a mamatunda ed sikara a manlingkor ed si Jehova. Saray nipalapag ya eksperiensya ra so makatulong ed sikayo pian makapansungdo met ya andi-takot. Konsideraen so duaran alimbawa.

Anguman so Bilay To Sanen Arisgo

Lugan na Abril 22, 2003 a paway na Awake! so artikulon “How an Injury Changed My Life.” Insalaysay ditan nen Stanley Ombeva, sakey ed saray Tasi nen Jehova ed Kenya, iray subok ya inarap to lapud impakatalapos ed sikato na mapmaples a luganan. Lapud inkapuy na bunigas to, sikatoy naandian na trabaho tan amin a benepisyo. “Legan kon namomoria so inkagrabe na kipapasen ko,” so inaksobi nen Brother Ombeva diad salaysay to, “nagmaliw ak a negatibo, say dilik labat so nononoten ko, tan mainomay ak a naalipanesan. No maminsan et mapaspasnok tan abusado ak.” Anggaman ed paniirap to, sayan Kristiano so nansiansian makpel. Agto inabuloyan so pakakadismaya a manaeg tan sigpot a mamatunda ed sikato. Imbes, sikatoy nanmatalek ed si Jehova. “Sikatoy lawas tinmulong ed siak ed amin ya asagmakan ko​—a sobra lan maong itan kanian nababaingan ak la ingen ed inkasiak no maminsan,” so inkuan nen Brother Ombeva. “Nansesegan kon maong so pambasa tan pandalepdep ed saray kasulatan ya amtak a makaligliwa ed siak.”

Saray prangkan komento nen Brother Ombeva so akatulong ed dakel nira pian makpel a makapansungdo ed saray subok. “Akanangis ak sanen abasak iyan artikulo,” so insulat na sakey a Kristianon agin bii. “Pakaliknak a diad sayan artikulo et impatnag nen Jehova so aralem tan maaron panangiyansakit to tan nanligliwa ed siak.” Oniay insulat na sananey nin Tasi: “Saray artikulo a singa saya so makapaseseg a tuloy ed sikatayo ra a makakaeksperiensya na pareho iran situasyon tan maniirap ingen ta agmanrereklamo.

Pansungdo ed Kagogonigon na Liknaan

Say sananey nin makapatenyeg ya eksperiensya et samay nipaakar ed si Herbert Jennings, a  nisalaysay diad artikulon “You Do Not Know What Your Life Will Be Tomorrow.” * Sinungdoan nen Brother Jennings so sakit a bipolar disorder. Diad pannononot to ed kipapasen to sanen kagapogapo ni na sakit to, oniay inkuan to: “Mair-irap parad siak so anggan iyatendi ed Makristiano iran pantitipon. Anggaman ontan, siak so kombinsidon tuloy ed kablian na espiritual a panlilimog. Pian makapansungdo ak, kaslakan et onloloob ak ed Kingdom Hall sano akayurong lan amin so totoo tan onaalis ak la antis iran manbubuyak kayari na programa.”

Mairap met so panagpulong. “No maminsan, anggan wala ak la ed sakey ya abung, anggapo so pakpel ko anggan say pangitelmer labat ed doorbell,” so insalaysay nen Brother Jennings. “Balet, agak onsuko lapud amtak a say ministeryo tayo et mankabaliksan na kilalaban tayon mismo tan ed siopaman ya ondengel ed sikatayo. (1 Timoteo 4:16) Kabebekta et nakontrol ko la’d satan so emosyon ko tan onla ak lamet ed sananey a puerta pian mitongtong. Diad impantultuloy kon akibiang diad ministeryo, apansiansiak so maabig a bunigas ed espiritual, tan lalon atulongan ak a makapansungdo.”

Say matuan salaysay nen Brother Jennings so akatulong ed dakel a managbasa a mangarap ed saray pakakadetdetan da tekep na parehon inkakpel. Alimbawa, oniay insulat na sakey a Kristianon agin bii: “Siak so 28 a taon lan manbabasa na saray magasin a Panag-Bantayan tan Awake!, balet natan ak labat atenyeg a maong sanen babasaen ko iyan artikulo. Nakokonsiensia ak lapud kinaukolan kon itunda so sigpot-panaon a panaglingkor ko, a liknaen ko ya agak komon tinmunda no mabisbiskeg so pananisiak. Sanen abasak no panon a kinaukolan nen Brother Jennings ya itunda so asainmin to pian asikasoen so sakit to, atulongan ak a moriaen so situasyon ko diad asimbang a paraan. Talagan saya so ebat ed saray pikakasik!”

Ontan met, oniay insulat na sakey a Kristianon agin laki: “Kayari na samploy taon ya impanlingkor ko bilang matatken ed kongregasyon, kinaukolan kon ikbanan so pribilehyok lapud sakit ko ed mental. Liknaen ko ya anggapo lay kakanaan ko, kanian lanang ya onkakapuy ak sano nababasak iray artikulo ya istorya na bilay a mabetbet a mangisasalaysay ed saray makapakelaw a nagagawaan na totoo nen Jehova. Balet say impantepel nen Brother Jennings so amabiskeg ed siak. Aminpigak a binasa iyan artikulo.”

Mantultuloy a Manlingkor Tekep na Kompiyansa

Singa si Brother Ombeva tan Jennings, dakel ed saray Tasi nen Jehova so mantutultuloy a manlilingkor ed si Jehova a Dios ya andi-takot anggaman ed mairap iran subok. No sakey ka ed sikara, nakomendaan ka. Tandaan: “Say Dios aliwan agmatunong pian nalingwanan to so gawa yo tan say aro ya impanengneng yo ed ngaran to, ed impanulong yo ed saray sasanto ed saray pankaukolan da, tan ed panutulong yo ni natan ed sikara.”​—Hebreos 6:10.

No panon a tinulongan nen Jehova iray matoor a totoo to nensaman pian natalo da iray kalaban da, tulongan to ka met a makatalona ed antokaman a subok a kipaarapan mo. Sirin, ipapuso iray salita ya imbalikas nen Jehova panamegley nen propetan Isaias: “Agka antakot, ta wala ak ed sika, agka napagaan, ta siak so Dios mo; pabiskegen ta ka naani; on, tulongan ta ka: on, ampayaen ta ka ed nikawanan a lima na inkatunong ko.”​—Isaias 41:10.

[Saray paimano ed leksab]

[Saray litrato ed pahina 16]

Singa si Stanley Ombeva (tagey) tan Herbert Jennings (nikawanan), dakel so manlilingkor ed si Jehova ya andi-takot

[Picture Credit Line ed pahina 14]

USAF photo