Aligen so Ehemplo nen Jesus tan Ipatnag so Panangiyansakit ed Saray Pobri

NGALNGALIN kabansag na katooan so inkiwala na kairapan tan panagmaltrato. Anggaman ginetma na samay Ganggan ed Israel a protektaan iray pobri tan nabawasan so paniirap da, mabetbet ya agnatutumbok so Ganggan. (Amos 2:6) Kinondena na propetan si Ezequiel so paraan na katratrato ed saray pobri odino duka. Inkuan to: “Saray totoo ed dalin inagamil da so panangapos tan inagamil da so panagtakew; on, pinaermen da so duka tan naukolan, tan inaposan da ya ag-onkatunongan so sankaili.”​—Ezequiel 22:29.

Anggapoy pidumaan na kipapasen sanen wadiad dalin si Jesus. Saray papangulo na relihyon et agbalot angipatnag na panangiyansakit ed saray mairap-bilay tan mankaukolan. Indeskribe iray papangulo na relihyon bilang ‘maaro ed kuarta’ a “mangakmon ed saray abung na saray bibii a balo” tan mas interesado nira ed pamasiansia ed tradisyon da nen say pangasikaso ed saray maedad la tan mankaukolan. (Lucas 16:14; 20:47; Mateo 15:5, 6) Makapainteres, diad samay parabolo nen Jesus nipaakar ed maong a Samaritano, nilabasan na sakey a saserdote tan Levita so anengneng da ed dalan ya abogbog a laki, a pinaliisan da ni imbes a dagoen da komon a tulongan.​—Lucas 10:30-37.

Impatnag nen Jesus so Panangiyansakit ed Saray Pobri

Ipapanengneng na saray salaysay na Ebanghelyo nipaakar ed bilay nen Jesus a natatalosan ton maong iray paniirap na saray pobri tan sankatebek to iray pankaukolan da. Anggaman sikatoy nanayam ed tawen, nilukpos toy espiritun laman to, nankinon too, tan ‘nagmaliw a duka  nisesengeg ed sikatayo.’ (2 Corinto 8:9) Sanen anengneng nen Jesus so dakerakel a totoo, “inabagey to ra, lapud maermen ira tan abuybuyak ira, a singa saray karnero ya anggapoy pastol da.” (Mateo 9:36) Ipapanengneng na salaysay nipaakar ed samay mankaukolan a balo a say akasagyatan nen Jesus et aliwan say angkabaleg a donasyon na saray mayaman ya ‘angipelag na saray nansulokan da,’ noag say melmelag a donasyon na pobrin balo. Atenyeg so puso nen Jesus ed satan lapud ‘dia ed kakulangan to, impelag to so amin a pantagano a wala ed sikato.’​—Lucas 21:4.

Si Jesus so aglambengat akalikna na panangabagey ed saray pobri, noagta sikatoy walaan met na personal ya interes ed saray pankaukolan da. Sikato tan saray apostol to so walaan na pundon pangaalaan day iiter da ed saray mankaukolan ya Israelita. (Mateo 26:6-9; Juan 12:5-8; 13:29) Pinaseseg nen Jesus iramay labay day magmaliw a patumbok to a mamidbir ed obligasyon dan ontulong ed saray mankaukolan. Oniay inkuan to ed sakey a malangwer a mayaman a manuley: “Ilakom so amin a wala ed sika, et yutob mo ed saray duruka, et wala naani kayamanan mo ed tawen; et gala, tumboken mo ak.” Lapud masuyat imay laki a mangitalirak ed saray kayamanan to, impatnag ton mas inaro to iray kayamanan to nen say Dios tan say kapara ton too. Sirin, sikatoy andian na saray kalidad a nakaukolan ed pagmaliw a babangatan nen Jesus.​—Lucas 18:22, 23.

Mangiyaansakit ed Saray Pobri Iray Papatumbok nen Kristo

Kayari impatey nen Jesus, saray apostol tan arum niran papatumbok to so nantultuloy ya angipatnag na panangiyansakit ed saray pobri odino mairap-bilay diad limog da. Nen manga 49 K.P., say apostol a si Pablo so akinengnengan ed si Santiago, Pedro, tan Juan tan intongtong to ed sikara so ganggan a pangipulong ed maong a balita a naawat to manlapud Katawan a Jesu-Kristo. Nampaknaan dan si Pablo tan si Bernabe so onla ed “saray Gentiles,” tan iyapasakey to ed saratan so panagpulong to. Balet, si Pablo tan Bernabe so pinaseseg nen Santiago tan saray kakaiba to ‘a pakanonoten da iray duka.’ Tan ontan so ‘nansesegan dan ginawa.’​—Galacia 2:7-10.

Legan na uley nen Emperador Claudius, niwalay eras ed nanduruman parte na Romanon Empiryo. Bilang polaing, ‘nannonongan [na saray Kristiano ed Antioquia], unong ed nayarian na sinansakey, so mangipawit na payabol ed saray agagin manaayam ed Judea. A sikato met so ginawa ra ya impawit ed saray mamasiken ed panamegley na lima nen Bernabe tan Saulo.’​—Gawa 11:28-30.

Bibidbiren met na saray tuan Kristiano natan a saray papatumbok nen Jesus et nepeg a mangipatnag na panangiyansakit ed saray mairap-bilay tan mankaukolan, nagkalautla ed limog na saray kapananisiaan da. (Galacia 6:10) Kanian, sikaray mangipapatnag na peteg a kapagaan ed materyal a pankaukolan na saray andian da. Alimbawa nen 1998, sinalot na pirmin kelang so baleg a kabiangan na mamaamianen-sagur na Brazil. Pinerde na satan iray pagey, buke-bukel, tan mais a nanresulta ed pinasyan eras​—say sankagrabian la ed loob na 15 a taon. Diad arum a pasen, anggan say nainum a danum et makisir. Saray Tasi nen Jehova ed arum a parte na Brazil so tampol ya angorganisa na saray komite parad pananulong, tan agnambayag, akatipon ira na toni-toniladan tagano tan binayaran daray gastos ed pangipawit ed saratan.

Onia so insulat na saray Tasin sinmuporta ed gagawaen a pananulong: “Malikeliket kami ta akatulong kami ed saray agagi mi, nagkalalo la  lapud segurado kamin apaliket mi so puso nen Jehova. Agmin balot lilingwanan iray salita ed Santiago 2:15, 16.” Oniay inkuan na saratan a bersikulo ed Biblia: “No sakey ya agin laki o bii nalakseban tan naandian iray kanen da ed agew-agew. Et sakey ed sikayo ikuan to ed sikara: Onla kayo la ed kareenan, naimengan tan napesel kayo komon; anta agyo iter ed sikara so bengatla ya antokaman a kaukolan na laman: Anto so gunggona ra?”

Diad sakey a kongregasyon na saray Tasi nen Jehova ed syudad a São Paulo, sakey a mapaabeba tan maseseg a Tasin mairap ed materyal so mabetbet a mantalikarkar pian nasaliw labat iray manunan nakaukolan ed bilay. Inkuan to: “Anggaman mairap ak, say mensahe na Biblia so talagan angiter na kabaliksan ed bilay ko. Agko amta no anto lay agawa ed siak no agak tinulongan na saray kaparak a Tasi.” Diad apalabas et kinaukolan na sayan makulin Kristianon bii so manpa-opera balet ta agto sarag a bayaran so bili na satan. Diad sayan partikular ya inkagawa et walad kipapasen iray agagin Kristiano ed kongregasyon pian salipotpotan so gastos ed operasyon to. Gagawaen na saray tuan Kristiano ed sankamundoan so panangitarya na tulong ed saray kapananisian da a mankaukolan.

Balet, anggaman ontan lan makapaligsay puso iratan ya eksperiensya, malinew a say ontan iran masimoon a sagpot et agmakapangekal ed kairapay-bilay. Anggaman anggan panon et wala met so nagagawaan na saray makapanyarin gobierno tan angkabaleg iran internasyonal ya ahensia parad pananulong, agda napaandi so abaybayag lan problema a kairapay-bilay. Kanian, oniay tepet, Anton solusyon so seguradon mamaandi ed kairapay-bilay tan arum niran problema a manasalot ed katooan?

Mangitatarya na Magnayon a Tulong Iray Bangat na Biblia

Isasalaysay na Ebanghelyo a si Jesu-Kristo so maparanay a nanggawa na kaabigan ed saramay pobri odino walaan na arum nin nakaukolan. (Mateo 14:14-21) Balet, anton kimey so prayuridad to? Diad sakey ya inkagawa, kayari ton tinulongan iramay mankaukolan, inkuan nen Jesus ed saray babangatan to: “Onla itayo ed anggan iner a pasen ed saray ontumbok a balbaley, pian manpulong ak met diman.” Akin ya intunda nen Jesus so gagawaen ton panutulong ed saray mansasakit tan mankaukolan pian nituloy so panagpulong a kimey to? Oniay impaliwawa to: “Ta linma ak dia lapu ed sayan getma [salanti, pian manpulong].” (Marcos 1:38, 39; Lucas 4:43) Anggaman importante ed kinen Jesus so panggawa na kamaongan ed saray totoon mankaukolan, say manunan misyon to et say pangipulong ed Panarian na Dios.​—Marcos 1:14.

Lapud ipapaseseg na Biblia ed saray Kristiano so maapit ‘a panumbok ed bakat [nen Jesus],’ saray Kristiano natan so walaan na malinew iran giya nipaakar ed panangiletneg na saray prayuridad dia ed panggugunaet dan tulongan so arum. (1 Pedro 2:21) Singa si Jesus, tutulongan da ray totoon mankaukolan. Bangbalet, singa met si Jesus, manunan prayuridad da so kimey a pangibangat ed mensahe na Biblia nipaakar ed maong a balita na Panarian na Dios. (Mateo 5:14-16; 24:14; 28:19, 20) Balet, akin a say pangipulong ed mensahen naromog ed Salita na Dios so nepeg ya iyuna nen say arum nin paraan na pananulong ed arum?

 Ipapanengneng na saray tudtuan eksperiensya ed interon mundo a sano natalosan tan tumboken na totoo so praktikal a bilin na Biblia, mas lalo iran akaparaan a mangarap ed inagew-agew iran problema ed bilay, laktip lay kairapan na bilay. Niarum ni, say mensahe na Biblia a Panarian na Dios ya ipupulong na saray Tasi nen Jehova natan so mangiiter ed totoo na ilalo ed arapen​—ilalon gawaen ton mas makabaliksan so bilay, anggaman ed saray mairap a tuloy iran kipapasen. (1 Timoteo 4:8) Anto itan ya ilalo?

Oniay impaseguro na Salitay Dios nipaakar ed arapen: “Unong ed sipan [na Dios] alagden tayo so saray tawen a balo tan dalin a balo, a sikara so panayaman na katunongan.” (2 Pedro 3:13) Sano ibabaga na Biblia so “dalin,” say tutukoyen na satan no maminsan et saray totoon manaayam ditan. (Genesis 11:1) Kanian say matunong a ‘balon dalin’ ya insipan ya onsabi et sakey a sosyedad na totoo ya aabobonan na Dios. Insipan ni na Biblia a diad uley nen Kristo, saramay aabobonan na Dios so makaawat na tumang ya andi-anggaan a bilay tan manbilay ira ed kapenek dia ed paraison dalin. (Marcos 10:30) Satan ya alay-abig ya arapen et lukas ed amin, pati ed saray pobri. Diad satan a ‘balon dalin,’ sigpot lan nasolbar so kairapay-bilay.

[Kahon/Litrato ed pahina 7]

PANON YA ‘ILIKTAR NEN JESUS IRAY NAUKOLAN’ ODINO POBRI?—Salmo 72:12

HUSTISYA: “Sikato ukomen to so makabos na saray katooan, sikato ilaban to so saray anak na naukolan, tan betagbetagen to so saray manamairap.” (Salmo 72:4) Legan na uley nen Kristo ed dalin, makagamor so amin na hustisya. Agnaabuloyan so inkakurakot, say salot a sengegan na paniirap na dakel a bansan mayaman la komon.

KAREENAN: “Dia ed saray agew to say matunong manaligwas, tan say inkadaakan na kareenan, angga ed kaandi na bulan.” (Salmo 72:7) Maslak a kairapan ed mundo et resulta na balingaan na totoo tan say guerra. Itarok nen Jesus so naspot a kareenan ed dalin, sirin et naandi met la so sakey ed saray manunan sengegan na kairapay-bilay.

PANANGABAGEY: “Sikato ilagak [odino, abageyen] to so makabos tan naukolan, tan ilaban to so kamarerwa na naukolan. Sikato dondonen to so kamarerwa ra a yarawi ed panamalingo tan panamasoot; et mabli naani dala ra ed mata to.” (Salmo 72:12-14) Saray mapaabeba, pobri tan namamaltrato so magmaliw a kabiangan na saksakey a pamilya na katooan, a nankakasakey ed silong na pananguley na Arin Jesu-Kristo.

INKADAAKAN: “Wala so daakan ya ilik ed tapew na dalin.” (Salmo 72:16) Kaleganay uley nen Kristo, napenek so amin ed inkadaakan na materyal. Agmanirap iray totoo ed kakulangay tagano tan eras a mabetbet iran pansesengegan na kairapan na bilay natan.

[Litrato ed pahina 4, 5]

Si Jesus so walaan na personal ya interes ed pankaukolan na saray pobri

[Litrato ed pahina 6]

Say mensahe na Biblia et mangiiter na peteg ya ilalo